Baa Hlorisoa Empa ba Thabile
“Ho thaba lōna ha batho ba le nyelisa ’me ba le hlorisa ’me ka leshano ba bua ntho ea mofuta o mong le o mong e khopo ka lōna ka lebaka la ka.”—MATHEU 5:11.
1. Jesu o ile a tiisetsa balateli ba hae eng mabapi le thabo le mahloriso?
HA Jesu a ne a roma baapostola ba hae ka lekhetlo la pele hore ba e’o bolela ka ’Muso, o ile a ba lemosa hore ba ne ba tla hanyetsoa. O ile a re ho bona: “Le tla hlouoa ke batho bohle ka lebaka la lebitso la ka.” (Matheu 10:5-18, 22) Leha ho le joalo, pejana, Thutong ea hae ea Thabeng, o ile a tiisetsa baapostola ba hae le ba bang hore khanyetso e joalo e ne e ke ke ea senya thabo ea bona e tebileng. Ha e le hantle, Jesu o bile a amahanya thabo le ho hlorisoa ha Bakreste! Ke joang ho hlorisoa ho ka tlisang thabo?
Ho Utloisoa Bohloko ka Lebaka la ho Loka
2. Ho ea ka Jesu le moapostola Petrose, ke ho utloa bohloko ha mofuta ofe ho thabisang?
2 Lebaka la borobeli la thabo leo Jesu a le boletseng ke lena: “Ho thaba ba hlorisitsoeng ka lebaka la ho loka, kaha ’muso oa maholimo ke oa bona.” (Matheu 5:10) Ho utloa bohloko hase ntho e monate. Moapostola Petrose o ile a ngola a re: “Ho na le thoriso efe ho seo haeba, ha le etsa sebe ’me le ntse le jabeloa, le mamella seo? Empa haeba, ha le etsa se molemo ’me le utloa bohloko, le ho mamella, ena ke ntho e lumellehang ho Molimo.” Hape o ile a re: “Leha ho le joalo, ho se ke ha e-ba le ea mong oa lōna ea utloang bohloko kahobane e le ’molai kapa lesholu kapa moetsi oa bobe kapa e le ea itšunya-tšunyang litabeng tsa batho ba bang. Empa haeba a utloa bohloko kahobane e le Mokreste, a se ke a ikutloa a le lihlong, empa a ke a tsoele pele ho tlotlisa Molimo ka lebitso lena.” (1 Petrose 2:20; 4:15, 16) Ho ea ka mantsoe a Jesu, ho utloa bohloko ho thabisa ha motho a ho mamella ka lebaka la ho loka.
3. (a) Ho hlorisoa ka lebaka la ho loka ho bolela’ng? (b) Mahloriso a bile le phello efe ho Bakreste ba pele?
3 Ho loka ha ’nete ho lekanngoa ka tsela eo re etsang thato ea Molimo ka eona le eo re bolokang litaelo tsa hae ka eona. Ka hona, ho utloa bohloko ka lebaka la ho loka, ho bolela ho utloa bohloko hobane motho a hanela tšusumetso ea ho tlōla melao kapa litekanyetso tsa Molimo. Baeta-pele ba Bajuda ba ile ba hlorisa baapostola hobane ba ne ba hana ho khaotsa ho bolela ka lebitso la Jesu. (Liketso 4:18-20; 5:27-29, 40) Na see se ile sa fokolisa thabo ea bona kapa sa etsa hore boboleli ba bona bo khaotse? Le hanyenyane! “Ba tloha ka pel’a Sanhedrine, ba thabile hobane ba ne ba nkiloe e le ba tšoaneloang ke ho hlompholloa ka lebaka la lebitso la hae. Letsatsi le leng le le leng ka tempeleng le ka ntlo le ntlo ba tsoela pele ba sa khaotse ho ruta le ho bolela litaba tse molemo mabapi le Kreste, Jesu.” (Liketso 5:41, 42) Mahloriso ana a ile a ba thabisa a ba a tsosolosa cheseho ea bona mosebetsing oa boboleli. Hamorao, Baroma ba ile ba hlorisa Bakreste ba pele hobane ba ne ba hana ho rapela moemphera.
