Mesebetsi e Eketsehileng Nakong ea ho ba Teng ha Kreste
“Ke moo Morena a tla bolella ba ka letsohong la hae le letona, a re: Tlong, lōna ba hlohonolofalitsoeng ke Ntate, le amohele ’muso oo le o lokiselitsoeng ha e sa le lefatše le theoa.”—MATTHEU 25:34.
1. Ke ka tsela efe pa·rou·siʹa ea Kreste e ’nileng ea e-ba joaloka “mehla ea Noe”?
HO BA teng ha Kreste—ke ketsahalo eo e leng khale e lebeletsoe! Nako e joaloka ‘mehleng ea Noe,’ eo Jesu a buileng ka eona mabapi le “bofelo ba tsamaiso ea lintho,” e fihlile ka selemo sa 1914. (Mattheu 24:3, 37, NW) Empa ho ba teng ha Kreste, kapa pa·rou·siʹa, ho ne ho tla bolela eng ho masala a tlotsitsoeng a “lekhoba le tšepahalang le le masene”? (Mattheu 24:45, NW) Ho ne ho tla bolela hore a lokela ho ba mafolo-folo ka ho eketsehileng joaloka bajari ba leseli! Lintho tse babatsehang li ne li tla tloha li etsahala! Mosebetsi o moholo ka mokhoa o ikhethang oa ho bolela o ne o le lekhatheng la ho qala.
2. Ke ho hloekisoa hofe ho etsahetseng phethahatsong ea Malakia 3:1-5?
2 Leha ho le joalo, tabeng ea pele, ho ne ho hlokahala hore Bakreste bana ba tlotsitsoeng ba hloekisoe. Joalokaha Malakia 3:1-5 e ne e boletse esale pele, Jehova Molimo le ‘lenģosa la hae la selekane,’ Jesu Kreste, ba ile ba tla ho tla lekola tempele ea moea ka nako ea selemo ka 1918. Kahlolo e ne e lokela ho qala ka “ntlo ea Molimo.” (1 Petrose 4:17) Malakia 3:3 e ile ea bolela esale pele: “[Jehova] o tla lula, a ntse a qhibilisa, a hloekisa silevera; o tla hloekisa bara ba Levi, a ba tšeke joale ka gauda le joale ka silevera.” E ne e le nako ea ho tšeka le ho hloekisa.
3. Ke hobane’ng ha e ne e le habohlokoa hore ho hloekisoa ha moea ho etsahale?
3 Ka ho feta nakong ena ea kahlolo, e ileng ea fihla tlhōrōng ka 1918, masala a sehlopha sa lekhoba a ile a hloekisoa litšileng tsa lefatše le tsa bolumeli. Ke hobane’ng ha Jehova a ile a ba hloekisa? Hobane tempele ea hae ea moea e ne e ameha. Ena ke tlhophiso e kang ea tempele ea ho rapela Jehova motheong oa sehlabelo sa pheko sa Jesu Kreste. Jehova o ne a batla hore tempele ea hae e be boemong bo hloekileng e le hore ha bongata bo boholo ba barapeli ba nang le tšepo ea lefatše ba tlisoa ho eona, ba fumane sebaka seo bobusi ba hae ba bokahohleng bo hlomphuoang, moo lebitso la hae la bomolimo le halaletsoang, le moo melao ea hae e lokileng e mameloang. Kahoo, ba ne ba tla ananela Jehova ’me ba kopanele ho tsebahatseng merero ea hae e hlollang.
Litokelo tse Eketsehileng
4, 5. (a) Ke joang potso e ileng ea botsoa ke Jesu Kreste e phephetsang e mong le e mong oa sehlopha sa lekhoba kajeno? (b) Ke ka litsela life lipolelo “lekhoba le tšepahalang le le masene” le “bahlanka ba hae” li lokelang ho utloisisoa? (c) Ke thōmo efe eo Jesu a e neileng lekhoba?
