Bahlanka ba Jehova ba Thabileng
“Ho thaba ba elang hloko tlhoko ea bona ea moea.”—MATHEU 5:3.
1. Thabo ea sebele ke eng, hona e bontša eng?
BATHO ba Jehova ba nka thabo e le ntho ea bohlokoa ka ho fetisisa. Mopesaleme Davida o ile a hooa a re: “Ho thaba batho bao Molimo oa bona e leng Jehova!” (Pesaleme ea 144:15) Thabo ke boikutlo ba boiketlo. Thabo e tebileng—e fihlang botebong ba pelo—e tlisoa ke ho ela hloko hore Jehova oa re hlohonolofatsa. (Liproverbia 10:22) Thabo e joalo e bontša hore re na le kamano e haufi le Ntate oa rōna oa leholimo ’me rea tseba hore re etsa thato ea hae. (Pesaleme ea 112:1; 119:1, 2) Hoa thahasellisa hore ebe Jesu o ile a thathamisa mabaka a robong a ho thaba. Ho hlahloba mabaka ana a thabo sehloohong sena le se latelang ho tla re thusa ho bona kamoo re ka thabang kateng ha ka botšepehi re sebeletsa Jehova “Molimo ea thabileng.”—1 Timothea 1:11.
Ho Ela Hloko Tlhoko ea Rōna ea Moea
2. Ho ne ho etsahala’ng ha Jesu a tla bua ka thabo, hona mantsoe a hae a selelekela a itse’ng?
2 Ka 31 C.E., Jesu o ile a fana ka e ’ngoe ea lipuo tse tummeng haholo historing. E bitsoa Thuto ea Thabeng hobane Jesu o fane ka eona a le mosikong oa thaba e okametseng Leoatle la Galilea. Kosepele ea Matheu e re: “Ha [Jesu] a bona bongata a nyolohela thabeng; ’me ka mor’a hore a lule fatše barutuoa ba hae ba tla ho eena; eaba o ahlamisa molomo ’me o qala ho ba ruta, a re: ‘Ho thaba ba elang hloko tlhoko ea bona ea moea, kaha ’muso oa maholimo ke oa bona.’” Mantsoe a selelekela a Jesu, ha a fetoleloa ka ho toba a baleha tjena: “Ho thaba ba futsanehileng moeeng,” kapa “Ho thaba bao e leng mekōpa-kōpa bakeng sa lintho tsa moea.” (Matheu 5:1-3; Kingdom Interlinear; mongolo o botlaaseng ba leqephe ho NW) Today’s English Version e baleha tjena: “Ho thaba ba tsebang hore ba futsanehile moeeng.”
3. Ho ikokobetsa ho re thusa joang hore re thabe?
3 Thutong eo a ileng a fana ka eona a le leralleng, Jesu o ile a re motho o thaba haholo haeba a ela hloko hore o hloka ho itseng moeeng. Bakreste ba ikokobelitseng, ba tsebang hantle boemo ba bona ba boetsalibe, ba kōpa Jehova hore a ba tšoarele motheong oa sehlabelo sa Kreste sa thekollo. (1 Johanne 1:9) Kahoo ba ba le khotso ea kelello le thabo ea sebele. “Ho thaba eo bofetoheli ba hae bo tšoaretsoeng, eo sebe sa hae se koahetsoeng.”—Pesaleme ea 32:1; 119:165.
4. (a) Ke ka litsela life re ka bontšang hore re ela hloko tlhoko ea rōna ea moea le litlhoko tsa ba bang? (b) Ke eng e etsang hore re thabe haholoanyane ha re ela hloko tlhoko ea rōna ea moea?
4 Ho ela hloko tlhoko ea rōna ea moea ho re susumelletsa hore re bale Bibele letsatsi le letsatsi, re je lijo tsa moea tseo re li fuoang “ka nako e tšoanetseng” ke “lekhoba le tšepahalang le le masene,” ’me re be teng kamehla libokeng tsa Bokreste. (Matheu 24:45; Pesaleme ea 1:1, 2; 119:111; Baheberu 10:25) Ho rata moahelani ho etsa hore re ele hloko litlhoko tsa moea tsa batho ba bang ’me ho re susumelletsa hore re chesehe ha re bolela le ha re ruta litaba tse molemo tsa ’Muso. (Mareka 13:10; Baroma 1:14-16) Ho bolella ba bang linnete tsa Bibele hoa re thabisa. (Liketso 20:20, 35) Thabo ea rōna e teba haholoanyane ha re thuisa ka tšepo e hlollang ea ’Muso le ka litlhohonolofatso tse tla tlisoa ke ’Muso oo. Bakeng sa “mohlatsoana” oa Bakreste ba tlotsitsoeng, tšepo ea ’Muso e bolela ho fumana bophelo ba ho se shoe leholimong e le karolo ea puso ea ’Muso o matsohong a Kreste. (Luka 12:32; 1 Bakorinthe 15:50, 54) “Linku tse ling” tsona li na le tšepo ea ho fumana bophelo bo sa feleng lefatšeng la paradeise pusong ea ’Muso oo.—Johanne 10:16; Pesaleme ea 37:11; Matheu 25:34, 46.
