Khaolo ea 5

“Matlotlo ’Ohle a Bohlale”

1-3. Puo eo Jesu a faneng ka eona ka 31 C.E., o e fane boemong bofe, hona ke hobane’ng ha bamameli ba hae ba ile ba hlolloa?

KE LETSATSI le leng nakong ea selemo ka 31 C.E. Jesu Kreste o haufi le Kapernauma, e leng motse o phetheselang o lebōpong le ka leboea-bophirimela ho Leoatle la Galilea. Jesu o qetile bosiu bohle a rapela a ’notši thabeng e haufi le moo. Ha bosiu bo e-sa, o bitsa barutuoa ba hae, ’me har’a bona o khetha ba 12, bao a ba bitsang baapostola. Ho sa le joalo, batho ba bangata—bao ba bang ba bona ba tsoang hōle—ba latetse Jesu ho tla sebakeng sena ’me ba bokane motsitseng oa thaba ena. Ba labalabela ho utloa seo a se buang le hore a ba folise maloetse. Jesu ha a ba soetse.—Luka 6:12-19.

² Jesu o ea letšoeleng ’me o folisa bohle ba kulang. Qetellong, ha bohle ba se ba se na mahlaba a bakoang ke ho kula ho tebileng, o lula fatše ’me o qala ho ruta.a E tlameha ebe bamameli ba hae ba ile ba makatsoa ke seo a ileng a se bua letsatsing leo le pholileng hamonate la selemo. Etsoe ho ne ho se mohla ba kileng ba utloa motho ea rutang joaloka eena. Ha aa ka a qotsa lineano tsa molomo kapa se builoeng ke bo-rabi ba tsebahalang ba Bajuda ho hatisa bohlokoa ba seo a se rutang. Ho e-na le hoo, o ile a qotsa khafetsa se ngotsoeng Mangolong a bululetsoeng a Seheberu. Molaetsa oa hae o ne o tobile, o ne a sebelisa mantsoe a bonolo, ’me seo a se buang se ne se hlakile. Ha a qeta, matšoele a ne a hloletsoe. Ha e le hantle, a ne a tlamehile. A ne a sa tsoa mamela motho ea bohlale ka ho fetisisa ea kileng a phela!—Matheu 7:28, 29.

³ Thuto eo hammoho le lintho tse ling tse ngata tseo Jesu a ileng a li bua le ho li etsa li tlalehiloe Lentsoeng la Molimo. Re lokela ho hlahloba seo tlaleho eo e bululetsoeng e se buang ka Jesu, kaha ho eena ho na le “matlotlo ’ohle a bohlale.” (Bakolose 2:3) O ne a fumane bohlale boo hokae—ba hore a khone ho matahanya tsebo le kutloisiso hore li sebetse ka tsela e atlehang? O bonahalitse bohlale joang, hona re ka latela mohlala oa hae joang?

‘Monna eo o Fumane Bohlale Boo Hokae?’

 4. Bamameli ba Jesu ha a le Nazaretha ba ile ba botsa potso efe, hona hobane’ng?

⁴ Ha Jesu a le leetong le leng la hae la boboleli, o ile a etela Nazaretha, e leng motse oo a hōletseng ho oona, ’me a qala ho ruta synagogeng moo. Ba bangata ba bamameli ba hae ba ile ba makala ’me ba botsa: ‘Monna eo o fumane bohlale boo hokae?’ Ba ne ba tseba ba lelapa labo—batsoali ba hae le banab’abo—le hore o tsoa lelapeng le futsanehileng. (Matheu 13:54-56; Mareka 6:1-3) Ha ho pelaelo hore ba ne ba boetse ba tseba hore ’metli enoa ea kheleke puong ha aa kena se seng sa likolo tse hlaheletseng tsa bo-rabi. (Johanne 7:15) Kahoo potso ea bona e ne eka ea utloahala.