4 Ka 1919 sehlopha sa lekhoba se hloekisitsoeng se ne se ka lebella mesebetsi e eketsehang ka mehla. Morao koana ka 1914, Jesu Kreste, Monghali oa sona, o ne a amohetse ’Muso oa leholimo. Ha a khutlela ho basebeletsi ba ntlo ea hae ka sepheo sa ho lekola “bahlanka” ba hae bohle, o ne a e-na le tlhompho ea borena, eo a neng a se na eona ha a ne a le lefatšeng. O ile a fumana eng? Na sehlopha sa lekhoba se ne se tšoarehile ho hlokomeleng lithahasello tsa Monghali oa sona? Joalokaha ho tlalehiloe ho Mattheu 24:45-47, Jesu o ile a botsa potso e neng e phephetsa e mong le e mong oa barutuoa ba tlotsitsoeng hore a hlahlobisise boinehelo ba hae ba botho ho Messia oa Jehova: “Hantle-ntle ke mang lekhoba le tšepahalang le le masene leo monghali oa lona a le khethetseng ho hlokomela bahlanka ba hae, ho ba nea lijo tsa bona ka nako e loketseng? Lekhoba leo le tla thaba hakaakang ha monghali oa lona a fihla a le fumana le etsa joalo. Kannete ke re ho lōna, O tla le khetha hore le hlokomele lintho tsohle tsa hae.”
5 Ka ho hlakileng, tlhaloso ea Jesu ea lekhoba lena le tšepahalang e ke ke ea sebelisoa ho motho leha e le ofe a le mong. Che, empa e hlalosa phutheho ea Kreste ea ba tlotsitsoeng ba tšepahalang ka kakaretso, e le sehlopha. Bahlanka bona ke balateli ba Kreste ba tlotsitsoeng e le batho ka bomong. Jesu o ne a tseba hore ka mali a hae o tla reka balateli ba hae ba tlotsitsoeng, kahoo ka nepo ha a ba akareletsa o ile a bua ka bona e le lekhoba la hae. Ba-Korinthe ba Pele 7:23 (NW) e re ka bona: “Le rekiloe ka theko; khaotsang ho ba makhoba a batho.” Jesu o rometse sehlopha sa hae sa lekhoba hore se khantše leseli la sona e le hore se hulele ba bang ho sona le ho etsa barutuoa ba bang le ho fepa bahlanka ba hae mohato ka mohato ka ho ba fa lijo tsa moea ka nako e loketseng.
6. Lekhoba le ile la putsoa joang ka mor’a ho lekola ha Jesu?
6 Ho tloha nakong eo ho ba teng ha Kreste ho qalileng ka eona ho theosa ho tla fihlela ka 1918, sehlopha sa lekhoba, ho sa tsotellehe ho se ratoe, mahloriso, haesita le pherekano, se ne se ntse se batla menyetla ea ho fa bahlanka lijo tse nakong. Ke sona seo Monghali a se fumaneng ha a qala ho lekola ha hae. Morena Jesu o ne a thabile, ’me ka 1919 a bolela ha sehlopha seo se tšepahalang se amohelehang e le se thabileng. Moputso o thabisang oa lekhoba e bile ofe bakeng sa ho etsa seo Monghali oa lōna a le khethetseng ho se etsa? Ho phahamisetsoa boemong bo boholoanyane! E, le ile la fuoa boikarabelo bo boholoanyane ba ho ntšetsa lithahasello tsa Monghali oa lōna pele. Kahoo, kaha Monghali e ne e se e le Morena oa leholimo, thepa ea hae ea lefatšeng e ile ea e-ba ea bohlokoa bo boholoanyane.
7, 8. (a) ‘Lintho tsohle’ tsa Monghali ke eng? (b) Ho hlokoa eng ho lekhoba ha le hlokomela lintho tsee?
7 Kahoo, “lintho tsohle tsa hae” ke eng? Tsena ke lintho tsohle tsa moea tsa lefatšeng tseo e bileng thepa ea Kreste kamanong le matla a hae e le Morena oa leholimo. Ka sebele sena se ne se akareletsa thōmo ea ho etsa barutuoa ba Kreste, ka tokelo e hlollang ea ho sebeletsa e le baemeli ba ’Muso oa Molimo o hlomiloeng lichabeng tsohle tsa lefatše.
