-
’Muso oa Molimo ke Eng?U ka Thaba ka ho sa Feleng!—Lenaneo la ho Ithuta Bibele
-
-
KHAOLO EA 31
’Muso oa Molimo ke Eng?
Molaetsa o ka sehloohong oo Bibele e buang ka oona ke ’Muso oa Molimo. Jehova o tla sebelisa ’Muso oo ho etsa hore lefatše e be Paradeise joalokaha a ne a rerile ho tloha qalong. ’Muso oa Molimo ke eng? Re tseba joang hore oa busa hona joale? O se o entse lintho life? Hona o tla etsa lintho life nakong e tlang? Khaolo ena le tse peli tse latelang li tla araba lipotso tsena.
1. ’Muso oa Molimo ke eng, hona Morena oa oona ke mang?
’Muso oa Molimo ke puso e thehiloeng ke Jehova Molimo. Morena oa oona e leng Jesu Kreste o busa a le leholimong. (Matheu 4:17; Johanne 18:36) Ha Bibele e bua ka Jesu e re: “O tla busa e le morena . . . ka ho sa feleng.” (Luka 1:32, 33) Kaha Jesu ke Morena oa ’Muso oa Molimo, o tla busa batho bohle ba lefatšeng.
2. Jesu o busa le bo-mang?
Jesu ha a buse a le mong. Batho ba tsoang “molokong o mong le o mong le lelemeng le leng le le leng le bathong ba bang le ba bang le sechabeng se seng le se seng . . . ba tla busa e le marena holim’a lefatše.” (Tšenolo 5:9, 10) Ke batho ba bakae ba tla busa le Kreste? Ho tloha ha Jesu a ne a le lefatšeng, Bakreste ba limilione e ile ea e-ba balateli ba hae. Empa ke ba 144 000 feela ba tla ea leholimong ho ea busa le Jesu. (Bala Tšenolo 14:1-4.) Bakreste ba bang bohle ba lefatšeng, ba tla ba tlas’a ’Muso oo.—Pesaleme ea 37:29.
3. Ke joang ’Muso oa Molimo o leng molemo ho feta mebuso ea batho?
Le hoja babusi ba bang ba batla ho etsetsa batho lintho tse molemo, ha ba na matla a ho etsa lintho tsohle tseo ba li batlang. Ha nako e ntse e e-ea ba hlahlangoa ke ba bang ba ka ’nang ba se ke ba nahanela litlhoko tsa batho. Empa Jesu Morena oa ’Muso oa Molimo o tla lula a busa. Molimo o ‘emisitse ’muso o ke keng oa senngoa le ka mohla.’ (Daniele 2:44) Jesu o tla busa lefatše lohle ’me a ke ke a rata batho ba bang ho feta ba bang. O lerato, o mosa ’me o na le toka ebile o tla ruta batho hore le bona ba tšoare ba bang ka lerato, mosa le ka toka.—Bala Esaia 11:9.
ITHUTE LINTLHA TSE LING
Hlokomela hore na ke hobane’ng ha ’Muso oa Molimo o le molemo ho feta mebuso ea batho.
4. Lefatše lohle le tla busoa ke ’muso o matla
Jesu Kreste o na le matla a ho busa ho feta ’musi leha e le ofe. Bala Matheu 28:18 ebe le buisana ka potso ena:
Ke hobane’ng ha Jesu a e-na le matla a ho busa a fetang a babusi ba bang?
Babusi ba lefatše ba busa karolo e itseng feela ea lona hape ba busa nako e khutšoanyane. Empa ’Musong oa Molimo teng ho ke ke ha e-ba joalo. Bala Daniele 7:14 ebe le buisana ka lipotso tsena:
Ke hobane’ng ha e le ntho e thabisang ho tseba hore ’Muso oa Molimo o ke ke oa felisoa?
Ke hobane’ng ha e le ntho e thabisang ho tseba hore ’Muso oa Molimo o tla busa lefatše lohle?
5. Mebuso ea lefatše e lokela ho felisoa
Ke hobane’ng ha e le ’Muso oa Molimo feela o lokelang ho busa batho? Bapala VIDEO ebe le buisana ka potso e latelang.
Litla-morao tsa ho busoa ke batho ke life?
Bala Moeklesia 8:9 ebe le buisana ka lipotso tsena:
Na u nahana hore ke ’Muso oa Molimo feela o lokelang ho busa? Ke hobane’ng ha u cho joalo?
6. Batho ba il’o busa ’Musong oa Molimo baa re utloisisa
Kaha Morena oa rona Jesu e kile ea e-ba motho, o tla khona ho “utloela mefokolo ea rona bohloko.” (Baheberu 4:15) Jehova o khethile banna le basali ba tšepahalang ba 144 000 “molokong o mong le o mong le lelemeng le leng le le leng le bathong ba bang le ba bang le sechabeng se seng le se seng” hore ba il’o busa le Jesu.—Tšenolo 5:9.
