Khaolo ea 20
Na U Batla ho ba oa Pele Kamehla?
NA U tseba motho ea itseng eo kamehla a batlang hore e be eena oa pele?— A ka ’na a sutumetsa batho ba bang e le hore e be eena oa pele moleng. Na u kile ua bona seo se etsahala?— Mosuoe e Moholo o ile a bona esita le batho ba baholo ba ipatla libakeng tse ka pele, kapa tsa bohlokoa. ’Me ha aa ka a rata seo. A re ke re bone hore na ho ile ha etsahala’ng.
Bibele e re Jesu o ne a menngoe moketeng ka tlung ea Mofarisi, eo e neng e le moeta-pele ea hlomphehang oa bolumeli. Ha Jesu a fihla, a qala ho shebella ha baeti ba bang ba kena ’me ba ikhethela libaka tsa bohlokoa. Kahoo a phetela ba menngoeng pale. Na u ka rata ho e utloa?—
Jesu o ile a re: ‘Ha motho a u mema moketeng oa lenyalo, u se ke ua khetha sebaka sa bohlokoa, kapa se hlaheletseng.’ Na ua tseba hore na ke hobane’ng ha Jesu a ne a cho joalo?— O ile a hlalosa hore mohlomong ho menngoe motho e mong oa bohlokoa. Kahoo, joalokaha u ka bona setšoantšong mona, mong’a mokete oa tla ’me o re: ‘E-re motho enoa a fumane sebaka sena, ’me uena e-ea mane.’ Joale moeti eo o ne a tla ikutloa joang?— O ne a tla ikutloa a soabile hobane baeti ba bang bohle ba ne ba tla be ba mo shebile ha a isoa sebakeng se sa hlahellang.
Jesu o ne a bontša hore ho fosahetse ho batla libaka tse phahameng. Kahoo o ile a re: ‘Ha u memiloe moketeng oa lenyalo, e-ea ’me u lule sebakeng se tlaase-tlaase. Joale motho ea u memileng a ka ’na a tla ’me a re, “Motsoalle, nyolohela holingoana.” Joale baeti ba bang bohle ba tla u hlompha ha ba bona u e-ea sebakeng se molemo.’—Luka 14:1, 7-11.
Na u utloisisitse ntlha eo Jesu a neng a e hlahisa paleng ee?— A re etse mohlala ho bona haeba u e utloisisitse. Ha re nke hore u palama bese le batho ba bang ba bangata. Na u lokela ho mathela setulong ebe motho e moholo eena o ema ka maoto?— Na Jesu o ne a ka rata ha u etsa joalo?—
Motho e mong a ka ’na a re Jesu ha a tsotelle hore na re etsa’ng. Empa na ua e lumela taba eo?— Ha Jesu a ne a le moketeng ka tlung ea Mofarisi, o ile a shebella ha batho ba ikhethela litulo. Na ha u nahane hore le kajeno o ntse a thahasella ho bona se etsahalang feela joaloka nakong eo?— Kaha hona joale Jesu o leholimong, ka sebele o re bona hantle.
Ha motho a batla ho ba oa pele, seo se ka baka mathata. Hangata ho ba le likhang ’me batho baa koata. Ka linako tse ling sena se etsahala ha bana ba il’o palama bese. Hang feela ha monyako oa bese o buleha, bana ba bang ba mathela hore ba kene pele. Ba batla ho lula litulong tse botleng, tse pel’a lifensetere. Ho ka ’na ha etsahala’ng?— E, ba ka ’na ba koatisana.
Ho batla ho ba oa pele ho ka baka mathata a mangata. Ho ile ha bakela baapostola ba Jesu bothata. Joalokaha re ithutile Khaolong ea 6 ea buka ena, ba ile ba phehisana khang ka hore na ke mang e moholo har’a bona. Jesu o ile a etsa’ng?— E, o ile a ba khalemela. Empa hamorao ba ile ba boela ba phehisana khang. A re ke re bone hore na e ile ea qala joang.
