“Le Lule le Lebetse”!

“Seo ke le bolellang sona ke se bolella bohle, Le lule le lebetse.”—MAREKA 13:37.

1, 2. (a) Monna e mong o ile a ithuta thuto efe ka ho boloka matlotlo a hae? (b) Papisong ea Jesu ea lesholu re ithuta’ng ka ho lula re falimehile?

JUAN o ne a boloka matlotlo a hae ka tlung. O ne a a behile ka tlas’a bethe—e leng sebaka seo ho ea ka eena e leng se sireletsehileng ka ho fetisisa ka tlung. Leha ho le joalo, bosiung bo bong ha eena le mosali oa hae ba ntse ba robetse, lesholu le ile la kena ka kamoreng. Ho bonahala eka lesholu le ne le tseba moo le lokelang ho ea teng. Le ile la nka matlotlo ’ohle a tlas’a bethe esita le chelete eo Juan a neng a e kentse ka laeng ea tafole e pel’a bethe. Hoseng ho latelang, Juan o ile a fumana hore ba mo etse ka liphalana. A ke ke a hlola a lebala thuto e bohloko eo a ithutileng eona: Motho ea robetseng a ke ke a lebela matlotlo a hae.

² Hoa tšoana le linthong tsa moea. Re ke ke ra lebela tšepo ea rōna le tumelo ea rōna haeba re robala. Ke ka lebaka leo Pauluse a ileng a eletsa a re: “A re se keng ra tsoela pele ho robala joalokaha ba bang kaofela ba tsoela pele ho robala, empa a re luleng re falimehile ’me re lule re hlaphohetsoe likelellong.” (1 Bathesalonika 5:6) Ho bontša hore na ho bohlokoa hakae ho lula re falimehile, Jesu o ile a sebelisa papiso ea lesholu. O ile a hlalosa liketsahalo tse neng li tla lebisa ho tleng ha hae e le Moahloli, ’me a lemosa a re: “Ka hona, le lule le lebetse, hobane ha le tsebe hore na Morena oa lōna o tla ka letsatsi lefe. Empa tsebang ntho e le ’ngoe, hore haeba mong’a ntlo a ne a tsebile hore na lesholu le tla ka tebelo efe, a ka be a ile a lula a falimehile ’me a se ke a lumella hore ntlo ea hae e thuhuoe. Ka lebaka lena le lōna le itokise, hobane Mor’a motho o tla tla ka hora eo le sa e nahaneng.” (Matheu 24:42-44) Lesholu ha le rerise ha le tla. Le fihla hona ha le sa lebelloa. Ka tsela e tšoanang, joalokaha Jesu a boletse, bofelo ba tsamaiso ena bo tla tla ka ‘hora eo re sa e nahaneng.’

“Lulang le Falimehile, le Eme le Tiile Tumelong”

 3. Jesu o ile a sebelisa joang papiso ea makhoba a letetseng hore mong’a ’ona a khutle lechatong ho bontša bohlokoa ba ho lula re falimehile?

³ Mantsoeng a tlalehiloeng Kosepeleng ea Luka, Jesu o tšoantša Bakreste le makhoba a letetseng hore mong’a ’ona a khutle lechatong. A lokela ho ela lintho hloko e le hore ha a fihla, a a fumane a falimehile, e le malala-a-laotsoe. Ka tsela e tšoanang Jesu o ile a re: “Mor’a motho o tla ka hora eo le sa nahaneng hore e ka ba eona.” (Luka 12:40) Ba bang ba sebelelitseng Jehova ka lilemo tse ngata ba ka ’na ba qhoaolla ’me ba lebala hore metsotso e jele babeli. Ebile ba ka ’na ba phetha ka ho re bofelo bo sa le hōle. Empa monahano o joalo o ka etsa hore re hlokomolohe lintho tsa moea ’me re hahamalle lipakane tsa nama, e leng litšitiso tse ka etsang hore re otsele moeeng.—Luka 8:14; 21:34, 35.

