Ha ho le Bohlale Hore Motho a Balehe

LEFATŠE la kajeno le atisa ho tšoauoa ka moea oa ho iketsa ea sebete le oa lehloeo kapa oa ho tobana le maemo a lekang. Motho ea balehang boemong bo joalo o atisa ho nkoa e le ea fokolang kapa e le lekoala. A ka ba a songoa.

Leha ho le joalo, Bibele e bontša ka ho hlaka hore ka linako tse ling ho baleha ke khato e bohlale le e sebete. Ho tiisa sena, pele Jesu Kreste a roma barutuoa ba hae tšebeletsong, o ile a re ho bona: “Ha ba le hlorisa motseng o mong, le balehele ho o mong.” (Matheu 10:23) E, barutuoa ba Jesu ba ne ba lokela ho leka ho phema bahlorisi ba bona. Ba ne ba sa lokela ho etsa ntho leha e le efe e kang ntoa ea bolumeli, ho leka ho sokolla ba bang ka likhoka. Ba ne ba hasa molaetsa oa khotso. (Matheu 10:11-14; Liketso 10:34-37) Kahoo, ho e-na le hore ba halefe, Bakreste ba ne ba lokela ho baleha, ba suthe boemong bo ba halefisang. Ka tsela ena, ba ile ba boloka letsoalo le letle esita le ho baballa kamano ea bona ea bohlokoa le Jehova.—2 Bakorinthe 4:1, 2.

Buka ea Bibele ea Liproverbia e na le mohlala o fapaneng. E bua ka mohlankana eo, ho e-na le hore a balehe boemong bo lekang, a ileng a sala letekatse morao “joaloka poho e tlang tlhabong.” Phello e bile efe? E bile tlokotsi hobane o ile a inehela tekong e amang bophelo ba hae.—Liproverbia 7:5-8, 21-23.

Ho thoe’ng haeba u tobana le teko ea ho kopanela boitšoarong bo litšila ba ho kopanela liphate kapa u tobana le boemo bo bong bo itseng bo ka ’nang ba e-ba kotsi? Ho latela Lentsoe la Molimo, ketso e loketseng e ka ’na ea e-ba ho baleha, ho tloha hang-hang boemong boo.—Liproverbia 4:14, 15; 1 Bakorinthe 6:18; 2 Timothea 2:22.