Pontšo—Na U E Ela Hloko?

“RE BATLA hore batho ba naha e ’ngoe le e ’ngoe ba thabele nala, boiketlo le thabo. Mokhoa oa ho finyella sena ke ka ho lebisa lefatšeng le lokolohileng libetseng tsa nuclear, le le se nang pefo.”—Perestroika, ea moeta-pele oa Soviet Union Mikhail Gorbachev.

Ho na le lebaka le utloahalang la hore e be ba bangata ha ba lumele hore motho o hlile o na le matla a ho hlahisa maemo a joalo a lefatše. Moeta-pele e mong, Jesu Kreste, o tšepisitse ntho e ’ngoe e kholoanyane—Iefatše la paradeise moo esita le lefu le tla beng le felisitsoe. (Mattheu 5:5; Luka 23:43; Johanne 5:28, 29) Ha e le hantle, mokhoa oa ho etsa sena ke ka hore Molimo o kene lipakeng. Ha a arabela potso ea hore na ke “neng” ho tla kenoa joalo lipakeng, Jesu o ile a re: “’Muso oa Molimo ha o tle ka ho lemohuoa.” Qalong, ke feela batho ba chatsi ho lemoheng ba nang le mahlo a tšoantšetso a ntsu ba neng ba tla o lemoha. (Luka 17:20, 37) Hobane’ng ho le joalo?

Lebaka leo ka lona re Hlokang Pontšo

Ho tloha ho nyoloheleng ha hae leholimong, Jesu Kreste o ‘ikahetse leseling le sa atameloeng, moo ho seng le a mong ho batho ea kileng a ’mona, eo ho seng ea ka ’monang.’ (1 Timothea 6:16) Ka hona, mahlo a nama a batho a ke ke a hlola a ’mona hape. Joalokaha Jesu a ile a bolela letsatsing la ho qetela la bophelo ba hae ba lefatšeng: “Ho se ho se hokae, ’me lefatše ha le sa tla mpona.” (Johanne 14:19) A ka bonoa feela ka tsela ea tšoantšetso.—Ba-Efese 1:18; Tšenolo 1:7.

Leha ho le joalo, Jesu o ile a bolella barutuoa ba hae hore ho ne ho tla ba bonolo ho bona ho lemoha ha ’Muso oa Molimo o se o qalile ho busa. Ka tsela efe? Ka pontšo. Ha a arabela potso, ‘Ntho eo e tla ba pontšo ea ho tla ha hae ke efe?’ Jesu o ile a fana ka bopaki bo bonahalang ba ho busa ha hae ho sa bonahaleng ha kamoso.—Mattheu 24:3.

Ho akarellelitsoeng pontšong e ne e le papiso e bontšang hore na ke batho ba mofuta ofe ba neng ba tla fumana molemo pusong eo. Jesu o itse: “Moo setopo se leng teng, ke moo lintsu li tla bōkana hammoho teng.” (Mattheu 24:28, NW) Bohle ba batlang ho pholoha bofelo ba tsamaiso ena ea joale ba pholohela ka lefatšeng le lecha la Molimo, ba tlameha ho “bōkana hammoho” ’me ba thabele lijo tsa moea ’moho le “bakhethoa” ba Kreste ba kang lintsu.—Mattheu 24:31, 45-47.

Ho Itebela Khahlanong le ho Hloka Mamello

Ha ho na motho ea ka sebetsang lipalo le ho fumana hore na letsatsi la bofelo ba tsamaiso ena e khopo ea joale le tla tla neng. Jesu o itse: “Ha e le bakeng sa letsatsi leo le hora eo, ha ho ea tsebang, leha e le mangeloi a leholimong, leha e le Mora, ha e se Ntate feela.”—Mareka 13:32, 33.

Na leha ho le joalo ho ka etsahala hore e be pontšo e ka etsahala melokong e mengata ea batho? Le hanyenyane. Pontšo e tla etsahala nakong ea moloko o le mong o khethehileng. Moloko ona o boneng qalo ea pontšo o tla boetse o bone tlhōrō ea eona nakong ea “mahlomola ao ho e-song ho ka ho bonoa a makalo ha e sa le le tšimolohong ea hlolo.” Bo-rahistori ba bararo, Mattheu, Mareka, le Luka, ba ile ba tlaleha tšepiso e tiileng ea Jesu ka sena.—Mareka 13:19, 30; Mattheu 24:13, 21, 22, 34; Luka 21:28, 32.