Kamoo ba Siameng ba ka Thabang Kateng
5. (a) Polelo e reng “ba siameng” e bolela’ng? (b) Batho ba joalo ba siameng ba tšeliseha joang?
5 Mantsoe a thabo e latelang eo Jesu a buileng ka eona a utloahala eka aa ikhanyetsa. O itse: “Ho thaba ba siameng, kaha ba tla tšelisoa.” (Matheu 5:4) Ke joang motho a ka siamang a ba a thaba ka nako e le ’ngoe? Hore re utloisise hore na mantsoe a Jesu a bolela’ng, re lokela ho hlahloba hore na o bua ka ho siama ha mofuta ofe. Morutuoa Jakobo o hlalosa hore boemo ba rōna ba boetsalibe bo lokela ho etsa hore re siame. O ile a ngola a re: “Hloekisang matsoho a lōna, lōna baetsalibe, ’me le hloekise lipelo tsa lōna, lōna ba hlōlehang ho etsa qeto. Hlomohang lipelo ’me le siame le be le lle. Litšeho tsa lōna li ke li fetohe ho siama, ’me thabo ea lōna e fetohe ho nyahama. Ikokobetseng mahlong a Jehova, ’me o tla le phahamisa.” (Jakobo 4:8-10) Ba saretsoeng e le kannete ka lebaka la boemo ba bona ba boetsalibe baa tšeliseha ha ba tseba hore libe tsa bona li ka tšoareloa haeba ba bontša tumelo sehlabelong sa Kreste sa thekollo le ho bontša pako ea sebele ka ho etsa thato ea Jehova. (Johanne 3:16; 2 Bakorinthe 7:9, 10) Ka lebaka leo ba ka ba le kamano ea bohlokoa le Jehova le tšepo ea ho phela ka ho sa feleng ba mo sebeletsa le ho mo rorisa. Sena se etsa hore ba thabe haholo ho tloha pelong.—Baroma 4:7, 8.
6. Ba bang ba siama ka kutloisiso efe, hona ba tšelisoa joang?
6 Mantsoe a Jesu a akarelletsa le ba siameng ka lebaka la maemo a nyonyehang a tletseng lefatšeng. Jesu o ile a lebisa boprofeta ba Esaia 61:1, 2 ho eena, ’me bo re: “Moea oa ’Musi Morena Jehova o holim’a ka, ka lebaka la hore Jehova o ntlotselitse hore ke bolelle ba bonolo litaba tse molemo. O nthometse hore ke tlamise ba robehileng lipelo, . . . ho tšelisa bohle ba siameng.” Thōmo eo e sebetsa le ho Bakreste ba tlotsitsoeng ba ntseng ba le lefatšeng, ba e phethang ka thuso ea bo-mphato ba bona, e leng “linku tse ling.” Kaofela ba kopanela mosebetsing oa tšoantšetso oa ho tšoaea liphatla tsa “batho ba feheloang le ba bobolang ka lebaka la lintho tsohle tse manyala tse ntseng li etsoa har’a eona [Jerusalema ea bokoenehi, e tšoantšetsang Bokreste-’mōtoana].” (Ezekiele 9:4) Batho bao ba siameng ba tšelisoa ke ‘litaba tse molemo tsa ’muso.’ (Matheu 24:14) Ba thabela ho tseba hore haufinyane tsamaiso ea lintho e khopo ea Satane e tla nkeloa sebaka ke lefatše le lecha la Jehova la ho loka.
