Le ka Mohla U se ke Ua Phetsa ho Bontša Kananelo

‘Menahano ea hao ke ea bohlokoa hakaakang! Molimo, kakaretso e feletseng ea eona e kaakang!’—PESALEME EA 139:17.

1, 2. Ke hobane’ng ha re lokela ho ananela Lentsoe la Molimo, ’me mopesaleme o ile a bolela kananelo ea hae joang?

HO NE ho fumanoe ntho e hlollang. Ha ho ntse ho lokisoa tempele ea Jehova Jerusalema, Moprista ea Phahameng Hilkia o ile a fumana “buka ea molao oa Jehova e fanoeng ka letsoho la Moshe,” ’me ha ho pelaelo hore e ne e le ea pele eo Moshe a neng a ile a qeta ho e ngola lilemong tse ka bang 800 pele ho moo! Na mahlo a hao a kelello a bona kamoo Morena Josiase ea tšabang Molimo a ileng a ikutloa kateng ha buka eo e behoa ka pel’a hae? Ha ho pelaelo hore o ile a e nka e le ea bohlokoa, ’me ka potlako feela a laela mongoli Shafane hore a e bale ka lentsoe le phahameng.—2 Likronike 34:14-18.

² Kajeno, batho ba likete tsa limilione ba ka bala Lentsoe la Molimo le feletse kapa le sa fella. Empa na seo se etsa hore Mangolo e se ke ea e-ba a bohlokoa haholo? Che! ’Nete ke hore a na le menahano ea Ea Matla ’Ohle, e ngotsoeng molemong oa rōna. (2 Timothea 3:16) Mopesaleme Davida o ile a bolela maikutlo a hae ka Lentsoe la Molimo ha a ne a ngola a re: “Menahano ea hao ke ea bohlokoa hakaakang ho ’na! Molimo, kakaretso e feletseng ea eona e kaakang!”—Pesaleme ea 139:17.

 3. Ke eng e bontšang hore Davida o ne a utloisisa ka botebo kamano ea hae le Molimo?

³ Ha ho mohla Davida a ileng a felloa ke kananelo bakeng sa Jehova, Lentsoe la hae le tokisetso ea hae ea borapeli ba ’nete. Lipesaleme tse ngata tse monate tseo Davida a ileng a li qapa li ile tsa hlalosa kamoo a neng a ikutloa kateng. Ka mohlala, ho Pesaleme ea 27:4, o ile a ngola a re: “Ke kōpile ntho e le ’ngoe ho Jehova—ke seo ke tla se batla, hore ke lule ka tlung ea Jehova ka matsatsi ’ohle a bophelo ba ka, ho bona thabo ea Jehova le ho talima tempele ea hae ka kananelo.” Ho ea ka Seheberu seo Bibele e ngotsoeng ka sona pele, poleloana e reng ho ‘talima ka kananelo’ e bolela ho thuisa, ho hlahlobisisa, ho bona ka nyakallo, thabo le tlhompho. Ho hlakile hore Davida o ne a hlile a utloisisa kamano ea hae le Molimo ’me ka sebele a ananela litokisetso tsa moea tseo Jehova a neng a li entse hore a matlafatse tumelo ea hae, a bile a thabela ’nete e ’ngoe le e ’ngoe ea moea eo Molimo a neng a e senola. Mohlala oa hae oa kananelo o tšoanela ho etsisoa.—Pesaleme ea 19:7-11.

Ananela Tokelo ea ho Tseba ’Nete ea Bibele

 4. Ke eng e ileng ea etsa hore Jesu a ‘nyakalle ka moea o halalelang’?

⁴ Ho utloisisa ka botebo Lentsoe la Molimo ha hoa itšetleha ka bohlale ba kelello kapa ka thuto ea lefatše, bo batlang bo khothalletsa boikhohomoso. Ho e-na le hoo, ho itšetlehile ka mosa o sa tšoanelang oa Jehova oo a o abelang batho ba ikokobelitseng le ba tšepahalang ba elang hloko tlhoko ea bona ea moea. (Matheu 5:3; 1 Johanne 5:20) Ha Jesu a ne a nahana ka ntlha ea hore ho na le batho ba sa phethahalang bao mabitso a bona a ngotsoeng leholimong, o ile “a nyakalla ka moea o halalelang ’me a re: ‘Ke u rorisa phatlalatsa, Ntate, Morena oa leholimo le lefatše, hobane ka hloko u patetse ba bohlale le ba nang le kelello lintho tsena, ’me u li senoletse bana.’”—Luka 10:17-21.

