JOSEFA OA ARIMATHEA O ba Sebete

JOSEFA OA ARIMATHEA o ne a tšaba ho bua le ’musisi oa Moroma e leng Ponse Pilato, ea neng a tsebahala a le manganga haholo. Leha ho le joalo, Josefa o ne a se na boikhethelo kaha Jesu o ne a lokeloa ho patoa ka tsela e hlomphehang le e nang le seriti. Kahoo Josefa o ne a lokela ho kopa Pilato ho lokolla setopo sa Jesu. Empa ha hoa ka ha e-ba thata haholo ho ea kamoo Josefa a neng a nahanne kateng. Ka mor’a hore molaoli oa lebotho a netefatse hore Jesu o shoele, Pilato o ile a fana ka taelo ea hore setopo sa Jesu se lokolloe. Le hoja a ne a ntse a utloile bohloko, Josefa o ile a khutlela sebakeng seo Jesu a bolaetsoeng ho sona.—Mar. 15:42-45.

• Josefa oa Arimathea e ne e le mang?

• O ne a tsebana joang le Jesu?

• Ke hobane’ng ha u lokela ho tseba haholoanyane ka eena?

Kosepele ea Mareka e re Josefa ke “setho sa Lekhotla se nang le botumo bo botle.” Tabeng ena Lekhotla le emela Sanhedrine, e leng lekhotla le phahameng la Bajuda. (Mar. 15:1, 43) Kaha Josefa e ne e le e mong oa baeta-pele ba Bajuda ebile e le morui, o ne a e-na le bolokolohi ba ho kopana le Pilato.—Mat. 27:57.

Litho tsa Lekhotla la Sanhedrine li ne li hloile Jesu hoo li ileng tsa rera ho mo bolaea. Empa Josefa eena e ne e le “monna ea molemo le ea lokileng.” (Luka 23:50) O ne a sa tšoane le basebetsi-’moho le eena. O ne a tšepahala a bile a phela ka melao ea Jehova. Hamorao Josefa e ile ea e-ba morutuoa oa Jesu ’me le eena joaloka ba bang o ne a “letetse ’muso oa Molimo.” (Mar. 15:43; Mat. 27:57) O ne a rata ’nete le toka ke kahoo a ileng a amohela molaetsa oa Jesu.

Johanne 19:38 e re Josefa e ne e le “morutuoa oa Jesu empa oa sephiri ka lebaka la ho tšaba Bajuda.” Josefa o ne a tšaba’ng? O ne a tseba hore Bajuda ba ne ba sa rate Jesu le hore ba fane ka taelo ea ho leleka mang kapa mang synagogeng ea neng a lumela ho Jesu. (Joh. 7:45-49; 9:22) Batho ba neng ba lelekoa synagogeng, ba ne ba nyatsuoa ke Bajuda. Kahoo, Josefa o ne a tšaba ho bolela phatlalatsa hore o lumela ho Jesu kaha ka ho etsa joalo o ne a tla tlosoa boemong ba hae ba ho ba moeta-pele le setho sa Lekhotla.

E ne e se Josefa feela ea neng a e-na le bothata boo. Johanne 12:42 e re: “Ba bangata esita le ho babusi ba hlile ba beha tumelo ho eena, empa ka lebaka la Bafarisi ba ne ba sa bolele hore ba na le tumelo ho eena, e le hore ba se ke ba lelekoa synagogeng.” Nikodemase eo e neng e le setho sa Lekhotla la Sanhedrine, le eena o ne a tšaba ho bolela phatlalatsa hore o lumela ho Jesu.—Joh. 3:1-10; 7:50-52.

Josefa o ne a tšaba ho bolela phatlalatsa hore ke morutuoa oa Jesu. Tšabo e joalo e tlisa mathata kaha Jesu o ile a re: “E mong le e mong ea bolelang hore o na le kopano le ’na ka pel’a batho, le ’na ke tla bolela hore ke na le kopano le eena ka pel’a Ntate ea maholimong; empa mang kapa mang ea ntatolang ka pel’a batho, le ’na ke tla mo latola ka pel’a Ntate ea maholimong.” (Mat. 10:32, 33) Ke ’nete hore Josefa ha aa ka a hana hore ke morutuoa oa Jesu empa le teng ha aa ka a ba sebete ’me a bolela phatlalatsa hore o lumela ho eena. Na le uena u ba le letsoalo ha u lokela ho bua ka Jesu?

Bibele e bontša hore Josefa ha aa ka a tšehetsa merero ea Lekhotla la Sanhedrine ea ho tšoara Jesu. (Luka 23:51) Ho ka etsahala hore ebe Josefa o ne a le sieo nyeoeng ea Jesu. Ho sa tsotellehe hore na o ne a ikutloa joang, Josefa o ile a utloa bohloko haholo ha tsena tsohle li etsahala. Empa ho ne ho se letho leo a ka le etsang.