4. Mabaka a mang a etsang hore Bakreste ba hlorisoe ke afe?
4 Mehleng ea kajeno, Lipaki Tsa Jehova li ’nile tsa hlorisoa hobane li hana ho khaotsa ho bolela “litaba tsena tse molemo tsa ’muso.” (Matheu 24:14) Ha liboka tsa tsona tsa Bokreste li thibeloa, li ikemiselitse ho utloa bohloko ho e-na le ho khaotsa ho bokana joalokaha Bibele e laela. (Baheberu 10:24, 25) Li ’nile tsa hlorisoa kahobane e le Bakreste ba sa jeleng paate kapa ka lebaka la ho hana ho sebelisa mali hampe. (Johanne 17:14; Liketso 15:28, 29) Leha ho le joalo, ho emela ho loka ka tsela ena ho tlisetsa batho ba Molimo ba kajeno khotso ea kelello le thabo.—1 Petrose 3:14.
Ho Nyelisoa ka Lebaka la Kreste
5. Lebaka le ka sehloohong le etsang hore batho ba Jehova kajeno ba hlorisoe ke lefe?
5 Lebaka la borobong la thabo leo Jesu a buileng ka lona Thutong ea hae ea Thabeng le lona le amana le taba ea ho hlorisoa. O ile a re: “Ho thaba lōna ha batho ba le nyelisa ’me ba le hlorisa ’me ka leshano ba bua ntho ea mofuta o mong le o mong e khopo ka lōna ka lebaka la ka.” (Matheu 5:11) Lebaka le ka sehloohong leo batho ba Jehova ba hlorisoang ka lona ke hobane hase karolo ea tsamaiso e khopo ea lintho ea hona joale. Jesu o ile a re ho barutuoa ba hae: “Haeba le ne le le karolo ea lefatše, lefatše le ka be le rata sa lona. Joale kahobane ha le karolo ea lefatše, empa ke le khethile lefatšeng, ka lebaka lena lefatše le le hloile.” (Johanne 15:19) Ka ho tšoanang, moapostola Petrose o ile a re: “Kahobane ha le tsoele pele ho matha le bona tseleng ena ho ea sekoting sa litšila se tlaase se tšoanang sa ho inehella litakatso tsa nama, baa makala ’me ba tsoela pele ho le nyefola.”—1 Petrose 4:4.
6. (a) Ke hobane’ng ha masala le bo-mphato ba ’ona ba nyelisoa le ho hlorisoa? (b) Na ho nyelisoa hoo ho fokotsa thabo ea rōna?
6 Re se re bone hore Bakreste ba pele ba ile ba hlorisoa hobane ba ne ba hana ho khaotsa ho bolela ka lebitso la Jesu. Kreste o ile a laela balateli ba hae a re: “Le tla ba lipaki tsa ka . . . ho isa karolong e hōle-hōle ea lefatše.” (Liketso 1:8) Masala a tšepahalang a barab’abo Kreste ba tlotsitsoeng, a thusoa ke bo-mphato ba ’ona ba tšepahalang ba “bongata bo boholo,” a ’nile a phetha thōmo eo ka cheseho. (Tšenolo 7:9) Ka hona, Satane o loana le “ba setseng ba peō ea hae [peō ea “mosali,” e leng karolo ea leholimo ea mokhatlo o hlophisitsoeng oa Molimo], ba bolokang litaelo tsa Molimo ’me ba e-na le mosebetsi oa ho paka ka Jesu.” (Tšenolo 12:9, 17) Re le Lipaki Tsa Jehova, re paka ka Jesu, Morena ea busang hona joale oa ’Muso o tla felisa mebuso ea batho e emeng tseleng ea lefatše le lecha la Molimo la ho loka. (Daniele 2:44; 2 Petrose 3:13) Ka lebaka leo rea nyelisoa le ho hlorisoa, empa rea thaba ha re utloa bohloko ka lebaka la lebitso la Kreste.—1 Petrose 4:14.
