Etelletsa Molimo Pele Bophelong ba Hao ba Lelapa!

BOB LE JEAN—banyalani bao ho builoeng ka bona sehloohong se fetileng—ha baa ka ba hlalana. Ho e-na le hoo, ba ile ba buisana le mosebeletsi oa Mokreste ka mathata a bona. O ile a hlokomela ka potlako hore mathata a bona a ne a bakoa ke limelo tsa bona tse sa tšoaneng.

Ka mohlala, kaha Bob o ne a tsoa lelapeng la bahoebi le litsebi tsa mesebetsi ea matsoho ’me ka boeena o ne a etsa mosebetsi oa matsoho, o ne a batla mohlōhlō oa lijo hoseng ho hong le ho hong. Jean, o ne a tsoa lelapeng la barutehi bao haholo-holo ba sa etseng mosebetsi oa matsoho, o ne a mo fa kofi le bohobe bo besitsoeng feela. Ke kahoo khang ea bona ka lijo tsa hoseng e neng e fetoha ntoa e sa feleng!

Ho ne ho hlokahala hore Bob le Jean ba ntlafatse puisano ea bona. Leha ho le joalo, sesosa sa sebele sa mahlomola a bona se ne se tebile haholoanyane. Mosebeletsi enoa o ile a botsa: “Na le talimana leseling la 1 Ba-Korinthe 13:4?” Temana eo ea Bibele e baleha tjena: “Lerato le sebete, le mosa; lerato ha le na mōna; lerato ha le na boikhantšo; ha le ikhohomose.” Temana e latelang e re lerato “ha le etse ho soabisang, ha le ipatlele tsa lona, ha le halefe, ha le hopole bobe.” Jean le Bob ba ne ba ikemiselitse ho sebelisa mantsoe ana kamanong ea bona.

Mathata a banyalani bana haholo-holo a ne a hloka tharollo ea moea. Kaha Bob le Jean ba ne ba lakatsa ho boloka kamano e ntle le Molimo, ka holim’a tsohle ho ne ho hlokahala hore ba sebelise melao-motheo ea Bibele le ho hlokomela hore “ekare ha e se Jehova ea hahang ntlo, ba e hahang ba sebeletsa lefeela.” (Pesaleme ea 127:1) Litemana tsa 3 ho ea ho 5 ke tse loketseng bakeng sa ho haha lelapa. ’Me ho etelletsa Molimo pele bophelong ba lelapa ho tlisa katleho e khōlō ho hōliseng thabo ea lelapa.—Ba-Efese 3:14, 15.

Seo ho Etelletsa Molimo Pele ho se Akarelletsang

Ho etelletsa Molimo pele bophelong ba hao ba lelapa ho akarelletsa ho hongata ho feta polelo e reng, “Lelapa le rapelang hammoho lea kopana.” Ho latela koranta ea Family Relations, ba bangata ba lumela hore “bolumeli bo nolofalletsa lelapa hore le sebelisane ’moho ka tumellano le ka katleho ’me bo etsa hore litho tsa lelapa li khotsofalle bophelo haholoanyane.” Empa ho sebelisa bolumeli ka tloaelo feela ha ho tšoane le ho etelletsa Molimo pele. Ba bangata ba khomarela bolumeli joaloka mokhoa feela oo e leng tloaelo, neano ea lelapa, kapa hobane ba batla ho fumana metsoalle e metle. Molimo o na le tšusumetso e nyenyane bophelong ba bona ba letsatsi le letsatsi. Habohlokoahali, hase bolumeli bohle boo e leng “borapeli bo hloekileng, bo se nang sekoli mahlong a Molimo.”—Jakobo 1:27.