Ho Thaba ba Maikutlo a Bonolo
7. Polelo e reng “maikutlo a bonolo” ha e bolele eng?
7 Jesu o ile a tsoela pele ka Thuto ea hae ea Thabeng a re: “Ho thaba ba maikutlo a bonolo, kaha ba tla rua lefatše.” (Matheu 5:5) Ka linako tse ling ho thoe ha motho a e-na le maikutlo a bonolo seo se bolela hore oa fokola. Empa ha ho joalo. Ha setsebi se seng sa Bibele se hlalosa moelelo oa lentsoe le fetoletsoeng e le “maikutlo a bonolo,” se ile sa ngola sa re: “Ntho e khōlō ka ho fetisisa e khethollang motho ea [maikutlo a bonolo] ke hore o khona ho itšoara ka mokhoa o phethahetseng. Maikutlo a bonolo hase mosa o bontšang bokoala, ho nkeha maikutlo, ho se natse se etsahalang. Ke matla a laolehileng.” Jesu o ile a itlhalosa tjena: “Ke na le maikutlo a bonolo ’me ke ikokobelitse pelong.” (Matheu 11:29) Leha ho le joalo, Jesu o ne a le sebete ha a emela melao-motheo e lokileng.—Matheu 21:12, 13; 23:13-33.
8. Maikutlo a bonolo a tsamaisana haholo le eng, hona ke hobane’ng ha re hloka tšobotsi ee likamanong tsa rōna le ba bang?
8 Kahoo maikutlo a bonolo a tsamaisana haholo le boitšoaro. Ha e le hantle, moapostola Pauluse o ile a kolokisa bonolo le boitšoaro hammoho ha a ne a thathamisa “litholoana tsa moea.” (Bagalata 5:22, 23) Maikutlo a bonolo a lokela ho hlaoleloa ka thuso ea moea o halalelang. Ke tšobotsi ea Bokreste e etsang hore re be le khotso le batho ba ka ntle le ba ka har’a phutheho. Pauluse o ile a ngola tjena: “Le ikapese lerato le mofuthu la qenehelo, mosa, ho ikokobetsa kelellong, bonolo, le tiisetso. Tsoelang pele le mamellana le ho tšoarelana ka bolokolohi.”—Bakolose 3:12, 13.
9. (a) Ke hobane’ng ha ho ba le maikutlo a bonolo ho sa felle feela likamanong tsa rōna le batho ba bang? (b) Ba maikutlo a bonolo ba “rua lefatše” joang?
9 Leha ho le joalo, maikutlo a bonolo ha a felle feela likamanong tsa rōna le batho ba bang. Haeba re ikokobeletsa bobusi ba Jehova ka boithatelo, re bontša hore re na le maikutlo a bonolo. Mohlala o ka sehloohong tabeng ena ke Jesu Kreste, eo ha a ne a le mona lefatšeng a ileng a bontša maikutlo a bonolo le ho ikokobeletsa thato ea Ntat’ae ka ho feletseng. (Johanne 5:19, 30) Jesu ke eena ea ka sehloohong ea ruang lefatše, hobane ke eena ’Musi oa lona ea khethiloeng. (Pesaleme ea 2:6-8; Daniele 7:13, 14) O arolelana lefa lena le ‘majalefa hammoho le eena’ a 144 000, a khethiloeng “har’a moloko oa batho” ho ea “busa e le marena holim’a lefatše.” (Baroma 8:17; Tšenolo 5:9, 10; 14:1, 3, 4; Daniele 7:27) Kreste le babusi-’moho le eena ba tla busa banna le basali ba kang linku ba limilione bao boprofeta ba pesaleme bo tla phethahala ho bona ka tsela e thabisang: “Ba bonolo ba tla rua lefatše, ka sebele ba tla fumana thabo e phethehileng khotsong e ngata.”—Pesaleme ea 37:11; Matheu 25:33, 34, 46.
Ho Thaba ba Lapelang ho loka
10. Tsela e ’ngoe eo “ba lapelang le ho nyoreloa ho loka” ba ka khorisoang ka eona ke efe?
10 Lebaka le latelang la thabo leo Jesu a ileng a le bolela ha a ne a bua leralleng leo la Galilea ke le reng: “Ho thaba ba lapelang le ho nyoreloa ho loka, kaha ba tla khorisoa.” (Matheu 5:6) Jehova ke eena ea behelang Bakreste tekanyetso ea ho loka. Kahoo, ha e le hantle ba lapelang le ho nyoreloa ho loka ba lapela le ho nyoreloa tataiso ea Molimo. Batho ba joalo ba elelloa ka hohle sebe sa bona le ho se phethahale ha bona ’me ba labalabela hore e be ba amohelehang ka pel’a Jehova. Ba thaba hakaakang ha ba ithuta Lentsoeng la Molimo hore haeba ba baka ’me ba kōpa tšoarelo motheong oa sehlabelo sa Kreste sa thekollo, e tla ba ba lokileng ka pel’a Molimo!—Liketso 2:38; 10:43; 13:38, 39; Baroma 5:19.
