Molao oa Khauta—Oa Sebetsa
Le hoja batho ba bangata ba nka Molao oa Khauta e le thuto ea boitšoaro e rutiloeng ke Jesu, eena ka boeena o ile a re: “Seo ke se rutang hase sa ka, empa ke sa ea nthomileng.”—Johanne 7:16.
E, MOQAPI oa lithuto tsa Jesu, ho akarelletsa le seo hamorao se ileng sa tsejoa e le Molao oa Khauta, ke ea neng a romile Jesu, e leng ’Mōpi, Jehova Molimo.
Ho tloha qalong Molimo o ne a rerile hore batho bohle ba tšoare ba bang kamoo le bona ba batlang hore ba tšoaroe kateng. O ile a beha mohlala o motle ka ho fetisisa oa ho bontša kameho ka boiketlo ba ba bang ka tsela eo a ileng a bōpa moloko oa batho ka eona: “Molimo a bōpa motho ka setšoantšo sa hae, a mo bōpa ka setšoantšo sa Molimo; a ba bōpa e le e motona le e motšehali.” (Genese 1:27) Sena se bolela hore ka lerato Molimo o ile a sitsa batho ka tekanyo e itseng ea litšoaneleho tsa hae tse hlahelletseng e le hore ba ka thabela bophelo ka khotso, thabo le kutloano—ba e-na le monyetla oa ho etsa seo ka ho sa feleng. Letsoalo leo Molimo a ba fileng lona, ha le koetlisitsoe hantle, le ne le tla ba tataisa hore ba tšoare ba bang kamoo bona ka bobona ba batlang hore ba ba tšoare kateng.
Boithati bo Ile ba Qala ho Rena
Kaha moloko oa batho o bile le tšimoloho e ikhethang hakaale, lintho li senyehile hokae? Ka tsela e bonolo, boithati bo ile ba kenella ka mokhoa o tšabehang. Batho ba bangata ba tseba tlaleho ea Bibele e buang ka seo monna le mosali ba pele ba ileng ba se etsa, joalokaha ho tlalehiloe ho Genese khaolo ea 3. Ba susumelitsoe ke Satane, mohanyetsi oa litekanyetso tsohle tsa Molimo tse lokileng, ka boithati Adama le Eva ba ile ba lahla bobusi ba Molimo ba khetha ho ipusa le ho iketsetsa seo ba se ratang. Boithati le bofetoheli ba bona ha lia ka tsa fella ka hore ba lahleheloe ke ho hongata feela empa li ile tsa boela tsa e-ba le liphello tse bohloko bakeng sa litloholo tsohle tsa bona tsa nakong e tlang. Eo e bile pontšo e hlakileng ea liphello tse bohloko tse tlisoang ke ho hlokomoloha thuto e ileng ea tsejoa e le Molao oa Khauta. Ka lebaka leo, “sebe se ile sa kena lefatšeng ka motho a le mong le lefu la kena ka sebe, ’me kahoo lefu la namela ho batho bohle hobane kaofela ba ne ba entse sebe.”—Baroma 5:12.
Le hoja moloko oohle oa batho o ile oa furalla litsela tse lerato tsa Jehova Molimo, eena ha aa ka a o lahla kherehloa. Ka mohlala, Jehova o ile a fa sechaba sa Iseraele Molao oa hae hore o se tataise. O ile oa ba ruta hore ba tšoare ba bang kamoo le bona ba batlang hore ba ba tšoare kateng. Molao o ne o fana ka tataiso mabapi le tšoaro ea makhoba, likhutsana le bahlolohali. O ne o bontša hore na ho lokela ho sebetsanoa joang le tlhaselo, ho koetela le bosholu. Melao ea tsamaiso ea likhoerekhoere e ne e bontša ho tsotella bophelo bo botle ba ba bang. Ho ne ho bile ho e-na le melao e mabapi le ho kopanela liphate. Jehova o ile a akaretsa Molao oa hae ka ho bolella batho hore: “U rate oa heno joalokaha u ithata,” e leng mantsoe ao Jesu a ileng a a qotsa hamorao. (Levitike 19:18; Matheu 22:39, 40) Molao o ne o boetse o e-na le litaelo tse neng li hlalosa kamoo bajaki ba har’a Baiseraele ba neng ba lokela ho tšoaroa kateng. Molao o ne o laela hore: “U se ke ua hatella mojaki, etsoe le tsebile moea oa mojaki, hobane le bile bajaki naheng ea Egepeta.” Ka mantsoe a mang, Baiseraele ba ne ba lokela ho bontša ba hlokang kutloelo-bohloko e nang le mosa.—Exoda 23:9; Levitike 19:34; Deuteronoma 10:19.
