Khomarelang Mohlala o Behiloeng ke Jesu
“Ke le behetse mohlala, e le hore, feela joalokaha ke entse ho lōna, le ka etsa ka ho tšoanang.”—JOHANNE 13:15.
1. Ke hobane’ng ha Jesu e le mohlala o loketseng hore Bakreste ba o etsise?
HISTORING eohle ea batho, ke motho a le mong feela ea sa kang a etsa sebe bophelong bohle ba hae. Motho eo ke Jesu. Ntle ho Jesu, “ha ho na motho ea sa etseng sebe.” (1 Marena 8:46; Baroma 3:23) Ka lebaka leo, Bakreste ba ’nete ba nka Jesu e le mohlala o phethahetseng oo ba ka o etsisang. Ha e le hantle, ka la 14 Nisane, 33 C.E., nakoana pele ho lefu la hae, Jesu ka boeena o ile a bolella balateli ba hae hore ba mo etsise. O itse: “Ke le behetse mohlala, e le hore, feela joalokaha ke entse ho lōna, le ka etsa ka ho tšoanang.” (Johanne 13:15) Bosiung boo ba ho qetela, Jesu o ile a bua ka litsela tse ngata tseo Bakreste ba lokelang ho loanela ho tšoana le eena ka tsona. Sehloohong sena, re tla tšohla tse ling tsa tsona.
Ho Hlokahala Boikokobetso
2, 3. Ke ka litsela life Jesu e neng e le mohlala o phethahetseng oa boikokobetso?
2 Ha Jesu a ne a phehella barutuoa ba hae hore ba latele mohlala oo a o behileng, ka ho toba o ne a bua ka boikokobetso. O ne a ile a eletsa balateli ba hae ka makhetlo a ’maloa hore ba ikokobetse, ’me bosiung ba la 14 Nisane, o ile a bontša hore o ikokobelitse ka ho hlatsoa baapostola ba hae maoto. Ka mor’a moo Jesu o ile a re: “Ka hona, haeba ’na, le hoja ke le Morena le Mosuoe, ke hlatsoitse maoto a lōna, le lōna le tšoanela ho hlatsoana maoto.” (Johanne 13:14) Ka mor’a moo, o ile a bolella baapostola ba hae hore ba latele mohlala oo a o behileng. ’Me oo e ne e le mohlala o motle hakaakang oa boikokobetso!
3 Moapostola Pauluse o re bolella hore pele Jesu a tla lefatšeng, o ne “a le teng ka sebōpeho sa Molimo.” Leha ho le joalo, o ile a ikhokhotha, ea e-ba motho ea ikokobelitseng. Ho feta moo, “o ile a ikokobetsa ’me a mamela ho isa lefung, e, lefu thupeng ea tlhokofatso.” (Bafilipi 2:6-8) Ak’u nahane ka sena ho se hokae. Jesu, motho oa bobeli ea phahameng ka ho fetisisa bokahohleng, o ile a lumela hore a be ka tlaasana ho mangeloi, a tsoaloe e le lesea le sa tsebeng ho iketsetsa letho, a hōlisoe ke batsoali ba sa phethahalang, ’me qetellong a shoe joaloka motlōli oa molao ea eisehang. (Bakolose 1:15, 16; Baheberu 2:6, 7) Ke boikokobetso bo bokaakang! Na hoa khoneha ho etsisa “boikutlo [boo] ba kelello” le “ho ikokobetsa kelellong” ho joalo? (Bafilipi 2:3-5) E, hoa khoneha, empa ha ho bonolo.
