Jesu Bophelo le Tšebeletso tsa Hae

Jesu oa Ruta Jeriko

KAPELE Jesu le matšoele a tsamaeang le eena ba fihla Jeriko, e leng motse o ka bang bohōle ba leeto la letsatsi ho tloha Jerusalema. Kamoo ho bonahalang kateng Jeriko ke motse o habeli, motse oa khale oa Bajode o hoo e ka bang k’hilomithara le halofo ho tloha motseng o mocha oa Baroma. Ha matšoele a e-tsoa motseng oa khale ’me a atamela ho o mocha, batho ba babeli ba bakōpi ba foufetseng ba utloa lerata. E mong oa bona ho thoe ke Bartimea.

Ha ba utloa hore ke Jesu ea fetang ka tsela, Bartimea le motsoalle oa hae ba qala ho hoeletsa: “Morena, mor’a Davida, re utloele bohloko!” Ha letšoele le ba bolella ka thata hore ba khutse, ba hooa le ho feta le ka mantsoe a phahameng haholoanyane: “U re utloele bohloko, morena, mor’a Davida!”

Ha a utloa pherekano eo, Jesu o-oa ema. O kōpa ba nang le eena hore ba bitse ba ntseng ba hoeletsa. Bana ba ea ho batho ba foufetseng ba bakōpi ’me ba re ho e mong oa bona: “Khothahala, u eme, oa u bitsa.” Ka thabo e tlōtseng, monna enoa oa sefofu o lahla kobo ea hae, o tlōlela holimo, ’me o ea ho Jesu.

Jesu o botsa banna bana ba babeli: “Le rata ha ke le etsetsa eng?”

Baa kōpa: “Morena, mahlo a rōna a ke a tutubolloe.”

A khannoa ke qenehelo, Jesu o ama mahlo a bona. Ho latela tlaleho ea Mareka, Jesu o re ho e mong oa bona: “E-ea, tumelo ea hao e u pholositse.” Kapele-pele banna bana ba bakōpi ba foufetseng baa bona, ’me ntle ho pelaelo ba qala ho rorisa Molimo ka bobeli ba bona. Ha batho bohle ba bona se etsahetseng, le bona ba boka Molimo. Ka ntle le ho lieha, Bartimea le motsoalle oa hae ba qala ho latela Jesu.

Ha Jesu a feta ho pholletsa le Jeriko, matšoele ke a maholo. E mong le e mong o batla ho bona motho ea folisitseng banna ba foufetseng. Batho ba subuhlellana ho Jesu ba tsoa ka ’nģa tsohle, ’me ka lebaka la sena, ba bang ha ba khone le ho ’mona hanyenyane feela. Har’a bana ke Zakea, molaoli oa ba-lekhetho Jeriko le ho e pota. O mokhutšoanyane haholo hore a ka bona se etsahalang.

Ka hona Zakea o mathela pele ’me o hloella sefateng sa sykomora haufi le tsela eo Jesu a tsamaeang ka eona. A le sebakeng sena se setle, a ka ba le pono e ntle ea ntho e ’ngoe le e ’ngoe. Ha matšoele a atamela, Jesu o hoeletsa sefateng: “Zakea, phakisa u theohe; hobane e ka khona ke fapohele tlung ea hao kajeno.”

Zakea o theohela fatše ka thabo ’me o potlakela hae ho ea lokisa lintho bakeng sa moeti oa hae ea khethehileng. Empa ha batho ba bona se etsahalang, kaofela ba qala ho koma-koma. Ba ho nka ho sa lokela hore Jesu e ka ba moeti oa monna ea joalo. Taba ke hore, Zakea e bile morui ka ho inkela chelete ka bolotsana mosebetsing oa hae oa ho bokella lekhetho.

Batho ba bangata baa latela, ’me ha Jesu a kena ka lapeng ha Zakea, baa belaela: “O fapohetse ha monna oa moetsalibe.” Empa Jesu o bona monyetla oa pako ka ho Zakea. ’Me Jesu ha a soabe, kaha Zakea o-oa ema ’me o-oa phatlalatsa: “Bona, Morena, leruo la ka ke le arolela mafutsana ka lehare; ’me ha ke amohile motho ntho e ’ngoe ka thetso, ke busetsa ho eena tse ’ne.”

Zakea o paka hore ho baka ha hae ke ha ’nete ka ho arolela mafutsana leruo la hae ka lehare le ka ho sebelisetsa halofo e ’ngoe ho buseletsa bao a ba qhekelletseng. Ho bonahala a ka lekanyetsa hore na o kolota batho bana bokae ka litlaleho tsa hae tsa lekhetho. Ka hona o etsa kano ea ho busetsa tse ’ne, tumellanong le molao oa Molimo o reng: ‘Ekare ha motho a utsoa konyana, o tla busa linku tse ’ne holim’a konyana.’

Jesu o khotsofetse ke kamoo Zakea a tšepisang ho aba leruo la hae ka teng, hobane O re: “Kajeno, poloko e kene tlung ena; hobane enoa le eena ke mora oa Abrahama. Hobane Mor’a motho o tlile ho batla le ho pholosa ho timetseng [“ho neng ho lahlehile,” NW].”

Haufinyane, Jesu o ne a ile a etsa papiso ea boemo ba ‘ho lahlehileng’ le pale ea hae ea mora ea lehlasoa. Joale re na le mohlala oa bophelo ba sebele oa ea lahlehileng ea fumanoeng. Le hoja baeta-pele ba bolumeli le ba ba latelang ba koma-koma le ho belaela ka ho lebisa tlhokomelo ha Jesu ho batho ba kang Zakea, Jesu o tsoela pele ho batla le ho tsosolosa bara bana ba lahlehileng ba Abrahama. Mattheu 20:29-34; Mareka 10:46-52; Luka 18:35–19:10; Exoda 22:1.

◆ Kamoo ho bonahalang ka teng Jesu o teana le batho ba foufetseng ba bakōpi hokae, hona o ba etsetsa eng?

◆ Zakea ke mang, hona ke hobane’ng ha a hloella sefateng?

◆ Zakea o paka ho baka ha hae joang?

◆ Re ka ithuta thuto efe tseleng eo Jesu a ileng a tšoara Zakea ka eona?