 5. Ke hobane’ng ha barutuoa ba Jesu ba ne ba sa lokela ho eisa linnete tsa ’Muso tseo ba li senoleloang?

⁵ Ha Jesu a qeta ho etsa thapelo eo e tlohang pelong, o ile a retelehela ho barutuoa ba hae eaba o re: “Ho thaba mahlo a bonang lintho tseo le li bonang. Etsoe ke re ho lōna, baprofeta ba bangata le marena a mangata ba ile ba lakatsa ho bona lintho tseo le li bonang empa ha baa ka ba li bona, le ho utloa lintho tseo le li utloang empa ha baa ka ba li utloa.” Ka sebele Jesu o ile a khothaletsa balateli ba tšepahalang ba hae hore ba se ke ba eisa linnete tsa ’Muso tseo ba ntseng ba li senoleloa. Linnete tsena li ne li sa ka tsa senoleloa meloko ea pele ea bahlanka ba Molimo, ’me ka sebele li ne li sa senoleloa “ba bohlale le ba nang le kelello” ba mehleng ea Jesu!—Luka 10:23, 24.

6, 7. (a) Re na le mabaka afe a ho ananela ’nete ea Molimo? (b) Ho bonahala phapang efe pakeng tsa bolumeli ba ’nete le ba bohata kajeno?

⁶ Kaha mehleng ena ea rōna Jehova o sebelisa “lekhoba le tšepahalang le le masene” hore a fe batho ba hae temohisiso e khōlō ea Lentsoe la hae, re na le mabaka a eketsehileng a ho ananela ’nete e halalelang. (Matheu 24:45; Daniele 12:10) Mabapi le nako ea bofelo, moprofeta Daniele o ile a ngola a re: “Ba bangata ba tla phenya, ’me tsebo ea ’nete e tla ba ngata.” (Daniele 12:4) Na ha u lumele hore kajeno tsebo ea Molimo ‘e ngata’ le hore bahlanka ba Jehova ba feptjoa hantle haholo moeeng?

⁷ Re bona phapang e kaakang pakeng tsa tsebo e ngata eo batho ba Molimo ba nang le eona le pherekano ea bolumeli eo Babylona e Moholo e nang le eona! Ka lebaka leo, batho ba bangata ba ferekaneng kapa ba khopisoang ke bolumeli ba bohata ba sokolohela borapeling ba ’nete. Ke batho ba kang linku ba sa ‘batleng ho kopanela le [Babylona e Moholo] libeng tsa hae,’ ba sa batleng le ho “amohela karolo ea likotlo tsa hae.” Jehova le bahlanka ba hae ba mema batho bao bohle hore ba tle phuthehong ea ’nete ea Bokreste.—Tšenolo 18:2-4; 22:17.

Batho ba Nang le Kananelo ba Phallela ho Molimo

8, 9. Mantsoe a Hagai 2:7 a phethahatsoa joang kajeno?

⁸ Jehova o ile a bolela esale pele mabapi le ntlo ea hae ea moea ea borapeli, a re: “Ke tla sisinya lichaba tsohle, ’me lintho tse lakatsehang tsa lichaba tsohle li tla kena; ’me ke tla tlatsa ntlo ena ka khanya.” (Hagai 2:7) Boprofeta bona bo hlollang bo ile ba phethahala mehleng ea Hagai ha masala a tsosolositsoeng a batho ba Molimo a ne a tsosa tempele ea Jerusalema. Kajeno, mantsoe a Hagai a phethahala hape mabapi le tempele ea Jehova e khōlō ea moea.