7, 8. Ke eng seo ka bohata bahanyetsi ba ileng ba se bolela ka Bakreste ba pele?
7 Jesu o ile a re balateli ba hae ba lokela ho thaba esita leha batho “ka leshano ba bua ntho ea mofuta o mong le o mong e khopo” ka bona ka lebaka la hae. (Matheu 5:11) Ka sebele sena se ile sa etsahalla Bakreste ba pele. Ha moapostola Pauluse a ne a tšoeroe Roma, hoo e ka bang ka 59-61 C.E., baeta-pele ba moo ba Bajuda ba ile ba re ka Bakreste: “Kannete mabapi le lequloana lena rea tseba hore hohle ho buuoa hampe ka lona.” (Liketso 28:22) Pauluse le Silase ba ile ba qosoa ka hore ‘ba ferekantse lefatše leo ho ahiloeng ho lona,’ ka ho etsa lintho tse “hanyetsanang le melao-taelo ea Cesare.”—Liketso 17:6, 7.
8 Ha rahistori K. S. Latourette a ngola ka Bakreste mehleng ea ’Muso oa Roma, o ile a re: “Liqoso li ne li sa tšoane. Ka lebaka la ho hana ho kopanela meketeng ea bohetene Bakreste ba ne ba bitsoa ba latolang boteng ba Molimo. Ka lebaka la ho ikarola mekhoeng e mengata ea bophelo ba sechaba—meketeng ea bohetene, boithabisong bo etsoang phatlalatsa . . .—ba ile ba songoa ka hore ke batho ba hloileng moloko oa batho. . . . Ho ne ho boleloa hore ba batona le ba batšehali ba ne ba kopana bosiu . . . le hore seo se ne se lateloa ke boitšoaro bo hlephileng ba ho kopanela liphate. . . . Taba ea hore ebe [Sehopotso sa lefu la Kreste] se ne se ketekoa feela ka pel’a balumeli e ile ea tsosa menyenyetsi ea hore kamehla Bakreste ba ne ba etsa sehlabelo ka lesea ’me ba noa mali a lona ba bile ba ja nama ea lona.” Hape, kahobane Bakreste ba pele ba ne ba hana ho rapela moemphera, ba ne ba qosoa ka hore ke lira tsa ’Muso.
9. Bakreste ba lekholong la pele la lilemo ba ile ba itšoara joang ha ba qosoa ka liqoso tsa bohata, hona boemo bo joang kajeno?
9 Liqoso tseo tsa bohata ha lia ka tsa thibela Bakreste ba pele ho phetha thōmo ea bona ea ho bolela litaba tse molemo tsa ’Muso. Ka 60-61 C.E., Pauluse o ile a khona ho bua ka ‘litaba tse molemo’ tse neng “li beha litholoana le ho eketseha lefatšeng lohle” le tse ileng tsa “boleloa pōpong eohle e tlas’a leholimo.” (Bakolose 1:5, 6, 23) Le kajeno ho etsahala se tšoanang. Lipaki Tsa Jehova li qosoa ka bohata, feela joaloka Bakreste ba lekholong la pele la lilemo. Leha ho le joalo, kajeno mosebetsi oa ho bolela molaetsa oa ’Muso oa atleha ’me o tlisetsa ba kopanelang ho oona thabo e khōlō.
Ba Thabela ho Hlorisoa Joaloka Baprofeta
10, 11. (a) Jesu o ile a phetha taba ea hae e mabapi le lebaka la borobong la thabo ka ho re’ng? (b) Ke hobane’ng ha baprofeta ba ne ba hlorisoa? Fana ka mehlala.