Baapostola ba ne ba tsamaea le batho ba bang ba e-ea motseng oa Jerusalema ka lekhetlo la ho qetela ba e-na le Jesu. Jesu o ne a ntse a bua le bona ka ’Muso oa hae, joale Jakobo le Johanne ba ne ba ntse ba nahana ka taba ea ho busa le eena e le marena. Ba ile ba ba ba bolella ’mè oa bona, Salome, ka taba ena. (Matheu 27:56; Mareka 15:40) Kahoo ha ba le tseleng e eang Jerusalema, Salome o ile a ea ho Jesu, a khumama ka pel’a hae, ’me a mo kōpa hore a mo etsetse ho itseng.
Jesu a mo botsa: “U batla’ng?” A re o kōpa hore Jesu a lulise bara ba hae haufi le eena ’Musong oa hae, e mong ka letsohong la hae le letona e mong ka ho le letšehali. U nahana hore baapostola ba bang ba leshome ba ile ba ikutloa joang ha ba utloa seo Jakobo le Johanne ba itseng ’mè oa bona a se kōpe?—
E, ba ile ba halefela Jakobo le Johanne haholo. Kahoo Jesu a fa baapostola bohle ba hae keletso e bohlale. Jesu a re babusi ba lichaba ba rata ho phahamisoa le ho nkoa e le ba bohlokoa. Ba batla maemo a holimo ao ho ’ona bohle ba tlang ho ba hlompha. Empa Jesu a re balateli ba hae bona ha baa lokela ho ba joalo. Ho e-na le hoo, Jesu a re: ‘Mang kapa mang ea batlang ho ba oa pele har’a lōna e lokela ho ba lekhoba la lōna.’ Ak’u nahane seo!—Matheu 20:20-28.
Na ua tseba hore na mosebetsi oa lekhoba ke ho etsa’ng?— Ke ho sebeletsa batho ba bang, le sa lebella hore bona ba le sebeletse. Le lula sebakeng se ka morao, eseng ka pele. Le itšoara joaloka mohlanka, eseng joaloka khosi. Hopola hore Jesu o itse ea batlang ho ba oa pele o lokela ho ba joaloka lekhoba la ba bang.
Joale, u nahana hore seo se bolela’ng ho rōna?— Na lekhoba le ka ngangisana le mong’a lona ka hore na ke mang ea lokelang ho lula setulong se hlaheletseng? Kapa na le ka tseka hore na ke mang ea lokelang ho ja pele? Uena u re’ng?— Jesu o ile a hlalosa hore kamehla lekhoba le emela mong’a lona pele hore a etse lintho.—Luka 17:7-10.
Kahoo ho e-na le hore re batle ho ba ba pele, re lokela ho etsa’ng?— E, re lokela ho ba joaloka makhoba ho ba bang. ’Me seo se bolela hore re lokela ho etelletsa lithahasello tsa ba bang pele. Ho bolela hore re nke ba bang e le ba bohlokoa ho re feta. Na u ka nahana ka litsela tse ling tseo u ka etelletsang lithahasello tsa ba bang pele ka tsona?— Ak’u khutlele leqepheng la 40 le la 41 ’me u boele u shebe litsela tse ling tseo u ka etelletsang lithahasello tsa ba bang pele ka tsona ka ho ba sebeletsa.
U tla hopola hore Mosuoe e Moholo o ile a etelletsa lithahasello tsa ba bang pele ka ho ba sebeletsa. Bosiung ba ho qetela ha a ne a e-na le baapostola ba hae, o ile a ba a khumama ’me a ba hlatsoa maoto. Haeba le rōna re etelletsa lithahasello tsa ba bang pele ka ho ba sebeletsa, re tla thabisa Mosuoe e Moholo le Ntate oa hae, Jehova Molimo.
A re ke re bale litemana tse ling tsa Bibele tse re khothalletsang ho etelletsa lithahasello tsa ba bang pele: Luka 9:48; Baroma 12:3; le Bafilipi 2:3, 4.
[Setšoantšo se leqepheng la 107]
Na u kile ua bona batho ba batla ho ba ba pele?
[Litšoantšo tse leqepheng la 108, 109]
Jesu o ne a ruta thuto efe ha a ne a bua ka batho ba lulang litulong tse hlaheletseng, kapa tse ka pele?
[Setšoantšo se leqepheng la 110]
Salome o kōpa Jesu hore a etse’ng, ’me hoo ho fella ka eng?