Jesu Bophelo le Tšebeletso Tsa Hae

Mahlomola Thupeng

LINOKOANE tse peli li isoa ka ntle ho ea bolaoa hammoho le Jesu. Sebakana le motse, mokoloko o emisa sebakeng se bitsoang Golgotha, kapa Sebaka sa Lehata.

Batšoaruoa ba hlobolisoa liaparo tsa bona. Joale ho fanoa ka veine e thethefalitsoeng ka myrrha. Ho bonahala hore e lokiselitsoe ke basali ba Jerusalema, ’me Baroma ha ba hanele seno sena se thethefatsang bohloko ho ba thakhisoang. Leha ho le joalo, ha Jesu a e latsoa, o hana ho noa. Hobane’ng? Kamoo ho bonahalang ka teng o batla ho ba le matla a felletseng a kelello nakong ea teko e phahameng ka ho fetisisa ea tumelo ea hae.

Joale Jesu o otlolloa thupeng matsoho a hae a le ka holim’a hlooho ea hae. ’Me masole a khokhothela lipekere tse khōlō matsohong a hae le maotong a hae. O nonyetsoa ke bohloko ha lipekere li phunya nama ea hae le manonyōllo. Ha thupa e emisoa ka ho otloloha, bohloko boa tōta, hobane boima ba ’mele bo tabola maqeba a lipekere. Leha ho le joalo, ho e-na le ho bua mantsoe a ba tšosang, Jesu o rapella masole a Roma: “Ntate, u ba tšoarele, hobane ha ba tsebe seo ba se etsang.”

Pilato o manehile mongolo thupeng o reng: “Jesu oa Nazaretha, morena oa ba-Jode.” Ho bonahala hore o ne a ngotse hona eseng feela hobane a hlompha Jesu empa hobane a nyonya baprista ba Bajode ha ba mo qobelletse hore e be eena ea ahlolang Jesu. E le hore bohle ba ka bala mongolo, Pilato a etsa hore ho ngoloe ka lipuo tse tharo—ka Seheberu, ka Selatine sa molao, le ka Segerike se tloaelehileng.

Baprista ba baholo, ho kopanyelletsa Kaiafa le Anna, ba nyahame. Phatlalatso ena e tiileng e senya hora ea bona ea tlhōlo. Kahoo baa hanyetsa: “Se ngole: ‘Morena oa ba-Jode,’ u mpe u ngole hore ke eena ea itseng: ‘Ke ’na morena oa ba-Jode.’” A halefisitsoe ke ho sebeletsa e le mosireletsi oa baprista, Pilato o arabela ka nyeliso e tiileng: “See ke se ngolileng, ke se ngolile.”

Joale baprista, hammoho le bongata bo boholo ba batho, ba bokana ka thōko ho sebaka sa polao, ’me baprista ba leka ho fetola bopaki ba mongolo. Ba pheta bopaki ba bohata bo fanoeng pejana linyeoeng tsa Sanhedrin. Kahoo, ha ho makatse, ha ba fetang ka tsela ba qala ho bua hampe, ba sisinya lihlooho tsa bona ka ho nyefola ’me ba re: “Uena, ea qhaqhang tempele, u reng u tla e tsosa ka matsatsi a mararo, ipholose he! Ha u le Mor’a Molimo, theoha sefapanong [“thupeng ea tlhokofatso,” NW]!”

Baprista ba baholo le metsoalle ea bona ea bolumeli ba buisana: “O pholositse ba bang, eena o sitoa ho ipholosa! Ha e le eena morena oa Iseraele, a ke a theohe joale sefapanong [“thupeng ea tlhokofatso,” NW], ’me re tla lumela ho eena. O tšepile Molimo; a o mo loele joale, ha o mo rata; hobane o itse: Ke Mor’a Molimo.”

A nkiloe ke moea oa se etsahalang, masole le ’ona a soma Jesu. Ka ho soma a mo fa veine e bolila, ho bonahala ba e tšoaretse ka holimonyana ho molomo oa hae o ommeng. Baa soma, “Ekare ha u le morena oa ba-Jude, u ipholose.” Esita le linokoane—se seng se thakhisitsoe ka letsohong le letona la Jesu, ’me se seng ka ho le letšehali—lia mo soma. Nahana ka hona! Motho e moholohali ea kileng a phela, e, eena ea kopanetseng le Jehova Molimo ho bōpa lintho tsohle, ka ho tiea a mamella ho hlapaoloa hona kaofela!

Masole a nka liaparo tsa Jesu tsa ka holimo ba li arola likarolo tse ’nè. Ba laola ka lotho ho bona hore na tsena e tla ba tsa mang. Leha ho le joalo, kobo e ka hare, ha e-na moroko, ke ea boleng bo phahameng. Kahoo masole a bolellana a re: “A re se ke ra e hahola, re mpe re laole ka lotho, hore re tle re tsebe hobane e tla ba ea mang.” Kahoo, ka ho se tsebe, ba phethahatsa lengolo le reng: “Ba arolelane liaparo tsa ka, ’me ba laotse kobo ea ka ka lotho.”

Ka mor’a nako, senokoane se seng se ananela hore kannete Jesu e tlameha e be e le morena. Kahoo, se khalemela ’mate oa sona, se re: “Na uena ha u tšabe Molimo ke’ng, kanthe u tsuong e le ’ngoe le enoa? Athe ha e le rōna, ho re loketse, hobane re nka se tšoanetseng tseo re li entseng; empa enoa ha a etsa letho le khopo.” Joale o bua le Jesu, a kōpa: “Morena, u nkhopole ha u kena ’musong oa hao!”

Jesu oa arabela, “Ka ’nete ke re ho uena kajeno, U tla ba le ’na Paradeiseng.” Tšepiso ena e tla phethahatsoa ha Jesu a busa joaloka Morena leholimong ’me a tsosetsa sesenyi sena bophelong Paradeiseng lefatšeng eo baphonyohi ba Harmagedone le metsoalle ea bona ba tlang ho ba le tokelo ea ho e lema. Mattheu 27:33-44; Mareka 15:22-32; Luka 23:27, 32-43, NW; Johanne 19:17-24.

◆ Hobane’ng Jesu a hana ho noa veine e thethefalitsoeng ka myrrha?

◆ Kamoo ho bonahalang ka teng, ke hobane’ng ha mongolo o manehiloe thupeng ea Jesu, ’me sena se qalisa phapanyetsano efe e ’ngoe ea mantsoe pakeng tsa Pilato le baprista ba baholo?

◆ Ke nyefolo efe e ’ngoe eo Jesu a e fumanang thupeng, ’me ho bonahala e susumelletsoa ke eng?

◆ Boprofeta bo phethahatsoa joang ka se etsoang ka liaparo tsa Jesu?

◆ Ke phetoho efe eo senokoane se seng se e etsang, ’me Jesu o tla phethahatsa kōpo ea sona joang?