Khaolo ea 15
Ke Hobane’ng ha U Tsotella Batho ba Bang?
1. (a) Ke eng e entseng hore batho ba bangata ba ikhoantlelle ’me ba se ke ba ameha haholo ka batho ba bang? (b) Phello e bile efe?
HO AMEHA ho se nang boithati ka batho ba bang hoa haella kajeno. Le hoja e mong le e mong a tsoaloa a e-na le lerato ka tekanyo eitseng, ha ba bang ba ipatlela katleho ea bona kapa ha boiteko ba motho ba ho bontša lerato bo sa utloisisoe, motho a ka ’na a etsa qeto ea hore ho molemo hore a ikhoantlelle. Ba bang, ha ba bona ba tlatlapang batho ba bang ba atleha linthong tse bonahalang, ba ka ’na ba nahana hore ke eona tsela e isang katlehong. Phello ke hore batho ba bangata ba na le moea oa ho se tšepe batho ba bang ’me ba na le metsoalle e seng mekae ea sebele, haeba ba e-na le eona. Ke eng ho ikarabellang ka boemo bona bo bosula ba litaba?
2. (a) Bibele e tsebahatsa motso oa bothata joang? (b) Ho tseba Molimo ho bolela eng?
2 Lerato lea haella, lerato la mofuta o iponahatsang ka kameho e tiileng bakeng sa boiketlo ba kamehla ba ba bang. Hona ke hobane’ng ha le haella? Ha e fihla motsong oa bothata bona, Bibele e re: “Ea se nang lerato ha a tsebe Molimo, kaha Molimo ke lerato.” (1 Johanne 4:8, TLP) Ha e le hantle, batho ba bangata ba ipatlang ba bolela hore ba lumela ho Molimo ’me ba bile ba kena kereke. Empa ’nete ke hore ha ba hlile ha ba tsebe Molimo. Ho tseba Molimo ho bolela ho tloaelana hantle le botho ba oona, ho lemoha borena ba oona, le ho sebetsa tumellanong le seo re se tsebang ka oona. (Jeremia 22:16; Tite 1:16) Kahoo, he, ho fumana thabo ea ’nete bophelong e tlang feela ha motho a bontša lerato le ho le amohela, re tlameha ho tseba Molimo hantle le ho sebelisa seo re ithutang sona.
3. Molimo o bonahalitse lerato la oona le leholo bakeng sa batho joang?
3 Moapostola Johanne o ile a ngola: “Lerato la Molimo ho rōna le bonahetse ka hona: Molimo o romile lefatšeng Mora oa oona ea tsoetsoeng a le mong, re tle re phele ka eena. Lerato le bonahala hona moo hoba hase rōna ba ratileng Molimo [pele], empa e le oona o re ratileng, ’me o romile Mora oa oona hore e be pheko ea libe tsa rōna. Baratuoa, ha e le moo Molimo o re ratile joalo, le rōna e ka khona re ratane.” (1 Johanne 4:9-11) Molimo ha o-oa ka oa lumella hore boitšoaro bo se nang lerato ba batho bo sitise lerato la oona. Joalokaha ho boletsoe ho Ba-Roma 5:8: “Moo Molimo o totisitseng lerato la oona ho rōna teng, ke ka hore, re sa le baetsalibe, Kreste o bile a shoa sebakeng sa rōna.”
4. Hoo ho u etsa hore u ikutloe joang ka Molimo?
4 Ke batho ba bakae bao u ba ratang hoo u neng u ka ba tella bophelo ba hao—batho bao ho seng letho leo ba kileng ba u etsetsa lona? Haeba u motsoali, ke mang eo u ka utloisisang hore ngoana oa hao a mo shoele? Ke lerato la mofuta o joalo leo Molimo o re bontšitseng lona. (Johanne 3:16) Ho tseba see ho u etsa hore u ikutloe joang ka Molimo? Haeba kannete re ananela seo o se entseng, re tla fumana hore ha ho boima ho utloa melao ea oona.—1 Johanne 5:3.
5. (a) “Molao o mocha” oo Jesu a o fileng barutuoa ba hae ke ofe? (b) Boinehelo ba rōna ho Molimo e le morena bo ameha joang ho oona? (c) Joale ho utloa ‘molao ona o mocha’ ho hloka eng?