 5. Jesu o ile a senola hore bohlale ba hae bo tsoa mohloling ofe?

⁵ Bohlale boo Jesu a neng a bo bonahatsa e ne e se feela hobane a phethahetse kelellong. Hamorao tšebeletsong ea hae, ha a ntse a ruta phatlalatsa tempeleng, Jesu o ile a senola hore bohlale ba hae bo tsoa mohloling o phahameng haholo. O ile a re: “Seo ke se rutang hase sa ka, empa ke sa ea nthomileng.” (Johanne 7:16) Ha e le hantle, Ntate, ea romileng Mora, e ne e le eena mohloli oa bohlale ba Jesu. (Johanne 12:49) Empa Jesu o fumane bohlale boo ho Jehova joang?

6, 7. Jesu o fumane bohlale ka litsela life ho Ntate oa hae?

⁶ Moea oa Jehova o halalelang o ne o sebetsa pelong le kelellong ea Jesu. Ha Esaia a profeta ka Jesu e le Mesia ea tšepisitsoeng, o ile a re: “Moea oa Jehova o tla lula holim’a hae, moea oa bohlale le oa kutloisiso, moea oa keletso le oa matla, moea oa tsebo le oa ho tšaba Jehova.” (Esaia 11:2) Kaha moea oa Jehova o ne o le ho eena o bile o mo tataisa tseleng eo a nahanang ka eona le liqetong tseo a li etsang, na ke ho makatsang hore ebe lintho tseo Jesu a neng a li bua le tseo a neng a li etsa li ne li bonahatsa bohlale bo tsotehang?

⁷ Jesu o ile a fumana bohlale ho Ntate oa hae ka tsela e ’ngoe e ikhethang. Joalokaha re bone Khaolong ea 2, ka nako e telele eo Jesu a e phetseng pele e e-ba motho oa nama, o bile le monyetla oa ho ithuta tsela eo Ntate oa hae a nahanang ka eona. Re sitoa ho hlalosa bohlale bo tebileng boo Mora a ileng a ithuta bona ho Ntate, ha a ntse a sebetsa e le “mosebetsi ea hloahloa” oa Molimo ho bōpa lintho tsohle tse phelang le tse sa pheleng. Ka ho utloahalang, Mora o hlalosoa e le bohlale bo mothofalitsoeng boemong boo a neng a le ho bona pele e e-ba motho oa nama. (Liproverbia 8:22-31; Bakolose 1:15, 16) Nakong ea tšebeletso ea hae, Jesu o ile a khona ho sebelisa bohlale boo a ithutileng bona ho Ntate oa hae leholimong.b (Johanne 8:26, 28, 38) Kahoo, ha rea lokela ho makatsoa ke kamoo mantsoe a Jesu a bonahatsang tsebo e pharaletseng le kutloisiso e tebileng kateng kapa hona ho makatsoa ke kamoo sohle seo a neng a se etsa se bonahatsang hore o ahlola lintho ka nepo kateng.

 8. Joaloka balateli ba Jesu, re ka fumana bohlale joang?

⁸ Kaha re balateli ba Jesu, le rōna re lokela ho itšetleha ka Jehova e le eena mohloli oa bohlale. (Liproverbia 2:6) Ke ’nete hore Jehova ha a re fe bohlale ka tsela ea mohlolo. Leha ho le joalo, o araba lithapelo tsa rōna ha re kōpa ka tieo bohlale bo hlokahalang e le hore re sebetsane ka katleho le mathata a bophelo. (Jakobo 1:5) Ho hlokahala hore re ikitlaetse e le hore re fumane bohlale boo. Re lokela ho lula re bo batla “joaloka matlotlo a patiloeng.” (Liproverbia 2:1-6) Ha e le hantle, re lokela ho tsoela pele re fatisisa Lentsoeng la Molimo, moo bohlale ba hae bo senotsoeng teng, ’me re phele tumellanong le seo re ithutang sona. Mohlala oa Mora oa Jehova ke oa bohlokoa ka ho khetheha tabeng ea ho re thusa ho fumana bohlale. A re ke re hlahlobeng lintlha tse ’maloa tseo Jesu a ileng a bonahatsa bohlale ho tsona ’me re bone kamoo re ka mo etsisang kateng ho tsona.

