Jesu Bophelo le Tšebeletso tsa Hae

Ho Hlokahala Thapelo le Boikokobetso

PEJANA, ha a ne a le Judea, Jesu o ile a bolela papiso ka bohlokoa ba ho phehella thapelong. Joale, leetong la hae la ho qetela la ho ea Jerusalema, o boetse o hatisa tlhokahalo ea ho se khathale ho rapela. Mohlomong Jesu o ntse a le Samaria kapa Galilea ha a bolella barutuoa ba hae papiso ena e tsoelang pele:

“Moahloli o na a le teng motseng o itseng, ea sa tšabeng Molimo, ’me le batho a sa re letho ka bona. Hape, ho no ho le mosali oa mohlolohali motseng oo, ea neng a e-tla ho eena, a re: Nkahlolele ho ea ntsekisang. A hana halelele; empa kamorao, a imamela, a re: Leha ke sa tšabe Molimo, ke sa re letho ka batho, leha ho le joalo, kahobane mohlolohali eo oa nkhathatsa, ke tla mo ahlolela, a tle a se ke a ’ngamola hlooho ka ho ’na a e-tla ka mehla.”

Joale Jesu o sebelisa pale ena ea hae, a re: “Utloang se boleloang ke moahloli eo ea sa lokang. ’Me Molimo oona, na o ke ke oa ahlolela bakhethoa ba oona, ba bitsang ho oona motšehare le bosiu, leha o lieha ho halefa ka baka la bona na?”

Jesu ha a fane ka maikutlo a hore Jehova Molimo ka tsela leha e le efe o tšoana le moahloli eno ea sa lokang. Ho e-na le hoo, haeba esita le moahloli ea sa lokang a ka arabela lithapelo tse phehellang, ha hoa lokela ho ba le khoao hore Molimo, eo ka hohle a lokileng a bileng a leng molemo, o tla arabela haeba batho ba hae ba sa khathale ho rapeleng. Kahoo Jesu o tsoela pele: “Kea le bolella, [Molimo] o tla phakisa ho ba ahlolela.”

Hangata ba tlaase le ba futsanehileng ba tingoa toka, athe ba matla le ba ruileng hangata baa tšehetsoa. Leha ho le joalo, Molimo, hase feela hore o tla bona hore ba khopo baa ahloloa ka toka empa hape o tla tiisa hore bahlanka ba hae ba tšoaroa ka toka ka ho ba fa bophelo bo sa feleng. Empa ke batho ba bakae ba lumelang ka tieo hore Molimo o tla etsa hore toka e phethoe ka potlako?

A bua haholo-holo ka tumelo e amana le matla a thapelo, Jesu o-oa botsa: “Etlare ha Mor’a motho a e-tla, na o tla fumana tumelo e le teng lefatšeng na?” Le hoja potso eo e siiloe e sa arabeloa, e ka ’na ea fana ka maikutlo a hore tumelo e joalo e ne e ke ke ea ba e tloaelehileng ha Kreste a fihla matleng a ’Muso. Leha ho le joalo, re ke ke ra etsa qeto ea hore e ne e ke ke ea e-ba teng. Na ua e bontša?

Har’a ba mametseng Jesu ho na le ba bang ba ikutloang ba kholisehile haholo tumelong ea bona. Ba itšepile bobona hore ba lokile, ’me ba khella ba bang fatše. Bana ba ka ’na ba akarelletsa ba bang ba barutuoa ba Jesu. Ka hona o tobisa papiso e latelang ho ba joalo:

“Batho ba babeli ba ne ba nyolohetse tempeleng ho ea rapela, e mong e le mofarisi, e mong e le mo-lekhetho. Mofarisi a ema, ’me a iketsetsa thapelo, a re: Molimo, kea u leboha ha ke se joalo ka batho ba bang, e leng masholu, le bakhopo, le bafebi, leha e le joalo ka mo-lekhetho enoa. Ke itima lijo habeli ka veke; ke ntša karolo ea leshome ea ntho tsohle tseo ke li ruang.”

Bafarisi ba tsebahala ka ho bontša ho loka ha bona phatlalatsa e le ho khahla ba bang. Matsatsi a tloaelehileng ao ba iqapetseng ’ona a ho itima lijo ke ’Mantaha le Labone, ’me ka hlokolosi ba lefa karolo ea leshome esita le ea litlama tse nyenyane tsa tšimo. Likhoeli tse seng kae pejana, ho nyelisa ha bona batho ba tloaelehileng ho ne ho ile ha bonahala nakong ea Mokete oa Metlotloane ha ba ne ba re: “Bongata boo, bo sa tsebeng molao [ke hore, tlhaloso ea Bofarisi eo ba e filoeng], bo rohakiloe.”

Ha a ntšetsa pele papiso ea hae, Jesu o bolela ka motho ea joalo ea ‘rohakiloeng’: “Mo-lekhetho eena a ema hole, a tšaba le ho lelaletsa mahlo a hae leholimong, a mpa a iteta sefuba, a re: Molimo, nkhauhele, ’na ke leng moetsalibe.” Kaha mo-lekhetho o lumetse liphoso tsa hae ka boikokobetso, Jesu o re: “Kea le bolella, enoa o theohetse tlung ea hae a beiloe ea lokileng ho feta oa pele. Hobane e mong le e mong ea ikhōlisang o tla kokobetsoa; empa ea ikokobetsang o tla hōlisoa.”

Ka hona Jesu o boetse o hatisa tlhokahalo ea ho ikokobetsa. Ho hōlisetsoa ka har’a mokhatlo oa batho oo Bafarisi ba inkang ba lokile ba nang le tšusumetso e matla le boemo le botumo li hatisoang ka linako tsohle, ha ho makatse hore esita le barutuoa ba Jesu baa ameha. Leha ho le joalo, ke lithuto tse ntle hakaakang ka boikokobetso tseo Jesu a li rutang! Luka 18:1-14; Johanne 7:49.

◆ Ke hobane’ng ha moahloli ea sa lokang a amohela kōpo ea mohlolohali, hona ke thuto efe e rutoang ke setšoantšo sa Jesu?

◆ Ke tumelo efe eo Jesu a tla e talima ha a fihla?

◆ Ke ho bo-mang Jesu a lebisang setšoantšo sa hae sa Mofarisi le mo-lekhetho?

◆ Ke boikutlo bofe ba Bafarisi bo lokelang ho qojoa?