Hafeela Baiseraele ba ne ba phethahatsa Molao ka botšepehi, Jehova o ne a hlohonolofatsa sechaba seo. Ka tlas’a puso ea Davida le Solomone, sechaba se ile sa atleha ’me batho ba ne ba thabile ba bile ba khotsofetse. Tlaleho ea histori ea re bolella: “Bajuda le Baiseraele ba ne ba le bangata, joaloka lehlabathe le haufi le leoatle ka bongata, ba ja ba noa ’me ba thabile. Bajuda le Baiseraele ba lula ba sireletsehile, e mong le e mong tlas’a sefate sa hae sa morara le tlas’a sefate sa hae sa feiga.”—1 Marena 4:20, 25.
Ka masoabi, khotso le tšireletseho tsa sechaba seo ha lia ka tsa e-ba teng ka nako e telele. Le hoja ba ne ba e-na le Molao oa Molimo, Baiseraele ha baa ka ba o boloka; ba ile ba lumella boithati ho pupetsa ho tsotella ha bona ba bang. Sena, hammoho le bokoenehi, se ile sa ba bakela mathata ka bomong le joaloka sechaba. Qetellong, ka selemo sa 607 B.C.E., Jehova o ile a lumella Bababylona hore ba timetse ’muso oa Juda, motse oa Jerusalema esita le tempele e ntle haholo e neng e le sebakeng seo. Hobane’ng? “‘Ka lebaka la hore ha lea ka la mamela mantsoe a ka, bonang! kea romeletsa ’me ke tla nka malapa ’ohle a leboea,’ ho bolela Jehova, ‘ke romeletse ho Nebukadrezare morena oa Babylona, mohlanka oa ka, ’me ke tla ba tlisa khahlanong le naha ena le khahlanong le baahi ba eona le khahlanong le lichaba tsena tsohle tse potolohileng; ke tla ba nehela timetso ’me ke ba etse ntho e makalloang le ntho e letsetsoang mololi le libaka tse ripitliloeng ho isa nakong e sa lekanyetsoang.” (Jeremia 25:8, 9) Ba ile ba lefa habohloko hakaakang ka lebaka la ho lahla borapeli bo hloekileng ba Jehova!
Mohlala o Lokelang ho Etsisoa
Ka lehlakoreng le leng, Jesu Kreste ha aa ka a ruta Molao oa Khauta feela empa o ile a boela a beha mohlala o babatsehang ka ho fetisisa oa ho o phetha. Kannete o ne a tsotella boiketlo ba ba bang. (Matheu 9:36; 14:14; Luka 5:12, 13) Ka lekhetlo le leng, ha a le haufi le motse oa Naine, Jesu o ile a bona mohlolohali ea saretsoeng a le mokolokong oa lepato la mora oa hae ea mong to! Tlaleho ea Bibele e re: “Ha Morena a re heli! ’me a mo bona, a mo hauhela.” (Luka 7:11-15) Poleloana “a mo hauhela,” ho ea ka Vine’s Expository Dictionary of Old and New Testament Words, e bolela “ho ameha ho ea fihla lithong tsa motho tse ka hare.” O ile a utloa bohloko boo mosali eo a neng a bo utloa ka pelong, ’me seo se ile sa mo susumelletsa ho nka mehato e nepahetseng ea ho tlosa bohloko ba hae. Mohlolohali eo o ile a thaba hakaakang ha Jesu a tsosa moshemane eo ’me “a mo fa ’m’ae”!
Qetellong, tumellanong le morero oa Molimo, Jesu o ile a utloa bohloko le ho fana ka bophelo ba hae ka boithatelo e le thekollo hore moloko oa batho o ka lokolloa bokhobeng ba ho ba tlas’a sebe le lefu. Ona e ne e le mohlala o ka sehloohong oa ho phela ka Molao oa Khauta.—Matheu 20:28; Johanne 15:13; Baheberu 4:15.
Batho ba Sebelisang Molao oa Khauta
Na ebe nakong ee eo re phelang ho eona ho sa na le batho ba hlileng ba sebelisang Molao oa Khauta bophelong ba bona? E, ’me ha ba etse seo feela ha ho le bonolo. Ka mohlala, nakong ea Ntoa ea II ea Lefatše Jeremane ea Bonazi, Lipaki tsa Jehova li ile tsa lula li e-na le tumelo ho Molimo li bile li e-na le lerato bakeng sa moahelani ’me tsa hana ho sekisetsa Molao oa Khauta. Nakong eo ’Muso o neng o matlafatsa letšolo la lehloeo le khethollo khahlanong le Bajuda bohle, Lipaki li ile tsa lula li latela Molao oa Khauta. Esita le likampong tsa mahloriso, li ile tsa tsoela pele li hlokomela batho ba bang, li arolelana lijo tsa tsona le Bajuda le bao e seng Bajuda ka ho tšoanang, ba neng ba bolaoa ke tlala, le hoja e ne e le lijo tse seng kae feela. Ho feta moo, le hoja ’Muso o ile oa li laela hore li nke libetsa le ho bolaea ba bang, li ile tsa hana ho etsa joalo, feela joalokaha li ne li sa batle ho bolaoa ke ba bang. Ke joang li neng li ka bolaea batho bao li neng li lokela ho ba rata joalokaha li ithata? Ka lebaka la ho hana ha tsona, tse ngata tsa tsona ha lia ka tsa romeloa likampong tsa mahloriso feela empa li ile tsa bolaoa.—Matheu 5:43-48.
