Etsisa Moetsi oa Barutuoa e Moholo
“Le ele hloko kamoo le mamelang kateng.”—LUKA 8:18.
1, 2. Ke hobane’ng ha u lokela ho ela hloko tsela eo Jesu a neng a sebelisana le batho ka eona tšebeletsong ea hae?
JESU KRESTE o ne a phetha mosebetsi oa hae oa ho ba Mosuoe le Moetsi oa Barutuoa e Moholo ha a ne a re ho balateli ba hae: “Le ele hloko kamoo le mamelang kateng.” (Luka 8:16-18) Joaloka Mokreste u lokela ho sebelisa molao-motheo oo. Haeba u ela hloko thupelo ea moea, u tla e sebelisa ebe u ba ’moleli oa ’Muso ea atlehang. Ho hlakile hore kajeno u ke ke ua utloa lentsoe la Jesu, empa u ka bala Mangolo ’me ua utloa seo a se buileng le seo a se entseng. A re’ng ka tsela eo Jesu a neng a sebelisana le batho ka eona tšebeletsong ea hae?
2 Jesu e ne e le ’moleli ea ipabolang oa litaba tse molemo le mosuoe ea ikhethang oa ’nete ea Mangolo. (Luka 8:1; Johanne 8:28) Mosebetsi oa ho etsa barutuoa o akarelletsa ho bolela le ho ruta, leha ho le joalo Bakreste ba bang ba khona ho bolela empa ha ba khone ho ruta batho ka katleho. Ho bolela ho tsamaisana le ho phatlalatsa molaetsa, empa hangata ho ruta batho ka Jehova le ka merero ea hae ho hloka hore mosuoe a hlaolele kamano le morutuoa. (Matheu 28:19, 20) Sena se ka etsoa ka ho etsisa Jesu Kreste, e leng Mosuoe le Moetsi oa Barutuoa e Moholo.—Johanne 13:13.
3. Ho etsisa Jesu ho ka ama mosebetsi oa hao oa ho etsa barutuoa joang?
3 Haeba u etsisa mekhoa eo Jesu a neng a ruta ka eona, u tla be u mamela keletso ena ea moapostola Pauluse: “Tsoelang pele le tsamaea ka bohlale mabapi le ba ka ntle, le ithekele nako e loketseng. Seo le se buang kamehla e ke e be se nang le mosa, se nōkiloeng ka letsoai, e le hore le tsebe kamoo le tšoanelang ho fana ka karabo ho e mong le e mong.” (Bakolose 4:5, 6) E le hore u etsise Jesu mosebetsing oa ho etsa barutuoa u lokela ho ikitlaetsa, empa ha u etsa joalo, u tla ruta ka tsela e atlehang hobane u tla khona “ho fana ka karabo ho e mong le e mong” ho latela seo a se hlokang.
Jesu o ne a Khothalletsa Batho Hore ba Ntše Maikutlo
4. Ke hobane’ng ha ho ka thoe Jesu o ne a mamela ka hloko?
4 Ho tloha ha Jesu a sa le monyenyane, o ne a tloaetse ho mamela batho le ho ba khothalletsa hore ba ntše maikutlo a bona. Ka mohlala, ha a ne a le lilemo li 12, batsoali ba hae ba ile ba mo fumana a le har’a mesuoe ka tempeleng, “a e mamela le ho e botsa” lipotso. (Luka 2:46) Jesu ha aa ka a ea tempeleng ho ea khantšetsa mesuoe tsebo ea hae. O ne a il’o mamela, empa a boela a botsa lipotso. Mohlomong taba ea hore o ne a mamela ka hloko e ile ea etsa hore a amohelehe ho Molimo le ho batho.—Luka 2:52.
5, 6. Re tseba joang hore Jesu o ne a mamela batho bao a ba rutang?