10 Jesu o ile a phetha taba ea hae e mabapi le lebaka la borobong la thabo ka ho re: “Thabang . . . , etsoe ba ile ba hlorisa baprofeta ka tsela eo pele ho lōna.” (Matheu 5:12) Baprofeta bao Jehova a ileng a ba roma hore ba lemose Baiseraele ba sa tšepahaleng ba ne ba sa amoheloe hantle ebile hangata ba ne ba hlorisoa. (Jeremia 7:25, 26) Moapostola Pauluse o ile a paka sena, ha a ne a ngola a re: “Ke eng hape eo nka e buang? Etsoe ke tla haelloa ke nako haeba ke tsoela pele ho pheta ka . . . baprofeta ba bang, bao ka tumelo . . . ba [ileng] ba amohela teko ea bona ka litšomo le lichapo, ho feta moo, ka litlamo le lichankana.”—Baheberu 11:32-38.
11 Baprofeta ba bangata ba Jehova ba ile ba bolaoa ka sabole nakong ea puso ea Morena Akabe ea khopo le mosali oa hae Jezebele. (1 Marena 18:4, 13; 19:10) Moprofeta Jeremia o ile a kenngoa metšoasong ’me hamorao a akheloa lemeneng le seretse. (Jeremia 20:1, 2; 38:6) Moprofeta Daniele o ile a lahleloa ka sekoting sa litau. (Daniele 6:16, 17) Baprofeta bana ba pele ho mehla ea Bokreste, kaofela ba ile ba hlorisoa kahobane ba ne ba emela borapeli bo hloekileng ba Jehova. Baeta-pele ba bolumeli ba Bajuda ba ile ba hlorisa baprofeta ba bangata. Jesu o ile a re bangoli le Bafarisi ke “bara ba ba ileng ba bolaea baprofeta.”—Matheu 23:31.
12. Ke hobane’ng ha rōna re le Lipaki Tsa Jehova re ho nka e le tlotla ho hlorisoa joaloka baprofeta ba boholo-holo?
12 Kajeno, re le Lipaki Tsa Jehova, hangata rea hlorisoa kahobane re bolela litaba tse molemo tsa ’Muso ka cheseho. Lira tsa rōna li re qosa ka hore re “sokolla batho ka likhoka,” empa rea tseba hore barapeli ba tšepahalang ba Jehova ba tlileng pele ho rōna le bona ba ile ba qosoa ka tsela e tšoanang. (Jeremia 11:21; 20:8, 11) Re ho nka e le tlotla ho utloa bohloko ka lebaka le tšoanang le la baprofeta ba boholo-holo. Morutuoa Jakobo o ile a ngola a re: “Barab’eso, nkang baprofeta ba ileng ba bua ka lebitso la Jehova e le mohlala oa ho utloisoa bohloko ke bobe le ho se fele pelo. Bonang! Re phatlalatsa hore ba mameletseng ba thabile.”—Jakobo 5:10, 11.
Mabaka a Matla a ho ba ba Thabileng
13. (a) Ke hobane’ng ha re sa nyahamisoe ke mahloriso? (b) Ke eng e re thusang ho ema re tiile, hona see ke bopaki ba eng?
13 Ho e-na le hore re nyahamisoe ke mahloriso, re tšelisoa ke hore re tsamaea mehatong ea baprofeta, ea Bakreste ba pele le ea Kreste Jesu ka boeena. (1 Petrose 2:21) Mangolo a etsa hore re thabe haholo, joalokaha mantsoe a latelang a moapostola Petrose a bontša: “Baratuoa, le se ke la makatsoa ke ho cha ho har’a lōna, ho le etsahallang hore e be teko, joalokaha eka le hlaheloa ke ntho e sa tloaelehang. Haeba le ntse le nyelisetsoa lebitso la Kreste, lea thaba, hobane moea oa khanya, moea oa Molimo, o lutse holim’a lōna.” (1 Petrose 4:12, 14) Re tseba ka phihlelo hore re khona ho ema re tiile ha re hlorisoa hobane feela moea oa Jehova o holim’a rōna ’me oa re matlafatsa. Tšehetso ea moea o halalelang ke bopaki ba hore Jehova oa re hlohonolofatsa, ’me sena se re thabisa haholo.—Pesaleme ea 5:12; Bafilipi 1:27-29.