Leha ho le joalo, ho na le kotsi ea ho fetoha ea hlokang mamello. Ho se ho fetile lilemo tse mashome a supileng a metso e mene haesale Ntoa ea I ea Lefatše e qhoma ka 1914. Ponong ea batho, hona ho ka ’na ha bonahala e le nako e telele haholo. Empa Bakreste ba bang ba nang le mahlo a kang a ntsu ba ileng ba bona Ntoa ea I ea Lefatše ba ntse ba le sehlahlo haholo. Moloko oa bona ha o e-s’o fete.

Ha a ne a fana ka pontšo, Jesu o ile a lemosa ka kotsi ea ho fetoha ea hlokang mamello. O ile a bua ka batho ka bomong ba neng ba tla re ka lipelong tsa bona: “Moren’a ka o liehile ho fihla.” Jesu o ile a bontša hore boikutlo bo joalo, ha bo sa thibeloe, bo ka isa ketsong e bothoto. (Mattheu 24:48-51) Baapostola ba Kreste ba ile ba bua ho hongata ka sena.

“Basomi”

Ho latela mongoli oa Bibele Juda, baapostola ba Kreste ba ile ba bolela temoso e latelang: “Mehleng ea bofelo ho tla tla basomi ba laoloang ke litakatso tsa bona tse khopo.”—Juda 17, 18, TLP.

Takatso ea bophelo lefatšeng le lecha le hloekileng e ka nkeloa sebaka habonolo ke ‘litakatso tse khopo.’ Sena se kotsi ka ho khethehileng kajeno ka baka la mekhoa ea lefatše ea ho itlhahisa pooaneng le ea puisano. Historing ea batho ha ho mohla pefo, kopano le meea, le boitšoaro bo bobe ba botona le botšehali li kileng tsa pepesoa haholo hakana. Hangata ke tsona tsa sehlooho tse hlahang ’minong le seea-Ie-moeeng, ’me li bonoa mananeong a mangata a TV, le li-video, liphatlalatso, libuka, le limakasine,

Pontšo e supa qetello ea lintho tse joalo tse khopo. Joalokaha ho ka lebelloa, batho ba bang ba lakatsang lintho tse khopo ba soma pontšo. Joalokaha ho hlile ha boleloa, ba phea khang hore “ntho tsohle li sa ntse li tiile, li sa le joale ka qalong ha li hloloa.”—2 Petrose 3:3, 4.

‘Lerato lea Tapa’

Haufinyane, mongoli oa Leamerika ea lilemo li 75, Paul Bowles, o ile a tšoara lipuisano le bangoli ba makasine oa Newsweek. Ha a arabela potso, “Pono ea hao ke efe ka lefatše?” Bowles o ile a re: “Tabeng ea boitšoaro lefatše le arohile litsekana. Ha ho sa le motho ea tšepahalang ka tsela eo batho ba neng ba tšepahala ka eona lilemong tse 60 tse fetileng. Ho ne ho e-na le kutloisiso ea hore na motho ea hlomphehang ke ea joang; e ne e le tšobotsi ea bohlokoa ea moetlo oa rōna oa Bophirima. Hona joale ha ho ea [tsotellang]. Ho boetse ho hatisoa ka matla bohlokoa ba chelete.”

Boemo bona ke bona hantle feela boo Bibele e ileng ea bo bolela e sa le pele. Jesu o ile a profeta: “Lerato la ba bangata le tla tapa ka baka la ngatafalo ea bokhopo.” (Mattheu 24:12; 2 Timothea 3:1-5) Ha boikhabi le meharo li eketseha, lerato ho Molimo lea qepha. Batho ba bangata ba bontša hore ba etelletsa litakatso tsa bona pele ho melao ea Molimo ka ho kopanela litlōlong tsa molao, botšosing, mekhoeng e bolotsana ea khoebo, boitšoarong bo bobe ba botona le botšehali, le tšebelisong e mpe ea lithethefatsi.

Ba bang ba hlokomela ho phethahala ha pontšo empa ba hlōleha ho itšoara tumellanong le eona ka baka la hobane ba tšoarehile ho ithabiseng bobona. Ka lehlakoreng le leng, ho ela pontšo hloko ho hloka mamello ea ho bontša lerato leo e seng la boithati ho Molimo le ho oa habo motho.—Mattheu 24:13, 14.