Na u utloa e le ntho e khothatsang ho tseba hore Jesu le batho ba il’o busa le eena baa tseba hore na ho joang ho ba motho? Ke hobane’ng ha u cho joalo?
Jehova o khethile banna le basali ba tsoang likarolong tsohle tsa lefatše hore ba il’o busa le Jesu
7. Melao ea ’Muso oa Molimo e molemo ho feta ea batho
Mebuso ea lefatše e etsa melao eo e nahanang hore e tla sireletsa batho. ’Muso oa Molimo le oona o na le melao eo batho ba busoang ke oona ba lokelang ho e latela. Bala 1 Bakorinthe 6:9-11 ebe le buisana ka lipotso tsena:
U nahana hore lefatšeng ho tla ba joang ha batho bohle ba se ba mamela melao ea Molimo?a
Na u nahana hore ke ntho e utloahalang hore ebe Jehova o lebeletse hore batho ba busoang ke ’Muso oa hae ba mamele melao ea hae? Ke hobane’ng ha u cho joalo?
Ke eng e bontšang hore batho ba sa mameleng melao ea Molimo ba ka fetoha? (Sheba temana ea 11.)
Mebuso ea lefatše e etsa melao e le hore e thuse batho le ho ba sireletsa. Empa ’Muso oa Molimo oona o na le melao e molemo le ho feta e thusang batho ba busoang ke oona le ho ba sireletsa
MOTHO A KA ’NA A RE: “ ’Muso oa Molimo ke eng?”
U tla mo araba joang?
KAKARETSO
’Muso oa Molimo ke ’muso o leholimong o tla busa lefatše lohle.
Re Ithutile’ng?
Ke bo-mang ba tl’o busa ’Musong oa Molimo?
Ke ka tsela efe ’Muso oa Molimo o leng molemo ho feta mebuso ea lefatše?
Jehova o lebeletse hore batho ba tla busoa ke ’Muso oa hae ba etse’ng?
BATLA
Ithute hore na Jesu o ile a re ’Muso oa Molimo o hokae.
“Na ’Muso oa Molimo o ka Pelong ea Hao?” (Sehlooho se websaeteng)
Ke hobane’ng ha Lipaki Tsa Jehova li khetha ho tšepahalla ’Muso oa Molimo eseng mebuso ea batho?
Hlokomela hore na Bibele e re’ng ka batho ba 144 000 bao Jehova a ba khethileng hore ba il’o busa le Jesu.
Ke eng e thusitseng ’mè e mong ea neng a le teronkong ho bona hore Molimo ke eena feela ea tla etsa hore ho be le toka lefatšeng?
“Kamoo ke Ileng ka Fumana Hore na ke Hobane’ng ha ho E-na le ho Hloka Toka” (Tsoha!, November 2011)
a E meng ea melao ena ho tla buuoa ka eona Karolong ea 3.
-
-
Re ka Etsa’ng ho Bontša Hore ha re Kenelle Lipolotiking?U ka Thaba ka ho sa Feleng!—Lenaneo la ho Ithuta Bibele
-
-
KHAOLO EA 45
Re ka Etsa’ng ho Bontša Hore ha re Kenelle Lipolotiking?
Jesu o ile a re balateli ba hae e se ke ea e-ba “karolo ea lefatše.” (Johanne 15:19) Taba eo e akarelletsa ho se tšehetse lintoa le lipolotiki. Ke ’nete hore ha se kamehla ho leng bonolo hore re se ke ra kenella linthong tse joalo. Batho ba ka ’na ba re tšeha. Tabeng ee re ka bontša joang hore re tšepahalla Jehova Molimo?
1. Bakreste ba ’nete ba ikutloa joang ka mebuso ea batho?
Bakreste ba hlompha mebuso. Re etsa seo Jesu a se buileng ha a ne a re re ‘lefe Cesare lintho tsa Cesare.’ Seo se bolela hore re mamela melao ea naha, joaloka ho lefa lekhetho. (Mareka 12:17) Bibele e ruta hore Jehova ke eena ea lumeletseng mebuso ea batho hore e buse. (Baroma 13:1) Kahoo, rea utloisisa hore mebuso ea batho ha e na bolaoli bo lekanang le ba Molimo. Rea tseba hore ke Molimo oa rona feela le ’Muso oa hae o leholimong o tla rarolla mathata a batho.