⁹ Batho ba limilione ba se ba khobokane tempeleng ena ea tšoantšetso e le hore ba rapele Molimo “ka moea le ka ’nete,” ’me selemo le selemo batho ba makholo a likete bao e leng “lintho tse lakatsehang tsa lichaba tsohle” ba ntse ba kena ka bongata. (Johanne 4:23, 24) Ka mohlala, tlaleho ea lefatše lohle ea selemo sa tšebeletso sa 2006 e bontša hore batho ba 248 327 ba ile ba kolobetsoa ho bontša hore ba inehetse ho Jehova. Palo ena e bontša hore ka karolelano ho ne ho kolobetsoa batho ba bacha ba 680 ka letsatsi! Ho rata ha bona ’nete le takatso ea bona ea ho sebeletsa Jehova e le baboleli ba ’Muso ke bopaki bo hlakileng ba hore ruri ba hutsoe ke Molimo.—Johanne 6:44, 65.

10, 11. Pheta phihlelo e bontšang kamoo batho ba bang ba ananetseng ’nete ea Bibele kateng.

¹⁰ Boholo ba batho bana ba tšepahalang bo ile ba khahloa ke ’nete ka lebaka la ho bona “phapang pakeng tsa ea lokileng le ea khopo, pakeng tsa ea sebeletsang Molimo le ea sa kang a mo sebeletsa.” (Malakia 3:18) Nahana ka phihlelo ea Wayne le Virginia, banyalani ba neng ba kena kereke ea Prostanta ’me ba e-na le lipotso tse ngata empa ba sa fumane likarabo tse khotsofatsang. Ba ne ba hloile ntoa ’me ba ne ba ferekana ba bile ba tšoenyehile ha ba bona baruti ba hlohonolofatsa masole le libetsa. Ha ba se ba hōlile, ba ile ba bona hore batho ba kereke eo ba neng ba e kena ba ba hlokomolohile, le hoja Virginia a ne a ile a ruta Sekolong sa Sontaha ka lilemo tse ngata. Ba ile ba re: “Ho ne ho se motho ea re etelang kapa ea bontšang hore oa re tsotella moeeng. Kereke e ne e ipatlela chelete ea rōna feela. Re ne re ferekane.” Ba ile ba ferekana le ho feta ha kereke eo ba neng ba e kena e lumella bosodoma.

¹¹ Khabareng, setloholo sa ngoanana sa Wayne le Virginia e ile ea e-ba Paki ea Jehova, ’me morali oa bona le eena o ile a latela hamorao. Le hoja sena se ile sa khopisa Wayne le Virginia qalong, hamorao ba ile ba fetola maikutlo eaba ba lumela ho ithuta Bibele. Wayne o re: “Ka likhoeli tse tharo feela re ile ra ithuta lintho tse ngata ka Bibeleng ho feta tseo re neng re ithutile tsona lilemong tse fetileng tse 70! Re ne re qala ho utloa hore lebitso la Molimo ke Jehova, ’me re ne re sa tsebe letho ka ’Muso [oa Molimo] le ka lefatše la Paradeise.” Kapele feela, banyalani bana ba tšepahalang ba ile ba qala ho ba teng libokeng tsa Bokreste le ho kopanela tšebeletsong. Virginia o re: “Re batla ho bolella motho e mong le e mong ’nete.” Bobeli ba lilemong tsa bo-80, ’me ba ile ba kolobetsoa ka 2005. Ba re: “Re fumane Bakreste ba ’nete bao re phutholohang har’a bona.”

