Jesu o Phekola Moshanyana ea Nang le Modemona

Ha Jesu, Petrose, Jakobo le Johanne ba theoha thabeng, ba kopana le mokhopi oa batho. Ho na le ho hong ho phoso. Bangoli ba etselitse barutuoa sakana la nkope ’me ba phehile khang le bona. Batho ba thabetse ho bona Jesu, kahoo ba mathela ho eena ho ea mo lumelisa. O re ho bona: “Ke eng eo le phehisanang le bona ka eona?”​—Mareka 9:16.

Monna e mong har’a letšoele o khumama ka pelʼa Jesu ’me oa mo hlalosetsa o re: “Mosuoe, ke tlisitse mora oa ka ho uena hobane o na le moea o sa khoneng ho bua. Kae kapa kae moo o mo tšoarang teng o mo tabanya fatše, ’me o khethetsa makoeba, o tsikitlanya meno ’me o felloa ke matla. Ke ile ka bolella barutuoa ba hao hore ba o leleke, empa ha baa ka ba khona.”​—Mareka 9:​17, 18.

Kamoo ho bonahalang kateng, bangoli ba nyatsa hore ebe barutuoa ba Jesu ba hlolehile ho phekola moshanyana enoa, mohlomong ba bile ba soma boiteko ba bona. Ho e-na le ho araba motsoali enoa ea tšoenyehileng, Jesu o bua le letšoele o re: “Lona moloko o se nang tumelo le o sothehileng, ke tla lula le lona halelele hakae? Ke tla le mamella halelele hakae?” Ho hlakile hore Jesu o bua ka ho toba le bangoli ba ileng ba tsunya-tsunya barutuoa ba hae ha a le sieo. Joale Jesu o araba motsoali enoa ea tsielehileng o re: “Mo tlise koano ho ’na.”​—Matheu 17:17.

Ha moshanyana enoa a atamela Jesu, modemona o mo tabanya fatše ’me o etsa hore a thakhinye ka matla. Joale moshanyana enoa o ipitika fatše ’me o khethetsa makoeba. Jesu o botsa ntate oa moshanyana enoa o re: “Ke nako e kae see se ntse se etsahala ho eena?” Ha a mo araba o re: “Ho tloha bongoaneng, ’me nako le nako o ne o mo lahlela mollong le ka metsing ho mo timetsa.” Ntate oa moshanyana oa mo kopa o re: “Haeba ho na le seo u ka se etsang, re hauhele ’me u re thuse.”​—Mareka 9:​21, 22.

Ntate enoa o tsielehile kaha barutuoa ba Jesu ha baa ka ba khona ho mo thusa. Ha Jesu a araba, o fana ka karabo ena e khothatsang o re: “Polelo eo, ‘Haeba u ka’! Ka sebele, lintho tsohle li ka etsahala ho motho haeba motho a e-na le tumelo.” Joale ntate enoa o araba kapele-pele o re: “Ke na le tumelo! Nthuse moo ke hlokang tumelo!”​—Mareka 9:​23, 24.

Jesu o bona letšoele le mathela ho eena. Joale o khalemela modemona batho bohle ba ntse ba mo shebile, o re: “Uena moea o sa khoneng ho bua le o sa utloeng litsebeng, kea u laela, tsoa ho eena ’me u se ke ua hlola u kena ho eena.” Ha modemona o tsoa, o etsa hore moshanyana enoa a tlerohe ’me a thakhinye haholo. Joale moshanyana eo o rapalla moo a sa sisinyehe. Ha ba bona sena, batho ba bangata ba re: “O shoele!” (Mareka 9:​25, 26) Leha ho le joalo, ha Jesu a mo tšoara ka letsoho ’me a mo phahamisa, oa ema ’me oa “phekoleha ho tloha ka hora eo.” (Matheu 17:​18) Ke ho utloahalang hore ebe batho ba makaletse sena seo Jesu a se entseng.

Pejana ha Jesu a ne a roma barutuoa ba hae ho ea bolela, ba ne ba khona ho leleka bademona. Joale ha ba se ba le ntlong, ba mo botsa lekunutung ba re: “Ke hobane’ng ha re ile ra sitoa ho o leleka?” Jesu oa ba hlalosetsa hore ke ka lebaka la ho hloka tumelo ha bona. O re: “Mofuta ona o ke ke oa tsoa ka ntho leha e le efe haese ka thapelo.” (Mareka 9:​28, 29) Ba ne ba hloka ho ba le tumelo e matla le ho rapella thuso ea Jehova e le hore ba ka leleka modemona ona o matla.

Jesu o qetella ka hore: “Kannete ke re ho lona, Haeba le e-na le tumelo e boholo ba thollo ea mosetareta, le tla re ho thaba ena, ‘Tloha mona u ee mane,’ ’me e tla tloha, ’me ha ho letho leo le ke keng la khona ho le etsa.” (Matheu 17:​20) Tumelo e ka etsa lintho tse hlollang e le kannete!

Ka linako tse ling, ha re kopana le mathata ha re ntse re sebeletsa Jehova, re ka utloa eka re thutse thaba. Leha ho le joalo, haeba re sebetsa ka thata hore re be le tumelo, re ka khona ho hlola mathata ao a kang lithaba.