‘Lefatšeng, Joaloka Leholimong’

“Tumelo e K’hatholike e qaqisa Lintho Tse ’Nè Tsa ho Qetela ka hore ke: Lefu, Kahlolo, Lihele le Leholimo.”—Catholicism, e hlophisitsoeng ke George Brantl.

HLOKOMELA hore letotong lena la Lintho Tse ’Nè Tsa ho Qetela tseo moloko oa batho o ka ’nang oa talimana le tsona, lefatše ha lea akarelletsoa. Sena ha se makatse ho hang hobane Kereke e K’hatholike, joaloka malumeli a mang a mangata, e lumela hore lefatše le tla timetsoa ka letsatsi le leng. Buka e bitsoang Dictionnaire de Théologie Catholique e hlakisa sena sehloohong se reng “End of the World [Bofelo ba Lefatše]”: “Kereke e K’hatholike ea lumela ebile e ruta hore lefatše la hona joale, kamoo Molimo a le bōpileng kateng le kamoo le leng kateng, le ke ke la e-ba teng ka ho sa feleng.” Katekisima ea morao tjena ea Kereke e K’hatholike le eona e na le maikutlo ana: “Lefatše la rōna . . . le reretsoe hore le fele.” Empa haeba le tla fela, ho tla etsahala joang ka litšepiso tsa Bibele tsa hore ho tla ba le paradeise lefatšeng?

Bibele e bua ka ho hlakileng hore nakong e tlang ho tla ba le paradeise lefatšeng. Ka mohlala, moprofeta Esaia o ile a hlalosa lefatše le baahi ba lona ka tsela ena: “Ka sebele ba tla haha matlo ’me ba lule ho ’ona; ka sebele ba tla lema lirapa tsa morara ’me ba je litholoana tsa tsona. Ba ke ke ba haha ’me e mong a lule teng; ba ke ke ba lema ’me e mong a je. Etsoe matsatsi a sechaba sa ka a tla ba joaloka matsatsi a sefate; ’me bakhethoa ba ka ba tla sebelisa mosebetsi oa matsoho a bona ka botlalo.” (Esaia 65:21, 22) Bajuda bao Molimo a ileng a ba tšepisa lintho tsena, ba ne ba kholisehile hore ka letsatsi le leng naha ea bona—ha e le hantle, lefatše lohle—e tla ba paradeise e tla tsoela moloko oa batho molemo ka ho sa feleng.

Pesaleme ea 37 e tiisa tšepo ena ka ho re: “Ba bonolo ba tla rua lefatše.” (Pesaleme ea 37:11) Temana ena ha e bue feela ka nakoana e khutšoanyane eo ka eona sechaba sa Iseraele se ileng sa khutlisetsoa Naheng e Tšepisitsoeng. Pesalemeng eona eo ho totobatsoa se latelang: “Ba lokileng ba tla rua lefatše, ba tla lula ho lona ka ho sa feleng.” (Pesaleme ea 37:29)a Hlokomela hore pesaleme ena e bolela hore moputso oa “ba bonolo” e tla ba ho phela ka ho sa feleng lefatšeng. Bibeleng e ’ngoe ea Sefora, tlhaloso ea temana ena e bolela hore lentsoe “bonolo” le na le moelelo o batsi ho feta kamoo ho bonahalang kateng liphetolelong; le akarelletsa ba malimabe, ba mahlomoleng kapa ba hlorisoang ka lebaka la Yahweh, e leng ba ikokobeletsang Molimo.”

Lefatšeng Kapa Leholimong?

Thutong ea Thabeng, Jesu o ile a etsa tšepiso e re hopotsang mangolo a qotsitsoeng ka holimo: “Ho lehlohonolo ba bonolo; hobane ba tla ja lefa la lefatše.” (Matheu 5:5, Bibele ea Sesotho) Lefatše e sa ntse e tla ba moputso oa ka ho sa feleng oa ba tšepahalang. Leha ho le joalo, Jesu o ile a hlakisetsa baapostola ba hae hore o ne a tla ba lokisetsa sebaka “ka tlung ea Ntate [oa hae]” le hore ba ne ba tla ba le eena leholimong. (Johanne 14:1, 2; Luka 12:32; 1 Petrose 1:3, 4) Ebe joale re lokela ho utloisisa joang litšepiso tsa hore ho tla ba le mahlohonolo lefatšeng? Na e sa ntse e le tsa bohlokoa kajeno, hona li sebetsa ho bo-mang?