 4. Ke ho kholiseha ka’ng ho tla re thusa hore re lule re lebetse, ’me Jesu o ile a bontša seo joang?

⁴ Re ka ithuta thuto e ’ngoe papisong ea Jesu. Le hoja makhoba a ne a sa tsebe hora eo mong’a ’ona a tla khutla ka eona, ho bonahala a ne a tseba bosiu boo a khutlang ka bona. Ho ne ho tla ba thata hore a lule a falimehile bosiung boo bohle haeba a ne a nahana hore mong’a ’ona o tla tla ka bosiu bo bong. A ne a tseba hore na o tla ka bosiu bofe, ’me sena se ile sa etsa hore a nolofalloe ho lula a falimehile. Ka tsela e tšoanang, boprofeta ba Bibele bo senola ka ho hlaka hore re phela mehleng ea bofelo; empa ha bo re bolelle letsatsi kapa hora ea bofelo. (Matheu 24:36) Ho lumela hore bofelo boa tla ho re thusa hore re lule re falimehile, empa haeba re kholisehile hore kannete letsatsi la Jehova le haufi, re tla ba le lebaka le matla la hore re lebele.—Sofonia 1:14.

 5. Re ka etsa’ng ka khothatso ea Pauluse ea hore re ‘lule re falimehile’?

⁵ Ha Pauluse a ngolla Bakorinthe, o ile a ba phehella a re: “Lulang le falimehile, le eme le tiile tumelong.” (1 Bakorinthe 16:13) E, ho lula re falimehile ho tsamaisana le ho ema re tiile tumelong ea Bokreste. Re ka lula re falimehile joang? Ka ho fumana tsebo e tebileng haholoanyane ea Lentsoe la Molimo. (2 Timothea 3:14, 15) Re matlafatsa tumelo ea rōna ka mekhoa e metle ea ho ithuta le ho ba teng kamehla libokeng, ’me ho lula re hopotse letsatsi la Jehova ke karolo ea bohlokoa ea tumelo ea rōna. Kahoo ho ikhopotsa nako le nako bopaki ba Mangolo ba hore re haufi le bofelo ba tsamaiso ena ho tla re thusa hore re se ke ra lebala linnete tsa bohlokoa mabapi le bofelo bo tlang.a Ho boetse ho molemo ho lemoha liketsahalo tsa lefatše tse phethahatsang boprofeta ba Bibele. Mora e mong oabo rōna oa Jeremane o ile a ngola a re: “Nako le nako ha ke shebella litaba—lintoa, litšisinyeho tsa lefatše le ho silafala ha polanete ea rōna—ke lemoha hore re haufi le bofelo.”

 6. Jesu o ile a bapisa joang hore batho ba ka ’na ba khaotsa ho ela lintho hloko moeeng ha nako e ntse e feta?

⁶ Ho Mareka khaolo ea 13, re fumana tlaleho e ’ngoe ea khothatso ea Jesu ho balateli ba hae hore ba lule ba falimehile. Ho ea ka khaolo ena, Jesu o bapisa boemo ba bona le ba molebeli oa monyako ea letetseng hore mong’a hae ea etetseng hōle a khutle. Molebeli oa monyako o ne a sa tsebe hora eo mong’a hae a tla khutla ka eona. Ho ne ho hlokahala feela hore a lule a lebetse. Jesu o ile a bua ka litebelo tse ’nè tse fapaneng tseo monghali a neng a ka khutla ka tsona. Tebelo ea bone e ne e qala ka hora ea boraro ka meso ’me e fela ha letsatsi le chaba. Tebelong ena ea ho qetela, habonolo feela molebeli oa monyako o ne a ka otsela. Ho tlalehoa hore masole a nka hore ho molemo ho tsometsa lira pelenyana ho meso. Ka tsela e tšoanang, mehleng ena ea bofelo, ha ka kutloisiso ea moea lefatše le ile le sephume sa boroko, re ka ’na ra fumana ho le thata haholo ho lula re falimehile. (Baroma 13:11, 12) Ke ka lebaka leo Jesu papisong ea hae a phehellang ka ho pheta-pheta: “Lulang le talimile, le lule le falimehile . . . Ka hona le lule le lebetse . . . Seo ke le bolellang sona ke se bolella bohle, Le lule le lebetse.”—Mareka 13:32-37.