Mantsoe a Bohlale

 9. Ke’ng se neng se etsa hore lithuto tsa Jesu e be tse fanang ka bohlale hakaale?

⁹ Batho ba ile ba tla ho Jesu ka bongata ho tla mo mamela ha a bua. (Mareka 6:31-34; Luka 5:1-3) E ne e se feela, ha Jesu a ne a bua ho ne ho tsoa mantsoe a bohlale bo ikhethang! Seo a neng a se ruta se ne se bonahatsa hore o na le tsebo e tebileng ea Lentsoe la Molimo le hore o khona ho ntša moko-taba ka tsela e ikhethang. Lithuto tsa hae li ipiletsa ho batho bohle ebile ha li felloe ke nako. Nahana ka mehlala e meng ea bohlale bo fumanoang mantsoeng a Jesu, e leng “Moeletsi ea Hlollang” ea ileng a boleloa esale pele.—Esaia 9:6.

10. Jesu o re khothalletsa hore re hlaolele litšobotsi life tse ntle, hona hobane’ng?

¹⁰ Thuto ea Thabeng, eo ho buuoeng ka eona qalong, ke tlaleho ea lithuto tseo Jesu a li rutileng puong eo a faneng ka eona ka ho toba ho se na motho ea ntseng a hlalosa kapa a bua mantsoe a itseng. Thutong ena, Jesu ha a re eletse feela hore re hahamalle ho bua le ho itšoara ka tsela e loketseng, o fihla khubung ea taba. Kaha Jesu oa tseba hore menahano le maikutlo ke tsona tse susumetsang seo motho a se buang le seo a se etsang, o re khothalletsa hore re hlaolele litšobotsi tse ntle tse susumetsang maikutlo le pelo, tse joaloka ho ba le maikutlo a bonolo, ho lapela ho loka, ho ba le tšekamelo ea ho ba mohau le ho ba ea phehellang khotso le ea ratang ba bang. (Matheu 5:5-9, 43-48) Ha re hlaolela litšobotsi tseo lipelong tsa rōna, seo se tla etsa hore re bue ka tsela e hahang re be re itšoare hantle, e leng ntho e khahlisang Jehova e bileng e etsang hore re be le kamano e ntle le batho ba bang.—Matheu 5:16.

11. Jesu o fihla motsong oa taba joang ha a fana ka keletso tabeng ea boitšoaro ba boetsalibe?

¹¹ Jesu o fihla motsong oa taba ha a fana ka keletso tabeng ea boitšoaro ba boetsalibe. Ha a re feela re qobe liketso tse mabifi. Ho e-na le hoo, o re lemosa hore re se ke ra koetla khalefo lipelong tsa rōna. (Matheu 5:21, 22; 1 Johanne 3:15) Ha a hanele bofebe feela. Ho e-na le hoo, o lemosa ka takatso e matla e qalang pelong ebe e lebisa motho ketsong eo ea ho se tšepahale. O re eletsa hore re se ke ra lumella mahlo a rōna ho re tsosetsa takatso e fosahetseng le e litšila. (Matheu 5:27-30) Jesu ha a bue ka ketso feela, empa o bua le ka sesosa sa eona. O bua ka maikutlo le litakatso tse lebisang motho sebeng.—Pesaleme ea 7:14.

12. Balateli ba Jesu ba talima keletso ea hae joang, hona hobane’ng?

¹² Mantsoe a Jesu a fupere bohlale ruri! Ha ho makatse hore ebe “bongata bo ile ba hlolloa ke tsela ea hae ea ho ruta.” (Matheu 7:28) Kaha re balateli ba hae, re nka keletso ea hae e bohlale e le tataiso bophelong. Re leka ho hlaolela litšobotsi tse ntle tseo a li khothalelitseng—tse akarelletsang ho ba mosa, ho phehella khotso le ho ba le lerato—re tseba hore ka ho etsa joalo re tla be re rala motheo oa boitšoaro bo khahlisang Molimo. Re leka ka matla ho etsa hore maikutlo le litakatso tse fosahetseng tseo a lemositseng ka tsona, tse kang bohale bo lonya le takatso ea boitšoaro bo litšila li tsoe ka metso lipelong tsa rōna, re tseba hore ho etsa joalo ho tla re thusa ho qoba boitšoaro ba boetsalibe.—Jakobo 1:14, 15.