4. Ke lintho life tse etsang hore batho ba ikakase, empa ke hobane’ng ha boikakaso bo le kotsi?
4 Se fapaneng le boikokobetso ke boikakaso. (Liproverbia 6:16-19) Satane o ile a lihuoa ke boikakaso. (1 Timothea 3:6) Bo hōla habonolo lipelong tsa batho, ’me ha bo se bo le pelong, bo tsoa ka thata. Batho ba ikakasa ka linaha tsa habo bona, merabe ea bona, matlotlo a bona, thuto ea bona, lintho tseo ba li finyelletseng, boemo ba bona sechabeng, ponahalo ea bona, bokhoni ba bona lipapaling le ka lintho tse ling tse ngata. Leha ho le joalo, linthong tsena ha ho na eo e leng ea bohlokoa ho Jehova. (1 Bakorinthe 4:7) Haeba li re bakela boikakaso, li senya kamano ea rōna le eena. “Jehova o phahame, leha ho le joalo o bona ea ikokobetsang; empa ea iphahamisang o mo tsebella hōle.”—Pesaleme ea 138:6; Liproverbia 8:13.
Ho Ikokobelletsa Barab’abo Rōna
5. Ke hobane’ng ha ho hlokahala hore baholo ba ikokobetse?
5 Esita le seo re se etsang le seo re se finyellang tšebeletsong ea Jehova ha sea lokela ho re etsa baikakasi; ebile ha rea lokela ho ikakasa hobane re e-na le boikarabelo bo itseng ka phuthehong. (1 Likronike 29:14; 1 Timothea 6:17, 18) Ha e le hantle, ha re e-na le boikarabelo bo boholoanyane, ho hlokahala hore re ikokobetse haholoanyane. Moapostola Petrose o ile a khothalletsa baholo hore ba se ke ba “rena ka thata holim’a bao e leng lefa la Molimo, empa [e be] mehlala ho mohlape.” (1 Petrose 5:3) Baholo ba behoa hore e be bahlanka le mehlala, eseng hore e be marena le benghali.—Luka 22:24-26; 2 Bakorinthe 1:24.
6. Ke likarolong life tsa bophelo ba Bokreste moo re hlokang boikokobetso?
6 Hase baholo feela bao ho hlokahalang hore ba bontše boikokobetso. Petrose o ile a ngolla banna ba bacha, ba ka ’nang ba ikakasa ka lebaka la likelello tsa bona tse chatsi le ’mele ea bona e matla ha ba bapisoa le ba hōlileng, a re: “Itlameng ka ho ikokobetsa kelellong e mong ho e mong, hobane Molimo o hanyetsa ba ikhohomosang, empa o fana ka mosa o sa tšoanelang ho ba ikokobelitseng.” (1 Petrose 5:5) Ka sebele boikokobetso bo kang ba Kreste ke ba bohlokoa ho bohle. Ho bolela litaba tse molemo ho hloka boikokobetso, haholo-holo ha motho a tobane le boiphapanyo kapa tšoaro e mpe. Ho hloka boikokobetso ho amohela keletso kapa ho nolofatsa bophelo ba rōna e le hore re kopanele tšebeletsong haholoanyane. Ho phaella moo, re hloka boikokobetso hammoho le tumelo le sebete ha re ntse re mamella ho buuoa hampe, ho hlaseloa ka molao, kapa ho hlorisoa ka mabifi.—1 Petrose 5:6.
7, 8. Ke litsela life tse ling tseo ka tsona re ka hlaolelang boikokobetso?
7 Motho a ka hlōla boikakaso joang ’me a ‘ikokobetsa kelellong le ho nka hore ba bang ba mo phahametse’? (Bafilipi 2:3) Ho hlokahala hore a ipone kamoo Jehova a mo bonang kateng. Jesu o ile a hlalosa boikutlo bo nepahetseng ha a ne a re: “Le lōna, ha le entse lintho tsohle tseo le li abetsoeng, le re, ‘Re makhoba a se nang molemo. Seo re se entseng ke seo re neng re tšoanela hore ebe re se entse.’” (Luka 17:10) Hopola, ha ho letho leo re ka le etsang le ka bapisoang le seo Jesu a se entseng. Empa, Jesu o ne a ikokobelitse.