Litsebi tse fapa-fapaneng tsa Bibele li bolela hore “lefatše” leo ho buuoang ka lona Thutong ea Thabeng esita le ho Pesaleme ea 37 hase lefatše la sebele. Tlhalosong ea hae bukeng e bitsoang Bible de Glaire, litemaneng tsena F. Vigouroux o ile a bona “tšoantšetso ea leholimo le Kereke.” Mofuputsi e mong oa Bibele oa Lefora ea bitsoang M. Lagrange eena o ile a bona hore tlhohonolofatso ena hase “tšepiso ea hore ba bonolo ba tla rua lefatše leo ba phelang ho lona, ebang ke tsamaisong ea hona joale kapa taolong e phethahetseng ho feta ena, empa tšepiso ena e bolela hore ba bonolo ba tla rua sebaka, leha e ka ba kae kapa kae, seo e leng ’muso oa maholimo.” Mofuputsi e mong eena o re ke “tsela ea tšoantšetso ea ho sebelisa lintho tsa lefatšeng ha ho buuoa ka lintho tsa leholimong.” Bafuputsi ba bang ba Bibele bona ba re: “Naha e tšepisitsoeng, ea Kanana, ke ntho ea tšoantšetso ’me e emela naha eo e leng hae leholimong, e leng ’muso oa Molimo, oo ba bonolo ba tiiselitsoeng hore ba tla o rua. Sena ke sona se boleloang ke tšoantšetso ena e ho Pesaleme ea 37 le libakeng tse ling.” Empa na re lokela ho potlakela ho qhela taba ea hore Molimo o bua ka lefatše la sebele?

Morero oa ka ho sa Feleng Bakeng sa Lefatše

Tšimolohong, lefatše le ne le amana ka ho toba le morero oa Molimo bakeng sa batho. Mopesaleme o ile a ngola a re: “Ha e le maholimo, ke maholimo a Jehova, empa lefatše o le file bara ba batho.” (Pesaleme ea 115:16) Kahoo, morero oa pele oa Molimo bakeng sa moloko oa batho o ne o amana le lefatše, eseng leholimo. Jehova o ile a fa batho ba babeli ba pele mosebetsi oa ho atolosa serapa sa Edene hore se tlale lefatše. (Genese 1:28) Morero ona e ne e se oa nakoana. Jehova o tiisa ka Lentsoeng la hae hore lefatše le tla ba teng ka ho sa feleng: “Moloko oa ea, ’me moloko oa tla; empa lefatše le eme esita le ho isa nakong e sa lekanyetsoang.”—Moeklesia 1:4; 1 Likronike 16:30; Esaia 45:18.

Ha ho mohla litšepiso tsa Molimo li fellang sebakeng, hobane ke Ea Phahameng ka ho Fetisisa, ’me o tiisa hore lia phethahala. Bibele e sebelisa mohlala oa se etsahalang ka metsi ha e hlalosa hore joang kapa joang litšepiso tsa Molimo li tla phethahala, ’me e re: “Feela joalokaha pula e tšolohang, le lehloa, li theoha maholimong ’me li sa khutlele sebakeng seo, ntle le hore li nosetse lefatše ’me li etse hore le be le lihlahisoa ’me le hlomele, . . . le lentsoe la ka [lentsoe la Molimo] le tsoang molomong oa ka le tla ba joalo. Le ke ke la khutlela ho ’na le se na litholoana, empa ka sebele le tla etsa seo ke se thabelang, ’me ka sebele le tla atleha ho seo ke le rometseng sona.” (Esaia 55:10, 11) Molimo o etsetsa batho litšepiso. Ho ka ’na ha feta nako e itseng pele litšepiso tseo li phethahala, empa ha li felle sebakeng. Li “khutlela” ho eena li phethahalitse sohle seo a se buileng.

Ha ho pelaelo hore Jehova o ile a ‘thaba’ ha a ne a bōpela batho lefatše. Qetellong ea letsatsi la botšelela la pōpo, o ile a bolela hore ntho e ’ngoe le e ’ngoe e “molemo haholo.” (Genese 1:31) Ho fetoloa ha lefatše lohle hore e be paradeise ea ka ho sa feleng ke karolo ea morero oa Molimo o e-s’o phethahale. Leha ho le joalo, litšepiso tsa Molimo ‘li ke ke tsa khutlela ho eena li se na litholoana.’ Litšepiso tsohle tsa hore ho tla ba le bophelo bo phethahetseng lefatšeng, moo batho ba tla phela ka ho sa feleng ka khotso le tšireletseho, li tla phethahala.—Pesaleme ea 135:6; Esaia 46:10.

Morero oa Molimo o Phethahala Ntle ho Tika-tiko

Sebe sa batsoali ba rōna ba pele, e leng Adama le Eva, se ile sa kena-kenana ka nakoana le morero oa pele oa Molimo oa ho etsa lefatše paradeise. Ka mor’a ho se mamele Molimo, ba ile ba lelekoa serapeng sa Edene. Kahoo, ba ile ba lahla monyetla oa ho ba le karolo ea ho phethahatsa morero oa Molimo oa hore batho ba phethahetseng ba lule paradeiseng lefatšeng. Leha ho le joalo, Molimo o ile a etsa litokisetso tsa hore a phethahatse morero oa hae. O ile a etsa seo joang?—Genese 3:17-19, 23.