Ho Phela ka Tsela e Tataisoang ke Bohlale

13, 14. Ke’ng se bontšang hore Jesu o ile a sebelisa kahlolo e molemo ha a khetha tsela eo a tla phela ka eona?

¹³ Jesu o bonahatsa bohlale ka seo a se buang le ka seo a se etsang. Tsela eo a neng a phela ka eona—liqeto tseo a neng a li etsa, tsela eo a neng a italima ka eona le tsela eo a neng a sebelisana le ba bang ka eona—e bonahalitse likarolo tse ngata tse ntle tsa bohlale. Nahana ka mehlala e seng mekae e bontšang hore Jesu o ne a tataisoa ke “bohlale bo sebetsang le matla a ho nahana.”—Liproverbia 3:21.

¹⁴ Bohlale bo akarelletsa ho ahlola lintho ka nepo. Jesu o ile a sebelisa kahlolo e molemo ha a khetha tsela eo a tla phela ka eona. Na u ka inahanela hore na a ka be a ile a phela bophelo bo joang—a ikahela ntlo e joang, a iketsetsa khoebo e joang, kapa hona ho hlahella hakae? Jesu o ne a tseba hore ho hahamalla lintho tseo bophelong “ke lefeela le ho lelekisa moea.” (Moeklesia 4:4; 5:10) Ho phela ka tsela eo ke booatla, hase bohlale. Jesu o ile a khetha ho phela bophelo bo itekanetseng. O ne a sa ameha ka ho batla chelete kapa ka ho bokella lintho tse bonahalang. (Matheu 8:20) Tumellanong le seo a neng a se ruta, o ile a tsepamisa maikutlo tabeng e le ’ngoe feela—e leng ho etsa thato ea Molimo. (Matheu 6:22) Jesu o ile a sebelisa nako ea hae le matla a hae ka bohlale ka ho phehella mesebetsi e amanang le ’Muso, e leng mesebetsi ea bohlokoa e bileng e khotsofatsang ho feta lintho tse bonahalang. (Matheu 6:19-21) Kahoo o re sietse mohlala oo re lokelang ho o etsisa.

15. Balateli ba Jesu ba ka bontša joang hore ba tsepamisitse kelello nģa e le ’ngoe feela, hona ke hobane’ng ha ho etsa joalo e le bohlale?

¹⁵ Balateli ba Jesu kajeno ba bona bohlale ba ho tsepamisa kelello nģa e le ’ngoe feela. Kahoo ba qoba ho ikimetsa ka likoloto tse sa hlokahaleng le ho lelekisa lintho tse ling tse tloaelehileng tse ka ba jellang nako le ho ba qeta matla. (1 Timothea 6:9, 10) Ba bangata ba lekile ho bebofatsa bophelo ba bona e le hore ba qete nako e eketsehileng ba le tšebeletsong ea Bokreste, mohlomong ebile e le baboleli ba ’Muso ba nako e tletseng. Ha ho na tsela e ’ngoe e bohlale ho feta ena, kaha ho beha mesebetsi e amanang le ’Muso sebakeng se loketseng ho tlisetsa motho thabo le khotsofalo e khōlō.—Matheu 6:33.

16, 17. (a) Jesu o bontšitse ka litsela life hore o ne a inyenyefatsa a bile a talima lintho ka tsela ea sebele mabapi le seo a lebeletseng ho se finyella? (b) Re ka bontša joang hore rea inyenyefatsa ebile re talima lintho ka tsela ea sebele mabapi le seo re lebeletseng ho se finyella?

