Jesu—Bophelo le Tšebeletso tsa Hae

Leeto le Leng la Boboleli Galilea

KAMOR’A lilemo tse ka bang peli tsa ho bolela ka matla, na joale Jesu o tla qala ho khoehlisa e be o itsoella pele ka monyebe? Ho fapana le hoo, o atolosa tšebetso ea hae ea boboleli ka ho qala leeto le leng hape, la boraro Galilea. O etela metse eohle le metsana sebakeng seo, a ruta masynagogeng ’me a bolela litaba tse molemo tsa ’Muso. Seo a se bonang leetong lena se mo kholisa ho feta leha e le neng pele ka tlhokahalo ea ho eketsa mosebetsi oa boboleli.

Hohle moo Jesu a eang, o bona matšoele a hlokang ho phekoloa le ho tšelisoa moeeng. A joaloka linku tse se nang molisa, a khathetse a bile a saretsoe, ’me o a utloela bohloko. O bolella barutuoa ba hae: “Kotulo e kholo ruri, empa basebetsi ha ba bakae. Rapelang ke hona Morena oa kotulo, hore a romele basebetsi kotulong ea hae.”

Jesu o rerile ho nka bohato, o bitsa baapostola ba 12, bao a ba khethileng hoo e ka bang selemo pejana. O ba arola ka bobeli, a ba etsa lihlopha tse tšeletseng tsa baboleli, ’me o ba fa litaelo, o re: “Le se ke la ea ho ba-lichaba, ’me le se ke la kena motseng ofe kapa ofe oa ba-Samaria; le mpe le ee linkung tsa ntlo ea Iseraele tse timetseng. Ha le ntse le tsamaea, le bolele, le re: ’Muso oa maholimo o atametse.”

’Muso ona oo ba il’o bolela ka oona ke oo Jesu a ba rutileng hore ba o rapelle thapelong ea mohlala. ’Muso o ne o atametse ka kutloisiso ea hore Morena ea khethiloeng oa Molimo, Jesu Kreste, o ne a le teng. E le ho etsa bopaki ba hore barutuoa ba hae ke baemeli ba ’muso oo o phahametseng batho, Jesu o ba fa matla a ho folisa ba kulang esita le a ho tsosa bafu. O ba laela ho etsa litšebeletso tsena mahala.

Hape o bolella barutuoa ba hae hore ba se ke ba etsa tokisetso ea lintho tsa nama bakeng sa leeto la boboleli. “Le se ke la inkela gauda, leha e le silevera, leha e le tšepe e khubelu ka maqhaameng a lōna; leha e le mokotla oa tsela, le likobo tse peli, le lieta, le lere; hobane ea sebetsang o lokeloa ke lijo tsa hae.” Bao ba ananelang molaetsa ba tla arabela ’me ba nehelane ka lijo le marobalo. Joalokaha Jesu a re: “Ha le kena motseng, kapa motsaneng ofe le ofe, le botse hore na ke ofe oa teng ea nang le tšoanelo; le lule ha hae le be le tlohe.”

Joale Jesu o fana ka litaelo tsa hore na ba atamele beng ba matlo joang ka molaetsa oa ’Muso. O laela hore, “Enore ha le kena tlung, le e lumelise. Ekare ha ntlo eo e e-na le tšoanelo, khotso ea lōna a e tle ho eona; empa ha e se na tšoanelo, khotso ea lōna e khutlele ho lōna. E mong le e mong ea sa le amoheleng, le polelo tsa lōna a sa li utloe, ha le e-tsoa tlung eo, kapa motseng oo, le hlohlore lerole la maoto a lōna.”

Jesu o re ka motse o hanang molaetsa oa bona: “Kotlo ea ba lefatše la Sodoma le la Gomorrha e tla ba chatsi ho ea motse oo, ka tsatsi la kahlolo.” Hona ho bontša hore bonyane ba bang ba sa lokang bao barutuoa ba neng ba tla ba bolella ba tla be ba le teng ka Letsatsi la Kahlolo. Leha ho le joalo, ha baahi bana ba pele ba tsosoa nakong ea Letsatsi la Kahlolo, ba tla thatafalloa le ho feta hore ba ikokobetse ’me ba amohele Kreste e le Morena ho feta batho ba tsositsoeng ba metseng ea boholo-holo e boitšoaro bo bobe ea Sodoma le Gomorrha. Mattheu 9:35–10:15; Mareka 6:6-12; Luka 9:1-5.

◆ Jesu o qala leeto la boraro la boboleli Galilea neng, ’me ke eng eo le mo kholisang ka eona?

◆ Ha a roma baapostola ba hae ba 12 ho ea bolela, o ba fa litaelo life?

◆ Ke hobane’ng ha ho ne ho nepahetse hore barutuoa ba rute hore ’Muso o ne o atametse?

◆ Ke joang kotlo e tla ba chatsi bakeng sa Sodoma le Gomorrha ho feta ho ba hanneng barutuoa ba Jesu?