8 Ho feta moo, re ka kōpa Jehova hore a re thuse hore re ipone ka tsela e loketseng. Joaloka mopesaleme re ka rapela ka tsela ena: “Nthute molemo, ho ba le kelello le tsebo, etsoe ke bontšitse tumelo litaelong tsa hao.” (Pesaleme ea 119:66) Jehova o tla re thusa hore re ipone ka tsela e nang le kelello le e bontšang ho leka-lekana, ’me o tla re hlohonolofalletsa ho ikokobetsa. (Liproverbia 18:12) Jesu o ile a re: “Mang kapa mang ea iphahamisang o tla kokobetsoa, ’me mang kapa mang ea ikokobetsang o tla phahamisoa.”—Matheu 23:12.
Pono e Loketseng ka se Nepahetseng le se Fosahetseng
9. Jesu o ne a e-na le pono efe ka se nepahetseng le se fosahetseng?
9 Ho sa tsotellehe hore Jesu o ile a phela ka lilemo tse 33 har’a batho ba sa phethahalang, o ile a lula “a se na sebe.” (Baheberu 4:15) Ha e le hantle, mopesaleme o ile a bua mantsoe a latelang ha a ne a profeta ka Mesia: “U ratile ho loka ’me u hloile bokhopo.” (Pesaleme ea 45:7; Baheberu 1:9) Le ntlheng ena Bakreste ba loanela ho etsisa Jesu. Hase feela hore ba tseba ho khetholla se nepahetseng ho se fosahetseng; ba hloile se fosahetseng ’me ba rata se nepahetseng. (Amose 5:15) Sena se ba thusa ho loantša litšekamelo tsa bona tsa tlhaho tsa sebe.—Genese 8:21; Baroma 7:21-25.
10. Haeba re sa bakele ho etsa “lintho tse mpe,” re senola boikutlo bofe?
10 Jesu o ile a re ho Mofarisi Nikodemase: “Ea tloaetseng ho etsa lintho tse mpe o hloile leseli ’me ha a tle leseling, e le hore mesebetsi ea hae e se ke ea khalemeloa. Empa ea etsang ’nete o tla leseling, e le hore mesebetsi ea hae e ka bonahatsoa e le e sebelitsoeng tumellanong le Molimo.” (Johanne 3:20, 21) Nahana ka sena: Johanne o tsebahalitse Jesu e le “leseli la ’nete le fanang ka leseli ho motho oa mofuta o mong le o mong.” (Johanne 1:9, 10) Empa, Jesu o itse haeba re tloaetse ho etsa “lintho tse mpe”—lintho tse fosahetseng, tseo Molimo a sa li amoheleng—re hloile leseli. Nahana feela u se u hloile Jesu le litekanyetso tsa hae! Leha ho le joalo, sena ke seo batho ba sa bakeng le ba tloaetseng ho etsa sebe ba leng sona. Mohlomong ha ba bone litaba ka tsela eo, empa ho hlakile hore Jesu eena o li bona ka tsela eo.
Tsela ea ho ba le Pono ea Jesu ea se Nepahetseng le se Fosahetseng
11. Ho hlokahala eng hore re be le pono ea Jesu ka se nepahetseng le se fosahetseng?
11 Ho hlokahala hore re be le kutloisiso e hlakileng ea se nepahetseng le se fosahetseng ponong ea Jehova. Kutloisiso eo re e fumana feela ka ho ithuta Lentsoe la Molimo, Bibele. Ha re ntse re tsoela pele ho ithuta ka tsela eo, ho hlokahala hore re rapele joalokaha mopesaleme a ile a rapela, a re: “Ntsebise litsela tsa hao, Jehova; nthute litsela tsa hao.” (Pesaleme ea 25:4) Leha ho le joalo, u hopole hore Satane oa thetsa. (2 Bakorinthe 11:14) A ka pata bobe ’me a etsa hore bo hlahe bo amoheleha ho Mokreste ea seng seli. Kahoo, ho hlokahala hore re nahanisise ka botebo ka seo re ithutang sona ’me re ele hloko keletso ea “lekhoba le tšepahalang le le masene.” (Matheu 24:45-47) Ho ithuta, ho rapela le ho thuisa ka seo re ithutang sona, ho tla re thusa ho hōla tsebong le ho ba har’a bao “ka tšebeliso, matla a bona a ho lemoha a koetliselitsoeng ho khetholla se nepahetseng le se fosahetseng.” (Baheberu 5:14) Kahoo re tla sekamela ho hloeeng se fosahetseng ’me re rate se nepahetseng.
