’Muso oa Molimo ke Eng?

“Litaba tsena tse molemo tsa ’muso . . .”—MATHEU 24:14.

THUTONG ea hae e tummeng ea Thabeng, Jesu o ile a etsa thapelo ea mohlala e akarelletsang kōpo ena ho Molimo: “’Muso oa hao o ke o tle.” Batho ba limilione ba tšoere thapelo eo ka hlooho ’me ba e pheta-pheta hangata. Ho latela encyclopedia e ’ngoe, ena ke “thapelo e ka sehloohong e etsoang ke Bakreste bohle ha ba rapela.” Leha ho le joalo, ba bangata ba phetang thapelo ena ka hlooho ha ba tsebe hore na ’Muso oo ke eng kapa hona hore na o tlil’o etsa’ng ha o fihla.—Matheu 6:9, 10.

Seo ha se makatse. Baeta-pele ba malumeli a ipitsang a Bokreste ba hlalosa hore na ’Muso ke eng ka litsela tse fapa-fapaneng, tse ferekanyang le tse rarahaneng. E mong o re ’Muso oa Molimo ke “ntho e phahametseng tlhaho, . . . ntho e itseng e ka har’a motho e mo kopanyang le Molimo . . . , ho tseba Molimo ka tsela e tla etsa hore banna le basali ba pholohe.” E mong eena o hlalosa kosepele e buang ka ’Muso e le “thuto e buang ka kereke.” Athe Catechism of the Catholic Church eona e re: “’Muso oa Molimo [ke] ho loka le khotso le thabo ka Moea o Halalelang.”

U tla fumana tlhaloso e hlakileng haholoanyane leqepheng la 2 la makasine ena. Eona e re: “’Muso oa Molimo, oo e leng puso ea sebele e leholimong, o tla tloha o felisa bokhopo bohle ’me o fetole lefatše paradeise.” A re hlahlobe hore na Bibele e tšehetsa kutloisiso eo joang.

Babusi ba ka Moso ba Lefatše Lohle

’Muso ke puso e tsamaisoang ke morena. Morena oa ’Muso oa Molimo ke Jesu Kreste ea tsositsoeng bafung. Ho behoa ha hae teroneng e leholimong ho ile ha hlalosoa ponong e ileng ea fuoa moprofeta Daniele, ea ileng a ngola a re: “Ka ’na ka talima liponong tsa bosiu, ’me, bonang! e mong ea joaloka mor’a motho [Jesu] o ne a tla ka maru a maholimo; a kena ho Moholo-holo oa Matsatsi [Jehova Molimo], ’me a atametsoa ka pel’a Hae. A fuoa bobusi le ho hlompheha le ’muso, hore batho, lichaba le lipuo kaofela ba mo sebeletse. Bobusi ba hae ke bobusi bo hlolang ka nako e sa lekanyetsoang bo ke keng ba feta, ’me ’muso oa hae ke o ke keng oa senngoa.”—Daniele 7:13, 14.

Buka ea Bibele ea Daniele e boetse e bontša hore Molimo o tla theha ’Muso oo ka tsela e tsitsitseng le hore o tla felisa mebuso eohle ea batho, ’me oona o ke ke oa tlosoa ke o mong. Khaolo ea 2 e hlalosa toro e bululetsoeng eo morena oa Babylona a ileng a ba le eona, eo ho eona a ileng a bona setšoantšo se seholo, se neng se emela mebuso ea lefatše e neng e tla latellana. Moprofeta Daniele o ile a hlalosa toro eo. O ile a ngola: “Karolong e qetellang ea matsatsi, . . . Molimo oa leholimo o tla emisa ’muso o ke keng oa senngoa le ka mohla. ’Muso oo o ke ke oa fetisetsoa ho batho leha e le bafe ba bang. O tla silakanya o felise mebuso ena kaofela, ’me o tla ema ho isa linakong tse sa lekanyetsoang.”—Daniele 2:28, 44.

