Lipotso Tse Tsoang ho Babali

Ke utloisisa hore lentsoe la Segerike “toʹte” (joale) le sebelisoa ho kenyelletsa ntho e latelang. Kahoo, ke hobane’ng ha Matheu 24:9 e baleha ka tsela ee: “Joale [“toʹte”] batho ba tla nehelana ka lōna matšoenyehong,” ha ka lehlakoreng le leng tlaleho e tšoanang le eo ho Luka 21:12 e re: “Empa pele ho lintho tsena tsohle batho ba tla le tšoara ’me ba le hlorise”?

Ho nepahetse hore toʹte e ka sebelisoa ho kenyelletsa ntho e latelang, re ka re, ntho e leng letotong la liketsahalo. Empa ha rea lokela ho utloisisa hore lentsoe lena le sebelisitsoe ka mokhoa ona feela ka Bibeleng.

A Greek-English Lexicon of the New Testament and Other Early Christian Literature, e ngotsoeng ke Bauer, Arndt le Gingrich, e bontša hore lentsoe toʹte le sebelisoa ka kutloisiso tse peli tsa motheo ka Mangolong.

E ’ngoe ke “nakong eo.” Ena e ka ba “joale ea nako e fetileng.” Mohlala o fanoeng ke oa Matheu 2:17: “Joale ha phethahala se ileng sa buuoa ka Jeremia moprofeta.” Sena ha se supe ntho e leng letotong la liketsahalo, empa se bontša nako e itseng e fetileng, nakong eo. Ka ho tšoanang, toʹte e ka sebelisoa “bakeng sa joale ea [nako e tlang].” Mohlala o mong o fumanoa ho 1 Bakorinthe 13:12: “Etsoe hona joale re bona ka setšoantšo se lerootho ka seipone sa tšepe, empa ka nako eo e tla ba ka lifahleho tse talimaneng. Hona joale ke tseba ka mokhoa o sa fellang, empa ka nako eo ke tla tseba ka mokhoa o nepahetseng esita le joalokaha ke tsejoa ka mokhoa o nepahetseng.” Mona Pauluse o sebelisitse toʹte ka kutloisiso ea ‘ka nako eo e tlang.’

Ho ea ka buka ena e hlalosang mantsoe, tšebeliso e ’ngoe ea toʹte ke “ho kenyelletsa ntho e latelang hamorao.” Buka ena e hlalosang mantsoe e fana ka mehlala e mengata e fumanoang litlalehong tse tharo tsa karabo ea Jesu potsong ea baapostola mabapi le pontšo ea ho ba teng ha hae.a E le mehlala ea tšebeliso ea toʹte “ho kenyelletsa ntho e latelang hamorao,” buka eo e hlalosang mantsoe e qotsitse Matheu 24:10, 14, 16, 30; Mareka 13:14, 21; le Luka 21:20, 27. Ho hlahloba taba e potolohileng ho bontša hore na ke hobane’ng ha ntho e latelang hamorao e le kutloisiso e nepahetseng. ’Me sena se molemo bakeng sa ho utloisisa boprofeta ba Jesu bo fupereng liketsahalo tse tla hlaha nakong e tlang.

Leha ho le joalo, ha rea lokela ho etsa qeto ea hore mohlala o mong le o mong oa toʹte litlalehong tsena ka ho sa tenyetseheng o lokela ho kenyelletsa ntho e latelang hamorao feela. Ka mohlala, ho Matheu 24:7, 8, re bala hore Jesu o ile a bolela esale pele hore sechaba se ne se tla tsohela sechaba matla le hore ho ne ho tla ba le likhaello tsa lijo le litšisinyeho tsa lefatše. Temana ea 9 e tsoela pele: “Joale batho ba tla nehelana ka lōna matšoenyehong ’me ba tla le bolaea, ’me le tla ba ba hloiloeng ke lichaba tsohle ka lebaka la lebitso la ka.” Na e ne e ka ba ho lekanyetsa hantle ho utloisisa hore lintoa, likhaello tsa lijo le litšisinyeho tsa lefatše tse boletsoeng esale pele li ne li tšoanela ho etsahala kaofela, ’me mohlomong li khaotse, pele mahloriso a ka qala?

Hoo ha ho utloahale, leha e le hore ho netefatsoa ke seo re se tsebang ka se ileng sa phethahala lekholong la pele la lilemo. Tlaleho e bukeng ea Liketso e senola hore hoo e batlileng e e-ba ka potlako ka mor’a hore litho tsa phutheho e ncha ea Bokreste li qale ho bolela, li ile tsa thulana le khanyetso e matla. (Liketso 4:5-21; 5:17-40) Ka sebele re ke ke ra bolela hore lintoa tsohle, litlala tsa boja-likata le litšisinyeho tsa lefatše tseo Jesu a buileng ka tsona li ile tsa etsahala pele ho mahloriso ao a pele. Ho e-na le hoo, khanyetso eo e ile ea tla “pele ho” lintho tse ling tse ngata tse neng li ile tsa boleloa pele, e leng se lumellanang le tsela eo Luka a behileng litaba ka eona: “Empa pele ho lintho tsena tsohle batho ba tla le tšoara ’me ba le hlorise.” (Luka 21:12) Hoo ho tla bolela hore ho Matheu 24:9, toʹte e sebelisitsoe haholoanyane ka kutloisiso ea “ka nako eo.” Nakong ea lintoa, litlala tsa boja-likata le litšisinyeho tsa lefatše, kapa ka nako eo, balateli ba Jesu ba ne ba tla hlorisoa.

[Mongolo o botlaaseng ba leqephe]