5 Bosiung ba pele ho lefu la hae, Jesu o ile a nea barutuoa ba hae o mong oa melao eo. O ne o tla ba tsebahatsa e le ba khethehileng lefatšeng ka kakaretso. O itse: “Ke le nea molao o mocha, ke hore le ratane.” Molao oa Jesu o ne o le “mocha” ka hore o ne a sa re ba rate ba bang feela joalokaha ba ithata, empa “joale ka ha ke le ratile”—ba utloisise ho tellana bophelo. (Johanne 13:34, 35; 1 Johanne 3:16) Lerato la mofuta ona le bontša boinehelo ba rōna ho Molimo ka ho shanofatsa polelo ea Diabolose ea hore ha ho motho ea tla utloa Molimo ha bophelo ba hae bo le kotsing. (Jobo 2:1-10) Ka ho totobetseng, ho utloa ‘molao ona o mocha’ ho hloka ho ameha ka ho tebileng e mong ka e mong.—Jakobo 1:27; 2:15, 16; 1 Ba-Thessalonika 2:8.
6. Lerato le lokela ho bontšoa le ho bo-mang, hona hobane’ng?
6 Empa Kreste o shoetse lefatše la batho, e seng barutuoa ba hae feela. Ke ka hona Mangolo a phehellang: “Ha re sa na le sebaka, a re etseng bohle hantle, empa haholo ba ntlo ea tumelo.” (Ba-Galata 6:10) Menyetla ea ‘ho etsa bohle hantle’ e hlaha letsatsi le leng le le leng. Ha lerato la rōna le sa patisana empa e le la pelo e bulehileng le le fanang, re etsisa Molimo, “hobane o chabisetsa ba babe le ba batle letsatsi la hae, ’me o nesetsa ba lokileng le ba khopo.”—Mattheu 5:43-48.
Ho Hlompha Batho le Thepa ea Bona
7. Ke eng e ka ’nang ea susumetsa hore na re tšoara batho ba bang le thepa ea bona joang?
7 Re phela lefatšeng le se nang lerato. Mohlomong u hlokomela hore hase kamehla u eeng u nahanele ba bang joalokaha u lokela. Empa haeba motho a tla sebeletsa Molimo, hoa hlokahala hore a iteke ka matla hore a ‘nchafatse kelello ea hae.’ (Ba-Roma 12:1, 2) Ho hlokahala hore a fetole boikutlo ba hae ka batho le thepa ea bona.
8. (a) Ke eng e bontšang hore ho hlompholla thepa ea ba bang ho atile? (b) Ke keletso efe e ka Bibeleng eo haeba e lateloa, e neng e tla thibela motho ho etsa lintho tse joalo?
8 Libakeng tse ling ho hlokomolohuoa lintho tsa batho ba bang ka ho sisimosang. Ka lebaka la boithabiso feela, bacha ba senya thepa ea batho ka bomong le ea sechaba. Kapa ba senye ka boomo tšobotsi ea lintho tseo batho ba bang ba li sebelelitseng ka thata hore ba li fumane. Ba bang mohlomong ba bontša ho se khotsofale ka tšenyo e joalo ea thepa, empa leha ho le joalo ba tlatsetsa ho eona ka ho qhalla lithōle lirapeng tsa boikhathollo, literateng, kapa mehahong ea sechaba. Na liketso tsee li lumellana le keletso ea Jesu: “ ’Me joale, ntho tsohle tseo le ratang hore batho ba le etse tsona, ba etseng tsona le lōna”? (Mattheu 7:12) Boitšoaro bo joalo bo se nang lerato, bo bontša hore motho ha a lumellane ka ho feletseng le morero oa Molimo bakeng sa hore lefatše lena e be paradeise.
9. (a) Ho utsoa ho ama bophelo ba bohle joang? (b) Ke hobane’ng ha ho utsoa ho le phoso mahlong a Molimo?
9 Libakeng tse ngata, ho ameha ka bophelo ba motho le matlotlo ho etsa hore menyako e notletsoeng, lifenstere tse sirelelitsoeng, le lintja tse lebelang e be lintho tse tloaelehileng. Mabenkele a phahamisa theko ho koala sekheo sa bosholu. Empa bosholu bo ke ke ba e-ba le sebaka Tsamaisong e Ncha ea Molimo. Ka hona, leha e le bafe ba nang le tšepo ea ho ea moo, hona joale ba tlameha ho ithuta ho phela ka tsela e tlatsetsang tšireletsehong ea batho ba bang. Bibele e bontša hore “neo ea Molimo” ke hore motho a ‘latsoe boiketlo ka mokhathala ’ohle oo a ikhathatsang ka oona.’ Ka hona ke phoso ho leka ho mo amoha litholoana tsa mosebetsi oa hae. (Moeklesia 3:13; 5:18) Batho ba bangata ba neng ba sa tšepahale nakong e fetileng, ba fetohile. Ha baa khaotsa ho utsoa feela empa hape ba ithutile thabo ea ho nea ba bang. (Liketso 20:35) Ka takatso ea ho khahlisa Molimo, ba tebisitse pelong se ngotsoeng ho Ba-Efese 4:28: “Ea neng a utsoa, a se ke a hlola a utsoa, a mpe a ineele ho sebetsa lintho tse molemo ka matsoho a hae, a tle a tsebe ho nea ea hlokang.”
