O Ile a Fumana se Laba-labeloang ke Pelo ea Hae
NA PELO ea hao e lakatsa ho bona ’Muso oa Messia o na le taolo e feletseng lefatšeng lohle? Haeba ho joalo, u laba-labela ’me u rapella litlhohonolofatso tse tšepisitsoeng tsa lefatšeng tlas’a ’Muso oo oa leholimo. E-ba le mamello, hobane “ha ho hlaha seo motho a se lumang, ke sefate sa bophelo.”—Liproverbia 13:12; Jakobo 5:7, 8.
Hoo e ka bang lilemong tse fetileng tse 2 000, Jerusalema ho ne ho lula monna ea bitsoang Simeone ea neng a “lokile, a hlonepha Molimo.” O ne a e-na le tumelo boprofeteng bo buang ka Messia ’me ka mamello o ne a “lebeletse tšeliso ea Iseraele.”—Luka 2:25.
Boprofeta ba Messia bo Fana ka Tšepo
Jehova o ne a ikarabella bakeng sa boprofeta ba pele bo buang ka Messia—bo neng bo fana ka tšepo ho moloko oa batho ba baetsalibe le ba shoang. Molimo o ile a bolela esale pele ka ho tla ha Peō ea “mosali” oa hae, kapa mokhatlo o hlophisitsoeng oa bokahohleng.—Genese 3:15.
Enoa o ile a tsebahatsoa e le peō ea Abrahama, ’me Jakobo o ile a bolela esale pele ka ho tla ha hae. (Genese 22:17, 18; 49:10) Lintho tse ntle tsa ’Muso oa Messia li rorisitsoe ho lipesaleme. (Pesaleme ea 72:1-20) Esaia o ile a bolela esale pele hore Peō e ne e tla tsoaloa ke moroetsana, ’me Mikea o ile a profeta hore e ne e tla tsoalloa Bethlehema. (Esaia 7:14; Mikea 5:2) Hona ke tlhase feela ea boprofeta bo bongata bo buang ka Messia.
Messia o Ntse a le Sieo!
Hopola nakong e fetileng, ’me u nahane hore lekholo la pele la lilemo C.E. lea atamela. Boprofeta ba Molimo ba qalong ka Messia hona joale bo se bo le lilemo li 4 000. Bajode ba bone pheliso ea tempele ea Jehova, ho etsoa lesupi ha naha ea habo bona, ho isoa kholehong Babylona ka lilemo tse 70, le lilemo tse eketsehileng tse 500 ba le tlas’a babusi ba Balichaba. Eaba Messia o ntse a le sieo!
E tlameha ebe Bajode ba tšabang Molimo ba ne ba laba-labela ho tla ha Messia hakaakang! Ka eena ba ne ba tla fumana litlhohonolofatso le lichaba tsohle.
Monna oa Morapeli
Har’a Bajode ba barapeli ba neng ba laba-labela ’me ba rapella ho tla ha Messia ke Simeone, mohlanka ea tšepahalang ea seng a hōlile oa Jehova ea neng a lula motse-moholong oa Judea. Ho etsahetse ntho e khethehileng ho Simeone.
Molimo o kentse moea oa hae o halalelang ho Simeone ’me o mo putsitse ka tšenolo. Simeone a ke ke a shoa pele a bona Ea tla fetoha Messia. Empa ho ntse ho feta matsatsi le likhoeli. Simeone oa tsofala ’me ha a sa lebeletse ho phela halelele haholo. Na tšepiso ea Molimo ho eena e tla phethahatsoa?
Ka letsatsi le leng (ka 2 B.C.E.), banyalani ba bacha ba nang le lesea ba tla tempeleng ba tsoa Bethlehema. Moea o halalelang o senolela Simeone hore lena ke lona letsatsi leo e leng khale a le lebeletse. O ea tempeleng, moo a tla bona Eo baprofeta ba ’nileng ba ngola ka eena. A tsamaea ka potlako ka hohle kamoo ’mele oa hae o tsofetseng o ka khonang, o bona Josefa, Maria, le ngoana.
Simeone o sika ngoana Jesu ka thabo e kaakang! Enoa ke Eena eo e tla ba Messia ea tšepisitsoeng—“Kreste oa Jehova.” Lilemong tseo tsa botsofali, Simeone ha a na tšepo ea ho bona Jesu a phethahatsa thomo ea Hae ea lefatšeng. Leha ho le joalo, hoa babatseha ho mo bona e le lesea. Boprofeta ba Messia bo qala ho phethahatsoa. Simeone o thabile hakaakang! Joale o tla khotsofalla ho robala lefung ho fihlela tsoho.—Luka 2:25-28.
