Ho ba Teng ha Kreste—Ho Bolela Eng ho Uena?

“Pontšo e tla ba efe ea ho ba teng ha hao le ea qetello ea tsamaiso ea lintho?”—MAT. 24:3.

 1. Baapostola ba Jesu ba ile ba botsa potso efe e tsosang tjantjello?

HOO e ka bang lilemong tse likete tse peli tse fetileng, baapostola ba Jesu ba bane ba ile ba botsa potso ha ba ntse ba buisana le Mong’a bona boinotšing Thabeng ea Mehloaare. Ba ile ba botsa: “Lintho tsee li tla etsahala neng, ’me pontšo e tla ba efe ea ho ba teng ha hao le ea qetello ea tsamaiso ea lintho?” (Mat. 24:3) Potsong eo, baapostola ba ile ba sebelisa lipoleloana tse peli tse tsosang tjantjello, “ho ba teng ha hao” le “qetello ea tsamaiso ea lintho.” Lipoleloana tsee li bolela’ng?

 2. Moelelo o ka sehloohong oa lentsoe “qetello” ke ofe?

² Re tla qala ka ho tšohla lentsoe “qetello,” le poleloaneng ea bobeli eo a e sebelisitseng, leo e leng phetolelo ea lentsoe la Segerike syn·teʹlei·a. Phetolelong ea Lefatše le Lecha, lentsoe lena le fetoletsoe ka tsela e tšoanang e le “qetello,” athe lentsoe la Segerike le batlang le tšoana le lona, e leng te’los, le fetoletsoe e le “bofelo.” Phapang ea moelelo pakeng tsa mantsoe ana a mabeli e ka tšoantšoa le ha ho hlalosoa puo e fanoang Holong ea ’Muso. Qetello ea puo ke karolo ea eona ea ho qetela, eo ho eona sebui se nkang nako e khutšoanyane se hopotsa bamameli hore na ho tšohliloe eng le hore na taba eo e sebetsa joang ho bona. Bofelo ba puo ke nako eo ka eona sebui se tlohang sethaleng. Ka tsela e tšoanang, ho ea ka Bibele, poleloana “qetello ea tsamaiso ea lintho” e bolela nako e isang bofelong ba eona le e akarelletsang bofelo ba eona.

 3. Ke lintho life tse ling tse etsahalang nakong ea ho ba teng ha Jesu?

³ Poleloana “ho ba teng,” eo baapostola ba ileng ba botsa ka eona e bolela’ng? Ke phetolelo ea lentsoe la Segerike pa·rou·siʹa.a Pa·rou·siʹa ea Kreste, kapa ho ba teng ha hae, e qalile ha Jesu a ne a hlomamisoa e le Morena leholimong ka 1914 ’me e akarelletsa “matšoenyeho a maholo,” e leng nako eo ka eona a tlang ho tla timetsa ba khopo. (Mat. 24:21) Nakong ena ea ho ba teng ha Jesu, ho etsahala lintho tse ngata tse sa tšoaneng, tse akarelletsang ‘matsatsi a ho qetela’ a tsamaiso ena e khopo ea lintho, ho bokelloa ha bakhethoa le ho tsosetsoa ha bona bophelong ba leholimo. (2 Tim. 3:1; 1 Bakor. 15:23; 1 Bathes. 4:15-17; 2 Bathes. 2:1) Ho ka ’na ha thoe nako ena ea “qetello ea tsamaiso ea lintho” (syn·teʹlei·a) e tsamaisana le nako e bitsoang ho ba teng ha Kreste (pa·rou·siʹa).

Nako e Telele

 4. Ho ba teng ha Jesu ho tšoana joang le liketsahalo tsa matsatsing a Noe?

⁴ ’Nete ea hore lentsoe pa·rou·siʹa le bolela nako e telele eseng e khutšoanyane, e lumellana le seo Jesu a ileng a se bua mabapi le ho ba teng ha hae. (Bala Matheu 24:37-39.) Hlokomela hore Jesu ha aa ka a tšoantša ho ba teng ha hae le nako e batlang e le khutšoanyane eo Moroallo o ileng oa etsahala ka eona matsatsing a Noe. Ho e-na le hoo, o ile a tšoantša ho ba teng ha hae le nako e telele e ileng ea etella Moroallo pele. Nako eo e akarelletsa nako eo ka eona Noe a ileng a haha areka a ba a etsa le mosebetsi oa ho bolela ho fihlela nako eo Moroallo o ileng oa qetella o fihlile ka eona. Liketsahalo tseo li ile tsa etsahala ka mashome a lilemo. Ka tsela e tšoanang, ho ba teng ha Kreste ho akarelletsa liketsahalo tse etellang pele matšoenyeho a maholo ebile lia a akarelletsa.—2 Bathes. 1:6-9.