10. (a) Ke joang, ka tsela eo re buang le ba bang ka eona, re ka bontšang ho ba nahanela? (b) Ke eng e tla thusa motho hore a ithute ho bontša lerato ka tsela ee?
10 Hangata, haholo ha lintho li sa tsamaee hantle, seo ba bang ba se hlokang, hase ntho e ’ngoe e bonahalang, empa ba hloka mosa feela. Leha ho le joalo, ho etsahala joang maemong ao ho oona mefokolo ea motho e hlahellang pooaneng? Ho ka ’na hoa e-ba le ho phasoloha ka bohale, mahlapa, kapa lipolelo tse hlabang. Le ba bang ba lumelang hore tsela ena e fosahetse, ba hlōleha ho laola maleme a bona. Motho a ka hlōla mokhoa o joalo joang? Ha e le hantle, ho haellang ke lerato, ’me hoo ho bontša hore ho tseba Molimo hoa hlokahala. Ha motho a ananela boholo ba mohau oa Molimo ho eena, a ke ke a thatafalloa haholo hore a tšoarele ba bang. A ka ba a bona le litsela tsa ho thusa mokhopisi, a fana ka thuso e mosa ka maikutlo a hore mokhopisi a ntlafatse.—Mattheu 18:21-35; Ba-Efese 4:31–5:2.
11. Ke hobane’ng ha re sa lokela ho rohakana ha re bua, le haeba ba bang ba se mosa ho rōna?
11 Ke ’nete hore batho ba bang ba ka ’na ba se sebelise keletso ena e ntle e tsoang Lentsoeng la Molimo ha ba sebelisana le rōna. Ho sa tsotellehe sepheo sa rōna se tiileng, ka linako tse ling re ka ’na ra fumana hore baa re tlatlapa. Joale re tla etsa joang? Bibele e-ea eletsa: “U se ke ua hlōloa ke bobe, u mpe u hlōle bobe ka botle.” (Ba-Roma 12:17-21; 1 Petrose 2:21-23) Ha mosa oa rōna o sa khaotse, kamorao ho nako o ka ’na oa nolofatsa boikutlo ba bona ’me oa hlahisa litšoaneleho tse molemo ka ho bona. Ho sa tsotellehe hore na ba itšoara joang, ha re tsoela pele ho bontša mosa, re bontša hore re phahamisa tsela eo Molimo o busang ka eona e theiloeng leratong.
Ho Hlōla Khethollo ea Morabe, Bochaba le Boemo
12, 13. Bibele e thusa motho joang hore a felise boikutlo leha e le bofe ba khethollo ea morabe, bochaba, kapa boemo bophelong?
12 Motho ea nang le lerato la sebele ha a susumetsoe ke morabe, lebala la letlalo, bochaba, kapa boemo bophelong. Hobane’ng? Hobane o ananela ’nete ea Bibele ea hore “[Molimo] o entse mefuta eohle ea batho ka mali a le mang.” (Liketso 17:26) Ka baka leo batho bohle baa amana. Ha ho morabe oo ka tlhaho o phahametseng e meng.
13 Ha ho motho ea nang le lebaka la ho ikhantša ka lebaka la lelapa leo a tsoang ho lona, morabe, lebala, bochaba, kapa boemo bophelong. “Bohle ba sitiloe, ’me ha ba tšoaneloe ke khanya ea Molimo.” (Ba-Roma 3:23) Ka baka leo, e mong le e mong o itšetlehile ka sehlabelo sa topollo sa Kreste. ’Me Bibele e bontša hore ba tla bolokoa “mahlomoleng a maholo” a tlang ba tsoa ho “ba lichaba tsohle, le ba mefuta eohle, le ba merabe eohle, le ba lipuo tsohle.”—Tšenolo 7:9, 14-17.