12. Ke keletso efe ea Bibele e re thusang hore re se ke ra tloaela ho tlōla molao?
12 Haeba re hloile se fosahetseng, re ke ke ra lumella takatso ea lintho tse fosahetseng hore e hōle ka lipelong tsa rōna. Lilemo tse ngata ka mor’a lefu la Jesu, moapostola Johanne o ile a ngola a re: “Le se ke la rata lefatše kapa lintho tse lefatšeng. Haeba leha e le mang a rata lefatše, lerato la Ntate ha le eo ho eena; hobane ntho e ’ngoe le e ’ngoe e lefatšeng—takatso ea nama le takatso ea mahlo le pontšo ea mponeng ea mokhoa oa motho oa boipheliso—ha e simolohe ho Ntate, empa e simoloha lefatšeng.”—1 Johanne 2:15, 16.
13, 14. (a) Ke hobane’ng ha ho le kotsi hore Bakreste ba rate lintho tsa lefatše? (b) Ke joang re ka qobang ho ba le lerato la lintho tsa lefatše?
13 Batho ba bang ba ka ’na ba nahana hore hase ntho e ’ngoe le e ’ngoe e lefatšeng e fosahetseng. Le haeba ho joalo, ho ka ba bonolo hore lefatše le lintho tsa lona tse khahlang, le re sitise ho sebeletsa Jehova. Ebile ha ho letho leo lefatše le fanang ka lona le reretsoeng ho re atametsa ho Molimo. Kahoo, re tla be re le kotsing haeba re ka ba le lerato la lintho tse lefatšeng, esita le haeba e le lintho tseo e ka ’nang eaba ha li phoso ka botsona. (1 Timothea 6:9, 10) Ntle ho moo, ’nete ke hore lintho tse ngata tsa lefatše li mpe ’me li ka re silafatsa. Haeba re shebella libaesekopo kapa mananeo a thelevishene a khothaletsang pefo, lerato la lintho tse bonahalang, kapa boitšoaro bo bobe ba ho kopanela liphate, lintho tsena li ka bonahala li amoheleha eaba lia re leka. Haeba re tloaelana le batho ba amehileng haholo ka ho ntlafatsa mekhoa ea bona ea bophelo kapa ka ho batla menyetla ea khoebo, le rōna re ka qetella re nka lintho tseo e le tsa bohlokoa haholo.—Matheu 6:24; 1 Bakorinthe 15:33.
14 Ka lehlakoreng le leng, haeba re thabela Lentsoe la Jehova, “takatso ea nama le takatso ea mahlo le pontšo ea mponeng ea mokhoa oa motho oa boipheliso” ha li na ho re hohela. Ho feta moo, haeba re tloaelana le batho ba etelletsang pele lintho tse amanang le ’Muso oa Molimo, re tla tšoana le bona, re tla rata seo ba se ratang ’me re qobe seo ba se qobang.—Pesaleme ea 15:4; Liproverbia 13:20.
15. Joalokaha ho ile ha etsahala ka Jesu, ho rata ho loka le ho hloea tlōlo ea molao ho ka re matlafatsa joang?
15 Ho hloea tlōlo ea molao le ho rata ho loka ho ile ha thusa Jesu ho tsepamisa mahlo ‘thabong e neng e behiloe ka pel’a hae.’ (Baheberu 12:2) Ho ka ba joalo le ka rōna. Rea tseba hore “lefatše lea feta ’me ho joalo le ka takatso ea lona.” Boithabiso leha e le bofe ba lefatše, ke ba nakoana feela. Leha ho le joalo, “ea etsang thato ea Molimo o hlola ka ho sa feleng.” (1 Johanne 2:17) Kaha Jesu o ile a etsa thato ea Molimo, o ile a bulela batho monyetla oa ho fumana bophelo bo sa feleng. (1 Johanne 5:13) E se eka bohle re ka mo etsisa ’me ra rua molemo botšepehing ba hae.
