Pono Ea Bibele
Na re Tlameha ho Phetha Likano tsa Rōna?
BANYALANI ba bang ba neng ba thabile ba tobana le mathata a sithabetsang. Lilemong tse fetileng, ha ba ne ba tetebetse ka har’a mathata a boima a lelapa, ba ile ba ikana hore ba tla fana ka karolo e le ’ngoe ho tse leshome ea chelete ea bona ho Molimo haeba a ne a ka ba ntša likhathatsong tsa bona. Hona joale, ba se ba tsofetse ’me ba imeloa ke mathata a neng a sa lebelloa a chelete, baa ipotsa, “Na re tlameha ho phethahatsa kano ee?”
Boemo ba bona ba tlokotsi bo hatisa bohlokoa ba keletso ea monna ea bohlale khahlanong le ho ba lehala ho bueeng: “Ho molemo ha u ke ke ua etsa kano, ho e-na le hore u e etse, ebe ha u e phethahatse. Se lumelle leleme la hao ho u khannela sebeng, ebe joale u re ho morōmuoa [“lengeloi,” NW] oa Molimo: ‘Ke entse phoso!’”—Moeklesia 5:5, 6, BPN.
Ho se Etsoe Phephi ka Mabaka a sa Utloahaleng
Le hoja likano tse thekeselang le litšepiso tsa bohata li tloaelehile mokhatlong oa kajeno oa batho ba lumellang ntho e ’ngoe le e ’ngoe, re ke ke ra lebella hore Molimo a lumele liphepi tse iqapetsoeng; esita le bahoebi ba tseba hamolemo ho feta moo. Makasineng oa khoebo Industry Week, sehloohong se seng se reng “Botšepehi Khoebong: Na ke Booatla?” se ile sa belaela ka ho re: “Ha re sa tšepa batho hore ba ka bolela ’nete, hore ba ka etsa se nepahetseng ho fapana le hore ba itšoasolle boikanong, le ho phelela boitlamo ba bona.” Le hoja batho ba kolotoang ba ka ’na ba thetsoa ke ba ba kolotang ka hore ba ba “romelletse cheke bakeng sa ho ba lefa,” mangeloi oona a ke ke a thetsoa.
Sena hase bolele hore Molimo o sebelisa mangeloi ho bona hore batho ba phetha likano tsa bona ka tsela e tšoanang le ea motho ea alimanang ka chelete ka ho hanyapetsa ba e alimang ka tsoala e ngata eo mohlomong a neng a ka ’na a sebelisa likoeta ho utsoetsa ka mahahapa batho ba hlokang lehlohonolo ba ileng ba alima ho eena ka hore ba lefe tsoala e ngata. Ho e-na le hoo, Molimo ka lerato o etsa mangeloi a hae “meea bakeng sa tšebeletso [e hahang] ea sechaba, e romeletsoeng ho sebeletsa ba tlang ho ja lefa la poloko.” (Ba-Heberu 1:14, NW) Ka booona, mangeloi a ka ho etsa ebile aa ameha ho arabeloeng ha lithapelo tsa rōna tse tsoang botebong ba pelo.
Leha ho le joalo, haeba lithapelong tsa rōna re tsoela pele ho etsa litšepiso tseo re sa li phethahatseng, na ka ho loketseng re ka lebella tlhohonolofatso ea Molimo? Monna ea bohlale o re: “Eba u etsetsa’ng hore Molimo a halefisoe ke lipolelo tsa hao, ebe o felisa [bonyane, ho isa bohōleng bo itseng] mosebetsi oa matsoho a hao?”—Moeklesia 5:6b, BPN.
Kahoo, hase ho tšaba lengeloi le iphetetsang ho lokelang ho re susumelletsa ho phetha likano tsa rōna re sa etse liphephi. Ho e-na le hoo, re lokela ho nka kamano e ntle le Molimo e le ea bohlokoa ’me ka botšepehi re lakatse ho amoheloa ke Molimo tšebeletsong ea rōna. Joalokaha banyalani ba boletsoeng ka holimo ba boletse tjena ka makhethe: “Re batla ho ba le letsoalo le letle ka pel’a Molimo ’me re batla ho nka bohato tumellanong le thato ea hae.”
Boloka Letsoalo le Letle
E le hore re ka ba le letsoalo le hloekileng mabapi le ho phetha kano ea rōna, re lokela ho tšepahala ho rōna ka borōna. Ho etsa papiso: Haeba motho e mong a u kolota chelete e ngata empa ka lebaka la bomalimabe bo itseng a iphumana a sitoa ho u lefa. Ke hofe ho neng ho tla u thabisa haholoanyane—na ke haeba a qhelela molato oohle ka thōko e le oo a sitoang ho o lefa kapa haeba bonyane a ne a ka lokisetsa ho u lefa oona ka likhaohana tse ntšoang ka mehla ho ea kamoo a ka khonang?