11, 12. (a) Bakreste ba tlotsitsoeng ba fumana ho loka joang? (b) Bo-mphato ba batlotsuoa ba nyorolloa joang?
11 Jesu o ile a bolela hore batho ba joalo ba tla thaba, kaha “ba tla khotsofatsoa.” (Matheu 5:6, Bibele—Phetolelo e Ncha) Bakreste ba tlotsitsoeng ba bitselitsoeng ho ea ‘busa e le marena’ le Kreste leholimong ba boleloa “ba lokile bakeng sa bophelo.” (Baroma 5:1, 9, 16-18) Jehova o ba amohela e le bara ba moea. E ba majalefa hammoho le Kreste, a bitselitsoeng ho ba marena le baprista pusong ea ’Muso oa hae oa leholimo.—Johanne 3:3; 1 Petrose 2:9.
12 Bo-mphato ba batlotsuoa ha ho e-s’o boleloe hore ba lokile bakeng sa bophelo. Leha ho le joalo, Jehova o ba balla ho loka ka tekanyo e itseng ka lebaka la tumelo ea bona maling a Kreste a tšolotsoeng. (Jakobo 2:22-25; Tšenolo 7:9, 10) Ba boleloa ba lokile e le metsoalle ea Jehova e mocheng oa ho lopolloa nakong ea ‘matšoenyeho a maholo.’ (Tšenolo 7:14) Ba tla nyorolloa ka ho eketsehileng tlas’a “maholimo a macha,” ha ba fetoha karolo ea lefatše le lecha leo ‘ho loka ho tla aha ho lona.’—2 Petrose 3:13; Pesaleme ea 37:29.
Ho Thaba ba Mohau
13, 14. Re lokela ho bontša mohau ka litsela life tse molemo, hona seo se tla re tlisetsa melemo efe?
13 Ha Jesu a tsoela pele ka Thuto ea hae ea Thabeng o ile a re: “Ho thaba ba mohau, kaha ba tla bontšoa mohau.” (Matheu 5:7) Litabeng tsa molao, mohau o utloisisoa e le mosa o bontšoang ke moahloli ea sa ahloleng mofosi ka tsela e feletseng e lumeletsoeng ke molao. Empa, mantsoe a qalong a fetoletsoeng e le “mohau” ka Bibeleng, a lebisitse haholo pontšong ea ho nahanela ho mosa kapa kutloelo-bohloko e imollang ba mathateng. Kahoo, ba mohau ba bontša kutloelo-bohloko ka mesebetsi. Setšoantšo sa Jesu sa Mosamaria ea nang le moea oa boahelani ke mohlala o motle oa motho ea ileng a “etsa ka mohau” ho motho ea hlokang.—Luka 10:29-37.
14 E le hore re be le thabo e tlisoang ke ho ba mohau, re lokela ho bontša mosa ka ho etsetsa bahloki mesebetsi e metle ea mosa. (Bagalata 6:10) Jesu o ile a qenehela batho bao a neng a ba bona. ‘O ile a susumetsoa ke khauho bakeng sa bona, hobane ba ne ba le joaloka linku tse se nang molisa. Eaba o qala ho ba ruta lintho tse ngata.’ (Mareka 6:34) Jesu o ne a tseba hore litlhoko tsa moea tsa batho ke tsona tsa bohlokoa ka ho fetisisa. Le rōna re ka bontša kutloelo-bohloko le ho ba mohau ka ho bolella ba bang seo ba se hlokang e le kannete—e leng ‘litaba tse molemo tsa ’muso.’ (Matheu 24:14) Hape re ka etsa ho hong ho molemo ho thusa Bakreste-’moho le rōna ba hōlileng, bahlolohali le likhutsana le ho ‘bua ka mokhoa o tšelisang le meea e tepeletseng maikutlo.’ (1 Bathesalonika 5:14; Liproverbia 12:25; Jakobo 1:27) Ho etsa sena ho ke ke ha re tlisetsa thabo feela empa ho boetse ho tla etsa hore re fumane mohau oa Jehova.—Liketso 20:35; Jakobo 2:13.