“Lipelaelo tsa Bophelo”

Jesu o ile a boela a lemosa hore, ntle ho boithabiso ba boikhabi, litlhokahalo tse utloahalang tsa nama li ne li tla tšoasa ba bang hoo ba neng ba tla hlokomoloha pontšo. O ile a phehella: “Le iponele, hore lipelo tsa lōna li se ke tsa imeloa ke ho ja le ho noa hampe, le ke lipelaelo tsa bophelo bona, ’me letsatsi leo la le tšoara sehlōhō; hobane le tla oela ba ahileng lefatšeng lohle joale ka sefi.”—Luka 21:34, 35.

Ha e le hantle, Bibele, e khothaletsa bophelo bo thabileng ba lelapa. (Ba-Efese 5:24–6:4) Sena hangata se hloka hore hlooho ea lelapa e tšoarehe mosebetsing o mong o itseng kapa khoebong e itseng e le hore e ka fana ka lintho tse hlokahalang ho mosali oa eona le bana. (1 Timothea 5:8) Leha ho le joalo, e ne e ka ba bothoto ho motho ho lumella hore bophelo ba hae bo likolohe ka ho feletseng lelapeng, khoebong, le linthong tse bonahalang. Ka baka la kotsi ena, Jesu o ile a lemosa: “Joale ka ha ho no ho etsahale mehleng ea Noe, ho tla ba joalo mehleng ea Mor’a motho. Ho no ho jeoa, ho nooa, ho nyaloa, ho nyalisoa, ho fihlela letsatsi leo Noe a ileng a kena arekeng ka lona, moroallo oa metsi oa ba oa fihla, oa ba timetsa kaofela. . . . Ho tla ba joalo ka letsatsi leo Mor’a motho a tla hlaha ka lona.”—Luka 17:26-30; Mattheu 24:36-39.

‘Ho Nkoa’ kapa ‘ho Tloheloa’?

Hora e haufi. Haufinyane, ’Muso oa Molimo o tla kenella ho lokisa litaba. Joale motho e mong le e mong o tla ameha ka tsela e ’ngoe litseleng tse peli. Joalokaha Jesu a hlalositse: “Mohlang oo, ho banna ba babeli ba tla beng ba le tšimong, e mong o tla nkoa, e mong a siuoe; ho basali ba babeli ba tla beng ba sila leloaleng, e mong o tla nkoa, e mong a siuoe.”—Mattheu 24:40, 41.

Ha nako eo ea makhaola-khang e fihla, boemo ba hao e tla be e le bofe? Na u tla tlohelloa hore u timetsoe, kapa u tla nkeloa ho pholoha? Ho u tataisa ka tsela e nepahetseng, nahana hape ka papiso e ileng ea fanoa ke Jesu: “Moo setopo se leng teng, ke moo lintsu le tsona li tla bōkana hammoho teng.”—Luka 17:34-37, NW; Mattheu 24:28, NW.

Kahoo Jesu o ne a hatisa joalo tlhokahalo ea tšebetso e bontšang ho bonela hōle le e bontšang bonngoe. Ba nkoang bakeng sa pholoho ke ba bokanang hammoho ka mehla ’me ba fumana molemo lijong tsa moea tseo Molimo o fanang ka tsona. Ba limillione ba utloile hore phepo e joalo ea moea e ba teng ka ho kopanela haufi-ufi le e ’ngoe ea liphutheho tsa Lipaki tsa Jehova tse ka holimo ho 55 000 le ka ho ithuta litokollo tse theiloeng Bibeleng joaloka ena eo u ntseng u e bala.

Lipaki tsa Jehova tse ka holimo ho limillione tse tharo li bontša ho lumela pontšong ka ho arolelana le baahelani ba tsona ‘litaba tse molemo tsa ’muso.’ (Mattheu 24:14, NW) Na u arabela hamolemo litabeng tse molemo? Haeba ho joalo, u tla nka ka ho teba tšepiso ea ho pholohela lefatšeng la paradeise.

[Setšoantšo se leqepheng la 5]

Ba bangata ba tšoarehile boithabisong hoo ba hlokomolohang pontšo

[Setšoantšo se leqepheng la 6]

Ho ela pontšo hloko ho akarelletsa ho bokana hammoho ho iphepa ka Lentsoe la Molimo