Ananela ho ‘Hlomelloa Mosebetsi o Mong le o Mong o Molemo’

12. Jehova o fa bahlanka ba hae eng kamehla, ’me re lokela ho etsa’ng e le hore re rue molemo?

¹² Kamehla Jehova o thusa bahlanka ba hae hore ba etse thato ea hae. Ka mohlala, Noe o ile a nehoa litaelo tse hlakileng le tse qaqileng tsa hore na a hahe areka joang, ’me mosebetsi ona o ne o lokela hore o nepahale li sa tloha feela! ’Me o ile oa nepahala. Hobane’ng? Hobane Noe o ile a “etsa ho ea ka sohle seo Molimo a mo laetseng sona. A fela a etsa joalo.” (Genese 6:14-22) Le kajeno, Jehova o hlomella bahlanka ba hae ka ho feletseng hore ba etse thato ea hae. Ha e le hantle, mosebetsi oa rōna o moholo ke ho bolela litaba tse molemo tsa ’Muso oa Molimo o hlomamisitsoeng le ho thusa batho ba tšoanelehang hore e be barutuoa ba Jesu Kreste. ’Me joaloka Noe, re tla atleha ha re mamela. Ka boikokobetso re lokela ho latela litaelo tseo Jehova a fanang ka tsona ka Lentsoe la hae le ka mokhatlo o hlophisitsoeng oa hae.—Matheu 24:14; 28:19, 20.

13. Jehova o re koetlisa ka tsela efe?

¹³ E le hore re phethe mosebetsi ona, re lokela ho ithuta ho ‘tšoara ka nepo’ sesebelisoa sa rōna se seholo—e leng Lentsoe la Molimo—le “molemo bakeng sa ho ruta, bakeng sa ho khalemela, bakeng sa ho otlolla lintho, bakeng sa ho laea ka ho loka, e le hore motho oa Molimo a ka tšoaneleha ka botlalo, a hlomelloa ka ho feletseng bakeng sa mosebetsi o mong le o mong o molemo.” (2 Timothea 2:15; 3:16, 17) Joaloka lekholong la pele la lilemo, Jehova o re fa thuto ea bohlokoa ka phutheho ea Bokreste. Kajeno, liphuthehong tse 99 770 lefatšeng lohle, ho tšoaroa Sekolo sa Tšebeletso sa Puso ea Molimo le Seboka sa Tšebeletso beke le beke ho re thusa tšebeletsong. Na u bontša hore u ananela liboka tsee tsa bohlokoa ka ho ba teng kamehla le ka ho sebelisa lintho tseo u ithutang tsona?—Baheberu 10:24, 25.

14. Bahlanka ba Jehova ba bontša joang hore ba ananela tlotla ea ho sebeletsa Molimo? (Akarelletsa litlhaloso tsa chate e leqepheng la 27-30.)

¹⁴ Batho ba Molimo ba baloang ka limilione lefatšeng lohle, ba ikitlaetsa tšebeletsong e le ho bontša hore ba ananela thuto eo ba e fuoang. Ka mohlala, selemong sa tšebeletso sa 2006, bahoeletsi ba ’Muso ba 6 741 444 ba sebelitse lihora tse 1 333 966 199 likarolong tsohle tsa mosebetsi, ’me sena se ne se akarelletsa ho khanna lithuto tsa mahae tsa Bibele tse 6 286 618. Tsena ke tse ling feela tsa lintlha tse seng kae tse khothatsang tse thathamisitsoeng tlalehong ea lefatše lohle. Re kōpa hore u ke u hlahlobisise tlaleho ena ’me e tla u khothatsa, feela joalokaha ho hlakile hore barab’abo rōna ba lekholong la pele la lilemo ba ile ba khothatsoa haholo ke litlaleho tsa ho hōla ha mosebetsi oa ho bolela mehleng ea bona.—Liketso 1:15; 2:5-11, 41, 47; 4:4; 6:7.

15. Ke hobane’ng ha motho a sa lokela ho nyahama ha a sebeletsa Jehova ka moea oohle?

¹⁵ Mohoo o moholo oa thoriso e eang ho Molimo selemo le selemo o bontša kananelo e tebileng eo bahlanka ba Jehova ba nang le eona bakeng sa tokelo ea ho tseba Jehova le ea ho ba lipaki tsa hae. (Esaia 43:10) Ke ’nete hore sehlabelo sa thoriso seo ba bang ba barab’abo rōna ba hōlileng, ba kulang, kapa ba bokooa ba se etsang se ka tšoantšoa le cheletana ea mohlolohali. Empa a re se keng ra lebala hore Jehova le Mora oa hae ba ananela kannete bohle ba sebeletsang Molimo ka moea oohle, ha ba ntse ba etsa sohle seo ba ka se khonang.—Luka 21:1-4; Bagalata 6:4.