8 Ho phahamisetsoa ho joalo boemong bo boholoanyane ba ho hlokomela lintho tsohle tsa Monghali ho ne ho hloka hore sehlopha sa lekhoba se fane ka nako le tlhokomelo tse eketsehileng ho phetheng mosebetsi oa ’Muso, le ho hōlisa meaho e meholoanyane bakeng sa mosebetsi oo. Joale se na le tšimo e khōloanyane ea mosebetsi—lefatše lohle leo ho ahiloeng ho lona.
Ho Bokella Linku
9. Ho eketsoa ha mesebetsi ea lekhoba ho bile le phello efe?
9 Ka hona, sehlopha sa lekhoba le tšepahalang le le masene sa Kreste se bontšitse kutlo ka ho eketsa mesebetsi ea sona. Phello e bile efe? Ba ho qetela ba batlotsuoa ba 144 000 ba ile ba bokelloa. Kahoo pono ea Johanne joalokaha e tlalehiloe ho Tšenolo 7:9-17 e ile ea e-ba taba ea sebele ka tsela e hlollang, le e khothatsang. Haholo-holo ho tloha ka 1935 sehlopha sa lekhoba se ile sa bona ho phuthulloa ha phethahatso ea pono ena hanyane ka hanyane. Ho tsoa likarolong tsohle tsa lefatše, “bongata bo boholo ba batho” ba limillione bo tletse meeling ea tempele ea Jehova ea moea joaloka barapeli ba hae. Lengeloi la Jehova le ile la bolella Johanne hore ha ho motho ea ka khonang ho bala bongata bona bo boholo. Hoo ho bolela hore ha hoa lekanyetsoa palo ea batho bao sehlopha sa lekhoba se lokelang ho ba tlisa ka tempeleng ea Jehova ea moea. Hafeela tsela e ntse e bulehile, mosebetsi oa ho ba bokella o tla ’ne o tsoele pele.
10. Lekhoba le ameha mosebetsing ofe o lerato kajeno?
10 Sehlopha sa lekhoba le tšepahalang se na le boikarabelo bo boima ba ho hlokomela manane a ntseng a tsoela pele ho eketseha a “linku tse ling,” ka ho tseba hore bana ba kang linku ba tsoang lichabeng tsohle ba rateha haholo ho Monghali, Jesu. Ha e le hantle ke mohlape oa hae. (Johanne 10:16; Liketso 20:28; 1 Petrose 5:2-4) Kahoo ka lerato ho Monghali le ho linku, ka thabo sehlopha sa lekhoba se hlokomela litlhoko tsa moea tsa bongata bo boholo.
11-13. Eo e neng e le mopresidente oa Mokhatlo oa Watch Tower o ile a bolela eng e loketseng mabapi le mosebetsi oa lekhoba?
11 E, karolo e khōloanyane ea thōmo ea lekhoba ea ho jara leseli e akareletsa ho bokelloa ha bafo bana ba lefatšeng ba ’Muso oa Molimo. Ha a tšohla mesebetsi e ntseng e eketseha ka mehla ea sehlopha sa lekhoba, F. W. Franz, eo e neng e le mopresidente oa Mokhatlo oa Watch Tower, pele ho lefu la hae ka December 1992, o ile a re:
12 “Ka linako tsohle Jesu Kreste o ’nile a sebelisa mokhatlo o hlophisitsoeng ka tsela e tsotehang ka ho eketsehileng, ho latela phihlelo ea bophelo ba ka ea lilemo tse 99. Hase motho feela tjee ea tataisang mokhatlo o hlophisitsoeng, empa e tlameha ebe ke Morena Jesu Kreste. Hobane o ’nile oa finyella lintho tse hlollang le tse tsotehang ho feta kamoo re kileng ra nahana ka teng. Kajeno re na le mokhatlo o hlophisitsoeng o eketsehileng lefatšeng ka bophara. O sebetsa Karolong ea Lefatše e ka Leboea le e ka Boroa, Bochabela le Bophirima. Ke motho a le mong feela ea ka ikarabellang bakeng sa keketseho ena e hlokomelehang—Mora oa Molimo, ea hlokometseng sehlopha sa lekhoba le tšepahalang le le masene. O ’nile a finyella boikarabelo ba hae, ’me seo ke sona se ikarabellang bakeng sa keketseho ena e hlollang eo re e boneng.