Morena oa ’Muso oa Molimo ha a buse a le mong. Ha Jesu a sa le lefatšeng, o ile a tiisetsa baapostola ba hae ba tšepahalang hore bona, hammoho le ba bang, ba ne ba tla tsosetsoa leholimong ’me ba ne ba tla lula literoneng. (Luka 22:28-30) Jesu o ne a sa bue ka literone tsa sebele, etsoe o bontšitse hore ’Muso o ne o tla ba leholimong. Bibele e hlalosa hore bana ba tlang ho busa le eena ba tsoa “molokong o mong le o mong le lelemeng le leng le le leng le bathong ba bang le ba bang le sechabeng se seng le se seng.” E tla ba “’muso le baprista ho Molimo oa rōna, ’me ba tla busa e le marena holim’a lefatše.”—Tšenolo 5:9, 10.

Lebaka Leo Litaba Tsa ’Muso li Leng Molemo

Hlokomela hore Kreste Jesu o filoe matla a ho busa “batho, lichaba le lipuo” kaofela ’me ba neng ba sebetsa le eena ba tla “busa e le marena holim’a lefatše.” Joale ke bo-mang bao e tla ba bafo ba ’Muso oo? Ke ba amohelang litaba tse molemo tse boleloang kajeno. Bafo bao ba akarelletsa ba tla tsosoa bafung ba tlil’o phela lefatšeng ba bile ba e-na le tšepo ea ho phela ka ho sa feleng.

Bibele e hlalosa ka ho hlakileng hore na batho ba tla fumana litlhohonolofatso joang ’Musong oo. Tse seng kae tsa tsona ke tsena:

“O felisa lintoa ho isa pheletsong ea lefatše. O roba seqha ’me o robakanya lerumo; o chesa likoloi mollong.”—Pesaleme ea 46:9.

“Ka sebele ba tla haha matlo ’me ba lule ho ’ona; ka sebele ba tla lema lirapa tsa morara ’me ba je litholoana tsa tsona. Ba ke ke ba haha ’me e mong a lule teng; ba ke ke ba lema ’me e mong a je.”—Esaia 65:21, 22.

“[Molimo] o tla hlakola meokho eohle mahlong a bona, lefu ha le sa tla hlola le e-ba teng, ’me ho siama kapa ho bokolla kapa bohloko ha li sa tla hlola li e-ba teng. Lintho tsa pele li fetile.”—Tšenolo 21:3, 4.

“Ka nako eo mahlo a lifofu a tla tutuboloha, ’me litsebe tsa ba sa utloeng litsebeng li tla buleha. Ka nako eo ea holofetseng o tla tlōla joalokaha khama e tona e tlōla, ’me leleme la ea sa khoneng ho bua le tla hooa ka nyakallo.”—Esaia 35:5, 6.

“Hora ea tla eo ka eona bohle ba mabitleng a khopotso ba tla utloa lentsoe la hae [Jesu] ’me ba tsoe, ba entseng lintho tse molemo ba ee tsohong ea bophelo.”—Johanne 5:28, 29.

“Ba bonolo ba tla rua lefatše, ka sebele ba tla fumana thabo e phethehileng khotsong e ngata.”—Pesaleme ea 37:11.

Ka sebele tseo ke litaba tse monate! Ho feta moo, boprofeta ba Bibele bo phethahetseng bo bontša hore nako e se e le haufi ea hore ’Muso oo o tlise puso ea oona e lokileng lefatšeng lohle.

Litaba Tse Molemo ke Eng?

“Litaba tsena tse molemo . . .”—MATHEU 24:14.

BAKRESTE ba lokela ho bolella ba bang “litaba tse molemo tsa ’muso,” ba ba hlalosetse hore ’Muso oo ke puso e tla ba teng lefatšeng nakong e tlang, e tla busa lefatše ka toka. Empa poleloana “litaba tse molemo” e boetse e sebelisoa ka litsela tse ling ka Bibeleng. Ka mohlala, ho na le moo ho buuoang ka “litaba tse molemo tsa poloko” (Pesaleme ea 96:2); “litaba tse molemo tsa Molimo” (Baroma 15:16); le “litaba tse molemo mabapi le Jesu Kreste.”—Mareka 1:1.