 5. Mantsoe a tlalehiloeng ho Tšenolo khaolo ea 6 a bontša joang hore ho ba teng ha Jesu ho nka nako e telele?

⁵ Boprofeta bo bong ba Bibele bo hlakisa hore ho ba teng ha Kreste ho bolela nako e telele eseng feela ho tla ha hae ho tla timetsa ba khopo. Buka ea Tšenolo e bontša Jesu a palame pere e tšoeu ’me a fuoa moqhaka. (Bala Tšenolo 6:1-8.) Ka mor’a hore Jesu a hlomamisoe e le Morena ka 1914, o tšoantšoa a tloha ‘ho ea hlōla le ho ea phetha tlhōlo ea hae.’ Ka mor’a moo tlaleho e bontša hore o lateloa ke bapalami ba lipere tse sa tšoaneng ka ’mala. Ho ea ka boprofeta li tšoantšetsa ntoa, tlala, mafu a seoa, tseo kaofela ha tsona li etsahetseng ka nako e telele e bitsoang ‘matsatsi a ho qetela.’ Mehleng ena ea rōna re bona phethahatso ea boprofeta bona.

 6. Tšenolo khaolo ea 12 e re thusa ho utloisisa eng mabapi le ho ba teng ha Kreste?

⁶ Tšenolo khaolo ea 12 e qaqisa lintlha tse ling mabapi le ho thehoa ha ’Muso oa Molimo leholimong. Khaolong ena re bala ka ntoa e qhomang sebakeng se sa bonahaleng. Mikaele, e leng Jesu Kreste boemong ba hae ha a le leholimong, le mangeloi a hae, ba loantša Diabolose le bademona ba hae. Ka lebaka leo, Satane Diabolose le mabotho a hae ba lahleloa lefatšeng. Tlaleho ena e re bolella hore ka nako eo, Diabolose o halefile haholo kahobane “a tseba hore o na le nako e khutšoanyane.” (Bala Tšenolo 12:7-12.) Kahoo, ho hlakile hore ho thehoa ha ’Muso oa Kreste leholimong ho lateloa ke nako e khetholloang ka ho eketseha ha “malimabe” lefatšeng le ho baahi ba lona.

 7. Pesaleme ea bobeli e bua ka eng, ’me e hlalosa hore ho na le monyetla ofe?

⁷ Pesaleme ea bobeli le eona e pheta boprofeta ba ha Jesu a ne a hlomamisoa e le Morena Thabeng ea Sione ea leholimong. (Bala Pesaleme ea 2:5-9; 110:1, 2.) Leha ho le joalo, pesaleme ena le eona e bontša hore ho na le nako eo ka eona babusi ba lefatše le bafo ba bona ba nehoang monyetla oa ho ikokobelletsa puso ea Kreste. Ba khothalletsoa hore ba “sebelise temohisiso” le ho itlohella hore ba “khalemeloe.” Ha ho pelaelo hore nakong eo, “ho thaba bohle ba tšabelang ho eena [Molimo]” ka ho sebeletsa Jehova le Morena eo a mo khethileng. Kahoo, monyetla o butsoe hore babusi le bafo ba bona ba etse liphetoho tse hlokahalang nakong ena ea ha Jesu a le teng ka matla a borena.—Pes. 2:10-12.

Ho Lemoha Pontšo

8, 9. Ke bo-mang ba neng ba tla lemoha pontšo ea ho ba teng ha Kreste le ho utloisisa bohlokoa ba eona?