5 Ka mor’a hore Jesu a kolobetsoe ’me a tlotsetsoe ho ba Mesia, o ile a lula a thahasella ho mamela batho. Ha aa ka a ameha haholo ka seo a neng a se ruta hoo a neng a lebala batho ba neng ba tlil’o mo mamela. Hangata o ne a khefutsa, a ba botse hore na ba nahana joang, ebe o mamela likarabo tsa bona. (Matheu 16:13-15) Ka mohlala, ka mor’a lefu la Lazaro, e leng khaitseli ea Maretha, Jesu o ile a re ho Maretha: “E mong le e mong ea phelang ’me a bontša tumelo ho ’na ho hang a ke ke a shoa le ka mohla.” Eaba oa mo botsa o re: “Na u lumela see?” Ka sebele Jesu o ile a mamela ha Maretha a araba a re: “E, Morena; ke lumetse hore ke uena Kreste Mora oa Molimo.” (Johanne 11:26, 27) E tlameha ebe Jesu o ile a khotsofala hakaakang ha a utloa Maretha a bua mantsoe ao a bontšang hore o na le tumelo!
6 Ha barutuoa ba bangata ba lahla Jesu kherehloa, o ne a batla ho utloa maikutlo a baapostola ba hae. Kahoo o ile a botsa a re: “Le lōna ha le batle ho tsamaea, na ha ho joalo?” Simone Petrose a araba a re: “Morena, re tla tloha re ee ho mang? Ke uena ea nang le lipolelo tsa bophelo bo sa feleng; ’me re lumetse ’me rea tseba hore u Mohalaleli oa Molimo.” (Johanne 6:66-69) E tlameha ebe Jesu o ile a thaba hakaakang ha a utloa mantsoe ao! Ka sebele u tla thaba ha u utloa seithuti sa Bibele se bua mantsoe a joalo a bontšang hore se na le tumelo.
Jesu o ne a Mamela ka Tlhompho
7. Ke hobane’ng ha Basamaria ba bangata ba ile ba lumela ho Jesu?
7 Lebaka le leng leo ka lona Jesu a neng a atleha ho etsa barutuoa ke hore o ne a tsotella batho ’me a ba mamela ka tlhompho. Ka mohlala, Jesu o kile a pakela mosali oa Mosamaria haufi le seliba sa Jakobo se Sikare. Ha ba ntse ba buisana, e ne e se Jesu feela ea buang; o ile a mamela mosali eo. Ha Jesu a ntse a mo mametse, o ile a hlokomela hore o thahasella litaba tsa borapeli, eaba o mo bolella hore Molimo o batla ba neng ba tla Mo rapela ka moea le ka ’nete. Jesu o ile a bontša hore o hlompha mosali enoa ’me o amehile ka eena, eaba mosali enoa o bolella ba bang ka Jesu, ’me “Basamaria ba bangata ba tsoang motseng oo ba beha tumelo ho eena ka lebaka la lentsoe la mosali eo.”—Johanne 4:5-29, 39-42.
8. Hore ebe batho ba thabela ho ntša maikutlo a bona ho ka u thusa joang ha u qalisa moqoqo le bona tšebeletsong?
8 Hangata batho ba thabela ho ntša maikutlo a bona. Ka mohlala, baahi ba Athene ea boholo-holo ba ne ba thabela ho ntša maikutlo a bona le ho mamela maikutlo a mang a macha. Sena se ile sa fella ka hore moapostola Pauluse a fane ka puo e matla Areopago e motseng oo. (Liketso 17:18-34) Kajeno ha u le tšebeletsong ’me u qalisa moqoqo le mong’a ntlo, u ka ’na ua re, “Ke u etetse hobane ke thahasella ho utloa maikutlo a hao ka [taba e itseng].” Mamela maikutlo a mong’a ntlo, ’me u bontše hore na u ikutloa joang ka seo a se buileng, kapa u mo botse potso mabapi le seo. Ebe ka mosa u mo bontša hore na Bibele e re’ng tabeng eo.
