Mafu a Seoa na ke Pontšo ea Bofelo?
NA MAFU a seoa a mehleng ea rōna a bontša hore bofelo ba lefatše bo atametse? Pele re araba potso eo, a re ke re nahaneng ka seo polelo “bofelo ba lefatše” e se bolelang.
Batho ba bangata ba lumela hore bofelo ba lefatše bo bolela hore Molimo o tla felisa lefatše le bophelo bohle bo ho lona. Leha ho le joalo, Lentsoe la Molimo le bolela hore o “bōpetse [lefatše] hore le ahuoe.” (Esaia 45:18) Morero oa hae ke ho tlatsa lefatše ka batho ba phelang hantle ’meleng, ba thabileng ba labalabelang ho mamela litekanyetso tsa hae tse lokileng. Kahoo bofelo ba lefatše ha bo bolele ho fela ha lefatše le tsohle tse ahileng ho lona. Ho e-na le hoo, bo bolela ho fela ha tsamaiso ena e teng ea lintho le ba hanang ho etsa thato ea Molimo.
Sena se bontšitsoe ke moapostola Petrose, ea ileng a ngola: “Lefatše [la mehleng ea Noe] le ile la timela ha le koaheloa ke metsi.” Ha lefatše le ne le timetsoa mehleng ea Noe, ho ile ha felisoa ba babe. Lefatše le ile la sala hammoho le Noe ea lokileng le lelapa la hae. Petrose o tsoela pele ho bolela hore Molimo o tla nka khato hape nakong e tlang ho tlisa “timetso ea batho ba se nang bomolimo.”—2 Petrose 3:6, 7.
Litemana tse ling tsa Bibele li tšehetsa pono ena li sa fetohe. Ka mohlala, Liproverbia 2:21, 22 e re: “Ba lokileng ba tla aha lefatšeng; ba hloekileng ba tla le rua. Empa ba babe ba tla khaoloa holim’a lefatše, ba lonya ba fotholoe ho lona.”—Bona le Pesaleme ea 37:9-11.
Mafu a Seoa le Bofelo ba Lefatše
Empa see se tla etsahala neng? Barutuoa ba Jesu ba bane ba ile ba mo botsa potso eo. Ba ile ba botsa: “Pontšo e tla ba efe ea ho ba teng ha hao le ea qetello ea tsamaiso ea lintho [kapa, joalokaha liphetolelo tse ling tsa Bibele li bolela, “ho fela ha lefatše”]?” Jesu o ile a araba: “Sechaba se tla tsohela sechaba matla le ’muso o tla tsohela ’muso matla, ’me ho tla ba le likhaello tsa lijo le litšisinyeho tsa lefatše sebakeng se seng ka mor’a se seng.” (Matheu 24:3, 7) Tlalehong e tšoanang ho Luka 21:10, 11, Jesu o ile a phaella: “Ho tla ba le . . . mafu a seoa . . . , sebakeng se seng ka mor’a se seng; ’me ho tla ba le lipono tse tšabehang le lipontšo tse khōlō tse tsoang leholimong.”
Hlokomela hore Jesu ha aa ka a re mafu a seoa ka booona a ne a tla bontša hore bofelo bo ne bo atametse. Ho e-na le hoo, o ile a boela a thathamisa lintoa tse khōlō, litšisinyeho tsa lefatše le likhaello tsa lijo. Boprofeteng ba hae bo qaqileng bo fumanoang ho Matheu 24 le 25, Mareka 13 le Luka 21, Jesu o ile a bolela esale pele ka lintho tse ling tse ngata tse neng li lokela ho hlaha. Kaofela ha tsona li ne li tla lokela ho etsahala hammoho pele Molimo a nka khato ea ho felisa bokhopo bo lefatšeng. Ho na le bopaki bo matla ba hore hona joale re phela nakong e joalo.
Paradeise e Tlang
Bokamoso ha bo tlise pheliso ea moloko oa batho, ebang ke ka lefu la seoa kapa ka letsoho la Molimo. Jehova Molimo o tšepisa ho fetola lefatše lena paradeise. (Luka 23:43) Har’a lintho tse ling tse ngata, o tla felisa mafu a hlaselang moloko oa batho.
Re tiisetsoa sena ha re nahana ka tšebeletso ea Jesu Kreste, ea neng a bontša litšoaneleho tse phethahetseng tsa Ntate oa hae. A nehiloe matla ke Ntate oa hae oa leholimo, Jesu o ile a folisa bao e neng e le lihlotsa, liqhoala, lifofu, kapa limumu. (Matheu 15:30, 31) Hape o ile a folisa ba neng ba e-na le lepera. (Luka 17:12-14) O ile a folisa mosali ea nang le phallo ea mali, monna ea nang le letsoho le omeletseng le monna ea neng a khotše seema. (Mareka 3:3-5; 5:25-29; Luka 14:2-4) O ile a phekola batho ba “tšoeroeng ke sethoathoa le batho ba shoeleng litho.” (Matheu 4:24) O bile a tsosa bafu ka makhetlo a mararo!—Luka 7:11-15; 8:49-56; Johanne 11:38-44.
Liphekolo tsena tsa mohlolo li fana ka motheo bakeng sa tšepiso ea Molimo ea hore nakong e tlang tsamaisong ea hae, “ha ho moahi ea tla re: ‘Kea kula.’” (Esaia 33:24, NW) Le ka mohla ho ke ke ha hlola ho e-ba le lefu la seoa le tla kulisa batho le ho ba bolaea. Re ka leboha hakaakang hore ’Mōpi oa rōna ea lerato o na le matla hammoho le takatso ea ho felisa ho kula le mafu ka ho feletseng, ka ho sa feleng!—Tšenolo 21:3, 4.
[Setšoantšo se leqepheng la 9]
Jesu o ne a nehiloe matla a hore a folise ba kulang ke Molimo
[Setšoantšo se leqepheng la 10]
Paradeiseng e tlang ea lefatšeng, Jehova o tla felisa ho kula le mafu