Jesu Bophelo le Tšebeletso tsa Hae

Ha Mor’a Motho a Hlaha

HA JESU a ntse a le ka leboea (ebang ke Samaria kapa Galilea), Bafarisi ba ’motsa ka ho fihla ha ’Muso. Ba lumela hore o tla tla ka mokete oa semetletsa le ka litšebeletso tse khōlō, empa Jesu o re: “’Muso oa Molimo ha o tle ka ho lemohuoa. Ho ke ke ha thoe: Bonang, o mona; kapa: Bonang, o mane; hobane ’muso oa Molimo o se o le ka hare ho lōna.”

Mantsoe a Jesu “ka hare ho lōna” ka linako tse ling a ’nile a fetoleloa e le “ka ho lōna.” Kahoo ba bang ba nahanne hore Jesu o ne a bolela hore ’Muso oa Molimo o busa ka lipelong tsa bahlanka ba Molimo. Empa, ka ho totobetseng, ’Muso oa Molimo ha o ka har’a lipelo tsa Bafarisi bana ba sa lumeleng bao Jesu a buang le bona. Leha ho le joalo, o ka hare ho bona, kaha Morena ea khethiloeng oa ’Muso oa Molimo, Jesu Kreste, o hlile o har’a bona.

Mohlomong ke ka mor’a hore Bafarisi ba tsamaee ha Jesu a tsoela pele ho bua le barutuoa ba hae ka ho tla ha ’Muso. Ka ho khetheha o hopotse ka ho ba teng ha hae ka moso matleng a ’Muso ha a lemosa: “Ho tla thoe ho lōna: Bonang, o mona; kapa: Bonang, o mane. Le se ke la ea teng, ’me le se ke la mathela [ho Bo-messia bana ba bohata]. Hobane joalo ka lehalima, ha le halima, le ee le halime ho qala nģa e ’ngoe tlas’a leholimo, ho isa nģa e ’ngoe tlas’a leholimo, ho tla ba joalo le Mor’a motho tsatsing la hae.” Ka hona, feela joalokaha lehalima le bonoa sebakeng se pharalletseng, Jesu o bontša hore bopaki ba ho ba teng ha hae matleng a ’Muso bo tla bonahala ka ho hlakileng ho bohle ba lakatsang ho bo bona.

Jesu joale o etsa lipapiso ka liketsahalo tsa boholo-holo ho bontša hore na boikutlo ba batho e tla ba bofe nakong ea ho ba teng ha hae ha ka moso. O-oa hlalosa: “Joalo ka ha ho no ho etsahale mehleng ea Nooe, ho tla ba joalo mehleng ea Mor’a motho . . . Le hona ho tla ba joalo ka ha ho kile ha etsahala mehleng ea Lota: ho no ho jeoa, ho nooa, ho rekoa, ho rekisoa, ho lengoa, ho hahuoa matlo. Empa ka letsatsi leo Lota a tsoang Sodoma ka lona, leholimo la nesoa mollo le sebabole, ba ba ba timetsoa kaofela ke tsona. Ho tla ba joalo ka letsatsi leo Mor’a motho a tla hlaha ka lona.”

Jesu ha a re batho mehleng ea Noe le Lota ba ile ba timetsoa feela hobane ba ile ba hahamalla mesebetsi e tloaelehileng ea ho ja, ho noa, ho reka, ho rekisa, ho lema, le ho haha matlo. Esita le Noe le Lota le malapa a bona ba ne ba etsa lintho tsena. Empa ba bang ba ile ba tsoela pele ka mesebetsi e joalo ea letsatsi le letsatsi ba sa hlokomele thato ea Molimo ka tsela leha e le efe, ’me ke ka lona lebaka lena ba ileng ba timetsoa. Ka lebaka le tšoanang, batho ba tla timetsoa ha Kreste a hlaha nakong ea mahlomola a maholo tsamaisong ena ea lintho.

Ha a hatisa bohlokoa ba ho arabela kapele bopaking ba ho ba teng ha hae ha ka moso matleng a ’Muso, Jesu oa phaella: “Ka letsatsi leo, ea tla be a le holim’a ntlo, ’me thepa ea hae e le ka tlung, a se ke a theoha ho ea e nka, le ea leng masimong a se ke a khutlela hae. Hopolang mosali oa Lota.” (TLP)

Ha bopaki ba ho ba teng ha Kreste bo hlaha, batho ba ke ke ba lumella hore ho khomarela ha bona lintho tsa bona tse bonahalang ho ba sitise ho nka bohato bo potlakileng. Ha a le tseleng ea hae ho tsoa Sodoma, ho bonahala mosali oa Lota o ile a talima morao ka ho laba-labela lintho tse setseng morao, ’me a fetoha seemahale sa letsoai.

Ha a ntšetsa pele tlhaloso ea hae ka boemo bo neng bo tla ba teng nakong ea ho ba teng ha hae ha ka moso, Jesu o bolella barutuoa ba hae: “Ka bosiu boo, ho ba babeli ba robetseng phateng e le ’ngoe, e mong o tla nkoa, e mong a tloheloe. Ho basali ba babeli ba silang hammoho, e mong o tla nkoa, e mong a tloheloe.”

Ho nkoa ho tšoana le ho kena ha Noe le lelapa la hae ka arekeng le ho nkoa ha Lota le lelapa la hae ke mangeloi ho tsoa Sodoma. Ho bolela pholoho. Ka lehlakoreng le leng, ho tloheloa ho bolela ho timetsoa.

Ntlheng ena, barutuoa baa botsa: “Morena, e tla ba kae?”

Jesu oa arabela, “Moo setopo se leng teng, ke moo le manong [“lintsu,” NW] a tla bōkana teng.” Ba ‘nkoang’ bakeng sa pholoho ba tšoana le lintsu tse bonelang hōle ka hore ba bōkana hammoho ‘setopong.’ Setopo se emela Kreste oa ’nete ho beng teng ha hae ho sa bonahaleng matleng a ’Muso le lijong tse hlabosang tsa moea tseo Jehova a fanang ka tsona. Luka 17:20-37; Genese 19:26.

◆ Ke joang ’Muso o neng o le har’a Bafarisi?

◆ Ke ka tsela efe boteng ba Kreste e kang lehalima?

◆ Ke hobane’ng ha batho ba tla timetsoa nakong ea boteng ba Kreste?

◆ Ho boleloa’ng ka ho nkoa, le ho tloheloa?