Jesu o ne a Tseba ho Qalisa Moqoqo
9. Jesu o ile a etsa’ng pele ‘a bulela Cleopase le motsoalle oa hae Mangolo ka botlalo’?
9 Ho ne ho se mohla Jesu a qakehang hore na a re’ng. Ntle le hore o ne a mamela ka hloko, hangata o ne a lemoha seo batho ba se nahanang, ’me a tseba hantle seo a lokelang ho se bua. (Matheu 9:4; 12:22-30; Luka 9:46, 47) Ka mohlala: Nakoana ka mor’a tsoho ea Jesu, barutuoa ba hae ba babeli ba ne ba tsoa Jerusalema ba e-ea Emmause. Tlaleho ea Kosepele e re: “Ha ba ntse ba qoqa le ho buisana, Jesu a atamela ’me a qala ho tsamaea le bona; empa mahlo a bona a ne a thibiloe hore a se ke a mo hlokomela. A re ho bona: ‘Litaba tsee tseo le phehisanang ka tsona ha le ntse le tsamaea ke life?’ Eaba ba ema ka lifahleho tse hlomohileng. Ha e mong ea bitsoang Cleopase a araba a re ho eena: ‘Na u lula u le mojaki u le mong Jerusalema ’me kahoo ha u tsebe lintho tse etsahetseng teng matsatsing aa?’ Eaba o re ho bona: ‘Lintho life?’” Mosuoe e Moholo o ile a ba mamela ha ba ntse ba bolela hore Jesu Monazaretha o ne a ruta batho, a etsa mehlolo eaba oa bolaoa. Joale ba bang ba ne ba re o tsositsoe bafung. Jesu o ile a tlohela Cleopase le motsoalle oa hae hore ba ntše maikutlo a bona. Eaba o ba hlalosetsa seo ba neng ba lokela ho se tseba, ‘a ntse a ba bulela Mangolo ka botlalo.’—Luka 24:13-27, 32.
10. U ka etsa joang e le hore u tsebe seo motho eo u kopanang le eena ha u le tšebeletsong a se lumelang?
10 Mohlomong ha u tsebe letho ka seo mong’a ntlo a se lumelang. E le hore u tsebe seo a se lumelang, u ka ’na ua mo bolella hore u thabela ho utloa hore na batho ba ikutloa joang ka thapelo. Ebe ua mo botsa, “Na u nahana hore ho na le ea hlileng a mamelang lithapelo?” Karabo ea motho eo e ka ’na ea senola maikutlo a hae le hore na ke oa bolumeli bofe. Haeba a rata bolumeli, u ka ’na ua mo fata maikutlo ka ho mo botsa, “Na u nahana hore Molimo o mamela lithapelo tsohle, kapa na ebe ho na le lithapelo tseo a sa li mameleng?” Lipotso tse joalo li ka etsa hore le qoqe le phutholohile. Ha ho loketse, mo bontše seo Mangolo a se buang ka taba eo, ’me ho tla ba molemo hore u etse seo ka bohlale, u sa nyefole seo a se lumelang. Haeba a thabela puisano ea lōna, a ka ’na a rata hore u khutle. Empa u tla etsa’ng haeba a u botsa potso eo u sa khoneng ho e araba? U ka etsa lipatlisiso ’me u khutlele ho eena u itokiselitse ho fana ka ‘lebaka la tšepo ea hao, empa u etse joalo ka maikutlo a bonolo le tlhompho e tebileng.’—1 Petrose 3:15.
Jesu o ne a Ruta ba Tšoanelehang
11. U tla thusoa ke eng hore u fumane ba tšoanelehang bakeng sa ho rutoa?
11 Kaha Jesu o ne a phethahetse o ne a e-na le temoho e neng e mo thusa ho tseba ba tšoanelehang bakeng sa ho rutoa. Ho thata haholoanyane hore re lemohe ‘ba nang le tšekamelo e nepahetseng bakeng sa bophelo bo sa feleng.’ (Liketso 13:48) Ho ne ho le joalo le ka baapostola bao Jesu a ileng a re ho bona: “Ha le kena motseng kapa motsaneng ofe kapa ofe, le batle hore na ke mang ho oona ea tšoanelehang.” (Matheu 10:11) U lokela ho etsisa baapostola ba Jesu ka hore u batle batho ba ratang ho mamela le ho rutoa ’nete ea Mangolo. U ka fumana ba tšoanelehang ka hore u mamele batho bohle ka hloko, ’me u ele hloko tsela eo e mong le e mong a ikutloang ka eona.