13 “Hase taba ea motho a le mong. Re na le mokhatlo o hlophisitsoeng o leng tlas’a puso ea Molimo, ’me o sebetsa ho latela puso ea Molimo, ka mokhoa oo Molimo a o tsamaisang ka ’ona. Ha ho motho lea mong, esita le mothehi oa Watch Tower Bible and Tract Society, ea ka reng ke eena ea jarang boikarabelo ba se finyeletsoeng lefatšeng ka bophara kapa eo tlotla e ka lebisoang ho eena. Ka sebele ke ntho e makatsang.” Na bohle bao e leng ba bongata bo boholo ha ba lumellane ka pelo eohle le maikutlo ao a Moena Franz ea seng a hlokahetse? E, ka sebele, ba thabetse haholo mesebetsi e eketsehileng ea sehlopha sa lekhoba.
Bafo ba ’Muso
14, 15. (a) Jesu o ne a bontša eng setšoantšong sa hae sa litalenta (Mattheu 25:14-30)? (b) Ka ho loketseng, ho latela eng ho Mattheu khaolo ea 25?
14 Ho Mattheu khaolo 25, setšoantšo sa Jesu sa linku le lipōli se hlalosa mosebetsi ona o moholo oa ho bokella bafo ba ’Muso oa Molimo lefatšeng. Setšoantšong se ka pele ho sona, setšoantšo sa litalenta, Jesu o bontša hore barutuoa ba tlotsitsoeng ba nang le tšepo ea ho busa hammoho le eena ’Musong oa hae oa leholimo ba tlameha ho sebetsa ka thata ho eketsa lintho tsa hae tsa lefatšeng. Ka ho loketseng, setšoantšong se latelang, Jesu o bontša se hlokahalang ho ba batlang ho ba bafo ba ’Muso oa hae oa leholimo.
15 Hlokomela mantsoe a hae ho Mattheu 25:31-33: “Mohla Mor’a motho a tlang a teetsoe hare ke khanya ea hae, mangeloi a e-na le eena kaofela, ke moo a tla lula teroneng ea khanya ea hae. Lichaba tsohle li tla bokelloa pel’a hae; ’me o tla khetha ba bang ho ba bang, joale ka molisa ha a khetha linku ho lipōli. O tla bea linku ka letsohong la hae le letona, a bee lipōli ho le letšehali.”
16. Ke joang lichaba li bokelloang ’me batho ba aroloang?
16 Jesu o ile a fihla ka khanya ea hae ka 1914. Ha a nka bohato, eena le mangeloi ’ohle a hae, ba ile ba hlasela le ho leleka lira tsa hae tsa bademona leholimong. Se latelang setšoantšong sa hae se re thusa ho utloisisa hore ho lula ha Jesu teroneng ea hae e khanyang ho tšoantšetsa boemo ba ho ahlola nakong ea ho ba teng ha hae. Ho bokelloa ha lichaba tsohle pel’a hae ho bolela hore Jesu o amohela lichaba tsohle e le mohlape oa hae, ka puo ea tšoantšetso. Ke mohlape o kopaneng oa linku le lipōli. Le hoja ho arola linku ho lipōli ho ka ’na ha nka nako e ka etsang karolo ea letsatsi mohlapeng oa sebele, ho aroloa ha batho ba nang le boikhethelo lefatšeng ka bophara ho nka nako e teletsana. Sena se etsahala hobane ho aroloa ho theiloe liketsong tsa motho ka mong.
17. Ke hobane’ng ha boemo kajeno bo tebile bakeng sa batho bohle?
17 Setšoantšong seo, Morena eo hape e leng Molisa o beha ba kang linku ka letsohong la hae le letona le ba kang lipōli ka letsohong la hae le letšehali. Letsoho le letona le ipaka e le kahlolo e nang le phello e molemo—bophelo bo sa feleng. Lehlakore le ka letsohong le letšehali ke kahlolo e bohloko—ea timetso e sa feleng. Boikemisetso ba Morena tabeng ena bo na le liphello tse tebileng.