Se etsahetseng Edene se ne se tšoana le se etsahallang motho ea qalang ho haha ntlo setšeng se botleng. Feela moo a reng o rala motheo, ho fihla motho e mong ea senyang motheo oo. Ho e-na le hore a tlohele ho haha, monna enoa o nka mehato e tiisang hore ntlo eo ea ahuoa. Le hoja mosebetsi ona o neng o sa reroa o tla eketsa litšenyehelo, ha ho pelaelo hore morero oa pele oa ho haha ntlo eo o ne o loketse.

Ka tsela e tšoanang, Molimo o ile a etsa litokisetso tsa ho tiisa hore morero oa hae oa phethahala. Kahoo, kapele feela ka mor’a sebe sa batsoali ba rōna ba pele, o ile a fa bana ba bona tšepo—e leng “peō” e neng e tla etsolla tšenyo e entsoeng. Ha ho phethahatsoa boprofeta bona, ho bonahetse hore karolo e ka sehloohong ea peō eo ke Mora oa Molimo, Jesu, ea ileng a tla lefatšeng eaba o fana ka bophelo ba hae e le sehlabelo hore a rekolle moloko oa batho. (Bagalata 3:16; Matheu 20:28) Ha Jesu a tsoselitsoe leholimong, e ne e tla ba Morena oa ’Muso. Ha e le hantle, Jesu ke eena ea bonolo ea jang lefa la lefatše hammoho le bakhethoa ba tšepahalang ba tsosetsoang leholimong hore ba il’o busa le eena ’Musong ona. (Pesaleme ea 2:6-9) Ka nako e tšoanetseng, ’muso ona o tla laola litaba tsa lefatše e le hore o phethahatse morero oa pele oa Molimo le hore o fetole lefatše paradeise. Boieane ba batho ba bonolo bo “tla ja lefa la lefatše” ka kutloisiso ea hore bo tla rua molemo pusong ea ’Muso ona oa Jesu Kreste le ba busang le eena.—Genese 3:15; Daniele 2:44; Liketso 2:32, 33; Tšenolo 20:5, 6.

‘Lefatšeng, Joaloka Leholimong’

Poloko ena e isang batho libakeng tse peli, e leng ho ea phela leholimong le ho phela lefatšeng, e boleloa ponong e ileng ea bonoa ke moapostola Johanne. O ile a bona marena a lutseng literoneng tsa leholimo a neng a khethiloe har’a barutuoa ba tšepahalang ba Kreste. Bibele e bolela ka ho toba mabapi le metsoalle ena ea Kreste hore ‘e tla busa e le marena holim’a lefatše.’ (Tšenolo 5:9, 10) Hlokomela likarolo tse peli tse phethahatsang morero oa Molimo—e leng lefatše le tsosolositsoeng le laoloang ke ’Muso oa leholimo oo litho tsa oona e leng Jesu Kreste le majalefa-’moho le eena. Litokisetso tsena tsa Molimo kaofela li bula tsela ea hore qetellong ho tsosolosoe Paradeise ea lefatšeng tumellanong le morero oa pele oa Molimo.

Thapelong ea Jesu ea mohlala, o ile a kōpa barutuoa ba hae hore ba rapelle hore thato ea Molimo e etsoe ‘lefatšeng, joaloka leholimong.’ (Matheu 6:9, 10) Na mantsoe aa a ne a tla be a utloahala haeba lefatše le ne le ka senngoa kapa haeba le ne le tšoantšetsa leholimo? Ka ho tšoanang, na a ne a tla be a utloahala haeba bohle ba lokileng ba ne ba e-ea leholimong? Thato ea Molimo ka lefatše e boletsoe ka ho hlaka ka Bibeleng, ho tloha tlalehong ea pōpo ho fihlela liponong tse bukeng ea ho qetela ea Bibele, e leng Tšenolo. Lefatše le tla ba seo Molimo a se rerileng, e tla ba paradeise. Ke eona thato eo Molimo a tšepisang hore o tla e phetha. Ba tšepahalang ba lefatšeng ba rapella hore thato eo e phethahale.

Morero oa pele oa ’Mōpi, eena Molimo ‘ea sa fetohang,’ e ne e le hore ho be le bophelo bo sa feleng lefatšeng. (Malakia 3:6; Johanne 17:3; Jakobo 1:17) Ka lilemo tse fetang 100, makasine ena ea Molula-Qhooa, e ’nile ea hlalosa likarolo tsena tse peli tse phethahatsang morero oa Molimo. Sena se re fa monyetla oa ho utloisisa litšepiso tse ka Bibeleng tsa hore lefatše le tla tsosolosoa. Re u khothalletsa hore u hlahlobe taba ena ho ea pele, ka ho buisana le Lipaki Tsa Jehova kapa ka ho iteanya le bahatisi ba makasine ena.

[Mongolo o botlaaseng ba leqephe]

[Setšoantšo se leqepheng la 4]

Bibele e bolela ka ho hlaka hore nakong e tlang ho tla thehoa Paradeise lefatšeng

[Setšoantšo se leqepheng la 7]

Na thapelo ea Jesu ea mohlala e ne e tla be e utloahala haeba lefatše le ne le ka senngoa?