Na Molimo oa Mamela ha U Rapela?
MOOKAMELI ea ka sehloohong o etsa qeto hore na o tla romela lenģosa bakeng sa taba e itseng kapa o tla e rarolla ka boeena. Ka ho tšoanang, ’Musi Morena oa bokahohle o na le khetho ea ho lekanyetsa hore na o tla kenella ho isa bohōleng bofe tabeng leha e le efe. Mangolo a ruta hore Molimo o khethile ho kenella ka booona lithapelong tsa rōna ka hona o re laela hore re li lebise ho oona.—Pesaleme ea 66:19; 69:13.
Khetho ea Molimo tabeng ena e bontša thahasello ea oona ea botho lithapelong tsa bahlanka ba oona ba batho. Ho e-na le ho hanela batho ba oona ho o atamela ka monahano le matšoenyeho ’ohle, oa ba khothalletsa: “Se phetseng ho rapela,” “le tiee thapelong,” “jarisa Jehova phahlo ea hao,” “lahlelang lipelaelo tsohle tsa lōna holim’a [Molimo].”—1 Ba-Thessalonika 5:17; Ba-Roma 12:12; Pesaleme ea 55:22; 1 Petrose 5:7.
Haeba Molimo o ne o sa batle ho mamela lithapelo tsa bahlanka ba oona, o ne o ke ke oa lokisetsa tsela e joalo ea ho o atamela le ho khothalletsa hore e sebelisoe ka bolokolohi. Ka hona, hore ebe Molimo o entse hore batho ba oona ba o atamele, ke lebaka le leng la ho kholiseha hore oa mamela. E, o nahanisisa ka lithapelo tsa e mong le e mong oa bahlanka ba oona.
Ntho e sa lokelang ho hlokomolohuoa ke hore Bibele e bolela ka ho hlaka hore Molimo o mamela thapelo. Ka mohlala, moapostola Johanne oa ngola: “’Me tšepo e tiileng eo re nang le eona ho eena, ke hobane, ha re kōpa ntho ka ho rata ha hae, oa re utloa.” (1 Johanne 5:14) Morena Davida o buile ka Jehova Molimo e le “ea utloang merapelo” ’me a tiisa ka kholiseho: “O utloa lentsoe la ka.”—Pesaleme ea 55:17; 65:2.
Kahoo le hoja ntle ho pelaelo ketso ea ho rapela e e-na le melemo ka boeona, Mangolo a bontša hore ho ameha ho hongata haholo ha motho ea lokileng a rapela. Ho na le ea mametseng. Eo ea mametseng ke Molimo.—Jakobo 5:16-18.
Lithapelo tse Ileng tsa Utluoa
Ha e le hantle, Bibele e na le litlaleho tse ngata tsa batho bao Molimo o ileng oa utloa lithapelo tsa bona ’me oa li arabela. Liphihlelo tsa bona li tiisa ka ho hlakileng hore melemo ea thapelo ha se feela matla a eona a ho phekola ha motho a lokolisa menahano ea hae ’me a e hlalosa. Li akarelletsa ho hongata ho feta boiteko ba motho ba ho etsa se tumellanong le lithapelo tsa hae.
Ka mohlala, ha Morena Davida a tobane le morero o mobe oa Absalome oa ho ikhapela borena ba Iseraele, o ile a rapela: “Oho, Jehova, u etse keletso ea Akitofele [moeletsi oa Absalome] lefeela.” E ne e se kōpo e nyenyane, kaha “keletso eo Akitofele a neng a eletsa ka eona, e be e kholisa joale ka eka ho botsitsoe molomo oa Molimo. Keletso tsohle tsa Akitofele li ne li le kalo.” Ka mor’a moo Absalome o ile a hana leqheka le hlahisitsoeng ke Akitofele la ho ketola Morena Davida. Hobane’ng? “Ke Jehova ea neng a laetse hore ho senngoe keletso e ntle ea Akitofele, e le hore Jehova a hlahisetse Absalome kotsi.” Ka ho totobetseng, thapelo ea Davida e ile ea utluoa.—2 Samuele 15:31; 16:23; 17:14.
Ka ho tšoanang, ka mor’a hore Ezekiase a rapele Molimo bakeng sa ho lopolloa ho kuleng ho sa phekoleheng, o ile a fola. Na hona ho ne ho le molemo feela kamanong le boikutlo ho Ezekiase hobane a ile a rapela? Ho hang ha ho joalo! Molaetsa oa Jehova ho Ezekiase, joalokaha o boletsoe ke moprofeta Esaia, ke ona: “Ke utloile thapelo ea hao, ke bone le meokho ea hao; bona, ke tla u folisa.”—2 Marena 20:1-6.
Daniele, eo thapelo ea hae e ileng ea lieha ho arabeloa ho feta kamoo a neng a lebelletse ka teng, o ile a tiisetsoa ke lengeloi la Jehova: “Lipolelo tsa hao li hlile tsa utluoa.” Lithapelo tsa ba bang, joaloka tsa Anna, barutuoa ba Jesu, le molaoli oa lebotho Kornele, li ile tsa arabeloa ka litsela tseo ho ke keng ha thoe e bile ka matla a motho feela tjee. Joale, Bibele e ruta ka ho hlakileng hore Molimo o amohela lithapelo tse tumellanong le thato ea bomolimo, oa li utloa, ebile oa li arabela.—Daniele 10:2-14; 1 Samuele 1:1-20; Liketso 4:24-31; 10:1-7.
Empa Molimo o araba lithapelo tsa bahlanka ba oona ba tšepahalang joang kajeno?