12. Ke joang u ka tsoelang pele ho thusa motho ea thahasellang?
12 Ha u qeta ho tloha ho motho ea bontšitseng hore o thahasella molaetsa oa ’Muso, ho molemo hore u ’ne u nahane ka seo a se hlokang moeeng. Haeba ka mor’a ho buisana le motho ka litaba tse molemo u ngola seo u se hlokometseng, sena se tla u nolofalletsa hore u ’ne u mo thuse moeeng. Leetong la ho boela, u lokela ho mamela ka hloko e le hore u tsebe haholoanyane hore na motho eo u lumela eng, u ikutloa joang, kapa maemo a hae ke afe.
13. U ka thusoa ke eng hore u lemohe tsela eo motho a talimang Bibele ka eona?
13 U ka khothalletsa batho joang hore ba u hlalosetse tsela eo ba talimang Lentsoe la Molimo ka eona? Libakeng tse ling, ho molemo ho botsa potso ena, “Na u ’nile ua thatafalloa ke ho utloisisa Bibele?” Hangata karabo ea potso eo e bontša hore na motho o ikutloa joang ka lintho tsa moea. Tsela e ’ngoe e ka ba ho bala lengolo ebe u botsa potso ena, “U ikutloa joang ka taba ee?” Joaloka Jesu, u ka finyella ho hongata tšebeletsong ka ho sebelisa lipotso tse loketseng. Leha ho le joalo, ho hlokahala hore u be hlokolosi.
Jesu o ne a Atleha ho Sebelisa Lipotso
14. U ka bontša hore u thahasella maikutlo a batho joang u sa ba emelle ka lipotso?
14 Bontša hore u thahasella maikutlo a ba bang u sa ba hlabise lihlong. Etsisa Jesu. O ne a sa emelle motho ka lipotso tse bontšang ho se natse maikutlo a hae, empa o ne a botsa lipotso tse fatang maikutlo. Hape Jesu o ne a mamela motho ka mosa ’me a khatholla batho ba tšepahalang a bile a etsa hore ba phutholohe. (Matheu 11:28) Batho ba mefuta eohle ba ne ba ikutloa ba lokolohile hore ba ka mo bolella mathata a bona. (Mareka 1:40; 5:35, 36; 10:13, 17, 46, 47) E le hore batho ba ikutloe ba lokolohile ho u bolella maikutlo a bona ka Bibele le lithuto tsa eona, u lokela ho qoba ho ba emella ka lipotso.
15, 16. U ka kenyelletsa batho joang moqoqong oa litaba tsa bolumeli?
15 Ho phaella tabeng ea ho sebelisa lipotso ka katleho, u ka etsa hore moqoqo o tsoele pele ka ho bolela ntho e ’ngoe e thahasellisang ebe u mamela karabo. Ka mohlala, Jesu o ile a re ho Nikodemase: “Ntle le hore mang kapa mang a tsoaloe hape, a ke ke a bona ’muso oa Molimo.” (Johanne 3:3) Mantsoe ao a ne a thahasellisa hoo Nikodemase a ileng a susumelletseha ho araba Jesu le ho mo mamela. (Johanne 3:4-20) U ka ’na ua khona ho kenyelletsa batho moqoqong ka tsela e joalo.
16 Kajeno, taba eo batho ba e thahasellang ke ho thehoa ha likereke tse ncha libakeng tse joaloka Afrika, Europe Bochabela le Latin America. Libakeng tse joalo, hangata u ka qalisa moqoqo ka ho re: “Hoa ntšoenya hore ebe ho na le malumeli a mangata hakana. Empa ke na le tšepo ea hore haufinyane ke tla bona batho ba lichaba tsohle ba kopane bolumeling bo le bong. Na u ka rata ho bona seo se etsahala?” Ka ho bua ntho e ’ngoe e hlollang ka tšepo ea hao, u ka khona ho fata batho maikutlo. ’Me ho bonolo ho araba lipotso tse ka arajoang ka litsela tse peli tse fapaneng. (Matheu 17:25) Ka mor’a hore mong’a ntlo a arabe potso ea hao, e arabe ka lengolo le le leng kapa a mabeli. (Esaia 11:9; Sofonia 3:9) Ka ho mamelisisa le ho ela hloko karabo ea motho, u ka ’na ua fumana seo u ka buisanang le eena ka sona nakong e tlang.