Ho etelletsa Molimo pele bophelong ba rōna ba lelapa, rōna le baratuoa ba rōna re tlameha ho rapela Jehova, “Ea Phahameng ka ho Fetisisa holim’a lefatše lohle,” ho latela litlhokahalo tsa hae. (Pesaleme ea 83:18, NW) Mora oa Molimo, Jesu Kreste, o itse: “Nako ea tla, le joale e setse e le eona, eo barapeli ba ’nete ba tla rapela Ntate ka moea le ka ’nete; hobane Ntate o batla ba mo rapelang joalo. Molimo ke Moea: ba o rapelang e ka khona ba rapele ka moea le ka ’nete.” (Johanne 4:23, 24) Hore re rapele Jehova Molimo “ka moea,” tšebeletso e halalelang ea rōna ho eena e tlameha ho susumetsoa ke pelo e tletseng lerato le tumelo. (Mareka 12:28-31; Ba-Galata 2:16) Ho rapela Jehova ka “’nete” ho re hloka hore re lahle mashano a bolumeli ’me re iphaphathe le thato ea hae ka ho felletseng joalokaha e senotsoe ka Bibeleng. Re ke ke ra etelletsa Jehova Molimo pele ka ntle le hore bolumeli ba rōna bo finyelle litekanyetso tsa hae.a Tse ling tsa tsona ke life? ’Me ho li sebelisa ho ka ruisa lelapa molemo joang?

Ho Etelletsa Molimo Pele Joaloka Monna

Ho 1 Ba-Korinthe 11:3, Bibele e re: “Hloho ea monna e mong le e mong ke Kreste, ’me hloho ea mosali ke monna, ’me hloho ea Kreste ke Molimo.” Haeba u monna, u na le boikarabelo boo u bo filoeng ke Molimo ba ho ba moetsi ea ka sehloohong oa liqeto lelapeng la hao. Empa sena ha se fe monna leha e le ofe tumello ea ho ba ea hatellang kapa ’mampoli.

Bibele e khothalletsa banna ho nahanela maikutlo a basali ba bona ha ba etsa liqeto tse ba amang. (Bapisa le Genese 21:9-14.) Ke ’nete hore Mangolo a re phehella hore kaofela re ‘se ke ra hlokomela tseo e leng tsa rōna feela, re mpe re hlokomele le tseo e leng tsa ba bang.’ (Ba-Filippi 2:2-4) Hangata monna oa Mokreste o tla tšehetsa khetho ea mosali oa hae haeba ho sa amehe molao-motheo oa Bibele. Kaha oa mo thahasella, o tla boela a tiiseha hore a se ke a mo imetsa ka boikarabelo. Ka mohlala, mohlomong a ka mo thusa ka mesebetsi ea lelapa, haholo-holo haeba a sebetsa mosebetsi oa boipheliso.

Moapostola Pauluse o ile a ngola: “Ke ka mokhoa o joalo le bona banna ba tšoanetseng ho rata basali ba bona joale ka ’mele ea bona. Ea ratang mosali oa hae, eba oa ithata. Hobane ha ho e-so ho be motho ea kileng a hloea nama ea hae le ka mohla o le mong; empa o ee a e fepe, a e baballe, joale ka ha Kreste le eena a etsa kereke.” (Ba-Efese 5:28, 29) Jesu Kreste o sebelisana le litho tsa phutheho ka tsela e lerato.

Keletso ea moapostola Petrose le eona e lokela ho eloa hloko: “Lōna banna, tsoelang pele ho phela ka mokhoa o tšoanang le [basali ba lōna] ho latela tsebo, le ba fe tlhompho joaloka lijana tse fokolang, motho e motšehali, kaha le boetse le majalefa hammoho le bona mohaung o sa tšoanelang oa bophelo, e le hore lithapelo tsa lōna li tle li se ke tsa sitisoa.” (1 Petrose 3:7, NW) Na ho hlokomela hore ho tšoara mosali ka tsela e sa bontšeng lerato ho ka sitisa lithapelo tsa monna ha ho etse hore motho a nahane ka ho teba? E, monna o tlameha ho sebelisana le mosali oa hae ka tsela e lerato e le hore Molimo o ka utloa le ho arabela lithapelo tsa hae.

Ho etelletsa Molimo pele ho boetse ho ama kamano ea ntate le bana ba hae. O lokela ho ameha ka ho teba ka boiketlo ba bona ba moea. Leha ho le joalo, phuputsong e khōlō ea U.S., ke halofo feela ea banna ba ileng ba re “ho kopanela thutong ea Mangolo kapa puisanong ea lihlopha” ke ‘ntho ea bohlokoa ka ho fetisisa bakeng sa ho ntlafatsa bomoea ba malapa a bona.’ Ba bang ba ile ba bua ka lintho tse kang “ho shebella kapa ho mamela mananeo a phatlalatsoang a litšebeletso tsa bolumeli” kapa ‘ho nahana ka morero oa bophelo.’