14. Re na le mabaka afe a ho thaba ha re hlorisoa ka lebaka la ho loka?
14 Lebaka le leng le etsang hore ho hanyetsoa le ho hlorisoa ka lebaka la ho loka ho re thabise ke hobane seo se paka hore re le Bakreste ba ’nete, re phela ka boinehelo ba bomolimo. Moapostola Pauluse o ile a ngola a re: “Bohle ba lakatsang ho phela ka boinehelo ba bomolimo kamanong le Kreste Jesu le bona ba tla hlorisoa.” (2 Timothea 3:12) Re thaba haholo ha re nahana ka hore ho tšepahala ha rōna ha re lekoa ho fana ka karabo e eketsehileng qosong ea Satane ea hore libōpuoa tsohle tsa Jehova li Mo sebeletsa ka lebaka la boithati. (Jobo 1:9-11; 2:3, 4) Ho sa tsotellehe hore na re phetha karolo e nyenyane hakae ho tlosoeng ha qoso bobusing bo lokileng ba Jehova, re thabela seo re ka khonang ho se etsa.—Liproverbia 27:11.
Le Tlōle ke Thabo ka Lebaka la Moputso
15, 16. (a) Jesu o ile a fana ka lebaka lefe la hore re ‘thabe le ho tlōla ke thabo’? (b) Bakreste ba tlotsitsoeng ba boloketsoe moputso ofe maholimong, ’me bo-mphato ba bona ba “linku tse ling” bona ba tla fumana moputso ofe?
15 Jesu o ile a fana ka lebaka le eketsehileng la ho thaba ha re buuoa hampe le ha re hlorisoa joaloka baprofeta ba boholo-holo. Ho elella qetellong ea lebaka la borobong la thabo, o ile a re: “Thabang le tlōle ke thabo, kaha moputso oa lōna o moholo maholimong.” (Matheu 5:12) Moapostola Pauluse o ile a ngola a re: “Moputso oo sebe se o lefang ke lefu, empa mpho eo Molimo a fanang ka eona ke bophelo bo sa feleng ka Kreste Jesu Morena oa rōna.” (Baroma 6:23) Ke ’nete hore ‘moputso ona o moholo’ ke bophelo, empa hase moputso oo re o fumanang ka ho o sebeletsa. Ke mpho e sa lefelloeng. Jesu o ile a re moputso oo o “maholimong” hobane o tsoa ho Jehova.
16 Batlotsuoa ba amohela “moqhaka oa bophelo,” e leng bophelo ba ho se shoe hammoho le Kreste leholimong. (Jakobo 1:12, 17) “Linku tse ling,” e leng ba nang le tšepo ea ho phela lefatšeng, li lebeletse ho rua bophelo bo sa feleng lefatšeng la paradeise. (Johanne 10:16; Tšenolo 21:3-5) Lihlopha tsena ka bobeli, ha li fumane “moputso” ona ka ho o sebeletsa. Batlotsuoa hammoho le “linku tse ling” ba amohela moputso oa bona ka lebaka la “mosa o sa tšoanelang o fetisisang” oa Jehova, o ileng oa susumeletsa moapostola Pauluse hore a re: “Ho ke ho lebohuoe Molimo bakeng sa mpho ea hae e ke keng ea hlalosoa e sa lefelloeng.”—2 Bakorinthe 9:14, 15.