Ka mabaka a tšoanang, nahana ka kano e entsoeng ka lepotla-potla e sa kang ea phethahatsoa ea ho nehelana ha motho ka nako ea hae e tletseng kapa matla mesebetsing e loketseng ea Bokreste. Na ha rea lokela ho ikutloa re tlamehile ho phetha kano ea rōna ka botlalo ho ea kamoo maemo a rōna a hona joale a ka re lumellang? Pauluse o ngotse: “Ha boitokisetso bo le teng pele, hoo ke ho amohelehang ka ho khethehileng” ebang re na le ho hongata hoo re ka fanang ka hona kapa ho fokolang feela. (2 Ba-Korinthe 8:12, NW) Empa ho thoe’ng ka likano tseo motho a ileng a li etsa pele a fumana tsebo e nepahetseng ea ’nete ea Bibele?
Likano tse Fosahetseng Kapa Tseo Eseng tsa Mangolo
Haeba re ithuta hore kano e litšila kapa ke ea boitšoaro bo bobe, re lokela ho e nyahlatsa joalokaha eka ke leshala le hlenneng leo re neng re le fupere! (2 Ba-Korinthe 6:16-18) Mehlala ea likano tse sa hloekang ke ena:
◻ Likano tse entsoeng ho melimo ea bohata kapa melimotsana, e kang “mofumahali oa leholimo” oa Babylona.—Jeremia 44:23, 25.
◻ Likano tseo eseng tsa molao, joaloka kano ea banna ba 40 ea hore ba ne ba ke ke ba ja letho pele ba bolaea moapostola Pauluse.—Liketso 23:13, 14.
◻ Likano tsa bakoenehi ba latelang “lithuto tsa bademona; ka . . . baruti ba bohata . . . ba tlang ho hana ha batho ba nyala, ba tla re, ho tšajoe lijo tseo Molimo o li bōpileng hore ba lumetseng, ba tsebang ’nete, ba li amohele ka teboho.”—1 Timothea 4:1-3.
Kahoo, ho totobetse hore re ka ’na ra lokela ho bolela likano tse ling tsa nako e fetileng e le lefeela. Empa ka likano tse sa amaneng ka letho le hananang le mangolo, ke hobane’ng ha re batla mefokolo? Na tsebo e nepahetseng eo re nang le eona hona joale ha ea lokela ho re etsa hore re bontše tlhompho e khōloanyane likanong tsa rōna tsa pele ho feta leha e le neng pele?
Nahanisisa ka Likano tsa Hao tsa Nako e Fetileng le tsa ka Moso
Hape hoa utloahala hore re lokela ho nahana ka ho teba pele re phaella likano leha e le life tsa ka moso borapeling ba rōna. Likano ha lia lokela ho sebelisetsoa feela hore li susumetse motho hore a etse kapa a se ke a etsa ntho e itseng, joaloka hore motho a eketse nako ea hae eo a e sebelisetsang borapeli ba Bokreste kapa ho itšoara hore a se ke a ja ka ho tlōlisa. Leha ho le joalo, Jesu, haa ka a hanyetsa likano tsohle, joalokaha ka mohlala, ho ka hlokahala lekhotleng la molao. Empa kamoo ho bonahalang ka teng o ile a beha moeli mabapi le likano tse sa khetholleheng habonolo, o ile a lemosa: “Ho itsoe ho ba mehleng ea boholo-holo, ‘u se ke ua hlapanya ntle le ho phetha, empa u tlameha ho phetha likano tsa hao ho Jehova.’ Leha ho le joalo, ke re ho lōna: Le se ke la hlapanya ho hang.” (Mattheu 5:33, 34, NW) Ke hobane’ng ha a ile a nka boemo boo? Na likano li ne li se li sa lokela ho feta pele?
Hangata ba tšepahalang ba mehleng ea boholo-holo ba ne ba etsa likano tlas’a maemo a itseng feela. Ka thapelo e tiileng ba ne ba ee ba tšepise Jehova, ‘Haeba u ka nthusa ho tsoa maqakabetsing ana, ke tla u etsetsa hore le hore.’ Empa Jesu o ile a re: “Ntho tsohle tsee le tla li qela ho Ntate ka lebitso la ka, o tla le fa tsona.” Ho fapana le hore a buelle likano tse ka etsoang tlas’a maemo a itseng ke ba tšepahalang ba mehleng ea hae, Jesu o ile a ba tiisetsa: “Ho fihlela joale, ha le e-so ho kōpe letho ka lebitso la ka; kōpang, ’me le tla fuoa.”—Johanne 16:23, 24.
Tšepo ena lebitsong, kapa boemong, ba Jesu e lokela ho khothatsa mang le mang ea ntseng a ikutloa a le molato hobane—le hoja a etsa boiteko—ha a khone ho phethahatsa tšepiso eo a ileng a e etsetsa Molimo “ka molomo oa hae a sa ka a e nahanisisa.” (Levitike 5:4-6, NW) Kahoo re ntse re sa khelle fatše likano tseo re li entseng nakong e fetileng, hase feela hore re ka rapela ka lebitso la Jesu empa re ka ipiletsa ho Molimo hore a sebelise sehlabelo sa topollo sa Jesu bakeng sa libe tsa rōna, ’me re ka kōpa tšoarelo ka lebitso la Jesu. Ka tsela ena re ka fumana “tiisetso e tletseng ea tumelo, kaha lipelo tsa rōna li [hloekisitsoe] letsoalong le lebe.”—Ba-Heberu 10:21, 22, NW.
[Tlhaloso ea Moo Setšoantšo se Nkiloeng Teng e leqepheng la 24]
Priests taking vows at Montmartre