Lipelo Tsa Bona li Hloekile ’me ba na le Khotso
15. Ke joang re ka bang ba hloekileng pelong le ho ba ba nang le khotso?
15 Jesu o ile a bua ka lebaka la botšelela le la bosupa la thabo ha a re: “Ho thaba ba lipelo li hloekileng, kaha ba tla bona Molimo. Ho thaba ba nang le khotso, kaha ba tla bitsoa ‘bara ba Molimo.’” (Matheu 5:8, 9) Pelo e hloekileng ha ea hloeka boitšoarong feela empa e boetse e hloekile moeeng ebile e momahane borapeling ba eona ho Jehova. (1 Likronike 28:9; Pesaleme ea 86:11) Lentsoe la puo ea qalong le fetoletsoeng e le ‘ea nang le khotso’ ka ho toba le bolela “ba bōpang khotso.” Batho ba nang le khotso ba phelisana ka khotso le barab’abo bona ba Bakreste ’me haeba ho khoneha, ba phelisana ka khotso le baahelani ba bona. (Baroma 12:17-21) Ba ‘batla khotso ’me baa e phehella.’—1 Petrose 3:11.
16, 17. (a) Ke hobane’ng ha batlotsuoa ba bitsoa “bara ba Molimo,” hona ba “bona Molimo” joang? (b) “Linku tse ling” li “bona Molimo” joang? (c) “Linku tse ling” e tla ba “bara ba Molimo” ka kutloisiso e feletseng joang hona neng?
16 Ba nang le khotso le ba hloekileng pelong ba tšepisoa hore “ba tla bitsoa ‘bara ba Molimo’” ’me “ba tla bona Molimo.” Bakreste ba tlotsitsoeng ba tsoetsoe ka moea ’me Jehova o ba nketse ka lapeng e le “bara” ba ntse ba le lefatšeng. (Baroma 8:14-17) Ha ba tsosetsoa ho ea ba le Kreste leholimong, ba sebeletsa ka pel’a Jehova ’me ba Mo bona ka toba.—1 Johanne 3:1, 2; Tšenolo 4:9-11.
17 “Linku tse ling” tse nang le khotso li sebeletsa Jehova tlas’a Molisa ea Khabane, Kreste Jesu, eo e bang “Ntate [oa bona] oa ka ho sa Feleng.” (Johanne 10:14, 16; Esaia 9:6) Ba atlehang ho feta tekong ea ho qetela ka mor’a Puso ea Kreste ea Lilemo Tse Sekete ba tla amoheloa e le bara ba Jehova ba lefatšeng ’me ba “be le tokoloho e khanyang ea bana ba Molimo.” (Baroma 8:21; Tšenolo 20:7, 9) Ha ba ntse ba lebeletse sena, ba bitsa Jehova Ntat’a bona, kaha ba nehela bophelo ba bona ho eena, ba mo nka e le Monehi-Bophelo oa bona. (Esaia 64:8) Joaloka Jobo le Moshe ba mehleng ea khale, ba ka “bona Molimo” ka mahlo a tumelo. (Jobo 42:5; Baheberu 11:27) Ka ‘mahlo a lipelo tsa bona’ le ka ho ba le tsebo e nepahetseng ka Molimo, ba bona litšobotsi tse babatsehang tsa Jehova ’me ba leka ho mo etsisa ka ho etsa thato ea hae.—Baefese 1:18; Baroma 1:19, 20; 3 Johanne 11.
18. Ho ea ka mabaka a pele a supileng a thabo a boletsoeng ke Jesu, ke bo-mang ba thabileng e le kannete kajeno?
18 Re bone hore ba elang hloko tlhoko ea bona ea moea, ba siameng, ba maikutlo a bonolo, ba lapelang le ho nyoreloa ho loka, ba mohau, ba lipelo li hloekileng, le ba nang le khotso ba thaba e le kannete ka lebaka la ho sebeletsa Jehova. Leha ho le joalo, batho bana ba ’nile ba hanyetsoa, esita le ho hlorisoa. Na see se felisa thabo ea bona? Potso ena e tla tšohloa sehloohong se latelang.
Tlhahlobo
• Ba elang hloko tlhoko ea bona ea moea ba ba le thabo efe?
• Ba siameng ba tšelisoa ka litsela life?
• Re bontša maikutlo a bonolo joang?
• Ke hobane’ng ha re lokela ho ba ba mohau, ba lipelo li hloekileng le ba nang le khotso?
[Setšoantšo se leqepheng la 10]
“Ho thaba ba elang hloko tlhoko ea bona ea moea”
[Litšoantšo tse leqepheng la 10]
“Ho thaba ba lapelang le ho nyoreloa ho loka”
[Setšoantšo se leqepheng la 10]
“Ho thaba ba mohau”