14. Ke hobane’ng ha phihlelo e bohloko ea botho e se motheo o utloahalang bakeng sa ho khetholla batho ba morabe o itseng kapa ba bochaba bo itseng?
14 Motho ha a leka ho lokafatsa leeme la hae, a ka ’na a hopola phihlelo e bohloko eo a bileng le eona le motho oa morabe o mong kapa oa bochaba bo bong. Empa na ke e mong le e mong oa morabe oo kapa sechaba seo ea neng a ameha phosong? Hona na batho ba morabe kapa bochaba bahabo motho ha baa ba molato oa ntho eona e joalo? Haeba re e-na le tšepo ea ho phela Tsamaisong e Ncha ea Molimo ea khotso, ho hlokahala hore lipelong tsa rōna re hloekise boikhohomoso leha e le bofe bo sekamelang ho re aroleng ho batho ba bang.
15. Haeba lipolelo tsa motho ka morabe kapa bochaba li ne li ka khopisa molumeli e mong, hona ho ne ho tla ama boemo ba motho joang ka pel’a Molimo le Kreste?
15 Se ka lipelong tsa rōna se tsoa ka melomong ea rōna kapele kapa neng-neng. Joalokaha Kreste Jesu a itse: “Molomo oa motho o bolela seo pelo e tletseng sona.” (Luka 6:45) Ho thoe’ng haeba lipolelo tse bontšang khethollo li ne li ka khopisa e mong ea neng a bontša hore o thahasella mokhatlo o hlophisitsoeng oa Jehova? Taba e tebile hoo Jesu a ileng a lemosa: “Ea ka khopisang e mong oa ba banyenyane bana ba lumetseng ho ’na, ho ka bang molemo ho eena ke ho tlamelloa leloala le leholo molaleng, a lahleloe leoatleng.”—Mareka 9:42.
16. Jesu o bontšitse joang ho se ee ka leeme hoo re lokelang ho ho bontša ho batho ba bang?
16 Bakreste ba tlameha ho bontša thahasello e lerato ho ba bang ho sa tsotellehe morabe oa bona, bochaba ba bona, kapa boemo ba bona bophelong. (Jakobo 2:1-9) Joalokaha Jesu a phehelletse: “Enore ha u etsa ’mōka, u bitse bahloki, le lihole, le lihlotsa, le lifofu; ’me u tla ba motho ea lehlohonolo, kahobane ha ba na seo ba ka u buseletsang sona.” (Luka 14:13, 14) Ka ho ba le thahasello ena e seli ka batho ba bang, re bonahatsa litšoaneleho tse lerato tsa Ntate oa rōna oa leholimo.
Kameho e Lerato ka Boiketlo ba ka ho sa Feleng ba ba Bang
17. (a) Ntho ea bohlokoa haholo eo re ka e kopanelang le ba bang ke efe? (b) Ke hobane’ng ha re lokela ho ikutloa re susumeletseha ho etsa joalo?
17 Kameho ea rōna ka ba bang ha e-ea lokela ho lekanyetsoa ka hore na ba hloka eng nameng. Leha e le hore lerato la rōna e ka ba le phethahetseng feela ke hore re bile mosa ho batho ba mefuta eohle. Hore bophelo bo hle bo be le seo bo se bolelang, ho hlokahala hore batho ba tsebe Jehova le merero ea hae. Jesu thapelong ho Ntate oa hae o itse: “Bophelo bo sa feleng ke hore ba u tsebe, uena Molimo o ’notši oa ’nete, le Jesu Kreste eo u mo romileng.” (Johanne 17:3) Haeba u balile buka ena ho tloha qalong, u tseba hore na u ka fumana moputso oo joang. U iponetse seo Mangolo a se profetang ka ‘mahlomola a maholo,’ le bopaki bo bonahalang bo tiisang hore a haufi. U tseba hore ’Muso oa Molimo ke oona tšepo feela bakeng sa batho. Empa na lerato bakeng sa Jehova le bakeng sa batho ba bang le u susumelletsa hore u kopanele tsebo ee ea bohlokoa le batho ba bang?
18. (a) Ho Mattheu 24:14, Jesu o profetile mosebetsi ofe bakeng sa mehla ea rōna? (b) Re lokela ho talima ho kopanela ho oona joang?