17. Ke hobane’ng ha re lokela ho thaba ha re hlorisoa le ho ‘tlōla ke thabo’ ka tsela ea tšoantšetso?
17 Ha moapostola Pauluse a ne a ngolla Bakreste, bao ba bang ba bona ba neng ba tla tloha ba hlorisoa ka sehlōhō ke Moemphera Nero, o ile a re: “A re thabeng ha re ntse re le matšoenyehong, kaha rea tseba hore matšoenyeho a hlahisa mamello; mamello, eona, e hlahisa boemo bo amohelehang; boemo bo amohelehang, bona, bo hlahisa tšepo, ’me tšepo ha e soetse.” O ile a boela a re: “Thabang tšepong. Mamellang tlas’a matšoenyeho.” (Baroma 5:3-5; 12:12) Ho sa tsotellehe hore na re na le tšepo ea ho phela leholimong kapa lefatšeng, moputso oo re o fumanang ka lebaka la ho tšepahala ha re lekoa o feta hōle ntho leha e le efe eo re tšoanetseng ho e fumana. Thabo eo re nang le eona ka lebaka la tšepo ea ho phela ka ho sa feleng re sebeletsa le ho rorisa Ntate oa rōna ea lerato, Jehova, tlas’a Morena Jesu Kreste, e ke ke ea lekanngoa. Ka tsela ea tšoantšetso, re ‘tlōla ke thabo.’
18. Re ka lebella hore lichaba li etse’ng ha bofelo bo ntse bo atamela, ’me Jehova o tla etsa’ng?
18 Linaheng tse ling, Lipaki Tsa Jehova li ’nile tsa hlorisoa ’me li ntse li hlorisoa. Boprofeteng ba hae bo mabapi le qetello ea tsamaiso ea lintho, Jesu o ile a lemosa Bakreste ba ’nete a re: “Le tla hlouoa ke lichaba tsohle ka lebaka la lebitso la ka.” (Matheu 24:9) Ha re ntse re atamela bofelo, Satane o tla etsa hore lichaba li bonahatse lehloeo la tsona khahlanong le batho ba Jehova. (Ezekiele 38:10-12, 14-16) Seo e tla ba pontšo ea hore e se e le nako ea hore Jehova a nke khato. “Ka sebele ke tla itlotlisa ke ikhalaletse ’me ke itsebahatse ka pel’a mahlo a lichaba tse ngata; ’me li tla lokela ho tseba hore ke ’na Jehova.” (Ezekiele 38:23) Kahoo Jehova o tla halaletsa lebitso la hae le leholo ’me a lopolle batho ba hae mahlorisong. Ka lebaka leo, “ho thaba motho ea ntseng a tsoela pele ho mamella.”—Jakobo 1:12.
19. Ha re ntse re letetse “letsatsi la Jehova” le leholo, re lokela ho etsa’ng?
19 Ha “letsatsi la Jehova” le leholo le ntse le atamela ka potlako, a re nyakalleng hobane re “nkiloe [re] le ba tšoaneloang ke ho hlompholloa ka lebaka la” lebitso la Jesu. (2 Petrose 3:10-13; Liketso 5:41) Joaloka Bakreste ba pele, e se eka re ka tsoela pele re “sa khaotse ho ruta le ho bolela litaba tse molemo mabapi le Kreste” le ka puso ea ’Muso oa hae ha re ntse re letetse moputso oa rōna lefatšeng le lecha la ho loka la Jehova.—Liketso 5:42; Jakobo 5:11.
Tlhahlobo
• Ho hlorisoa ka lebaka la ho loka ho bolela’ng?
• Mahloriso a ile a e-ba le phello efe ho Bakreste ba pele?
• Ke hobane’ng ha ho ka thoe Lipaki Tsa Jehova li hlorisoa joaloka baprofeta ba boholo-holo?
• Ke hobane’ng ha re lokela ho ‘thaba le ho tlōla ke thabo’ ha re hlorisoa?
[Litšoantšo tse leqepheng la 16, 17]
“Ho thaba lōna ha batho ba le nyelisa ’me ba le hlorisa”
[Tlhaloso ea Moo Setšoantšo se Nkiloeng Teng]
Group in prison: Chicago Herald-American