16. Molimo o re lokiselitse lisebelisoa life tsa ho ruta lilemong tsa morao tjee?

¹⁶ Jehova ha a re koetlisetse tšebeletso feela, empa ka mokhatlo oa hae o hlophisitsoeng, o boetse o re hlomella ka lisebelisoa tse babatsehang tsa ho ruta. Lilemong tse seng kae tse fetileng, ho akarellelitsoe buka ea ’Nete e Isang Bophelong bo sa Feleng, U ka Phela ka ho sa Feleng Paradeiseng Lefatšeng, Tsebo e Isang Bophelong bo sa Feleng ’me, hona joale re na le buka ea Ha e le Hantle ke Eng Seo Bibele e se Rutang? Ba ananelang litokisetso tsena e le kannete ba li sebelisa hamolemo tšebeletsong.

Sebelisa Hamolemo Buka Ea Seo Bibele e se Rutang

17, 18. (a) Ke likarolo life tsa buka ea Seo Bibele e se Rutang tseo u ratang ho li buella tšimong? (b) Molebeli e mong oa potoloho o ile a hlokomela eng ka buka ea Seo Bibele e se Rutang?

¹⁷ Buka ena e nang le likhaolo tse 19, le e nang le sehlomathiso se qaqisang taba e ngotsoeng ka mokhoa o bonolo ea Ha e le Hantle ke Eng Seo Bibele e se Rutang?, e bonahala e le mpho ea bohlokoa tšebeletsong. Ka mohlala, khaolo ea 12 e tšohla taba e reng “Ho Phela ka Tsela e Khahlisang Molimo.” Khaolo ena e hlalosetsa seithuti hore na e ka ba motsoalle oa Molimo joang, e leng seo ho seng mohla batho ba bangata ba kileng ba nahana ka sona kapa ba nka hore se ka khoneha. (Jakobo 2:23) Batho ba re’ng ka buka ee e rutang Bibele?

¹⁸ Molebeli e mong oa potoloho oa Australia o tlaleha hore buka ea Seo Bibele e se Rutang e “khahlisa hoo e hulelang beng ba matlo moqoqong kapele.” O boetse o bolela hore buka ena e bonolo hoo ‘bahoeletsi ba bangata ba ’Muso ba tsohileng molota ba bileng ba thabelang tšebeletso. Hase feela ba bang ba reng buka ena ke Letlotlo le Joaloka Khauta!”

19-21. Pheta liphihlelo tse ling tse hlakisang bohlokoa ba buka ea Seo Bibele e se Rutang.

¹⁹ Mosali e mong oa Guyana o ile a re ho pula-maliboho ea neng a mo etetse, “E tlameha ebe u rometsoe ke Molimo.” Mohlankana oa mosali eo o ne a sa tsoa mo siea le bana ba bona ba babeli ba banyenyane. Pula-maliboho enoa o ile a phetla buka ea Seo Bibele e se Rutang khaolong ea 1 eaba o mo balla serapa sa 11, sehlohoaneng se reng “Molimo o Ikutloa Joang ka ho Hloka Toka Hoo re Tobanang le Hona?” Pula-maliboho eo o re: “Lintlha tseo li ile tsa mo ama maikutlo. Ha e le hantle, o ile a tlameha ho ema, a ee ka morao ho lebenkele la hae, a e’o lla haholo.” Mosali enoa o ile a lumela ho ithuta Bibele kamehla le morali’abo rōna oa moo ’me o ntse a hatela pele.

