Lilemo tsa bo-1990—Lilemo tse Leshome tse Hlokang Botsitso
MESO ea lilemo tsa bo-1990 e tlisitse tšepo e ncha bakeng sa khotso ea lefatše. Empa e boetse e tlisitse ho hloka botsitso le pherekano e ke keng ea lekanngoa.
Ka mohlala, ho na le ho hloka botsitso ho hoholo ka se tlang ho etsahala lichabeng tse tlohelang moruo o reriloeng o ileng oa hlōleha. Linaha tse ngata joale li kenela ’maraka o bulehileng oa tsamaiso ea tlhahiso ea lintho e lokolohileng. Empa lichaba tseo eseng tsa tsamaiso ea tlhahiso e lokolohileng li na le bofutsana bo jang setsi, le ho hloka mosebetsi, theko ea lintho e phahameng le molato oa chelete. Esita le United States e na le molato o moholohali oa chelete ea machaba—molato oa liranta tse limillione tse robeli—’me e boetse ke molato o moholo ka ho fetisisa oa khoebo ea machaba.
Sesosa se seng sa tlokotsi ea moruo oa lefatše se hlokometsoe ke mohlophisi oa New York Times, ea itseng: “Ho na le batho ba futsanehileng ka ho tšosang lefatšeng ho feta leha e le neng pele.”
Eseng ka ho felletseng ka lebaka la ho hloka botsitso ho eketsehang, batho ba bangata ba sekametse boithating: boikutlo ba ’na pele, meharo ea lintho tse bonahalang, takatso ea ho ikhotsofatsa hona hoo ho sa tsotellehe liphello. Tšebeliso e mpe e pharalletseng ea lithethefatsi ke bopaki ba sena. Christopher Lasch, moprofesa oa histori Univesithing ea Rochester, o hlalosa sena ka tsela ena: “Re felletsoe ke motheo oa boitšoaro.”
Seithuti sa moruo se amoheloang lefatšeng lohle Arjo Klamer sea bolela: “Batšoantši, liithuti tsa moruo, bo-rakhoebo le malapa ba felletsoe ke tšepo linthong tsa joale tse hlokang botsitso. . . . Masoabi a fetohile maikutlo ao batho baa abelanang likarolong tse fapaneng le taeong.” Ha a bolela hore “masoabi a tletse hohle,” o phaelletse ka hore: “Karohano. Lefeela. Ho iphapanya. Lerata. Ana ke a mang a mantsoe a amohelehang. Mantsoe ana a hlalosa tsamaiso e rarahaneng eo batho ba mehleng ea kajeno ba iphumanang ba lahlehile ho eona.”
Ho hlakile ka ho utloisang bohloko hore litsamaiso tsa lefatše lena tsa lipolotiki, moruo, le kahisano ha li na tharollo ea ka ho sa feleng ea mathata a mangata le ho hloka botsitso. Empa boemo bona bo hlile ba boleloa esale pele boprofeteng ba Bibele bakeng sa mehla ea rōna. Ela hloko mehlala e ’maloa: “Mehleng ea qetello linako tse thata ho sebetsana le tsona li tla ba mona.” “Lefatšeng lichaba li tla tsieleha, li be le matsoalo . . . Batho ba tla neela moea ke tšabo le ke tebello ea tse tla tla lefatšeng.”—2 Timothea 3:1, NW; Luka 21:25, 26.
[Tlhaloso ea Moo Setšoantšo se Nkiloeng Teng e leqepheng la 31]
Fotografía de Publicaciones Capriles, Caracas, Venezuela