18. Ke hobane’ng ha ho se bonahale ha Morena ho sa behe ka thōko motho leha e le ofe?
18 Ho se bonahale ha Mor’a motho ea busang ho beng teng ha hae, kapa pa·rou·siʹa, ha ho behelle mang kapa mang ka thōko. Batho ba eketsehileng ba kang linku kajeno ba ntse ba ikopanya le sehlopha sa lekhoba ho boleleng litaba tse molemo tsa ’Muso oa Molimo lefatšeng ka bophara, ba khantša leseli la bona. Kannete, bopaki ba bona bo fihlile likhutlong tse hōle tsa lefatše.—Mattheu 24:14.
19. Ke litšoaneleho life tsa sehlopha sa linku tse bontšoang setšoantšong sa linku le lipōli?
19 Ke hobane’ng ha Morena eo e bileng e leng Molisa a putsa batho ba sehlopha sa linku ka bokamoso bo hlohonolofalitsoeng? Ka lebaka la tšehetso ea bona ea pelo eohle mosebetsing oa ho bolela ka ’Muso le mosa oo ba o bontšang ho baena ba hae ba tlotsitsoeng, e leng hoo Jesu a ho nkang ho entsoe ho eena ka sebele. Kahoo, Mor’a motho ea matleng a borena o re ho bona: “Tlong, lōna ba hlohonolofalitsoeng ke Ntate, le amohele ’muso oo le o lokiselitsoeng ha e sa le lefatše le theoa.”—Mattheu 25:34; 28:19, 20.
Ho Thusa Morena
20, 21. Ke bopaki bofe boo linku li fanang ka bona ba hore li eme ka lehlakoreng la ’Muso?
20 Hlokomela hore ha Morena a mema linku tsena ho ja lefa la ’muso oa Molimo oa lefatšeng, lia makala. Lia ’motsa: ‘Morena, ke neng re ileng ra u etsetsa lintho tsee tsohle?’ Oa araba: “Kannete kea le bolella, ke re: Tseo le li entseng e monyenyane ho baena ba ka, le li entse ho ’na.” (Mattheu 25:40) Ha Jesu a hlaha ho Maria Magdalena ka letsatsi la hae la tsoho, o ile a bua ka baena ba hae ba moea ha a re ho eena: “U ee ho banab’eso.” (Johanne 20:17) Nakong ea ho ba teng ha hae ho sa bonahaleng, Jesu o na le masala a fokolang a baena ba hae ba moea ba 144 000 ba ntseng ba phela lefatšeng.
21 Kaha Jesu ha a bonahale o maholimong, batho bana ba kang linku ba etsa lintho tsena ho eena ka tsela e sa tobang. Ba ’mona teroneng ea hae ka mahlo a bona a tumelo feela. Jesu o ananela boiteko bohle boo ba bo etsang ba ho thusa baena ba hae ba moea, bao e tla ba majalefa-’moho le eena maholimong. Se etsoang ho baena ba hae o se nka se etsoa ho eena ka sebele. Batho ba kang linku ba ithaopela ho etsa baena ba Kreste hantle hobane ba hlokomela hore ke baena ba hae. Ba ananela hore baena ba Jesu ba moea ke baemeli ba ’Muso oa Jehova, ’me ba batla ho fana ka bopaki bo tiileng ba hore ba eme le bona ho tšehetseng ’Muso oo.
22. Sehlopha sa linku se putsoa joang? (Bapisa le Tšenolo 7:14-17.)
22 Jehova o ile a bona esale pele hore sehlopha sena sa batho ba kang linku se ne se tla hlaha nakong ena ea ho ba teng ha Mor’a hae, ’me o ba boloketse moputso o hlollang! Bongata bo boholo bo tla rua litlhohonolofatso tsa khotso mona lefatšeng nakong e thabisang ea Puso ea Lilemo tse Sekete ea Morena ea behiloeng ke Jehova, Jesu Kreste.