⁸ Ha Bafarisi ba ne ba mo botsa hore na ’Muso o ne o tla tla neng, Jesu o ile a araba ka hore o ke ke oa tla “ka ho hlokomeleha ho totobetseng” ho bona. (Luka 17:20, 21) Ba sa lumelang ba ne ba ke ke ba utloisisa. Ba ne ba ka utloisisa joang? Ba ne ba sa nke Jesu e le Morena ea tla ba busa nakong e tlang. Ebe joale ke bafe ba neng ba tla lemoha pontšo ea ho ba teng ha Kreste ba be ba utloisise bohlokoa ba eona?

⁹ Jesu o ile a tsoela pele ho bolela hore barutuoa ba hae ba ne ba tla bona pontšo eo ka ho hlaka feela joalokaha ba ne ba tla bona “lehalima, ka ho halima ha lona, le khanya ho tloha karolong e ’ngoe tlas’a leholimo ho ea karolong e ’ngoe tlas’a leholimo.” (Bala Luka 17:24-29.) Hoa thahasellisa ho hlokomela hore Matheu 24:23-27 e bontša ka ho hlaka hore Jesu o ne a bua ka pontšo ea ho ba teng ha Kreste.

Moloko o Bonang Pontšo

10, 11. (a) Nakong e fetileng “moloko” o boletsoeng ho Matheu 24:34 o ne o hlalosoa joang? (b) Ke bo-mang bao ntle ho pelaelo barutuoa ba Jesu ba neng ba tla utloisisa hore baa akarelletsoa ha ho buuoa ka “moloko” oo?

¹⁰ Nakong e fetileng, makasine ena e ile ea hlalosa hore lekholong la pele la lilemo, “moloko ona” o boletsoeng ho Matheu 24:34 e ne e le “moloko oa Bajuda ba neng ba sa lumela ba neng ba phela ka nako e le ’ngoe.”b Tlhaloso eo e ne e bonahala e utloahala hobane litsela tse ling tsohle tse tlalehiloeng tseo Jesu a ileng a sebelisa lentsoe “moloko” ka tsona li ne li e-na le moelelo o fetisang maikutlo a seng matle, ’me maemong a mangata, Jesu o ile a sebelisa sehlakisi se fetisang maikutlo a seng matle, se kang o “khopo,” ho hlalosa moloko oo. (Mat. 12:39; 17:17; Mar. 8:38) Kahoo, ho ne ho nkoa hore phethahatsong ea mehleng ea kajeno, Jesu o ne a bua ka “moloko” o khopo oa batho ba sa lumelang ba neng ba tla bona litšobotsi tse neng li tla tšoaea “qetello ea tsamaiso ea lintho” (syn·telei·a) le bofelo ba tsamaiso ea lintho (teʹlos).

¹¹ Ke ’nete hore ha Jesu a ne a sebelisa lentsoe “moloko” ka moelelo o fetisang maikutlo a seng matle, o ne a bua le batho ba khopo ba mehleng ea hae kapa o ne a bua ka bona. Empa na o ne a hlile a bua ka bona mantsoeng a hae a tlalehiloeng ho Matheu 24:34? Hopola hore barutuoa ba bane ba Jesu ba ne ba ile ba mo atamela “boinotšing.” (Mat. 24:3) Kaha Jesu ha aa ka a sebelisa lihlakisi tse nang le moelelo o fetisang maikutlo a seng matle ha a ne a bua le bona ka “moloko ona,” ha ho pelaelo hore baapostola ba ne ba tla utloisisa hore bona hammoho le barutuoa-’moho le bona e ne e tla ba karolo ea “moloko” o neng o ke ke oa feta “ho fihlela lintho tsena tsohle li etsahala.”

12. Moelelo oa taba o bontša eng mabapi le hore na Jesu o ne a bua le bo-mang ha a ne a sebelisa lentsoe “moloko”?

¹² Ke eng e etsang hore re fihlele qeto ee? Ke ho hlahloba litemana tse potolohileng taba ena. Joalokaha ho tlalehiloe ho Matheu 24:32, 33, Jesu o itse: “Joale ithuteng ntlha ena sefateng sa feiga e le papiso: Hang feela ha lekala la sona le lenyenyane le nolofala ’me le hlahisa makhasi, lea tseba hore lehlabula le haufi. Ka ho tšoanang le lōna, ha le bona lintho tsena tsohle, le tsebe hore o haufi, o menyako.” (Bapisa le Mareka 13:28-30; Luka 21:30-32.) Joale, ho Matheu 24:34, rea bala: “Kannete ke re ho lōna ho hang moloko ona o ke ke oa feta ho fihlela lintho tsena tsohle li etsahala.”

