Jesu—Bophelo le Tšebeletso tsa Hae

Ho Itokisetsa ho Tobana le Mahloriso

HOBA a laele baapostola ba hae ka mekhoa ea ho phetha mosebetsi oa ho bolela, Jesu o ba hlokomelisa ka bahanyetsi. O re: “Bonang, ke le roma le le joale ka linku har’a liphiri . . . le tsohele batho masene; hobane ba tla le isa khotla, ba le shape masynagogeng a bona. Hape, le tla isoa pel’a babusisi, le pel’a marena, ka baka la ka.”

Ho sa tsotellehe mahloriso a tšabehang ao balateli ba hae ba tla tobana le oona, Jesu o ba tšepisa ka ho tiea hore: “Mohla ba le neelang bona, le se ke la belaella mokhoa oo le tla bua ka oona, le seo le tla se bolela; hobane seo le tla se bolela, le tla se neoa nakong eona eo. Hobane e ke ke ea e-ba lōna le buang, empa e tla ba Moea oa Ntat’a lōna o buang ka lōna.”

Ho feta moo, Jesu o tsoela pele, “ngoan’abo motho o tla neela ngoan’abo polaong, le ntat’a motho a etse ngoan’a hae joalo; bana ba tla tsohela batsoali ba bona matla, ba ba bolaee.” Oa phaella: “Le tla hlouoa ke bohle ka baka la lebitso la ka; empa ea tiisetsang ho isa qetellong, ke eena ea tla bolokeha.”

Kaha ho bolela ke habohlokoahali haholo, ke kahoo Jesu a hatisang hore ho hlokahala masene e le hore motho a ka lula a lokolohile hore a ka phetha mosebetsi ona. O re: “Etlere ha ba le hlorisa motseng o mong, le balehele ho o mong; hobane ka ’nete ke re ho lōna: Mor’a motho o tla hlaha, le e-so ho qete metse eohle ea Iseraele.”

Ke ’nete hore taelo ena, temoso ena le khothatso ena, Jesu o fane ka tsona ho baapostola ba hae ba 12, empa li ne li boetse li reretsoe ba neng ba tla kopanela boboleling ba lefatše ka bophara kamor’a lefu la hae le tsoho ea hae. Hona ho bontšoa ke ’nete ea hore a re barutuoa ba hae ba ne ba tla ‘hlouoa ke batho bohle,’ e seng ke Baiseraele feela bao baapostola ba neng ba rometsoe ho ea ba bolella. Ho feta moo, ho bonahala baapostola ba sa ka ba huleloa ka pel’a babusi le marena ha Jesu a ba romela phutuhong ea bona e khutšoaane ea ho bolela. Ho feta moo, ka nako eo balumeli ba ne ba sa bolaoe ke litho tsa lelapa.

Kahoo ha a re barutuoa ba hae ba ne ba ke ke ba qeta metse ba bolela ‘ho fihlela Mor’a motho a fihla,’ Jesu o ne a re bolella ka boprofeta hore barutuoa ba hae ba ne ba ke ke ba potoloha lefatše lohle le ahiloeng ba bolela ka ’Muso o hlomiloeng oa Molimo pele Morena ea tlotlisitsoeng Jesu Kreste a fihla e le moahloli e moholo oa Jehova ka Harmagedone.

Ha a tsoela pele ka litaelo tsa hae tsa ho bolela, Jesu o re: “Morutuoa ha a moholo ho moruti oa hae, le mohlanka ha a moholo ho morena oa hae.” Kahoo balateli ba Jesu ba tlameha ho lebella ho tšoaroa hampe ho joalo le ho hlorisoa joaloka eena ka lebaka la ho bolela ’Muso oa Molimo. Empa leha ho le joalo oa eletsa: “Le se ke la tšaba ba bolaeang ’mele, ba mpa ba se na matla a ho bolaea moea; le mpe le tšabe ea nang le matla a ho bolaela moea le ’mele liheleng.”

Jesu o beile mohlala tabeng ena. O ile a mamella lefu a sa tšabe ho e-na le ho sekisetsa botšepehi ba hae ho Ea nang le matla ’ohle, Jehova Molimo. E, ke Jehova ea ke keng a timetsa feela “moea” (ntlheng ena e leng ho bolelang litebello tsa motho tsa kamoso e le moea o phelang) empa a ka boetseng a tsosa motho eo ho tla thabela bophelo bo sa feleng lefatšeng. Jehova ke Ntate oa leholimo ea lerato le ea nang le kutloelo-bohloko hakaakang!

Jesu o boetse o khothatsa barutuoa ba hae ka papiso e totobatsang tlhokomelo e lerato ea Jehova ho bona. Oa botsa: “Na lirobele tse peli ha li rekoe ka peni e le ’ngoe na? Athe le se seng sa tsona se ke ke sa oela fatše, ka ntle ho Ntat’a lōna. Esita le qoba tsa moriri oa hloho tsa lōna li baliloe kaofela. Ka baka leo, le se ke la tšaba: le fetisa lirobele tse ngata.”

Molaetsa oa ’Muso oo Jesu a romileng barutuoa ba hae hore ba o bolele o tla arola malapa, ha litho tse ling tsa malapa li o amohela ’me tse ling li o hana. Oa hlalosa: “Le se ke la hlōma ekaba ke tlile ho romela khotso lefatšeng; ha kea tla ho romela khotso, empa e le lerumo.” Kahoo, hore setho sa lelapa se amohele ’nete ea Bibele se hloka sebete. Jesu oa hlokomela, “Ea ratang ntat’ae, leha e le ’m’ae haholo ho ’na, ha a ntšoanele; le ea ratang mor’a hae, leha e le morali oa hae haholo ho ’na, ha a ntšoanele.”

Ha a qetella litaelo tsa hae, Jesu o hlalosa hore ba amohelang barutuoa ba hae le eena baa mo amohela. “E mong le e mong ea nosang e mong oa ba banyenyane bana mohope feela oa metsi a batang, kahoba a e-na le lebitso la morutuoa oa ka ka ’nete ke re ho lōna: A ke ke a timelloa ke moputso oa hae.” Mattheu 10:16-42.

◆ Jesu o ile a fa barutuoa ba hae litemoso life?

◆ O ile a ba khothatsa le ho ba tšelisa ka eng?

◆ Ke hobane’ng ha litaelo tsa Jesu li boetse li sebetsa le ho Bakreste ba kajeno?

◆ Ke ka tsela efe morutuoa oa Jesu a seng moholo ho moruti oa hae?