23. Ke joang ka tsebo linku li thusang baena ba Morena?
23 Ha re nahana ka boprofeta ba Bibele bo sebetsang nakong ea ho ba teng ha Kreste, hammoho le setšoantšo sa Jesu sa linku le lipōli, re bona eng? Sena: Hase taba ea ho etsa e mong oa baena ba moea ba Morena hantle ntle ho tsebo le ka kotsi feela ho etsang hore motho e be nku e nang le boemo bo lokileng pel’a Molimo le Morena ea behiloeng ke eena. Batho ba sehlopha sa linku ba tseba seo ba se etsang, le hoja ba sa bone Morena ea busang ka mahlo a bona a nama. Ba sebetsa ka thata ho thusa baena ba Morena eseng feela ka lintho tse bonahalang empa hape le ka tsela ea moea. Joang? Ka ho ba thusa boboleling ba litaba tse molemo tsa ’Muso oa Molimo le ho khanneng lithuto tsa Bibele bakeng sa ho etsetsa Kreste barutuoa. Ka hona, kajeno ho na le baboleli ba ’Muso oa Molimo ba jereng leseli ba fetang limillione tse ’nè.
Mesebetsi e Eketsehileng
24. Ke mesebetsi efe e lerato e entseng hore sehlopha sa lekhoba e be batho ba thabileng ka ho fetisisa lefatšeng kajeno?
24 A re thathamiseng e meng ea mesebetsi e mengata e metle ea sehlopha sa lekhoba le tšepahalang. Oa pele, sehlopha sa lekhoba se khethetsoe ho hlokomela lintho tsohle tsa Monghali—lithahasello tsa hae tsa ’Muso lefatšeng—’me lintho tsena li ntse li tsoela pele ho eketseha. Oa bobeli, sehlopha seo hase fepe bahlanka feela empa se boetse se fepa bongata bo boholo ba batho ba ntseng ba eketseha ka mehla ka lijo tsa moea. Oa boraro, sehlopha sa lekhoba se etella pele ho phatlalatseng leseli la ’Muso. Oa bone, mosebetsi o eketsehileng haholo oa lona o ama ho bokella bongata bo boholo ba linku tse ling, ho bo kenya ka tempeleng ea Jehova ea moea. Oa bohlano, sehlopha sa lekhoba, se tšehelitsoe ka pelo eohle ke batho ba kang linku, se aha meaho e meholoanyane bakeng sa litlhophiso tsa makala lefatšeng lohle, hammoho le ntlo-khōlō United States. Mesebetsi e joalo ea lerato e entse sehlopha sa lekhoba batho ba thabileng ka ho fetisisa lefatšeng kajeno, ’me e boetse e thabisitse le batho ba bang ba limillione. Bana bohle ba lebisa liteboho ho Jehova Molimo le ho Jesu Kreste, ba ’nileng ba tataisa mesebetsi e eketsehileng ea lekhoba le masene!
25. Linku li ka tsoela pele ho tšehetsa sehlopha sa lekhoba joang, ka tšepo efe?
25 Hona joale sehlopha sa lekhoba se sebetsa ka matla ho feta leha e le neng pele mesebetsing ea sona eo se e abetsoeng ke Molimo. Nako e setseng pele ‘mahlomola a maholo’ a qhoma e se e batla e felile! (Mattheu 24:21) Ke habohlokoa hakaakang hore bana bao e leng linku tsa Molimo ba lule ka letsohong le letona la mohau oa Morena eo hape e leng Molisa! Kahoo, bohle a ba ke ba tsoele pele ho tšehetsa ka cheseho lekhoba le tšepahalang le le masene. Ke ka ho etsa joalo feela batho bohle ba kang linku ka letsatsi le leng haufinyane ba tlang ho utloa mantsoe ana a thabisang: “Tlong, lōna ba hlohonolofalitsoeng ke Ntate, le amohele ’muso oo le o lokiselitsoeng ha e sa le lefatše le theoa.”
Na U ka Araba?
◻ Ke ho ahlola hofe ha pele ho ileng ha latela ho behoa teroneng ha Morena?
◻ Mattheu 24:45-47 e ile ea phethahala joang mehleng ee?
◻ Mabapi le mesebetsi e eketsehileng, sehlopha sa lekhoba le bongata bo boholo ba thabela eng haholo?
◻ Mattheu 25:34-40 e ntse e phethahala joang nakong ea pa·rou·siʹa?
[Setšoantšo se leqepheng la 16]
Morena o behile lintho tsohle tsa hae tlhokomelong ea lekhoba le tšepahalang
[Setšoantšo se leqepheng la 18]
Jesu o lutse teroneng ea hae e khanyang ho ahlola moloko oa batho