Jesu o Rata Bana Hape o Ruta ka Tlhalo

Ha Jesu le barutuoa ba hae ba tloha Galilea, ba tšela Noka ea Jordane ’me ba nka tsela e lebang ka boroa ho Perea. Nakong e fetileng ha Jesu a ne a le Perea, o ne a ile a qaqisetsa Bafarisi molao-motheo oa Molimo o mabapi le tlhalo. (Luka 16:​18) Hona Joale ba bua ka taba eo hape e le ho leka Jesu.

Moshe o ngotse hore mosali a ka hlaloa haeba ho fumanoe “ntho e sa hlompheheng” ho eena. (Deuteronoma 24:1) Maikutlo aa fapana tabeng ea hore na mabaka a utloahalang a ho hlala motho ke afe. Batho ba bang ba lumela hore esita le mathata a sa reng letho feela aa utloahala. Kahoo, Bafarisi baa mo botsa ba re: “Na ho lumelloa ke molao hore monna a hlale mosali oa hae ka lebaka leha e le lefe?”​—Matheu 19:3.

Ho e-na le hore Jesu a arabe ho ea ka maikutlo a batho, ka bohlale o bua ka tsela eo Molimo a ralileng lenyalo. O re: “Na ha lea ka la bala hore ea ba bopileng tšimolohong o ba entse e le e motona le e motšehali ’me a re, ‘Ka lebaka lena monna o tla siea ntat’ae le ’m’ae ’me o tla khomarela mosali oa hae, ’me bao ba babeli e tla ba nama e le ’ngoe’? E leng hore ha ba sa le babeli, empa e se e le nama e le ’ngoe. Ka hona, seo Molimo a se kopantseng hammoho jokong ho se ke ha e-ba le motho ea se arolang.” (Matheu 19:​4-6) Ha Molimo a kopanya Adama le Eva, o ne a sa rera hore ba hlalane.

Bafarisi ha ba lumellane le Jesu, ba re: “Joale, ke hobane’ng ha Moshe a ile a laela hore ho fanoe ka lengolo la bopaki la ho mo bolella hore a tsamaee le ho mo hlala?” (Matheu 19:7) Jesu o re ho bona: “Moshe, o ile a le fa tumello ea ho hlala basali ba lona ka lebaka la bothata ba lipelo tsa lona, empa ha hoa ba joalo ho tloha tšimolohong.” (Matheu 19:8) ‘Tšimoloho’ eo a buang ka eona ha se mehleng ea Moshe, empa ke ha Molimo a qapa lenyalo, Edene.

Joale Jesu o hatisa ntlha e ’ngoe ea bohlokoa o re: “Ke re ho lona mang kapa mang ea hlalang mosali oa hae, haese ka lebaka la bohlola [ka Segerike, por·neiʹa], ’me a nyala e mong oa feba.” (Matheu 19:9) Lebaka feela leo mangolo a lumellang motho hore a hlale ke ha ho bile le bohlola.

Barutuoa ba susumetseha ho re: “Haeba boemo bo le joalo ka monna le mosali oa hae, ha ho bohlale ho nyala.” (Matheu 19:​10) Ho hlakile hore motho ea ntseng a lohotha ho nyala o lokela ho tseba hore o tl’o lokela ho lula lenyalong ka ho sa feleng!

Ha a bua ka bosoha, Jesu o hlalosa hore batho ba bang ba tsoetsoe ba e-na le bokooa ba tlhaho bo ba sitisang ho ba le likamano tsa botona le botšehali. Batho ba bang ba etsoa maqhalaha mohlomong ka ho khaoloa litho. Ha ba bang bona ba hatella litakatso tsa bona tsa ho etsa thobalano. Ba etsa joalo e le hore ba ka tsepamisa likelello tsa bona mesebetsing e amanang le ’Muso oa Molimo. Jesu o re ho bamameli ba hae: ‘Ea ka bo etsetsang [bosoha] sebaka a ke a bo etsetse sebaka.’​—Matheu 19:12.

Joale batho ba qala ho tlisa bana ba bona ho Jesu. Leha ho le joalo, barutuoa ba leka ho ba khalemela. Mohlomong ha ba batle ha batho ba hlopha Jesu. Ha Jesu a bona sena oa halefa ’me o re: “Tlohelang bana ba banyenyane ba tle ho ’na, le se ke la leka ho ba thibela, etsoe ’Muso oa Molimo ke oa ba joaloka bona. Kannete ke re ho lona, mang kapa mang ea sa amoheleng ’Muso oa Molimo joaloka ngoana e monyenyane ho hang a ke ke a kena ho oona.”​—Mareka 10:​14, 15; Luka 18:15.

Eo ke thuto ea bohlokoa hakaakang! E le hore re fumane ’Muso oa Molimo re lokela ho ba batho ba bonolo ’me re ikemisetse ho ithuta joaloka bana ba banyenyane. Jesu o bontša hore o rata bana ba banyenyane ka ho ba kuka le ho ba hlohonolofatsa. Jesu o na le lerato le joalo bakeng sa bohle ba “amohelang ’Muso oa Molimo joaloka ngoana e monyenyane.”​—Luka 18:​17.