 7. Ke kotsi efe e teng, ’me re ntse re hopotse see, ke khothatso efe eo re e balang Bibeleng khafetsa?

⁷ Hangata tšebeletsong ea hae le ka mor’a tsoho ea hae, Jesu o ile a khothalletsa batho hore ba falimehe. Ha e le hantle, hoo e batlang e le lekhetlo le leng le le leng leo Mangolo a buang ka bofelo ba tsamaiso ena ea lintho ka lona, re fumana temoso ea hore re lule re falimehile kapa hore re lule re lebetse.b (Luka 12:38, 40; Tšenolo 3:2; 16:14-16) Ka ho hlakileng, ho otsela moeeng ho kotsi haholo. Kaofela re hloka temoso ena!—1 Bakorinthe 10:12; 1 Bathesalonika 5:2, 6.

Baapostola ba Bararo ba sa Kang ba Lula ba Falimehile

 8. Ha ba le serapeng sa Gethesemane, baapostola ba Jesu ba bararo ba ile ba etsa’ng ha a ba kōpa hore ba lule ba lebetse?

⁸ Ho ba le boikemisetso bo botle ha hoa lekana ho etsa hore re lule re falimehile, joalokaha re tla bona mohlaleng oa Petrose, Jakobo le Johanne. Bana e ne e le banna ba bararo ba matla moeeng ba neng ba latela Jesu ka botšepehi ’me ba mo rata haholo. Ho sa tsotellehe seo, bosiung ba la 14 Nisane, 33 C.E., ba ile ba hlōleha ho lula ba falimehile. Ha ba tloha kamoreng e ka holimo moo ba neng ba keteka Paseka teng, baapostola bana ba bararo ba ile tsamaea le Jesu ba ea serapeng sa Gethesemane. Ha ba le moo, Jesu o ile a re ho bona: “Moea oa ka o saretsoe haholo, esita le ho isa lefung. Salang mona ’me le lule le lebetse le ’na.” (Matheu 26:38) Jesu o ile a rapela Ntat’ae oa leholimo ka tieo ka makhetlo a mararo, o ile a khutlela ho metsoalle ena ea hae ka makhetlo a mararo, ’me a e fumana e robetse.—Matheu 26:40, 43, 45.

 9. E ka ’na eaba ke’ng e ileng ea etsa hore baapostola ba otsele?

⁹ Ke hobane’ng ha banna baa ba tšepahalang ba ile ba phoqa Jesu bosiung boo? Ba ne ba khathetse. E ne e se e le bosiu bo boholo, mohlomong e le ka mor’a khitla, ’me “mahlo a bona a ne a le boima” ke boroko. (Matheu 26:43) Ho sa tsotellehe seo, Jesu o ile a re: “Lulang le lebetse ’me le rapele le sa khaotse, e le hore le se ke la kena molekong. Ka ho hlakileng, moea o na le tabatabelo, empa nama ea fokola.”—Matheu 26:41.

10, 11. (a) Ho sa tsotellehe hore Jesu o ne a khathetse, ke’ng e ileng ea mo thusa hore a lule a lebetse serapeng sa Gethesemane? (b) Re ithuta’ng ho se hlahetseng baapostola ba bararo ha Jesu a ne a ba bolella hore ba lule ba lebetse?