Ka mantsoe a bonolo feela, litaba tse molemo li akarelletsa ’nete eohle eo Jesu a ileng a bua ka eona le eo barutuoa ba hae ba ileng ba ngola ka eona. Pele Jesu a nyolohela leholimong, o ile a bolella balateli ba hae: “Ka hona e-eang ’me le etse batho ba lichaba tsohle barutuoa, le ba kolobetse ka lebitso la Ntate le la Mora le la moea o halalelang, le ba rute ho boloka lintho tsohle tseo ke le laetseng tsona.” (Matheu 28:19, 20) Ka hona, mosebetsi oa Bakreste ba ’nete hase feela ho bolella ba bang ka ’Muso; ba boetse ba lokela ho leka ho etsa barutuoa.

Likereke li etsa joang tabeng ee? Tse sa utloisiseng hore na ’Muso ke eng—etsoe li ngata—li sitoa ho ruta ba bang se nepahetseng ka oona. Ho e-na le hoo, li ruta lintho tse kang ho tšoareloa libe le ho ba le tumelo ho Jesu, tseo li tsebang hore li thabisa bamameli. Hape li hohela batho ka ho etsa mesebetsi e thusang sechaba kapa ho haha lipetlele, likolo le mahae a mafutsana. Le hoja liketso tse joalo li ka bitsa batho ba bangata hore e be litho tsa kereke, ha li etse hore batho e be Bakreste ba ’nete bao ka tieo ba batlang ho phela tumellanong le seo Jesu a se rutileng.

Setsebi se seng sa thuto ea bolumeli se re: “Litsebi le baeta-pele ba bangata ba likereke tsa Bokreste baa lumela hore re lokela ho etsa batho barutuoa kapa liithuti tsa Jesu le ho ba ruta lintho tsohle tseo Jesu a li rutileng. . . . Taelo ea Jesu tabeng ena e hlakile. Re mpa re sa etse seo a re laetseng sona. Ha re iteke ho le hokaalo. Hape ho bonahala re sa tsebe hore na re lokela ho etsa seo joang.”

Ka tsela e tšoanang, phuputso e entsoeng ho Mak’hatholike a United States e bontšitse hore batho ba etsang karolo ea 95 lekholong baa lumela hore ho ruta litaba tse molemo ke ntho eo ba lokelang ho e etsa tumelong ea bona. Leha ho le joalo, hoo e ka bang kaofela ha bona ba nka hore tsela e molemo ea ho etsa seo hase ka ho bua ka tsona, empa ke ka ho phela ka tsela e tla behela ba bang mohlala. E mong oa bao ho ileng ha etsoa phuputso ho bona, o itse: “Ho bolela evangeli ho fapane le ho bua mantsoe feela a mangata. Rōna ka borōna re lokela ho ba Litaba Tse Molemo.” Makasine ea U.S. Catholic, eo e neng e le eona e neng e etsa liphuputso tseo, e re ba bangata ba leqe ho bolella ba bang ka tumelo ea bona ka lebaka la “botumo bo bobe boo kereke ea bona e nang le bona morao tjena ba mahlabisa-lihlong a ho hlekefetsa ka thobalano le lithuto tse ling tsa kereke tse fanang ka mathata.”

Sebakeng se seng, mobishopo oa Methodiste o ile a tletleba ka hore litho tsa kereke ea hae li arohile likoto li bile li na le lintho tse li ferekantseng, ka hona ha li na sebete sa ho phetha thomo ea tsona, etsoe li iphelela feela joaloka batho ba bang ba sa keneng kereke. A utloahala a tsielehile, o ile a botsa: “Joale ke bo-mang ba phethang boikarabelo ba ho bolela kosepele ea ’Muso?”

Mobishopo ha aa ka a araba potso eo ea hae. Empa karabo eona e teng. U tla e fumana sehloohong se latelang.

[Ntlha e Qolotsoeng e leqepheng la 6]

Litaba tse molemo li mabapi le ’Muso oa Molimo le poloko ka ho lumela ho Jesu Kreste