Mantsoe a Simeone a Boprofeta
Ha Simeone a phahamisa lentsoe la hae ho rorisa Jehova, re mo utloa a re: “Joale, Monghali, u lese mohlanka oa hao, a ee ka khotso, ka polelo ea hao; hobane mahlo a ka a bone poloko ea hao, eo u e lokisitseng pontšeng ea lichaba kaofela, hore e be leseli le tla bonesa lichaba, le khanya ea Iseraele, sechaba sa hao.” Ntate oa Jesu oa mohōlisi, Josefa, le ’mè oa Hae, Maria, ba tsoela pele ho makalla mantsoe ana.—Luka 2:29-33.
Sefahleho sa Simeone se elile ha a hlohonolofatsa Josefa le Maria, ka ho hlakileng o ba lakaletsa tlhohonolofatso ea Jehova ea ho phetha boikarabelo ba bona ho ngoana. Joale sefahleho sa monna ea hōlileng sea hoaqatsa. A bua le Maria feela, oa phaella: “Bona, ngoana enoa o beetsoe ho oa le ho tsoha ha ba bangata Iseraeleng, le ho ba pontšo e hanyetsoang; le hona, lerumo le tla hlaba pelo ea hao, hore mehopolo ea lipelo tse ngata e tle e senoloe.”—Luka 2:34, 35.
Polelo ea Simeone ho Maria
Ak’u inahanele hore na Maria o ile a ikutloa joang. Simeone o ne a bolela eng? Ba bang ba ne ba tla amohela Kreste ’me ba phahamisoe boemong boo ba seng ba ntse ba le ho bona ba ho oa. Leha ho le joalo, ba bang ba ne ba tla mo hana, ba khoptjoe ho eena, ’me ba oe. Joalokaha ho boletsoe esale pele, Jesu o ile a ipaka e le lejoe la khopiso ho Bajode ba bangata. (Esaia 8:14; 28:16) Mantsoe a Simeone ha a bolele hore Baiseraele ka bomong ba ne ba tla qala ka ho oa ka lebaka la ho se lumele ebe baa tsoha ha ba lumela ka ho amohela Jesu. Ho e-na le hoo, tsela eo ba arabelang ka eona ho eena e ne e tla fapana ho batho ka bomong, e leng ho tla pepesa menahano ea lipelo tse ngata ’me ho lebise kahlōlong ea Molimo ho bona bakeng sa botle kapa bobe. Ho ba sa lumelang, o ne a tla tšoana le letšoao, kapa nyeliso. Ka ho bontša tumelo ho eena, ba bang ba ne ba tla phahamisoa boemong ba ho shoa litšitong le libeng tsa bona, ’me ba tla thabela ho ba le boemo bo lokileng le Molimo. Liketso tsa batho ho Messia li ne li tla bontša se leng ka lipelong tsa bona.
Ho thoe’ng ka mantsoe a Simeone: “Lerumo le tla hlaba pelo ea hao”? Ha ho na sesupo sa Mangolo se bontšang hore Maria o hlile a hlajoa ka lerumo. Leha ho le joalo, ho hanoa ha Jesu ke batho ba bangata ho ne ho tla mo ngongorehisa. ’Me Maria o ile a utloa bohloko hakaakang ha a bona Jesu a khokhothetsoe thupeng! Sena se ne se tšoana le ho hlajoa ka lerumo.
Simeone o Sebelisa Boprofeta bo Buang ka Messia
Moea oa Molimo o ile oa susumetsa Simeone hore a sebelise boprofeta bo buang ka Messia ho Jesu. Simeone o ne a ka shoa ka khotso, kapa khutso, ‘hobane mahlo a hae a bone poloko ea Molimo eo A e entseng pontšeng ea lichaba kaofela, hore e be leseli le tla bonesa lichaba, le khanya ea Iseraele sechaba sa Hae.’ (Luka 2:30-32) Sena se ile sa sebetsa hantle hakaakang mantsoeng a Esaia a boprofeta!
Moprofeta eo o ile a bolela esale pele: “Khanya ea Jehova e tla bonahala, nama eohle e tla e bona hammoho.” “Ke [Jehova] bile ke u [Messia] beile leseli la lichaba, u tle u be poloko ea ka ho isa pheletsong ea lefatše.” (Esaia 40:5; 42:6; 49:6; 52:10) Mangolo a Segerike a Bokreste le linnete tse hlakileng li ’nile tsa paka hore Messia, Jesu Kreste, ke leseli la ’nete la lichaba, Ea tla tlosa lesira la lefifi la moea ’me a tlisetse batho poloko.
Lentsoe la Molimo ha le sa bua letho ka Simeone ea hōlileng. Ka ho hlakileng o ile a shoa pele Kreste a bula tsela ea bophelo ba leholimo. Joale, pele ho feta nako e telele, Simeone o tla tsosetsoa bophelong lefatšeng. E tla ba thabo e kaakang eo eena—le uena—le ka bang le eona lefatšeng le lecha tlas’a ’Muso oa Molimo oa Bomessia!