¹⁰ Ntle ho pelaelo Jesu le eena o ne a khathetse bosiung bona ba bohlokoa. Leha ho le joalo, ho e-na le ho robala, o ile a rapela ka matla nakong eo ea ho qetela a lokolohile. Matsatsing a seng makae pejana, o ne a ile a phehella balateli ba hae ho rapela, a re: “Joale, le lule le falimehile ka nako eohle le etsa thapeli e le hore le ka atleha ho phonyoha lintho tsena tsohle tse reretsoeng hore li etsahale, le ho ema ka pel’a Mor’a motho.” (Luka 21:36; Baefese 6:18) Haeba re mamela keletso ea Jesu ’me re latela mohlala oa hae o motle tabeng ea thapelo, lithapeli tsa rōna tse tlohang pelong tse eang ho Jehova li tla re thusa ho lula re falimehile moeeng.

¹¹ Ho hlakile hore Jesu o ne a tseba hore haufinyane o tla tšoaroa a be a ahloleloe lefu, empa barutuoa ba hae bona ba ne ba sa tsebe. Liteko tsa hae li ne li tla ba bohloko haholo ha a le thupeng ea tlhokofatso. Jesu o ne a lemositse baapostola ba hae ka lintho tsena, empa ba ne ba sa utloisisa seo a neng a se bua. Ke ka lebaka leo ba ileng ba robala ha eena a ile a lula a falimehile a rapela. (Mareka 14:27-31; Luka 22:15-18) Joaloka baapostola, nama ea rōna ea fokola ’me ho na le lintho tseo re sa li tsebeng. Leha ho le joalo, haeba re sa lemohe hore nakong eo re phelang ho eona metsotso e jele babeli, re ka robala moeeng. Re tla lula re falimehile moeeng hafeela re ela lintho hloko.

Lintho Tse Tharo Tsa Bohlokoa

12. Ke lintho life tse tharo tseo Pauluse a li amahanyang le hore re lule re hlaphohetsoe likelellong?

¹² Ke joang re ka lulang re e-na le boikutlo ba hore metsotso e jele babeli? Re se re bone bohlokoa ba thapelo le hore ho hlokahala hore re lule re hopotse letsatsi la Jehova. Ho phaella moo, Pauluse o bolela lintho tse tharo tsa bohlokoa tseo re lokelang ho sebeletsa ho ba le tsona. O re: “Empa ha e le rōna ba motšehare, a re luleng re hlaphohetsoe likelellong ’me re apare tšireletso ea sefuba ea tumelo le lerato ’me re roale tšepo ea poloko e le helmete.” (1 Bathesalonika 5:8) A re ke re hlahlobeng ka bokhutšoanyane karolo e phethoang ke tumelo, tšepo le lerato hore re lule re falimehile moeeng.

13. Tumelo e phetha karolo efe hore re ’ne re ele lintho hloko?

¹³ Re lokela ho ba le tumelo e tiileng ea hore Jehova o teng ’me “e ba moputsi oa ba mo batlang ka tieo.” (Baheberu 11:6) Jesu o ile a profeta bofelo, ’me ho phethahala ha bona ka lekhetlo la pele lekholong la pele la lilemo ho matlafatsa tumelo ea rōna ea hore bo tla phethahala ka ho feletseng nakong ea rōna. ’Me tumelo ea rōna e etsa hore re lebelle letsatsi la Jehova ka tabatabelo, re kholisehile hore “[pono ea boprofeta] ruri e tla phethahala. E ke ke ea siuoa ke nako.”—Habakuke 2:3.