Ho Fumana Likarabo tsa Lithapelo
Lithapelo tse qotsitsoeng ka holimo li ile tsa arabeloa ka litsela tse hlollang, le tsa mohlolo. Leha ho le joalo, hopola hore esita le mehleng ea Bibele, likarabo tse fumanoang nako le nako lithapelong li ne li sa hlokomelehe habonolo. Ho joalo hobane li ne li amana le ho nehoa matla a ho etsa ho hotle le temohisiso, ho thusang bahlanka ba Molimo ho tšoarella tseleng e lokileng. Haholo-holo ho Bakreste, ho fumana likarabo tsa lithapelo ho ne ho amana le litaba tsa moea haholo, eseng meeka kapa liketso tse matla.—Ba-Kolosse 1:9.
Ka hona, ka linako tsohle u se ke ua nyahama haeba lithapelo tsa hao li sa arabeloe ka tsela eo u e lebelletseng kapa eo u e ratang. Ka mohlala, ho e-na le ho tlosa teko, Molimo o ka khetha ho u neha “matla ao a fetisisang” ho e mamella. (2 Ba-Korinthe 4:7, BPN; 2 Timothea 4:17) Le ka mohla ha rea lokela ho khella bohlokoa ba matla a joalo fatše, leha e le hore re etse qeto ea hore Jehova ha a arabela thapelo ea rōna ho hang.
Nahana ka taba ea Mor’a Molimo, Jesu Kreste. Kaha Jesu o ne a amehile ka hore a se shoe joaloka monyefoli oa sebele, o ile a rapela: “Ntate, hoja u ka rata ho suthisa senoelo sena pel’a ka!” Na Molimo o ile oa utloa thapelo ena hamolemo? E, joalokaha ho tiisoa ho Ba-Heberu 5:7. Jehova ha a ka a lokolla Mora oa hae tlhokahalong ea ho shoa thupeng ea tlhokofatso. Ho e-na le hoo, “eaba lengeloi le hlaha ho eena, le e-tsoa leholimong, la mo matlafatsa.”—Luka 22:42, 43.
Na e ne e le karabo e hlollang, ea mohlolo? Ho e mong le e mong oa rōna, e ka ba mohlolo! Empa ho Jehova Molimo, mohloli oa matla a joalo, hona e ne e se mohlolo. Hape le Jesu, ho tsoa bophelong ba hae ba pele ba leholimong, o ne a tloaelane le liketsahalo tse fetileng ha mangeloi a hlaha ho batho. Kahoo ho hlaha ha lengeloi ho ne ho ke ke ha e-ba le tšusumetso e hlollang ho eena joalokaha e ne e tla etsa ho rōna. Leha ho le joalo, lengeloi lena, leo ka ho totobetseng Jesu a neng a le tseba ha A ntse a phela pele e e-ba motho, le ile la Mo matlafatsa bakeng sa teko e larileng ka pele.
Ha a araba lithapelo tsa bahlanka ba hae ba tšepahalang kajeno, hangata Jehova o fana ka matla a hlokahalang ho mamella. Tšehetso ena e ka hlaha e le khothatso e tsoang ho barapeli-’moho bao re tloaelaneng le bona. Na o teng ho rōna ea ka batlang ho hana khothatso eo, mohlomong ka ho etsa qeto ea hore kaha basebeletsi-’moho ba sa feta litekong tse tšoanang le tsa rōna, ha ba boemong ba ho re matlafatsa? Jesu a ka be a bile le pono e joalo ka lengeloi le hlahileng ho eena. Ho e-na le hoo, o ile a amohela khothatso joaloka karabo ea Jehova thapelong ea hae, kahoo o ile a khona ho phethahatsa thato ea Ntate oa hae ka botšepehi. Le rōna re tla batla ho amohela ka mosa matla ao Molimo o re nehang oona ha o arabela lithapelo tsa rōna. Hape, hopola hore hangata linako tse joalo tsa ho mamella ka tiisetso li lateloa ke mahlohonolo a mangata.—Moeklesia 11:6; Jakobo 5:11.
Kholiseha Hore Molimo oa Mamela
Le ka mohla u se ke ua lahleheloa ke kholiseho matleng a thapelo haeba u sa arabeloe ka eona nako eo. Likarabo tsa lithapelo tse ling, joaloka tsa ho imolloa tsietsing e itseng kapa boikarabelong bo eketsehileng tšebeletsong ea Molimo, li ka ’na tsa lokela ho emela nako eo Molimo o tsebang hore e loketse ebile e molemo. (Luka 18:7, 8; 1 Petrose 5:6) Haeba u rapela ka taba ea botho e u tšoentseng ka ho teba, bontša Molimo ka phehello ea hao hore takatso ea hao e matla, sepheo sa hao ke se hloekileng le sa ’nete. Jakobo o bontšitse moea ona, ka mor’a ho betana ka nako e teletsana le lengeloi, o ile a re: “Ha nka ke ka u lesa ua ea, u e-so ho ntlhohonolofatse.” (Genese 32:24-32) Re tlameha ho ba le kholiseho e tšoanang ea hore haeba re tsoela pele re kōpa, re tla fuoa tlhohonolofatso ka nako e loketseng.—Luka 11:9.
Khopolo e le ’ngoe ea ho qetela. Ho mameloa ke ’Musi oa bokahohle ke tokelo ea bohlokoa. Ka lebaka leo, na re mamela ka hloko ha Jehova Molimo, ka Lentsoe la hae, a bua le rōna ka litlhokahalo tsa hae? Ha lithapelo tsa rōna li re atametsa haufi-ufi le ’Mōpi oa rōna, re tla batla ho lebisa tlhokomelo e tebileng ho sohle seo a re bolellang sona.
[Setšoantšo se leqepheng la 6]
Molimo o mamela lithapelo. Na rea o mamela ka Lentsoe la oona?