13, 14. Ke hobane’ng ha re ka bolela hore “moloko” oo Jesu a neng a bua ka oona e tlameha ebe e ne e le barutuoa ba hae?

¹³ Jesu o ile a re barutuoa ba hae, ba neng ba tla tloha ba tlotsoa ka moea o halalelang, ke bona ba neng ba lokela ho fihlela liqeto tse itseng ha ba ne ba bona “lintho tsena tsohle” li etsahala. Kahoo e tlameha ebe Jesu o ne a bua ka barutuoa ba hae ha a ne a re: “Moloko ona o ke ke oa feta ho fihlela lintho tsena tsohle li etsahala.”

¹⁴ Ho fapana le batho ba sa lumelang, barutuoa ba Jesu ba ne ba ke ke ba bona pontšo feela empa hape ba ne ba tla utloisisa bohlokoa ba eona. Ba ne ba tla ‘ithuta’ litšobotsing tsa pontšo eo ba be ba “tsebe” moelelo oa eona oa sebele. Ba ne ba tla utloisisa ka botlalo “hore o haufi, o menyako.” Le hoja e le ’nete hore Bajuda ba sa lumelang le Bakreste ba tšepahalang ba tlotsitsoeng ba ile ba bona ha mantsoe a Jesu a phethahala hanyenyane lekholong la pele la lilemo, ke batlotsuoa ba hae feela morao koo ba ileng ba ithuta liketsahalong tsena—ba neng ba ka utloisisa moelelo oa sebele oa seo ba ileng ba se bona.

15. (a) Ke bo-mang ba etsang “moloko” oa kajeno oo Jesu a buileng ka oona? (b) Ke hobane’ng ha ho ke ke ha khoneha hore re bale ka ho toba hore na “moloko ona” o tla phela halelele hakae? (Bona lebokose le leqepheng la 25.)

¹⁵ Kajeno batho ba sa utloisiseng lintho tsa moea ba ’nile ba nahana hore ha ho letho le ‘hlokomelehang ka ho totobetseng’ mabapi le pontšo ea ho ba teng ha Jesu. Ba nahana hore lintho tsohle li ntse li tsoela pele hantle feela joaloka nakong e fetileng. (2 Pet. 3:4) Ka lehlakoreng le leng, barab’abo Kreste ba tšepahalang ba tlotsitsoeng, e leng sehlopha sa kajeno sa Johanne, ba lemohile pontšo ena ka ho hlaka joalokaha ba ne ba tla lemoha ho benya ha lehalima ’me ba ile ba utloisisa moelelo oa eona oa sebele. E le sehlopha, batlotsuoa bana ba etsa “moloko” oa kajeno oa batho ba phetseng ka nako e tšoanang o ke keng oa feta “ho fihlela lintho tsena tsohle li etsahala.”c Sena se fana ka maikutlo a hore ba bang ba barab’abo Kreste ba tlotsitsoeng ba tla be ba ntse ba phela lefatšeng ha matšoenyeho a maholo a boletsoeng esale pele a qala.

“Le Lule le Lebetse”

16. Barutuoa bohle ba Kreste ba lokela ho etsa’ng?

¹⁶ Leha ho le joalo, ho hlokahala ho hongata ho feta feela ho lemoha pontšo. Jesu o ile a tsoela pele a re: “Seo ke le bolellang sona ke se bolella bohle, Le lule le lebetse.” (Mar. 13:37) Taba ena ke ea bohlokoa ka ho fetisisa ho rōna bohle kajeno ho sa tsotellehe hore na re batlotsuoa kapa re ba bongata bo boholo. Ho se ho fetile lilemo tse mashome a robong ho tloha ha Jesu a ne a hlomamisoa e le Morena leholimong ka 1914. Le hoja ho ka ’na ha e-ba thata, re lokela ho itokisa ’me re lule re lebetse. Ho utloisisa hore Kreste o teng empa a sa bonahale le hore o busa e le Morena ho re thusa ho etsa joalo. Ho boetse ho re hlokomelisa ’nete ea hore haufinyane o tla tla ’me a timetse lira tsa hae “ka hora eo [re] sa nahaneng hore e ka ba eona.”—Luka 12:40.