¹⁶ Bibele e amahanya bohlale le boinyenyefatso, bo akarelletsang ho elelloa moo re haelloang teng. (Liproverbia 11:2) Jesu o ne a inyenyefatsa a bile a talima lintho ka tsela ea sebele mabapi le seo a lebeletseng ho se finyella. O ne a tseba hore a ke ke a sokolla motho e mong le e mong ea utloang molaetsa oa hae. (Matheu 10:32-39) Hape o ne a hlokomela hore eena a ka finyella palo e itseng feela ea batho. Kahoo ka bohlale o ile a beha mosebetsi oa ho etsa barutuoa boikarabelong ba balateli ba hae. (Matheu 28:18-20) Ka ho inyenyefatsa o ile a lumela hore ba ne ba “tla etsa mesebetsi e meholo” ho feta eo eena a e entseng, kaha bona ba ne ba tla finyella batho ba likarolong tse ngata ebile e le ka nako e telele ho feta ea hae. (Johanne 14:12) Jesu o ne a boetse a hlokomela hore le eena o hloka thuso. O ile a amohela thuso ea mangeloi a ileng a tla ho eena lefeelleng ho tla mo sebeletsa le ea lengeloi le ileng la tla ha a le Gethesemane ho tla mo matlafatsa. Mora oa Molimo o ile a kōpa thuso nakong eo a neng a e hloka.—Matheu 4:11; Luka 22:43; Baheberu 5:7.

¹⁷ Le rōna re lokela ho inyenyefatsa le ho talima lintho ka tsela ea sebele mabapi le seo re lebeletseng ho se finyella. Ke ’nete hore re batla ho sebetsa ka moea oohle le ho ikitlaetsa ha re bolela le ha re etsa mosebetsi oa ho etsa barutuoa. (Luka 13:24; Bakolose 3:23) Ka nako e tšoanang, re lokela ho hopola hore Jehova ha a re bapise le ba bang, kahoo le rōna ha rea lokela ho ipapisa le bona. (Bagalata 6:4) Bohlale bo sebetsang bo tla re thusa ho ipehela lipakane tse utloahalang ho latela matla a rōna le maemo a rōna. Ho feta moo, bohlale bo tla tataisa ba maemong a boikarabelo hore ba amohele hore ho na le moo ba haelloang teng le hore ka linako tse ling ba hloka thuso le tšehetso. Boinyenyefatso bo tla ba nolofalletsa ho ananela thuso eo ba e fuoang, e le ha ba hlokomela hore Jehova a ka ’na a sebelisa molumeli-’moho le bona ho ba “thuso e [ba] matlafatsang.”—Bakolose 4:11.

18, 19. (a) Ke’ng se bontšang hore Jesu o ne a e-na le kahlolo e molemo a bile a sheba se molemo seo motho a se etsang ha a sebelisana le barutuoa ba hae? (b) Ke hobane’ng ha re e-na le lebaka le utloahalang la ho sheba se molemo seo ba bang ba se etsang le la ho sebelisa kahlolo e molemo ha re sebelisana le ba bang, hona re ka etsa seo joang?

¹⁸ Jakobo 3:17 e re: ‘Bohlale bo tsoang holimo bo na le kahlolo e molemo.’ Jesu o ne a e-na le kahlolo e molemo a bile a sebelisana le barutuoa ba hae ka tsela e mosa. O ne a tseba mefokolo ea bona, leha ho le joalo o ne a sheba se molemo seo ba se etsang. (Johanne 1:47) O ne a tseba hore ba tlil’o mo siea kherehloa bosiung boo a tšoeroeng ka bona, empa ha aa ka a belaella botšepehi ba bona. (Matheu 26:31-35; Luka 22:28-30) Petrose o ile a latola ka makhetlo a mararo hore o tseba Jesu. Ho ntse ho le joalo, Jesu o ile a rapella Petrose ’me a bontša hore oa mo tšepa. (Luka 22:31-34) Thapelong ea Jesu ho Ntate oa hae, eo a e entseng bosiung ba hae ba ho qetela a le lefatšeng, ha aa ka a tsepamisa maikutlo liphosong tseo barutuoa ba hae ba li entseng. Ho e-na le hoo, o ile a babatsa tsela eo ba phetseng ka eona ho fihlela bosiung boo, a re: “Ba bolokile lentsoe la hao.” (Johanne 17:6) Le hoja ba ne ba sa phethahala, o ile a ba fa boikarabelo ba hore ba hlokomele mesebetsi e amanang le ’Muso e lefatšeng. (Matheu 25:14, 15; Luka 12:42-44) Ha ho pelaelo hore tšepo le tumelo eo a neng a e-na le eona ho bona e ile ea ba matlafalletsa ho ntšetsa pele mosebetsi oo a neng a laetse hore ba o etse.

