Karolo ea Lipotso
● Ke hobane’ng ha e le habohlokoa ho qeta ho ithuta libuka tse peli ka botlalo le barutuoa ba bacha esita leha ba kolobetsoa pele buka ea bobeli e qetoa?
Jehova o hlohonolofatsa mokhatlo oa hae o hlophisitsoeng ka keketseho ea ba bacha ba phallelang ka liphuthehong. Re thabela ho bona keketseho ena. Leha ho le joalo, re ananela hore batho bana ba kang linku ba hloka thuso e tsoelang pele le tataiso hore ba ithute ho sebeletsa Jehova.
Ba bacha ba hloka thuso ea hore ba be le tsebo e nepahetseng ea ’nete. (Ba-Kol. 1:9, 10) Re na le tokelo ea ho ba thusa ho fumana kutloisiso e molemo ea lithuto tsa motheo tsa Bibele le ho utloisisa hantle seo Bibele e se rutang mabapi le litekanyetso tsa boitšoaro, bophelo ba Bokreste, le litaba tse amanang le tseo. Sena se tla ba thusa ho itsetsepela ka tieo ’neteng e le hore ba ka hlōla liteko life kapa life tseo mohlomong li larileng ka pele.
Hape ho hlokahala hore liithuti li hōle matleng a tsona a kutloisiso. (1 Ba-Kor. 14:20, NW) Phihlelo e bontšitse hore ho finyella boemo ba monna ea hōlileng ka ho felletseng, thuto ea botho ea Bibele hammoho le tichere ea thusa. Ka hona, le hoja motho a ka kolobetsoa pele a qeta ho ithuta libuka tse peli, ntho e bohlale ke hore thuto ea hae ea lehae ea Bibele e lokela ho tsoela pele ho fihlela a qetile ho ithuta libuka tseo tse peli.
KA MOR’A KOLOBETSO
Jesu o itse re lokela ho etsa barutuoa—re ba kolobetse le ho ba ruta. (Matt. 28:19, 20) Ho rutoa ho hoholo ha barutuoa ho etsoa ka mor’a kolobetso. Hangata tsebo eo motho a ka e fumanang bukeng e le ’ngoe feela ha ea lekana ho phetha koetliso ea hae ea moea. Ho hlokahala thupelo e eketsehileng ho etsa hore a tšoanelehe bakeng sa tšebeletso le ho mo hlomella hore a hanele likhatello tse tlelang ba sebeletsang Jehova mehleng ena ea qetello. Ho hlōleha ho fana ka koetliso e lekaneng ho ka ’na ha siea seithuti se sa itokisetsa ho ikemela moeeng. Ka mor’a hore motho e mocha a kolobetsoe, re tsoela pele ho mo thusa hore a tsoele pele ka ho eketsehileng ho sa tsotellehe hore na o qetile ho ithuta libuka tse peli kapa che. Buka ea pele e ithutoang e fana ka kutloisiso linthong tsa motheo. Buka ea bobeli e akaretsa litšoaneleho tsa Bokreste. Libuka tsena e ka ’na ea e-ba buka ea Phela ka ho sa Feleng le buka ea Ho Kopana Borapeling kapa buka ea Khotso ea ’Nete. Haeba libuka tsena li le sieo, mohlomong ho ka sebelisoa tse ling tse nang le boitsebiso bo tšoanang. Ho ntšetsa pele thuto ea Bibele ho fihlela ho qetoa buka ea bobeli ho fana ka thuto e utloahalang ea merero ea Jehova hammoho le litekanyetso le litlhokahalo tsa hae tse phahameng tsa Bokreste. Sena se thusa motho e mocha ho utloisisa se boleloang ke melao-motheo ea Bokreste le ho ema a tiile tumelong. (Ba-Kol. 2:7) Bakeng sa makolopetso a eketsehileng le boitsebiso bo mabapi le ho tlaleha lithuto tse joalo, bona Karolo ea Lipotso ho Tšebeletso ea Rona ea ’Muso ea November 1987.
Ha e le hantle, ho lebelletsoe hore batho ba bacha ba tsoele pele moeeng ka mor’a kolobetso. (Ba-Heb. 6:1-3) Maemong a mangata ha ho nke nako e telele hore ho qetoe buka ea bobeli. Ka hona motho e mocha o fuoa motheo o tiileng.