Ka mor’a lefu la Jesu, Josefa o ile a ba sebete ’me a ikemisetsa ho tšehetsa balateli ba Jesu. Qeto ena ea hae re e bona ha re bala Mareka 15:43 e reng: “A ba sebete ho ea ka pel’a Pilato ’me a kōpa setopo sa Jesu.”

Josefa o tsebile ka lefu la Jesu pele ho Pilato kaha o ne a le teng ha Jesu a bolaoa. Ke kahoo ha Josefa a ne a kopa setopo ’musisi eo a ileng “a ipotsa hore na [Jesu] o se a shoele.” (Mar. 15:44) Ho ka etsahala hore ebe Josefa o ile a utloa bohloko haholo ha Jesu a ne a bolaoa eaba o ba sebete ’me o bua phatlalatsa hore ke e mong oa barutuoa ba Jesu. Ho sa tsotellehe hore na lebaka e bile lefe, Josefa o ile a bolela phatlalatsa hore ke morutuoa oa Jesu.

Molao oa Bajuda o ne o re batho bohle ba ahloletsoeng lefu ’me ba bolaoa, ba lokela ho patoa pele letsatsi le likela. (Deut. 21:22, 23) Baroma ba ne ba tlohela setopo sa motho ea tlotseng molao se fanyehiloe e le hore se bole kapa ba se lahlela ka lebitleng. Empa Josefa o ne a sa batle hore Jesu a patoe ka tsela eo. O ile a etsa lebitla leo a neng a tla patela Jesu ho lona pel’a sebaka seo a bolaetsoeng ho sona. Kaha Josefa o ne a sa tsoa fallela Jerusalema a tloha Arimatheaa, sebaka sa lepato seo a neng a tla patela ba lelapa la hae ho sona se ne se e-s’o sebetse. (Luka 23:53; Joh. 19:41) Hore ebe Josefa o ile a patela Jesu sebakeng sa hae sa lepato ke pontšo ea hore o ne a rata Jesu. Kahoo ho ile ha boela ha phethahala boprofeta ba hore Mesia o ne a tla patoa le “barui” kaha Josefa e ne e le morui.—Esa. 53:5, 8, 9.

Likosepele tse ’nè kaofela li re ka mor’a hore setopo sa Jesu se tlosoe thupeng ea tlhokofatso, Josefa o ile a se phuthela ka line ’me a se isa ka lebitleng. (Mat. 27:59-61; Mar. 15:46, 47; Luka 23:53, 55; Joh. 19:38-40) Nikodemase o ile a thusa Josefa ’me a tla le linoko tse tlotsang mofu. Kaha Nikodemase le Josefa ba ne ba hlompheha, ha baa ka ba tlosa setopo ka bobona empa ba ile ba laela bahlanka ba bona ho se nka le ho se pata. Le hoja ba ile ba laela bahlanka ba bona ho pata setopo, ba ile ba etsa mosebetsi oa bohlokoa haholo. Mang kapa mang ea neng a ka tšoara setopo, o ne a nkoa a sa hloeka ka matsatsi a supileng ’me le ntho eo a e tšoereng e ne e sa hloeka. (Num. 19:11; Hag. 2:13) Ha motho a ne a tšoere setopo o ne a sa itsoakanye le batho ba bang ka Paseka ’me a sa be teng le moketeng oo. (Num. 9:6) Josefa o ne a boetse a tl’o sonngoa ke litho tsa Lekhotla ka lebaka la ho pata Jesu. Leha ho le joalo, o ile a pata Jesu ka tsela e hlomphehang ’me a bolela phatlalatsa hore ke morutuoa oa Jesu ho sa tsotellehe mathata a neng a ka bakoa ke ho etsa joalo.

Josefa oa Arimathea o hlaha Likosepeleng feela. Ha ho moo a hlahang teng ka Bibeleng ntle le tlalehong ea lefu la Jesu. Taba ena e etsa hore batho ba ipotse potso ena: ‘Ho etsahetse eng ka eena?’ Ha re tsebe. Empa ho ea ka litaba tseo re li tšohlileng ka eena, ho ka etsahala hore ebe Josefa o ile a bolela phatlalatsa hore ke Mokreste. Josefa o ile a ba sebete, ’me le tumelo ea hae ea matlafala ka mor’a tsena tsohle.

Pale ena ea Josefa e etsa hore re nahanisise ka potso ena ea bohlokoa: ‘Na ho na le ntho leha e le efe eo e leng ea bohlokoa ho feta kamano ea rona le Jehova?’