Ho Mamella Mahloriso
16. Ke hobane’ng ha Jesu a ile a phehella barutuoa ba hae hore ba ratane?
16 Jesu o ile a bontša tsela e ’ngoe eo barutuoa ba hae ba neng ba tla mo etsisa ka eona ha a re: “Ena ke taelo ea ka, hore le ratane feela joalokaha ke le ratile.” (Johanne 15:12, 13, 17) Ho na le mabaka a mangata a hore na ke hobane’ng ha Bakreste ba rata barab’abo bona. Lekhetlong lena, ntho e khōlō eo Jesu a neng a nahanne ka eona ke lehloeo la lefatše leo ba neng ba tla tobana le lona. O ile a re: “Haeba lefatše le le hloea, le tsebe hore le ntlhoile pele le le hloea. . . . Lekhoba ha le leholo ho mong’a lona. Haeba ba ntlhorisitse, le lōna ba tla le hlorisa.” (Johanne 15:18, 20) Ka sebele, esita le ka ho hlorisoa Bakreste ba tšoana le Jesu. Ho hlokahala hore ba be le maqhama a matla a lerato a tla ba thusa ho tobana le lehloeo leo.
17. Ke hobane’ng ha lefatše le hloile Bakreste ba ’nete?
17 Ebe ke hobane’ng ha lefatše le ne le tla hloea Bakreste? Ke hobane, joaloka Jesu, “hase karolo ea lefatše.” (Johanne 17:14, 16) Ha ba jele paate litabeng tsa sesole le tsa lipolotiki, ebile ba boloka melao-motheo ea Bibele, ba hlompha khalalelo ea bophelo ’me ba phela ka litekanyetso tse phahameng tsa boitšoaro. (Liketso 15:28, 29; 1 Bakorinthe 6:9-11) Sepheo sa bona se ka sehloohong ke lintho tsa moea eseng tsa nama. Ba phela lefatšeng, empa joalokaha Pauluse a ile a ngola, ha ba le ‘sebelise ka botlalo.’ (1 Bakorinthe 7:31) Ke ’nete hore batho ba bang ba ’nile ba bolela hore ba rata litekanyetso tse phahameng tsa Lipaki Tsa Jehova. Empa Lipaki Tsa Jehova ha li reke kamohelo ea batho ba bang ka ho khoehlisa melao-motheo ea tsona. Ka lebaka leo, batho ba bangata ba lefatše ha ba li utloisise, ’me ba bangata ba li hloile.
18, 19. Bakreste ba latela mohlala oa Jesu joang ha ba sebetsana le khanyetso le mahloriso?
18 Baapostola ba Jesu ba ile ba bona lehloeo le matla la lefatše ha Jesu a ne a tšoaroa a bile a bolaoa, ’me ba ile ba bona kamoo Jesu a ileng a sebetsana le lehloeo leo kateng. Bahanyetsi ba Jesu ba bolumeli ba ile ba tla mo tšoara serapeng sa Gethesemane. Petrose o ile a leka ho mo sireletsa ka sabole, empa Jesu a re ho Petrose: “Khutlisetsa sabole ea hao sebakeng sa eona, kaha bohle ba nkang sabole ba tla timela ka sabole.” (Matheu 26:52; Luka 22:50, 51) Nakong e fetileng, Baiseraele ba ne ba loantša lira tsa bona ka sabole. Empa joale, maemo a ne a se a fetohile. ’Muso oa Molimo e ne e se “karolo ea lefatše lena” ’me o ne o se na naha eo o sireletsang meeli ea eona. (Johanne 18:36) Petrose e ne e tla tloha e e-ba karolo ea sechaba sa moea, seo litho tsa sona e neng e tla ba baahi ba leholimong. (Bagalata 6:16; Bafilipi 3:20, 21) Kahoo, ho tloha nakong eo, balateli ba Jesu ba ne ba tla talimana le lehloeo le mahloriso ka tsela eo Jesu a ileng a etsa ka eona—e leng ka sebete empa e le ka khotso. Ka kholiseho ba ne ba tla tlohela litaba matsohong a Jehova ebe ba tšepa eena hore a ba fe matla a ho mamella.—Luka 22:42.
