Jesu Bophelo le Tšebeletso Tsa Hae

Pontšo ea Mehla ea Bofelo

HO TLA fihlela joale ke Labobeli thapama. Ha Jesu a lutse Thabeng ea Mehloare, a shebile tempeleng e tlaase, Petrose, Andrease, Jakobo, le Johanne ba tla ho eena ka lenyele. Ba amehile ka tempele, kaha Jesu o sa tsoa profeta hore ‘ha ho lejoe le tla tloheloa holim’a lejoe ho eona.’

Empa ka ho hlakileng likelellong tsa bona ba hopotse ho eketsehileng ha ba atamela Jesu. Libekeng tse seng kae tse fetileng, o ne a ile a bua ka ‘ho ba teng ha hae,’ nako ea “ha Mor’a motho a ne a tla senoloa.” ’Me liketsahalong tsa pejana, o ne a ile a ba bolella ka “ho fela ha tsamaiso ea lintho.” Ka hona baapostola ba chesehela ho tseba litaba.

Ba re: “Re bolelle, lintho tsee li tla etsahala neng [tse tla fella ka ho timetsoa ha Jerusalema le tempele ea eona], hona pontšo e tla ba efe ea ho ba teng ha hao le ea ho fela ha tsamaiso ea lintho?” Ha e le hantle, potso ea bona e likarolo li tharo. Ea pele, ba batla ho tseba ka ho fela ha Jerusalema le tempele ea eona, joale ho latela e mabapi le ho ba teng ha Jesu ka matla a ’Muso, ’me qetellong e mabapi le ho fela ha tsamaiso eohle ea lintho.

Karabong ea hae e telele, Jesu o arabela likarolo tsohle tse tharo tsa potso ena. O fana ka pontšo e khethollang nako ea ha tsamaiso ea Sejode ea lintho e tla fela; empa o fana ka ho eketsehileng. Hape o fana ka pontšo e tla hlokomelisa barutuoa ba hae ba ka moso hore ba phela nakong ea ho ba teng ha hae le ea ha ho fela ha tsamaiso eohle ea lintho ho le haufi.

Ha lilemo li ntse li feta, baapostola ba qala ho hlokomela phethahalo ea boprofeta ba Jesu. E, tsona lintho tseo a ileng a li profeta li qala ho etsahala mehleng ea bona. Kahoo, Bakreste ba phelang lilemo tse 37 hamorao, ka 70 C.E., ha ba tšohanyetsoe ke timetso ea tsamaiso ea Sejode le tempele ea eona.

Leha ho le joalo, ho ba teng ha Kreste le ho fela ha tsamaiso ea lintho ha ho etsahale ka 70 C.E. Ho ba teng ha hae ka matla a ’Muso ho etsahala morao haholo. Empa neng? Ho hlahloba boprofeta ba Jesu ho senola sena.

Jesu o profeta hore ho tla ba le “lintoa le litlaleho tsa lintoa.” “Sechaba se tla tsohela sechaba matla,” le hore ho tla ba le likhaello tsa lijo, litšisinyeho tsa lefatše, le mafu a seoa. Barutuoa ba hae ba tla hlouoa le ho bolaoa. Baprofeta ba bohata ba tla hlaha ’me ba khelose ba bangata. Tlōlo ea molao e tla eketseha, ’me lerato la ba bangata le tla tapa. Ka nako e tšoanang, litaba tse molemo tsa ’Muso oa Molimo li tla boleloa lefatšeng lohle leo ho ahiloeng ho lona e le bopaki ho lichaba tsohle.

Le hoja boprofeta ba Jesu bo bile le phethahatso e nyenyane pele ho timetso ea Jerusalema ka 70 C.E., phethahatso e khōlō ea bona e etsahala nakong ea ho ba teng ha hae le bofelong ba tsamaiso ea lintho. Tlhahlobo e hlokolosi ea liketsahalo tsa lefatše ho tloha ka 1914 e senola hore boprofeta ba bohlokoa haholo ba Jesu bo kene phethahatsong ea bona e khōlō ho tloha ka selemo seo.

Karolo e ’ngoe ea pontšo eo Jesu a fanang ka eona ke ho hlaha ha “ntho e nyonyehang e bakang timetso.” Ka 66 C.E. ntho ena e nyonyehang e ile ea hlaha ka sebopeho sa “mabotho a bokaneng” a Baroma a ileng a kopela Jerusalema le ho nyokola lerako la tempele. “Ntho e nyonyehang” e ile ea ema moo e neng e sa lokela.

Phethahatsong e khōlō ea pontšo, ntho e manyala ke Selekane sa Lichaba le mohlahlami oa sona, Machaba a Kopaneng. Mokhatlo ona oa khotso ea lefatše o talingoa ke Bokreste-’mōtoana e le moemeli oa ’Muso oa Molimo. Ke ho nyonyehang hakaakang! Ka baka leo, ka morao ho nako, mebuso ea lipolotiki e amanang le Machaba a Kopaneng e tla fetohela Bokreste-’mōtoana (bo neng bo tšoantšetsoa ke Jerusalema) ’me e tla bo senya.

Kahoo Jesu o ile a profeta: “Ho tla ba le matšoenyeho a maholo ka mokhoa oo ho seng mohla ho kileng ha etsahala haesale lefatše le qala ho fihlela joale, che, leha e le hore ho tla etsahala hape.” Le hoja ho timetsoa ha Jerusalema ka 70 C.E. ka sebele e ne e le matšoenyeho a maholo, ka ba fetang millione bao ho tlalehoang hore ba ile ba bolaoa, e ne e se matšoenyeho a maholo ho feta Moroallo oa lefatše lohle oa mehleng ea Noe. Ka hona phethahatso e khōlō ea boprofeta bona ba Jesu ke hona e tla phethahala. Mattheu 24:2-22, NW; 13:40, 49; Mareka 13:3-20; Luka 21:7-24; 19:43, 44; 17:20-30; 2 Timothea 3:1-5.

◆ Ke eng e susumelletsang potso ea baapostola, empa ho bonahala ba hopotse eng?

◆ Ke karolo efe ea boprofeta ba Jesu e etsahetseng ka 70 C.E., empa ke eng e sa kang ea etsahala ka nako eo?

◆ Ke neng boprofeta ba Jesu bo ileng ba phethahala ka lekhetlo la pele, empa bo ba le phethahatso e khōlō neng?

◆ Ntho e nyonyehang ke eng phethahatsong ea eona ea pele le ea ho qetela?

◆ Ke hobane’ng ha matšoenyeho a maholo a sa ka a e-ba le phethahatso ea ’ona ea ho qetela ka ho timetsoa ha Jerusalema?