Thuto e Fumanoang ho Linonyana le Lipalesa

HANGATA batho ba amehile ka eng kajeno ho feta ntho leha e le efe e ’ngoe? Ba bangata ba amehile ka ho ba le chelete e lekaneng bakeng sa ho hlokomela malapa a bona kapa ho khona ho ntlafatsa boemo ba bona ba bophelo.

Hore motho a fumane chelete e lekaneng bakeng sa ho itlhokomela kapa ho hlokomela lelapa la hae le hona e ne e le ntho e ka sehloohong eo batho ba amehileng ka eona ha Jesu Kreste a ne a le lefatšeng. Empa o ile a hlokomelisa hore kameho ena e loketseng e ne e ka fetoha matšoenyeho a hatellang a sitisang lintho tsa moea ho kena. Ha a etsa setšoantšo se hlakisang ntlha ea hae, Jesu o ile a bolella barutuoa ba hae hore ba shebe linonyana le lipalesa ka hloko.

Ho hlokahala hore linonyana li je letsatsi le leng le le leng—ha ho bapisoa li ja ho feta kamoo re jang kateng ka lebaka la tekanyo e phahameng ea tlhahiso ea matla ’meleng ea tsona. Ho feta moo, li ke ke tsa jala peō, tsa kotula kapa hona ho bokella lijo bakeng sa nako e tlang. Empa, joalokaha Jesu a ile a lemoha, “Ntat’a [rōna] ea maholimong oa li fepa.” (Mattheu 6:26) Ka ho tšoanang, Molimo o apesa “likhahla tsa naha” tse ntle ka tsela e khethehileng ka ho khotsofatsang.—Mattheu 6:28-30.

Jesu o re tiisetsa hore haeba re ka ba le pono e loketseng ka litlhoko tsa rōna tsa lintho tse bonahalang ’me re etelletsa lintho tsa moea pele, Molimo o tla tiisa hore le rōna re ba le lijo le liaparo tse hlokahalang. Haeba Jehova Molimo a hlokomela linonyana le lipalesa, ka sebele o tla hlokomela ba mo ratang le ba ‘batlang ’muso le ho loka ha hae pele.’ (Mattheu 6:33) Na u beha lithahasello tsa ’Muso oa Molimo pele bophelong ba hao?