2. Re ka bontša joang hore ha re kenelle lipolotiking?
Re etsisa Jesu ka ho se kenelle lipolotiking. Ha batho ba bona Jesu a etsa mohlolo o mong, ba ile ba leka ho mo etsa morena oa bona empa ha aa ka a lumela. (Johanne 6:15) Hobane’ng? Hamorao o ile a hlalosa lebaka a re: “ ’Muso oa ka ha se karolo ea lefatše lena.” (Johanne 18:36) Kaha re barutuoa ba Jesu, re bontša ka litsela tse sa tšoaneng hore ha re tšehetse lipolotiki. Ka mohlala, ha re ee ntoeng. (Bala Mikea 4:3.) Re hlompha matšoao a naha joaloka folakha empa ha re a rapele. (1 Johanne 5:21) Ha re hanyetse ebile ha re tšehetse moeta-pele kapa mokhatlo leha e le ofe oa lipolotiki. Re bontša ka litsela tsena le tse ling hore re tšepahalla ’Muso oa Molimo ka ho feletseng.
ITHUTE LINTLHA TSE LING
Nahana ka maemo a ka etsang hore ho be thata ho se be karolo ea lefatše ’me u bone hore na u ka etsa’ng maemong ao hore u thabise Jehova.
3. Bakreste ba ’nete ha ba kenelle lipolotiking
Jesu le balateli ba hae ba re behetse mohlala. Bala Baroma 13:1, 5-7 le 1 Petrose 2:13, 14. Ka mor’a moo, bapala VIDEO ebe le buisana ka lipotso tse latelang.
Ke hobane’ng ha re lokela ho hlompha babusi?
Re ka bontša ka litsela life tse ling hore rea ba hlompha?
Ha ho e-na le ntoa, linaha tse ling li thusa linaha tse loantšanang le hoja li bolela hore ha ho na naha eo li e tšehetsang. Ho se kenelle lipolotiking ho bolela’ng? Bala Johanne 17:16. Ka mor’a moo, bapala VIDEO ebe le buisana ka potso e latelang.
Ho se kenelle lipolotiking ho bolela’ng?
Re lokela ho etsa’ng haeba babusi ba batla hore re etse lintho tse khahlanong le molao oa Molimo? Bala Liketso 5:28, 29. Ka mor’a moo, bapala VIDEO ebe le buisana ka lipotso tse latelang.
Haeba molao oa batho o le khahlanong le molao oa Molimo, re lokela ho mamela mang?
U nahana hore ke maemong afe moo Bakreste ba ke keng ba mamela babusi?
4. Bontša ka liketso le ka seo u se nahanang hore ha u tšehetse lipolotiki
Bala 1 Johanne 5:21. Ka mor’a moo, bapala VIDEO ebe le buisana ka lipotso tse latelang.
Videong ee, ke hobane’ng ha Ayenge a ile a etsa qeto ea hore e ke ke ea ba setho sa mokhatlo oa lipolotiki le ea hore o tla ba sieo ha ho etsoa lintho tsa bochaba tse kang ho lumelisa folakha?
Na u nahana hore o entse qeto e nepahetseng?
Ke maemong afe a mang ao ho ’ona re sa lokelang ho tšehetsa lipolotiki? Bapala VIDEO ebe le buisana ka lipotso tse latelang.
Re ka qoba ho ba karolo ea lefatše joang ha re shebeletse lipapali tse lipakeng tsa linaha tse fapaneng?
Re ka lula re sa kenelle lipolotiking joang le haeba liqeto tsa bo-ralipolotiki li re ama ka ho toba?
Lintho tseo re li utloang litabeng kapa ho batho bao re tloaelaneng le bona, li ka re susumetsa joang ha ho tluoa lipolotiking?
Ke lintho life tseo Mokreste a lokelang ho li qoba e le hore a se ke a kenella lipolotiking ka lintho tseo a li nahanang le tseo a li etsang?
MOTHO A KA ’NA A RE: “Ke hobane’ng ha u sa lumelise folakha kapa u sa bine pina ea sechaba?”
U tla mo araba joang?
KAKARETSO
Bakreste ba leka kahohle hore ba se ke ba kenella lipolotiking, ebang ke ka lintho tseo ba li nahanang, tseo ba li buang kapa tseo ba li etsang.
Re Ithutile’ng?
Re lokela ho ikutloa joang ka mebuso ea batho?
Ke hobane’ng ha re sa kenelle lipolotiking?
Ke lintho life tseo re sa lokelang ho li etsa e le hore re se ke ra kenella lipolotiking?
BATLA
Ke lintho life tseo re ka lokelang ho li tela e le hore re se ke ra kenella lipolotiking?
Malapa a ka etsa’ng ho itokisetsa maemo a ka etsang hore a kenelle lipolotiking?
Ke hobane’ng ha ho loanela naha e se eona ntho e ka tlisetsang motho tlotla e kholo ka ho fetisisa?
Nahana kamoo u ka lulang u se karolo ea lefatše kateng ha u etsa liqeto tse mabapi le mosebetsi.
“E Mong le e Mong o Tla Jara Mojaro oa Hae” (Molula-Qhooa, March 15, 2006)
-