14. Tšepo e bohlokoa joang hore re ’ne re lule re falimehile?

¹⁴ Tšepo e tiileng e tšoana le “ankora bakeng sa moea” e re thusang ho mamella mathata esita le haeba re lokela ho letela phethahatso ea sebele ea litšepiso tsa Molimo. (Baheberu 6:18, 19) Margaret, morali oabo rōna ea tlotsitsoeng ka moea ea nang le lilemo tse fetang 90 ea kolobelitsoeng lilemong tse fetang 70 tse fetileng, o re: “Ha monna oa ka a ne a le makhatheng a ho bolaoa ke kankere ka 1963, ke ne ke nahana hore ho ka ba molemo ha bofelo bo ka tla kapele. Empa hona joale kea hlokomela hore ke ne ke inahanela feela ka mathata a ka. Ka nako eo re ne re sa tsebe hore na mosebetsi o tla hōla hakae lefatšeng ka bophara. Esita le hona joale, ho na le libaka tse ngata tseo mosebetsi o sa tsoa qaloa ho tsona. Kahoo ke thabela hore ebe Jehova o mameletse.” Moapostola Pauluse oa re tiisetsa o re: “Mamello, eona, e hlahisa boemo bo amohelehang; boemo bo amohelehang, bona, bo hlahisa tšepo, ’me tšepo ha e soetse.”—Baroma 5:3-5.

15. Lerato le tla re susumetsa joang esita leha ho bonahala re se re letile ka nako e telele?

¹⁵ Lerato la Bokreste ke ntho e hlaheletseng hobane ke tšusumetso ea bohlokoa ho sohle seo re se etsang. Re sebeletsa Jehova hobane re mo rata, ho sa tsotellehe linako tseo a li behang. Ho rata baahelani ho re susumelletsa ho bolela litaba tse molemo tsa ’Muso, ho sa tsotellehe hore na thato ea Molimo ke hore re etse joalo halelele hakae le hore na re lokela ho khutlela malapeng a le mang hangata hakae. Joalokaha Pauluse a ngotse, “ho sala tumelo, tšepo, lerato, tsena tse tharo; empa e khōlō ho tsona ke lerato.” (1 Bakorinthe 13:13) Lerato le re fa mokoka ’me le re thusa ho lula re falimehile. “[Lerato] le tšepa lintho tsohle, le mamella lintho tsohle. Lerato ha le fele le ka mohla.”—1 Bakorinthe 13:7, 8.

“U ’ne U Tšoare ka Tieo Seo U Nang le Sona”

16. Ho e-na le ho khoehlisa, re lokela ho sebeletsa ho ba le boikutlo bofe?

¹⁶ Re phela linakong tsa bohlokoa ha liketsahalo tsa lefatše li re hopotsa khafetsa hore re phela matsatsing a ho qetela. (2 Timothea 3:1-5) Hona joale hase nako ea ho khoehlisa empa ke ea hore ‘re ’ne re tšoare ka tieo seo re nang le sona.’ (Tšenolo 3:11) Ha re ‘falimeha mabapi le lithapelo’ ’me re sebeletsa ho ba le tumelo, tšepo le lerato, nakong ea teko re tla be re le malala-a-laotsoe. (1 Petrose 4:7) Re na le ho hongata hoo re ka ho etsang mosebetsing oa Morena. Ho tšoareha liketsong tsa boinehelo ba bomolimo ho tla re thusa hore re falimehe.—2 Petrose 3:11.

17. (a) Ke hobane’ng ha re sa lokela ho nyahamisoa ke ho soetseha ho tlang ka linako tse ling? (Bona lebokose le leqepheng la 21.) (b) Re ka etsisa Jehova joang, ’me ba mo etsisang ba tla fumana mahlohonolo afe?