17. Kutloisiso ee e lokela ho etsa hore re ikutloe joang, hona re lokela ho ikemisetsa ho etsa’ng?

¹⁷ Ho utloisisa se boleloang ke ho ba teng ha Kreste ho thusa ho matlafatsa boikutlo ba rōna mabapi le ho potlaka ha linako. Rea tseba hore Jesu o se a ntse a le teng le hore o ’nile a busa a sa bonahale e le Morena leholimong ho tloha ka 1914. Haufinyane o tla felisa ba khopo ’me a tlise liphetoho tse khōlō lefatšeng ka bophara. Ka hona re lokela ho ikemisetsa ho feta leha e le neng pele ho kopanela ka mafolofolo mosebetsing oo Jesu a ileng a bua ka oona esale pele ha a ne a re: “Litaba tsena tse molemo tsa ’muso li tla boleloa lefatšeng lohle leo ho ahiloeng ho lona hore e be bopaki ho lichaba tsohle; joale e ntan’o ba hona bofelo [teʹlos] bo tla tla.”—Mat. 24:14.

[Mongolo o botlaaseng ba leqephe]

U ka Araba Joang?

• Re tseba joang hore ho ba teng ha Jesu ho tsoela pele ka nako e telele?

• Ke bo-mang ba lemohang pontšo ea ho ba teng ha Jesu le ba utloisisang seo e se bolelang?

• Ke bo-mang ba etsang moloko oa kajeno o boletsoeng ho Matheu 24:34?

• Ke hobane’ng ha re ke ke ra khona ho bala hore na “moloko ona” o tla phela halelele hakae?

[Lebokose le leqepheng la 25]

Na re ka Bala Hore na “Moloko Ona” o Tla Phela Halelele Hakae?

Ka tloaelo lentsoe “moloko” le bolela batho ba lilemo tse fapa-fapaneng ba phelang ka nako e itseng kapa ba phelang ha ho etsahala ntho e itseng. Ka mohlala, Exoda 1:6 e re: “Qetellong Josefa a shoa, le barab’abo kaofela le moloko oo oohle.” Josefa le barab’abo ba ne ba sa lekane ka lilemo, empa ba ile ba etsahalloa ke ntho e tšoanang ka nako e tšoanang. Ba bang ba barab’abo Josefa ba ileng ba tsoaloa pele ho eena ba ile ba akarelletsoa ‘molokong oo.’ Ba bang ba bona ba ile ba phela halelele ho feta Josefa. (Gen. 50:24) Ba bang ba “moloko oo,” ba kang Benjamine, ba ile ba tsoaloa ka mor’a Josefa ’me ho ka etsahala hore ebe ba ile ba tsoela pele ba phela ka mor’a lefu la hae.

Kahoo ha ho sebelisoa lentsoe “moloko” ha ho buuoa ka batho ba phelang nakong e itseng, ho ke ke ha boleloa ka ho toba hore na nako eo e telele hakae haese feela hore e na le qetello le hore e ke ke ea e-ba telele haholo. Ka hona, ha Jesu a ne a sebelisa poleloana “moloko ona,” joalokaha ho tlalehiloe ho Matheu 24:34, ha aa ka a fa barutuoa ba hae mokhoa o neng o tla ba thusa ho lekanyetsa hore na ‘matsatsi a ho qetela’ a ne a tla fela neng. Ho e-na le hoo, Jesu o ile a tsoela pele ho hatisa taba ea hore ba ne ba ke ke ba tseba “letsatsi leo le hora.”—2 Tim. 3:1; Mat. 24:36.

[Setšoantšo se leqepheng la 22, 23]

Ka mor’a hore a hlomamisoe e le Morena ka 1914, Jesu o tšoantšoa e le ea “hlōlang”

[Setšoantšo se leqepheng la 24]

“Moloko ona o ke ke oa feta ho fihlela lintho tsena tsohle li etsahala”