Mosamaria o Ipaka e le Moahelani oa ’Makhonthe

Ha Jesu a ntse a le haufi le Jerusalema, Bajuda ba ’maloa ba tla ho eena. Ba bang ba tletse ho tla ithuta, ha ba bang bona ba batla ho mo leka. E mong oa bona, ea tsebang Molao haholo o botsa Jesu, o re: “Mosuoe, ke ka ho etsa’ng ke tlang ho rua bophelo bo sa feleng?”​—Luka 10:25.

Jesu oa hlokomela hore maholi a patile maeba. E ka ’na eaba o batla hore Jesu a arabe ka tsela e tla halefisa Bajuda. Jesu oa elelloa hore monna eo o se a ntse a e-na le maikutlo a hae tabeng eo. Kahoo, o mo araba ka tsela e etsang hore monna eo a phunye seso se tsoe bolalu.

Jesu oa mo botsa o re: “Ho ngoliloe’ng Molaong? U bala joang?” Kaha monna eo o tseba Molao oa Molimo hantle, karabo ea hae e itšetleha Mangolong. O qotsa Deuteronoma 6:5 le Levitike 19:​18, o re: “ ‘U rate Jehova Molimo oa hao ka pelo ea hao eohle le ka moea oa hao oohle le ka matla a hao ’ohle le ka kelello ea hao eohle,’ hape, ‘u rate moahelani oa hao joalokaha u ithata.’ ” (Luka 10:​26, 27) Na karabo ee e nepahetse?

Jesu o re ho eena: “U arabile ka nepo, u ’ne u etse sena ’me u tla fumana bophelo.” Na monna eo o khotsofalletse karabo ee? Ha ho joalo, kaha o batla “ho ipaka a lokile.” O batla hore Jesu a mo tiisetse hore maikutlo a hae a nepahetse le hore o na le mabaka a utloahalang a ho tšoara batho ka tsela eo a ba tšoarang ka eona. Kahoo, o re: “Ha e le hantle moahelani oa ka ke mang?” (Luka 10:​28, 29) Potso ena e ka ’na ea bonahala eka ha e re letho empa e tebile. Joang?

Bajuda ba lumela hore lentsoe “moahelani” le sebetsa feela ho batho ba latelang meetlo ea Sejuda, ’me ho ka ’na ha bonahala eka Levitike 19:​18 e tšehetsa taba eo. Ha e le hantle, Mojuda a ka ’na a re ‘ha ho lumelloe ke molao’ hore a tloaelane le motho eo e seng Mojuda. (Liketso 10:​28) Kahoo, monna enoa, mohlomong le balateli ba bang ba Jesu ba inka ba lokile haeba ba tšoara Bajuda ba bang ka mosa. Leha ho le joalo, e ka ’na eaba ba tšoara bao e seng Bajuda hampe, kaha ba nka hore ha se ‘baahelani’ ba bona.

Jesu a ka lokisa maikutlo aa a fosahetseng joang a sa khopise monna eo le Bajuda ba bang? O etsa joalo ka hore a phete pale e reng: “Motho ea itseng o ne a theoha Jerusalema a ea Jeriko eaba o oela har’a masholu, a ileng a mo nkela tsohle ’me a mo otla, eaba aa tloha, a mo siea a le makhatheng a ho shoa. Joale, ha etsahala hore ebe moprista ea itseng o ne a theoha ka tsela eo, empa, ha a mo bona, a tsamaela ka lehlakoreng le leng. Ka ho tšoanang, Molevi le eena, ha a fihla sebakeng seo ’me a mo bona, a tsamaela ka lehlakoreng le leng le shebaneng le leo. Empa Mosamaria ea itseng ea neng a tsamaea ka tsela eo a fihla ho eena ’me, ha a mo bona, a susumetsoa ke khauho.”​—Luka 10:​30-33.

Monna enoa ea mametseng pale ena ea Jesu o tseba hantle hore baprista ba bangata le Balevi ba hlokomelang tempele ba lula Jeriko. Ha ba khutla tempeleng ba lokela ho tsamaea leeto la lik’hilomithara tse ka bang 23. Ka linako tse ling, tsela ena eo ba tsamaeang ka eona e kotsi, kaha e na le linokoane tse lallang batho. Na ha se ntho e utloahalang hore ha moprista le Molevi ba kopana le Mojuda ea mathateng ba mo thuse? Paleng ena ea Jesu, ha baa ka ba mo thusa. O ile a thusoa ke monna oa Mosamaria, e leng motho ea tsoang sechabeng seo Bajuda ba se nyatsang.​—Johanne 8:48.

Mosamaria eo o ile a thusa Mojuda ea lemetseng joang? Ha Jesu a tsoela pele o re: “A mo atamela ’me a tlamisa maqeba a hae, a a tšela ka oli le veine. Joale a mo palamisa phoofolo ea hae ’me a mo tlisa ntlong ea baeti ’me a mo hlokomela. Letsatsing le hlahlamang a ntša lidenari tse peli, a li fa mohlokomeli oa ntlo eo ea baeti, eaba o re, ‘Mo hlokomele, ’me eng kapa eng eo u e sebelisang ntle ho sena, ke tla u buseletsa eona ha ke khutlela mona.’ ”​—Luka 10:​34, 35.

Ka mor’a ho pheta pale ena, Jesu Mosuoe ea Hloahloa o botsa monna ea neng a mo qholotsa o re: “Ke mang ho ba bararo baa eo ho uena a bonahalang eka o ikentse moahelani oa monna eo ea ileng a oela har’a masholu?” Mohlomong o soabela ho araba ka ho re “Mosamaria,” kahoo o araba ka ho re: “Ea ileng a mo etsa ka mohau.” Ka mor’a moo, Jesu oa hlakisa hore na thuto ea bohlokoa ke efe paleng ena eo a qetang ho e pheta ka ho re: “Tsamaea ’me u ’ne u etse ho tšoanang.”​—Luka 10:​36, 37.

Jesu o behile litaba tsa hae ka boqhetseke bo tšabehang! Hoja ebe Jesu o ile a bolella monna eo feela hore batho bao eseng Bajuda le bona ke baahelani ba hae, na monna eo le Bajuda ba bang ba mametseng ba ka be ba lumetse? Le hanyenyane! Ka ho pheta pale ena e bonolo, a bua ka lintho tseo bohle ba li tsebang, karabo ea potso e reng, “Ha e le hantle moahelani oa ka ke mang?” e ile ea hlaka le ho feta. Motho ea ipakang e le moahelani oa ’makhonthe ke ea bontšang lerato le ea mosa, joalokaha Mangolo a re laela.