Pono ea Bibele

Bofebe—Na U Lokela ho Tšoarela Kapa ho se Tšoarele?

“HA LE e-na le taba le e mong, le mo tšoarele, hore le eena Ntat’a lōna ea maholimong a le tšoarele litlōlo tsa lōna.” (Mareka 11:25) Mantsoe ana a Jesu a phahamisa lipotso tse thata ha lenyalo le tsukutloa ke bofebe: Na Mokreste ea se nang molato o tlameha ho tšoarela molekane oa hae ’me a boloke lenyalo? Haeba a etsa qeto ea ho mo hlala, na o beha kamano ea hae le Molimo kotsing? A re boneng kamoo Bibele e re thusang ho araba lipotso tsena.

Na U Tlameha ho Tšoarela ka Linako Tsohle?

Na mantsoe a Jesu a reng, “ha le e-na le taba le e mong, le mo tšoarele,” a bolela hore maemong ’ohle—ho akarelletsa le ha molekane a etsa bofebe—Mokreste o tlameha ho tšoarela? Polelo ea Jesu e tlameha ho utloisisoa leseling la litlhaloso tse ling tseo a li buileng ka ho tšoarela.

Ka mohlala, re ithuta molao-motheo oa bohlokoa tabeng ea ho tšoarela mantsoeng a Jesu a tlalehiloeng ho Luka 17:3, 4: “Ekare ha ngoan’eno a u sitetsoe, u mo khalemele; ha a baka, u mo tšoarele. ’Me leha a ka u siteloa hasupa ka tsatsi le le leng, ’me a khutlela ho uena hasupa, a re: Ke bakile; u mo tšoarele.” (Mongolo o tšekaletseng ke oa rōna.) Ka sebele maemong a amang sebe se tebileng, ea sitetsoeng o khothalletsoa ho leka ho tšoarela haeba ho e-na le pako ea sebele. Jehova ka boeena o talima litaba ka tsela ena; e le hore re fumane tšoarelo ea bomolimo, re tlameha ho bontša pako ea sebele.—Luka 3:3; Liketso 2:38; 8:22.

Leha ho le joalo, sena se boetse se bontša hore haeba molekane ea febileng a sa bontše pako, a hana ho jara boikarabelo ka sebe sa hae, hoa utloahala hore molekane ea se nang molato a ka ’na a khetha ho se mo tšoarele.—Bapisa le 1 Johanne 1:8, 9.

Ho Tšoarela—Ho Thoe’ng ka Liphello?

Leha ho le joalo, ho thoe’ng haeba mofebi a bontša pako? Ha pako e le teng, ho na le lebaka la ho tšoarela. Empa na ho tšoarela ho bolela hore mofosi o lokolotsoe liphellong tsohle tsa tsela ea hae e fosahetseng? Nahana ka mehlala e meng ea ho tšoarela ha Jehova.

Ha Baiseraele ba rabela ka mor’a ho mamela lihloela tse leshome tse ileng tsa fana ka tlaleho e mpe ka naha ea Kanana, Moshe o ile a kōpa Jehova ka tieo: “U tšoarele bokhopo ba sechaba sena.” Jehova o ile a arabela: “Kea ba tšoarela kamoo u kōpileng kateng.” Na see se ne se bolela hore bafosi ba ne ba lokolotsoe liphellong leha e le life tsa liketso tsa bona? Jehova o ile a tsoela pele: “Ha e le batho bana kaofela ba . . . sa kang ba utloa lentsoe la ka, ruri, ha ho le a mong ho bona ea tla bona lefatše leo ke hlapanyelitseng bo-ntat’a bona.” (Numere 14:19-23) Jehova o ile a phetha seo a se boletseng; moloko oo o hōlileng—ntle le Joshua le Kalebe—ha o-oa ka oa bona Naha e Tšepisitsoeng.—Numere 26:64, 65.

Ka ho tšoanang, ha moprofeta Nathane a ne a khalemela Morena Davida ka sebe sa hae le Bathe-Sheba, Davida ea bontšitseng pako o ile a lumela: “Ke sitetsoe Jehova.” Eaba Nathane o re ho Davida: “Le eena Jehova o se a fetisitse sebe sa hao.” (2 Samuele 12:13) Leha ho le joalo, le hoja Jehova a ile a tšoarela Davida, bophelong bohle ba hae, Davida o ile a utloa bohloko ka lebaka la liphello tsa sebe sa hae.—2 Samuele 12:9-14; bona le 2 Samuele, khaolo ea 24.

