Jesu Bophelo le Tšebeletso tsa Hae

Baroetsana ba Bohlale le ba Booatla

JESU o ntse a arabela kōpo ea baapostola ba hae ea pontšo ea ho ba teng ha hae matleng a ’Muso. Joale o fana ka litšobotsi tse eketsehileng tsa pontšo ka lipapiso tse tharo, kapa litšoantšo.

Phethahatso ea setšoantšo ka seng e ne e tla bonoa ke ba phelang nakong ea ho ba teng ha hae. O kenyelletsa sa pele ka mantsoe ana: “Mohlang oo, ’muso oa leholimo o tla tšoana le baroetsana ba leshome ba nkileng lilampi tsa bona, ba tsoile ho khahlanyetsa monyali. Ba bahlano ho bona e be e le ba bohlale, ba bahlano ba bang e be e le maoatla.”

Ka polelo “’muso oa leholimo o tla tšoana le baroetsana ba leshome,” Jesu ha a bolele hore halofo ea ba jang lefa la ’Muso oa leholimo ke batho ba booatla ’me halofo e ’ngoe ke ba bohlale! Che, empa o bolela hore mabapi le ’Muso oa maholimo, ho na le tšobotsi e ’ngoe e itseng e tšoanang le ena, kapa hore litaba tse mabapi le ’Muso li tla tšoana le ntho e ’ngoe e itseng.

Baroetsana ba leshome ba tšoantšetsa Bakreste bohle ba mocheng kapa ba ipolelang ba le mocheng oa ho fumana ’Muso oa leholimo. Ke ka Pentekonta ea 33 C.E. ha phutheho ea Bokreste e tšepisoa Monyali ea tsositsoeng, ea tlotlisitsoeng, Jesu Kreste lenyalong. Empa lenyalo le ne le tla ba teng leholimong nakong e ’ngoe e tlang e sa boleloang.

Setšoantšong, baroetsana ba leshome ba tsoa ka morero oa ho khahlanyetsa monyali le ho kenella mokolokong oa lenyalo. Ha a fihla, ba tla bonesa tsela eo mokoloko o tsamaeang ho eona ka lilampi tsa bona, ka hona ba tla mo hlompha ha a tlisa monyaluoa oa hae tlung eo a e lokiselitsoeng. Leha ho le joalo, Jesu oa hlalosa: “Maoatla ha a nka lilampi tsa ’ona, ha a ka a li nkela oli. Empa ba bohlale ba nka oli lipitseng tsa bona, hammoho le lilampi tsa bona. Joale kahobane monyali a liehile, ba otsela bohle, ba robala.”

Ho lieha ho hoholo ha monyali ho bontša hore ho ba teng ha Kreste e le Morena ea busang ho tla etsahala nakong e tlang e sa ntsaneng e le hōle. Qetellong o tla teroneng ea hae ka selemo sa 1914. Nakong ea bosiu bo bolelele bo etellang selemo seo pele, baroetsana bohle baa robala. Empa ha ba nyatsoe ka baka la sena. Ho nyatsoa ha baroetsana ba booatla ke ka baka la ho hloka ha bona oli bakeng sa lipitsa tsa bona. Jesu o hlalosa kamoo baroetsana ba tsohang ka teng pele monyali a fihla:

“Eare bosiu bo boholo, ha etsoa mohoo, ha thoe: Bonang, monyali ke eo; tsoang, le mo khahlanyetse. Eaba baroetsana bao kaofela ba tsoha, ba lokisa lilampi tsa bona. Maoatla a re ho ba bohlale: Le re qhatsetse oli, hobane lilampi tsa rōna lia tima. Empa ba bohlale ba fetola, ba re: Che; e ke ke ea lekana rōna le lōna; e-eang ho bao e rekoang ho bona, le ithekele.”

Oli e tšoantšetsa se bolokang Bakreste ba ’nete ba khanya joaloka maseli, ka ho khetheha, Lentsoe la Molimo le bululetsoeng, leo ba le fupereng ka thata, hammoho le moea o halalelang, o ba thusang ho utloisisa Lentsoe leo. Oli ea moea e etsa hore baroetsana ba bohlale ba khone ho khantša leseli ha ba amohela monyali mokolokong o eang moketeng oa lenyalo. Empa sehlopha sa baroetsana ba booatla ha se na oli e hlokahalang ea moea ka hare ho sona, ka lipitseng tsa sona. Kahoo Jesu o hlalosa se etsahalang:

“Ba re [baroetsana ba maoatla] ba sa ea ithekela [oli], monyali a fihla, ’me ba itokisitseng ba kena le eena bohaling, ’me ha koaloa monyako. Baroetsana ba bang ba ntoo fihla, ba re: Morena, Morena, re bulele! Empa a ba fetola, a re: Ka ’nete ke re ho lōna: Ha ke le tsebe.”

Ka mor’a hore Kreste a fihle ’Musong oa hae oa leholimo, sehlopha sa baroetsana ba bohlale sa Bakreste ba ’nete ba tlotsitsoeng se ile sa tsoha ho falimehela tokelo ea sona ea ho khantša leseli lefatšeng lena le lefifing ho rorisa Monyali ea khutlileng. Empa ba tšoantšetsoang ke baroetsana ba booatla ba ne ba sa itokisetsa ho fana ka thoriso ena e mo khahlanyetsang. Kahoo ha nako e fihla, Kreste ha a ba bulele monyako ho kena moketeng oa lenyalo leholimong. O ba siea ka ntle botšong ba bosiu ba lefatše bo lefifi ka ho fetisisa, hore ba timele hammoho le basebetsi ba bang kaofela ba ho hloka molao. Jesu o qetella ka ho re: “Lebelang ke hona; kahobane ha le tsebe letsatsi le hora.” Mattheu 25:1-13.

◆ Ke bo-mang ba tšoantšetsoang ke baroetsana ba leshome?

◆ Tšepiso ea lenyalo e etsoa neng ho monyali, empa o fihla neng ho tla nka monyaluoa oa hae ho ea moketeng oa lenyalo?

◆ Oli e emela eng, ’me ho ba le eona ho etsa hore baroetsana ba bohlale ba khone ho etsa eng?

◆ Mokete oa lenyalo o tšoareloa hokae?

◆ Ke moputso ofe o moholo oo baroetsana ba booatla ba lahleheloang ke oona, ’me qetello ea bona ke efe?