²⁰ José o lula Spain, ’me o ile a shoeloa ke mosali kotsing ea koloi. O ile a itšelisa ka lithethefatsi, a ba a batla thuso ho litsebi tsa kelello. Leha ho le joalo, litsebi tsa kelello li ne li sitoa ho arabela potso ena e neng e tšoenya José haholo: “Ke hobane’ng ha Molimo a ile a tlohella mosali oa ka hore a shoe?” Ka letsatsi le leng José o ile a kopana le Francesc, ea neng a sebetsa femeng e le ’ngoe le eena. Francesc o ile a mo khothaletsa hore ba bale hammoho khaolo ea 11 ea buka ea Seo Bibele e se Rutang, e reng “Ke Hobane’ng ha Molimo a Lumeletse Bohloko?” José o ile a thabisoa haholo ke tlhaloso ea Mangolo le papiso ea mosuoe le seithuti. O ile a qala ho ithuta ka tieo, a ea kopanong ea potoloho, ’me hona joale o ba teng libokeng Holong ea ’Muso ea moo.

²¹ Roman ke rakhoebo ea nang le lilemo tse 40 oa Poland, ’me haesale a hlompha Lentsoe la Molimo. Empa kaha o ne a kene ka hlooho mosebetsing oa hae, ha aa ka a hatela pele hakaalo thutong ea hae ea Bibele. Leha ho le joalo, o ile a ba teng kopanong ea setereke ’me a fumana buka ea Seo Bibele e se Rutang. Ka mor’a moo, o ile a hatela pele haholo. O re: “Buka ena e etsa hore lithuto tsohle tsa motheo tsa Bibele li bue taba e le ’ngoe e hlakileng.” Hona joale Roman o ithuta Bibele kamehla ’me o hatela pele hantle.

Kananelo ea Hao e ’Ne e Hōle

22, 23. Re ka tsoela pele joang ho bontša kananelo ea rōna bakeng sa tšepo e behiloeng ka pel’a rōna?

²² Joalokaha ho hlalositsoe Likopanong Tsa Setereke tse hlasimollang tsa “Topollo e Atametse!”, Bakreste ba ’nete ba labalabela “topollo e sa feleng” eo Molimo a re tšepisitseng eona, eo re tla e fumana ka lebaka la mali a tšolotsoeng a Jesu Kreste. Tsela e molemo ka ho fetisisa ea ho bontša hore re ananela ka botebo tšepo ena ea bohlokoa ke hore re tsoele pele ho hloekisoa “mesebetsing e shoeleng e le hore re ka etsetsa Molimo ea phelang tšebeletso e halalelang.”—Baheberu 9:12, 14.

²³ Ka sebele, ke mohlolo hore ebe baboleli ba ’Muso ba fetang limilione tse tšeletseng ba tiisetsa ka botšepehi tšebeletsong ea Molimo nakong ena eo batho ba ichebang bobona ka ho feletseng. Hape ke bopaki ba hore bahlanka ba Jehova ba ananela ka botebo tlotla ea ho sebeletsa Molimo, ba tseba hore “mosebetsi oa [bona] hase oa lefeela mabapi le Morena.” E se eka le ka mohla u ke ke ua phetsa ho bontša kananelo!—1 Bakorinthe 15:58; Pesaleme ea 110:3.

U ka Araba Joang?

• Mopesaleme o re ruta eng mabapi le ho ananela Molimo le litokisetso tsa hae tsa moea?

• Mantsoe a Hagai 2:7 a phethahatsoa joang kajeno?

• Jehova o hlomeletse bahlanka ba hae joang hore ba mo sebeletse ka katleho?

• U ka etsa’ng ho bontša hore u ananela molemo oa Jehova?

[Chate e leqepheng la 27-30]

ILALEHO EA SELEMO SA TŠEBELETSO SA 2005 EA LIPAKI TSA JEHOVA LEFATŠENG LOHLE

(Sheba boitsebiso bo hlophisitsoeng hantle khatisong)

[Litšoantšo tse leqepheng la 25]

Jehova o re hlomella ka ho feletseng hore re etse thato ea hae