Ha u ntse u bala sehlooho sena, u rua molemo mohlaleng o mong oa ho sebetsa ha Molao oa Khauta. Lipaki tsa Jehova kajeno lia hlokomela hore batho ba bangata ba utloa bohloko ka tsela e nyahamisang ho bile ho se letho leo ba ka le etsang. Ka lebaka lena, ka boithatelo Lipaki li nka mehato e nepahetseng ho thusa ba bang ho ithuta ka tšepo le tataiso e sebetsang e fumanoang ka Bibeleng. Sena kaofela ke karolo ea mosebetsi oa thuto o etsoang lefatšeng ka bophara o seng o etsoa ka tekanyo eo ho seng mohla o kileng oa etsoa ka eona. Phello e bile efe? Joalokaha ho profetiloe ho Esaia 2:2-4, “lichaba tse ngata,” ha e le hantle batho ba ka holimo ho limilione tse tšeletseng lefatšeng ho pota, li ‘rupetsoe ka litsela tsa Jehova ’me li tsamaea litseleng tsa hae.’ Ka puo ea tšoantšetso, li ithutile ‘ho tea lisabole tsa tsona hore e be mehoma le marumo a tsona hore e be likere tse faolang limela.’ Li fumane khotso le tšireletseho mehleng ena e likhathatso.
Ho Thoe’ng ka Uena?
Ak’u nahane ka motsotsoana ka bohloko bo otlang pelo le mahlomola a aparetseng moloko oa batho ka lebaka la ho hlokomoloha Molao oa Khauta ho tloha nakong ea phetohelo serapeng sa Edene, e neng e hlohlelelitsoe ke Satane Diabolose. Jehova o ikemiselitse ho etsolla lintho haufinyane. Joang? “Mora oa Molimo o ile a bonahatsoa ka morero ona, e leng, ho qhaqha mesebetsi ea Diabolose.” (1 Johanne 3:8) Sena se tla etsahala ka tlas’a puso ea ’Muso oa Molimo, o tla beng o le matsohong a Jesu Kreste ea tšoanelehang, ea rutileng le ea phetseng tumellanong le Molao oa Khauta.—Pesaleme ea 37:9-11; Daniele 2:44.
Morena Davida oa Iseraele ea boholo-holo o ile a re: “Nkile ka ba mohlankana, ke se ke tsofetse, leha ho le joalo ha ke e-s’o bone mang kapa mang ea lokileng a tloheloa ka ho feletseng, kapa bana ba hae ba batla bohobe. Letsatsi lohle o bontša mohau ’me oa alimana, kahoo bana ba hae ba mocheng oa tlhohonolofatso.” (Pesaleme ea 37:25, 26) Na ua lumela hore kajeno batho ba bangata baa nka le ho phamola ho e-na le ho ‘bontša mohau le ho alimana’? Ka ho hlakileng, ho latela Molao oa Khauta ho ka lebisa khotsong ea ’nete le tšireletsehong hobane ho nolofalletsa motho ho thabela litlhohonolofatso hona joale le nakong e tlang ka tlas’a ’Muso oa Molimo. ’Muso oa Molimo o tla felisa mesaletsa eohle ea boithati le bokhopo lefatšeng le ho nkela tsamaiso ea hona joale ea lintho e tletseng melao e bolileng ea batho sebaka ka tsamaiso e ncha e tla etsoa ke Molimo. Ka nako eo, batho bohle ba tla thabela ho phela ka Molao oa Khauta.—Pesaleme ea 29:11; 2 Petrose 3:13.
[Litšoantšo tse leqepheng la 4, 5]
Jesu ha aa ka a ruta Molao oa Khauta feela empa o ile a boela a beha mohlala o babatsehang ka ho fetisisa oa ho o phetha
[Litšoantšo tse leqepheng la 7]
Ho latela Molao oa Khauta ho ka lebisa khotsong ea ’nete le tšireletsehong