Jesu Bophelo le Tšebeletso Tsa Hae
Setšoantšo sa Litalenta
JESU o ntšetsa pele puisano ea hae le baapostola ba hae Thabeng ea Mehloare ka ho ba bolella setšoantšo se seng, sa bobeli letotong la tse tharo. Matsatsi a seng makae pejana, ha a ntse a le Jeriko, o ile a bolela setšoantšo sa limina ho bontša hore nako ea ho tla ha ’Muso e ne e sa ntsane e le hōle. Joale setšoantšo seo a se phetang, le hoja se e-na le litšobotsi tse ’maloa tse tšoanang, se hlalosa ka phethahatso ea sona mesebetsi e etsoang nakong ea ho ba teng ha Kreste matleng a ’Muso. Se bontša hore barutuoa ba hae ba tlameha ho sebetsa ha ba sa ntsane ba le lefatšeng ho eketsa “letlotlo la hae.”
Jesu oa qala: “Hobane hoo [ke hore, maemo a amanang le ’Muso a] ho joale ka motho ea etang, eo eitseng hobane a bitse makhoba a hae, a a neela letlotlo la hae.” Jesu ke monna eo, pele a etela hōle leholimong, a nehang makhoba a hae—barutuoa ba mocheng oa ho fumana ’Muso oa leholimo—letlotlo la hae. Letlotlo lena hase maruo a bonahalang empa le emela tšimo e lenngoeng eo a entseng hore e be le matla a ho hlahisa barutuoa ba eketsehileng.
Jesu o beha letlotlo la hae matsohong a makhoba a hae nakoana pele a nyolohela leholimong. Joang? Ka ho a laela hore a tsoele pele ho sebetsa tšimong e lenngoeng ka ho bolela molaetsa oa ’Muso ho isa likarolong tse hōle ka ho fetisisa tsa lefatše. Ho joalokaha Jesu a bolela: “A nea e mong litalenta tse hlano, e mong a mo nea li le peli, e mong a neoa e le ’ngoe; e mong le e mong a neoa ka matla a hae; eaba oa tsamaea.”
Ka hona litalenta tse robeli—letlotlo la Kreste—li ajoa ho latela matla, kapa menyetla ea moea, ea makhoba. Makhoba a emela lihlopha tsa barutuoa. Lekholong la pele la lilemo, sehlopha se ileng sa amohela litalenta tse hlano ka ho hlakileng se ne se akarelletsa baapostola. Jesu o tsoela pele ho bolela hore makhoba a amohetseng litalenta tse hlano le tse peli kaofela a ile a li eketsa habeli ka ho bolela ha ’ona ka ’Muso le ho etsa barutuoa. Leha ho le joalo, lekhoba le amohetseng talenta e le ’ngoe le ile la e pata mobung.
Jesu o tsoela pele: “Tšiu tse ngata ha li fetile, monghali oa makhoba ao a fihla, ’me a hlahloba litaba le ’ona.” E bile feela lekholong la bo20 la lilemo, hoo e ka bang lilemo tse 1 900 hamorao, ha Kreste a khutla ho tla hlahloba litaba, ka hona, ka sebele ebile ‘ha tšiu tse ngata li fetile.’ Joale Jesu oa hlalosa:
“Eaba le nkileng litalenta tse hlano lea atamela, la hlahisa tse ling tse hlano, la re: ‘Monghali, u no u ’neile litalenta tse hlano; bona, ke ruile tse ling tse hlano ka holim’a tsona.’ Monghali oa hae a re ho lona: ‘Ke hantle, lekhoba le molemo, le khabane! U bile khabane linthong li se kae, joale ke tla u bea holim’a tse ngata. Kena thabong ea morena oa hao.’” Lekhoba le amohetseng litalenta tse peli ka ho tšoanang le ile la eketsa litalenta tsa lona habeli, ’me le ile la amohela pabatso le moputso o tšoanang.
Leha ho le joalo, makhoba ana a tšepahalang a kena thabong ea Morena oa ’ona joang? Thabo ea Morena oa bona, Jesu Kreste, e bile ea ho amohela ’Muso ha a ea hōle ho Ntate oa hae leholimong. Ha e le makhoba a tšepahalang ba mehleng ea kajeno, a fumana thabo e khōlō ka hore boikarabelo bo eketsehileng ba ’Muso bo behoe matsohong a ’ona, ’me ha a qeta tsela ea ’ona ea lefatšeng, a tla fumana thabo e khōlō ka ho fetisisa ea ho tsosetsoa ’Musong oa leholimo. Empa ho thoe’ng ka lekhoba la boraro?
Lekhoba lena lea tletleba: “Morena, ke u tsebile hobane u motho ea thata . . . Ke tšabile ke hona, ’me ke ile ka pata talenta ea hao mobung; bona, e sa le ena ntho ea hao.” Lekhoba lena le hanne ka boomo ho sebetsa tšimong e lenngoeng ka ho bolela le ho etsa barutuoa. Kahoo morena o le bitsa “le lonya, le sebolu” ’me o phatlalatsa kahlolo: “Le amoheng talenta . . . Lahlelang lekhoba le sebolu mafifing a kantle, moo lillo li tla ba teng le litsikitlano tsa meno.” Bao ba sehlopha sa lekhoba le khopo, ba lahletsoeng ka ntle, ba amohuoa thabo ea moea.
Sena se fana ka thuto e tiileng bakeng sa bohle ba ipolelang e le balateli ba Kreste. Ba tlameha ho sebeletsa ho eketsa letlotlo la Morena oa bona oa leholimo ka ho kopanela ka botlalo mosebetsing oa boboleli hore ba tle ba thabele pabatso le moputso tse tsoang ho eena le hore ba tle ba qobe le ho lahleloa lefifing ka ntle le timetsong qetellong. Na ka mafolo-folo u sebelisa matla a hao ntlheng ee? Mattheu 25:14-30, NW.
◆ Setšoantšo see se latelang se ruta thuto efe?
◆ Makhoba ke bo-mang, ’me letlotlo le behiloeng matsohong a ’ona ke eng?
◆ Morena o khutla neng ho tla hlahloba litaba, ’me o fumana eng?
◆ Thabo eo makhoba a tšepahalang a kenang ho eona ke efe, ’me ho etsahala’ng ka lekhoba le khopo?