¹⁹ Balateli ba Jesu ba na le lebaka la ho mo etsisa ntlheng ena. Haeba Mora ea phethahetseng oa Molimo o ile a sebetsana ka mamello le barutuoa ba hae ba sa phethahalang, joale rōna re bile re le baetsalibe, re lokela ho bontša ho ba le kahlolo e molemo hakaakang ha re sebelisana le ba bang! (Bafilipi 4:5) Ho e-na le ho tsepamisa maikutlo mefokolong ea barapeli-’moho le rōna, re lokela ho sheba se molemo seo ba se etsang. Re lokela ho hopola hore ke Jehova ea ba hutseng. (Johanne 6:44) Kahoo, e tlameha ebe o bona se itseng se molemo seo ba se etsang, ’me le rōna re lokela ho se bona. Boikutlo boo ha bo na ho re thusa “ho hlokomoloha liphoso” feela empa bo tla re thusa le ho batla lintho tseo re ka babatsang ba bang ka tsona. (Liproverbia 19:11, The New English Bible) Ha re bontša bara le barali babo rōna ba Bakreste hore rea ba tšepa, re ba thusa hore ba etse sohle se matleng a bona tšebeletsong ea Jehova le hore ba e thabele.—1 Bathesalonika 5:11.

20. Re lokela ho etsa’ng ka mohloli o tšepahalang oa bohlale o fumanehang litlalehong tsa Kosepele, hona hobane’ng?

²⁰ Ka sebele litlaleho tsa Kosepele tsa bophelo ba Jesu le tšebeletso ea hae ke mohloli o tšepahalang oa bohlale! Re lokela ho etsa’ng ka mpho ee ea bohlokoahali? Ha a phethela Thuto ea Thabeng, Jesu o ile a phehella bamameli ba hae hore ba se ke ba utloa lipolelo tsa hae tse bohlale feela empa hore hape ba li phethe, kapa ba li sebelise. (Matheu 7:24-27) Ho fetola tsela eo re nahanang ka eona, sepheo seo re etsang lintho ka sona le liketso tsa rōna hore li lumellane le mantsoe a Jesu a bohlale le liketso tsa hae ho tla re thusa ho phela ka tsela e molemo ka ho fetisisa hona joale le hore re lule tseleng e isang bophelong bo sa feleng. (Matheu 7:13, 14) Ka sebele ha ho tsela e ’ngoe eo re ka phelang ka eona e molemo kapa e bohlale ho feta ena!

[Mongolo o botlaaseng ba leqephe]

U ka Latela Jesu Joang?

● Haeba u nahana hore u khopisitse molumeli-’moho le uena, ke bohlale hore u etse’ng?—Matheu 5:23, 24.

● Ke joang mantsoe a Jesu a ka u thusang hore u etse lintho ka tsela e bohlale ha motho a u khopisitse kapa a u halefisitse?—Matheu 5:38-42.

● Ho thuisa ka mantsoe a Jesu ho ka u thusa ho ba le pono e leka-lekaneng joang ka chelete le lintho tse bonahalang?—Matheu 6:24-34.

● Ho latela mohlala oa Jesu ho ka u thusa ho etsa qeto e bohlale joang tabeng ea ho khetha lintho tse tlang pele bophelong ba hao?—Luka 4:43; Johanne 4:34.

[Setšoantšo se leqepheng la 47]

“Bongata bo ile ba hlolloa ke tsela ea hae ea ho ruta”

[Setšoantšo se leqepheng la 50]

Bohlale ba Molimo bo senotsoe ka Bibeleng