18 Ha Jesu a ne a bua ka “ho fela ha lefatše,” o profetile: “Evangeli ena ea ’muso e tla boleloa lefatšeng lohle, e tle e be bopaki ho lichaba tsohle; ’me e tla ba hona bofelo bo hlahang.” (Mattheu 24:3, 14) Ke tokelo e kaakang ho emela Morena ’Musi oa bokahohle, eena Jehova, ha motho a kopanela ‘bopaking’ bona! Monyetla oa ho nka karolo mosebetsing ona o khethehileng o sa ntsane o bulehile, empa e seng halelele haholo.
19. Ke hobane’ng ha re sa lokela ho lumella boikutlo leha e le bofe ba ho haelloa matleng a botho hore bo re thibele ho kopanela mosebetsing ona?
19 Ha re nahana ka tebello ea ho kopanela ‘bopaking bona ho lichaba tsohle,’ ho hotle ho hlokomela hore hase matla a motho, empa ke Molimo o etsang hore molaetsa o bee litholoana. (Liketso 16:14; 1 Ba-Korinthe 3:6) Haeba u susumetsoa ke pelo e ratang, Jehova a ka u sebelisa ho finyella thato ea hae. Joalokaha moapostola Pauluse a itse: “Re fela re na le tšepo e joalo ho Molimo, ka Kreste. E seng hore re ka tseba ho lekanya letho re ’notši, joale ka hoja le itsoela ho rōna; matla a rōna a mpa a tsoa ho Molimo.”—2 Ba-Korinthe 3:4-6.
20. (a) Na ke bohle ba tlang ho arabela hantle litabeng tse molemo? (b) Ke molemo ofe o finyelloang ka ho bolella batho ba iphapanyang kapa ba bileng ba hanyetsang?
20 Leha ho le joalo, ha rea lokela ho lebella hore e mong le e mong o tla arabela hantle. Ba bangata ba tla iphapanya. Ba bang ba tla hanyetsa. Leha ho le joalo ba ka fetoha. Saule oa Tarese, eo ka nako e ’ngoe e neng e le mohlorisi oa Bakreste, o ile a fetoha moapostola ea chesehang oa Jesu. (1 Timothea 1:12, 13) E-bang ba bang baa ho tseba kapa che, ba hloka molaetsa oa ’Muso. Ka hona ho hlokahala hore re amehe ka bona, re ithaopele ho itella ho ntšetsa pele boiketlo ba bona ba kamehla. (1 Ba-Thessalonika 2:7, 8) Le haeba ba sa batle molaetsa oa ’Muso, ho na le molemo o finyelloang. Bopaki bo fanoe, lebitso la Jehova le phahamisitsoe, batho baa ‘aroloa,’ ’me re bontša botšepehi ba rōna ho Jehova.—Mattheu 25:31-33.
Ho Tsotella se Etsahallang Lelapa la Hao
21. Ke boikarabelo bofe boo hlooho ea lelapa e nang le bona ka katleho ea moea ea lelapa la eona?
21 Boiteko ba hao ba ho thusa ba bang hore ba ruoe molemo litokisetsong tse lerato tsa Jehova, bo lokela hore bo boele bo tobisoe lapeng la hao. Ka mohlala, hlooho ea lelapa, e ikarabella ka khōlo ea moea ea lelapa la eona. Hona ho susumetsoa ka ho toba ke litokisetso tsa eona tsa kamehla bakeng sa hore lelapa le buisane ka Lentsoe la Molimo. ’Me ha lithapelo tsa ntate lebitsong la lelapa li bontša boinehelo bo tebileng le teboho, hona ho ka bōpa boikutlo ba lelapa kaofela.
22. Ke hobane’ng ha e le hoa bohlokoa hore ntate a laee bana ba hae, ’me o lokela ho susumetsoa ke eng?
22 Boikarabelo ba hae bo boetse bo akarelletsa ho sebelisa taeo. Ha mathata a hlaha, ho ka ’na hoa bonahala ho le bonolo ho a hlokomoloha. Empa haeba taeo e sebelisoa feela ha ntate a khopehile, kapa haeba mathata a sebetsoa feela ha a se a tebile, ho na le ho haellang. Liproverbia 13:24 e re: ‘Ntate ea ratang mora oa hae o-oa mo laea.’ Ka hona ntate ea lerato o sebelisa taeo ka mokhoa o tsitsitseng. Ka mamello o hlalosetsa bana ba hae lintho ’me o nahanela litekanyetso tsa kelello, maikutlo, le ’mele tsa e mong le e mong. (Ba-Efese 6:4; Ba-Kolosse 3:21) Haeba u ntate, na u na le lerato la mofuta o joalo bakeng sa bana ba hao? Na u utloisisa ho jara boikarabelo boo, ka leihlo le sa talimang boiketlong ba hona joale feela, empa hape le ba kamoso ba lelapa la hao?—Liproverbia 23:13, 14; 29:17.