Jesu o ne a Mamela Bana
17. Ke eng se bontšang hore Jesu o ne a thahasella bana?
17 Jesu o ne a sa thahaselle batho ba baholo feela empa o ne a thahasella le bana. O ne a tseba lipapali tsa bana le seo ba neng ba se bua. Ka linako tse ling, o ne a bitsa bana hore ba tle ho eena. (Luka 7:31, 32; 18:15-17) Har’a matšoele a neng a mametse Jesu, ho ne ho e-na le bana ba bangata. Ha bashanyana ba ne ba hooa ho rorisa Mesia, Jesu o ile a hlokomela sena ’me a bontša hore Mangolo a ne a ile a bolela sena esale pele. (Matheu 14:21; 15:38; 21:15, 16) Kajeno, ho na le bana ba bangata bao e-bang barutuoa ba Jesu. Kahoo, u ka ba thusa joang?
18, 19. U ka thusa ngoana oa hao joang moeeng?
18 U tlameha ho mamela ngoana oa hao e le hore u mo thuse moeeng. U lokela ho utloisisa tsela eo a nahanang ka eona eo ho ka etsahalang hore ebe ha e lumellane le monahano oa Jehova. Ho sa tsotellehe hore na ngoana oa hao o re’ng, ho molemo hore u qale ka ho mo babatsa. Ka mor’a moo u ka sebelisa mangolo a loketseng ho thusa ngoana oa hao hore a utloisise tsela eo Jehova a talimang lintho ka eona.
19 Ke habohlokoa ho botsa lipotso. Empa joalokaha batho ba baholo ba sa rate ho emelloa ka lipotso, bana le bona ba joalo. Ho e-na le ho imetsa ngoana oa hao ka hore a arabe lipotso tse ngata tse thata, ke hobane’ng ha u sa mo bolelle phihlelo ea hao ka bokhutšoanyane? Ho itšetlehile ka taba eo le buang ka eona, u ka ’na ua mo bolella hore u kile ua ikutloa ka tsela e itseng le hore na ke hobane’ng ha u ne u ikutloa joalo. Ebe ua mo botsa, “Na le uena u ikutloa ka tsela eo?” Karabo ea ngoana oa hao e ka fella ka hore le be le moqoqo o molemo le o khothatsang o thehiloeng Mangolong.
U ’ne U Etsise Moetsi oa Barutuoa e Moholo
20, 21. Ke hobane’ng ha u lokela ho mamela ka hloko ha u le mosebetsing oa ho etsa barutuoa?
20 Ebang u tšohla taba e itseng le ngoana oa hao kapa motho leha e le ofe, ke habohlokoa hore u mamele ka hloko. Ka sebele u tla be u bontša hore ua mo rata. Ho mamela motho ha a bua ho bontša hore u ikokobelitse, ’me ua mo hlompha le hore ka lerato o amehile ka eena. Ha e le hantle, ho mamela motho ho bolela hore u ele hloko seo a se buang.
21 Ha u le tšebeletsong ea Bokreste, tsoela pele ho mamela ka hloko ha beng ba matlo ba bua. Ka ho mamelisisa, u ka ’na ua lemoha lintlha tsa ’nete ea Bibele tseo ba ka li thahasellang ka ho khetheha. Ebe u leka ho ba thusa ka ho sebelisa mekhoa e sa tšoaneng eo Jesu a neng a ruta ka eona. Ha u etsa joalo, u tla putsoa ka thabo le khotsofalo hobane u tla be u etsisa Moetsi oa Barutuoa e Moholo.
U ka Araba Joang?
• Jesu o ne a khothalletsa batho joang hore ba ntše maikutlo?
• Ke hobane’ng ha Jesu a ne a mamela batho bao a neng a ba ruta?
• U ka sebelisa lipotso joang ha u le tšebeletsong?
• U ka thusa bana joang moeeng?
[Setšoantšo se leqepheng la 28]
Etsa bonnete ba hore ua mamela ha u le mosebetsing oa ho bolela
[Setšoantšo se leqepheng la 28]
Re etsisa Jesu ha re thusa bana moeeng