¹⁷ Jeremia o ile a ngola a re: “Jehova ke kabelo ea ka, ke ka lebaka leo ke tlang ho mo letela. Jehova o molemo ho ea mo tšepang, ho moea o ntseng o mo batla. Ho molemo hore motho a lete, a bile a khutsitse, bakeng sa poloko ea Jehova.” (Lillo Tsa Jeremia 3:24-26) Ba bang ho rōna ba letile ka nako e khutšoanyane feela. Ba bang bona ba letile ka lilemo-lemo hore ba bone poloko ea Jehova. Leha ho le joalo, nako ee ea ho leta e khutšoanyane hakaakang ha e bapisoa le nako ea ka ho sa feleng e tlang! (2 Bakorinthe 4:16-18) Ha re ntse re letetse nako ea Jehova e loketseng, re ka hlaolela botho bo hlokahalang ho Bakreste ’me ra thusa ba bang hore ba sebelise mamello ea Jehova hamolemo ’me ba amohele ’nete. E se eka bohle re ka lula re falimehile. A re etsiseng Jehova ’me re mamelle, re lebohe tšepo eo a re fileng eona. Ha ka botšepehi re ela lintho hloko, e se eka re ka tšoara ka tieo tšepong ea bophelo bo sa feleng. Ha re etsa joalo, litšepiso tsena tse profetiloeng li tla phethahala ho rōna: “[Jehova] o tla u phahamisa hore u rue lefatše. Ha ba khopo ba felisoa, u tla ho bona.”—Pesaleme ea 37:34.

[Mongolo o botlaaseng ba leqephe]

U ka Araba Joang?

• Re ka matlafatsa joang kholiseho ea rōna ea hore bofelo ba tsamaiso ee ea lintho bo haufi?

• Re ka ithuta’ng mohlaleng oa Petrose, Jakobo le Johanne?

• Ke lintho life tse tharo tse ka re thusang hore re lule re falimehile moeeng?

• Ke hobane’ng ha hona joale e le nako ea hore ‘re ’ne re tšoare ka tieo seo re nang le sona’?

[Lebokose/Setšoantšo se leqepheng la 21]

“Ho Thaba ea Lulang a Lebeletse.”—Daniele 12:12

Nka hore molebeli o belaella hore ho na le lesholu le rerang ho thuha moo a lebetseng. Ha shoalane e tšoara molebeli o hloaea tsebe ho utloa mokhoathatsa leha e le ofe. O lula a thehile tsebe ka nako eohle ’me a butse mahlo. Ho bonolo hore a thetsoe ke mokhoathatsa leha e le ofe—molumo oa lifate tse fokaelang kapa oa ntho e lihuoang ke katse.—Luka 12:39, 40.

Ntho eona eo e ka hlahela bao ‘ka tabatabelo ba ntseng ba letetse tšenolo ea Morena oa rōna Jesu Kreste.’ (1 Bakorinthe 1:7) Baapostola ba ne ba nahana hore Jesu o ne a tla ‘khutlisetsa ’muso ho Iseraele’ hang ka mor’a tsoho ea hae. (Liketso 1:6) Nako e telele hamorao, Bakreste ba Thesalonika ba ile ba lokela ho hopotsoa hore ho ba teng ha Jesu ke hona ho tlang. (2 Bathesalonika 2:3, 8) Leha ho le joalo, hore ebe balateli ba pele ba Jesu ba ile ba nahana hore e se e le letsatsi la Jehova empa ho se joalo, ha hoa ka ha etsa hore ba tsoe tseleng e isang bophelong.—Matheu 7:13.

Mehleng ea rōna, ho soetseha ka lebaka la hore ho bonahala bofelo ba tsamaiso ena ea lintho bo lieha ho tla, ha hoa lokela ho etsa hore re khaotse ho falimeha. Molebeli ea elang lintho hloko a ka ’na a thetsoa ke mokhoathatsa leha e le ofe, leha ho le joalo, o ntse a lokela ho lula a lebetse! Ke mosebetsi oa hae. Ho joalo le ho Bakreste.

[Setšoantšo se leqepheng la 18]

Na u kholisehile hore letsatsi la Jehova le haufi?

[Litšoantšo tse leqepheng la 19]

Liboka, thapelo le mekhoa e metle ea ho ithuta li re thusa ho lula re lebetse

[Setšoantšo se leqepheng la 22]

E se e eka ka mamello le ka mafolofolo re ka lula re lebetse joaloka Margaret