23. ’Mè a ka tlatsetsa joang katlehong ea moea ea lelapa la hae?
23 Mosali, le eena, a ka tlatsetsa haholo lapeng. Tšebelisano ea hae le monna oa hae le tšebeliso ea hae e bohlale ea nako ho bōpeng bophelo ba bana ba bona ka tsela ea bomolimo li atisa ho bonahala boitšoarong le boikutlong ba bana. (Liproverbia 29:15) Le moo ho seng ntate ka lapeng, thuto e hlokolosi ea Bibele le mohlala o motle li tsoala litholoana tse ntle.
24. (a) Haeba a talimane le khanyetso e tsoang ho molekane oa hae oa lenyalo, ea lumelang o lokela ho etelletsa pele tseko efe? (b) Tlas’a maemo a joalo, lerato le ne le tla bontšoa joang bakeng sa molekane ea sa lumelang?
24 Empa ho thoe’ng haeba ntate ea lapeng a sa amohele Lentsoe la Molimo, kapa a bile a hlorisa mosali oa hae? Mosali o lokela ho etsa joang? Haeba mosali a rata Jehova, ka sebele a ke ke a Mo furalla. Ke Satane ea ileng a tseka hore batho ba tla furalla Molimo ha ba beoa bothateng. Ka sebele mosali ha a batle ho etsa thato ea Satane. (Jobo 2:1-5; Liproverbia 27:11) Le teng, Bibele e mo phehella hore a batle boiketlo ba kamehla ba monna oa hae. Ho furalla seo a tsebang hore ke ’nete ho ne ho tla bolela hore ba tla lahleheloa ke bophelo bo sa feleng ka bobeli. Empa haeba mosali a lula a tiile tumelong ea hae, a ka ’na a thusa monna hore a bolokehe. (1 Ba-Korinthe 7:10-16; 1 Petrose 3:1, 2) Ho feta moo, ka ho tsoela pele ho hlompha likano tsa hae tsa lenyalo, le tlas’a mathata, o bontša tlhompho ea hae e tebileng bakeng sa Moqapi oa lenyalo, Jehova Molimo.
25. Qeto ea motsoali e ama litebello tsa bophelo tsa bana joang?
25 Lebaka le leng le matla la hore motsoali ea lumelang a tšepahale ho Molimo ha a talimane le khanyetso, ke bana. Molimo o fana ka tiiso ea hore bana ba banyenyane ba bahlanka ba hae ba inehetseng ba tla bolokoa “mahlomoleng a maholo” a tlang. Le haeba e le motsoali a le mong feela eo e leng mohlanka oa Jehova, Jehova o nka bana ba joalo ba “halalela.” (1 Ba-Korinthe 7:14) Empa haeba motsoali a ne a ka ‘nyelisa’ ho etsa thato ea Molimo, joale ho tla etsahala joang? Motsoali ea joalo ha a itahlele eena a le mong feela boemo bo amohelehang ka pel’a Molimo, empa hape o bo lahlela le bana ba banyenyane. (Ba-Heberu 12:25) Hoo e ka ba tahlehelo e bohloko hakaakang?
26. Ho sebetsa ka molemo oa sebele ho rōna le ho ba bang, ho hlokahala re etse eng?
26 Ho sa tsotellehe hore na re talima tšobotsi efe ea bophelo, ho totobetse hore ho hlokahala hore re se ke ra inahanela re le bang feela, empa re nahanele le ba bang. Re tla amohela lerato haeba re bontša ba bang lerato. (Luka 6:38) Empa ho bontša lerato la ’nete le ho se khelosoe ke monahano oa batho o bonelang haufi, ho hlokahala hore re tsebe Jehova ’me re thabele kamano e mofuthu le eena. Leha ho le joalo, ha re etsa joalo, ho ama khetho eo re tlamehang ho e etsa ka borōna.
[Setšoantšo se leqepheng la 171]
Mofuta oa lerato oo bahlanka ba Jehova ba tlamehang ho ba le oona o ba tlama ho bontša kameho ea ’nete bakeng sa ba bang ho sa tsotellehe morabe, bochaba, kapa boemo bophelong