Mehlala ena ea tšoarelo ea bomolimo e totobatsa thuto ea bohlokoa: Re ke ke ra etsa sebe eaba ha re fumane kotlo. (Ba-Galata 6:7, 8) Mofosi ea bontšang pako, le hoja a ka tšoareloa, hase hore a ke ke a latsoa liphello tsa tsela ea hae e fosahetseng. Na see se bolela hore molekane ea se nang molato a ka tšoarela mofebi—bonyane ka kutloisiso ea ho tlohela tlhonamo e tebileng—ebe ho ntse ho le joalo o etsa qeto ea ho mo hlala?

Ho Tšoarela le Tlhalo

Jesu o ile a bua ka tlhalo ka makhetlo a mararo nakong ea tšebeletso ea hae. (Mattheu 5:32; 19:3-9; Luka 16:18) Hoa thahasellisa hore ebe ha ho lekhetlo leha le le leng ho ana moo Jesu a buileng ka ho tšoarela. Ka mohlala, ho Mattheu 19:9, o itse: “E mong le e mong ea hlalang mosali oa hae, ha e se ka baka la bofebe, a nyala e mong, oa feba.” Ka ho re “ha e se ka baka la bofebe,” Jesu o ne a lumela hore boitšoaro bo bobe ba likamano tsa botona le botšehali bo ka etsa hore molekane ea se nang molato a fumane tokelo, kapa ‘lebaka’ la Mangolo la ho hlala. Leha ho le joalo, Jesu ha aa ka a bolela hore molekane ea se nang molato o lokela ho hlala. Leha ho le joalo, o fane ka maikutlo a hlakileng a hore a ka ’na a hlala.

Lenyalo ke tlamo e kopanyang batho ba babeli hammoho. (Ba-Roma 7:2) Empa ha e mong oa bona a sa tšepahale, tlamo e ka ’na ea senngoa. Maemong a joalo ha e le hantle molekane ea se nang molato o tobane le liqeto tse peli. Ea pele, na a tšoarele? Joalokaha re bone, lebaka la bohlokoa mona ke hore na ebe mofebi o bontšitse pako ea sebele kapa che. Ha ho e-na le pako, qetellong molekane ea se nang molato a ka ’na a tšoarela—bonyane ka kutloisiso ea ho tlohela ho hlonama.

Qeto ea bobeli, na a hlale? Potso ena e hlahisoa ke eng haeba a se a mo tšoaretse?a Ho thoe’ng haeba a e-na le mabaka a utloahalang ka polokeho ea hae le bana, haholo-holo haeba monna a ne a ba hlekefetsa nakong e fetileng? Kapa ho thoe’ng haeba ho e-na le tšabo ea ho tšoaroa ke lefu le tšoaetsanoang la likamano tsa botona le botšehali? Kapa ho thoe’ng haeba ka ho tebileng a ikutloa hore ka lebaka la ho se tšepahale ha hae, a ke ke a hlola a mo tšepa kamanong ea monna le mosali? Maemong a joalo ho hlakile hore molekane ea se nang molato a ka tšoarela molekane oa hae ea fositseng (ka kutloisiso ea ho tlohela ho hlonama) empa a ’na a etsa qeto ea ho mo hlala hobane a sa lakatse ho tsoela pele a lula le eena. Ho tlohela ho hlonama ho ka mo thusa hore a tsoele pele ka bophelo ba hae. Ho ka boetse ha mo thusa hore a boloke litšebelisano leha e le life tsa nakong e tlang le mofebi e le tse nang le mekhoa e metle haholoanyane.

Hore na motho a hlale molekane ea sa tšepahaleng kapa che ke qeto ea botho, eo molekane ea se nang molato a lokelang ho e etsa ka mor’a hore ka hloko le ka thapelo a nahanele mabaka ’ohle a amehang. (Pesaleme ea 55:22) Ba bang ha ba na tokelo ea ho leka ho laela kapa ho qobella molekane ea se nang molato hore na a etse qeto efe. (Bapisa le Ba-Galata 6:5.) Hopola, Jesu ha aa ka a bolela hore molekane ea se nang molato o lokela ho etsa eng. Ka ho hlakileng, hase hore Jehova ha a thabisoe ke ba khethang ho hlala ka mabaka a Mangolo.

[Mongolo o botlaaseng ba leqephe]

[Tlhaloso ea Moo Setšoantšo se Nkiloeng Teng e leqepheng la 10]

Life