19 Lilemo hamorao, Petrose o ile a ngola a re: “Kreste o ile a utloa bohloko bakeng sa lōna, a le siela mohlala hore le latele mehato ea hae haufi-ufi. . . . Ha a ne a ntse a hlapaoloa, ha aa ka a qala ho iphetetsa ka ho hlapaola. Ha a ne a utloa bohloko, ha aa ka a qala ho soka, empa a tsoela pele ho ’na a ipeha ho ea ahlolang ka ho loka.” (1 Petrose 2:21-23) Feela joalokaha Jesu a ile a lemosa, Bakreste ba ’nile ba hlorisoa ka sehlōhō ka lilemo-lemo. Lekholong la pele la lilemo le mehleng ea rōna, ba ’nile ba latela mohlala oa Jesu ’me ba iketsetsa tlaleho e babatsehang ea ho mamella ka botšepehi, ba bontša hore baa tšepahala ebile ba na le khotso. (Tšenolo 2:9, 10) E se eka ka bomong re ka etsa joalo ha re talimane le maemo a tšoanang.—2 Timothea 3:12.
“Le Apare Morena Jesu Kreste”
20-22. Bakreste ba ‘apara Morena Jesu Kreste’ ka tsela efe?
20 Pauluse o ile a ngolla phutheho ea Roma a re: “Le apare Morena Jesu Kreste, ’me le se ke la rera esale pele bakeng sa litakatso tsa nama.” (Baroma 13:14) Ha re tšoantšetsa, Bakreste ba apara Jesu joaloka seaparo. Ba loanela ho etsisa litšobotsi le liketso tsa hae hoo ba fetohang litšoantšo tsa Monghali oa bona le hoja ba sa phethahala.—1 Bathesalonika 1:6.
21 Re ka atleha ho ‘apara Morena Jesu Kreste’ ha re tseba bophelo ba Monghali ebile re loanela ho phela kamoo a ileng a phela kateng. Re etsisa boikokobetso ba hae, ho rata ha hae ho loka, ho hloea ha hae tlōlo ea molao, ho rata ha hae barab’abo, ho se be ha hae karolo ea lefatše le ho mamella ha hae mahlomola ka sebete. Ha re ‘rere esale pele bakeng sa litakatso tsa nama’—ke hore, sepheo sa rōna se seholo bophelong hase ho finyella lipakane tsa lefatše kapa ho khotsofatsa litakatso tsa nama. Ho e-na le hoo, ha re etsa qeto kapa ha re sebetsa bothata, rea botsa: ‘Ebe Jesu o ne a tla etsa joang boemong boo? Ebe o ne a tla rata ha ke etsa joang?’
22 Qetellong, re etsisa Jesu ka ho tšoareha ka “ho bolela litaba tse molemo.” (Matheu 4:23; 1 Bakorinthe 15:58) Le ntlheng ena, Bakreste ba latela mohlala o behiloeng ke Jesu, ’me sehloohong se latelang re tla tšohla hore na ba o latela joang.
Na U ka Hlalosa?
• Ke hobane’ng ha ho hlokahala hore Mokreste a ikokobetse?
• Re etsa joang hore re be le pono e ntle ea se nepahetseng le se fosahetseng?
• Bakreste ba etsisa Jesu joang ha ba sebetsana le khanyetso le mahloriso?
• Ho ka khoneha joang hore re “apare Morena Jesu Kreste”?
[Setšoantšo se leqepheng la 7]
Jesu o ile a beha mohlala o phethahetseng oa boikokobetso
[Setšoantšo se leqepheng la 8]
Karolong e ’ngoe le e ’ngoe ea bophelo ba Mokreste, ho akarelletsa le boboleling, ho hlokahala boikokobetso
[Setšoantšo se leqepheng la 9]
Satane a ka etsa hore boithabiso bo sa lokelang bo bonahale bo amoheleha ho Mokreste
[Setšoantšo se leqepheng la 10]
Ho rata barab’abo rōna ho tla re matlafatsa ha re hanyetsoa