Leha ho le joalo, Bibele e bolella bo-ntate: “Le se ke la halefisa bana ba lōna; le mpe le ba hōlise ka ho ba laea le ka ho ba rutela Moreneng.” (Ba-Efese 6:4) Har’a Lipaki tsa Jehova, ho lebelletsoe hore bo-ntate ba etelle pele borapeling ba lelapa. Ka ho khanna lithuto tsa malapa tsa Bibele ka mehla, ho ba teng libokeng tsa Bokreste, le ho iphaphatha le litlhoko tse ling tsa Mangolo, banna ba joalo ba tla be ba etelletsa Molimo pele bophelong ba lelapa.

Ho Etelletsa Molimo Pele Joaloka Mosali

Haeba u mosali, u ka etelletsa Molimo pele ka ho tšehetsa monna oa hao karolong eo a e phethang joaloka hlooho ea lelapa. Bibele e re: “Basali, ikokobetseng ka tlase ho banna ba lōna, joale ka ha ho tšoaneleha Moreneng.” (Ba-Kolosse 3:18) Sena se ka ’na sa ba boima haholo haeba monna e le ea sa buisaneng le lelapa kapa ea monyebe hore a etelle pele borapeling ba lelapa. Leha ho le joalo, ho lebisa tlhokomelo ka ho tlōlisang mefokolong ea hae ka mehla kapa, ho hobe le ho feta, ho mo hanyetsa ho ka eketsa mahlomola a lelapa le ho feta.

Liproverbia 14:1 e re: “Mosali ea bohlale o haha ntlo ea hae, empa ea se nang kutlo o e qhaqha ka matsoho a hae.” Tsela e ’ngoe eo ka eona mosali ea nyetsoeng ea bohlale e le kannete a ka etelletsang Molimo pele le ho “haha ntlo ea hae” ke ka ho ikokobelletsa monna oa hae. (1 Ba-Korinthe 11:3) Kaha o na le ‘molao o mosa lelemeng la hae,’ o qoba ho tšoaea monna oa hae liphoso ho sa hlokahale. (Liproverbia 31:26) O bile o sebetsa ka thata ho etsa hore liqeto tsa hae li atlehe.

Tsela e ’ngoe eo ka eona mosali ea nyetsoeng a ka etelletsang Molimo pele ke ka ho ba mosali ea mahlaha-hlaha. Ha e le hantle, haeba a tlameha ho etsa mosebetsi oa boipheliso, a ka ’na a hloka nako kapa matla a hlokahalang bakeng sa ho hlokomela lelapa la hae ka tsela eo a ratang ka eona. Ho ntse ho le joalo a ka phehella ho ba joaloka “mosali ea khabane” eo ka eena Bibele e reng: “O alosa ntlo ea hae, ha a je bohobe ba botsoa.”—Liproverbia 31:10, 27.

Ka holim’a tsohle, ho hlokahala hore mosali a etelletse borapeli ba Molimo pele bophelong ba hae. Ba bangata ba etelang Holong ea ’Muso ea Lipaki tsa Jehova ka lekhetlo la pele ba bua ka ponahalo e hloekileng ea bana. Mosebetsi oa mosali tabeng ena ke oa bohlokoa haholo. Empa hape o tlameha ho hlokomela bomoea ba hae ka ho rapela, ho ithuta, le ho sebeletsa Molimo.

Ho Etelletsa Molimo Pele Joaloka Bacha

Sehlooho se seng makasineng oa Adolescent Counselor se re: “Bana ba ’nile ba ba le tšekamelo ea ho haha maikutlo le lifilosofi tse ba lumelletseng ho laola batsoali ba bona. . . . Kaha ba pepeselitsoe sechabeng se hatisang le ho tlotlisa monyaka o tlang kapele le leruo la lintho tse bonahalang, bana ba lilemong tsa ho hōla ba ba le boikutlo ba hore ‘ke e batla hona joale.’” Haeba u mocha, na boo ke boikutlo ba hao?

Ba-Kolosse 3:20 e re: “Bana, utloang batsoali ba lōna nthong tsohle; hobane ke taba e khahlisang Morena.” Mocha ea talimang kutlo e joalo e le e hlokoang ke Molimo o tla sebelisana le batsoali ba hae. Ka mohlala, a ke ke a ba hanyetsa ka lekunutu ka ho tloaelana le bao a kenang sekolo le bona bao batsoali ba mo hanelang ho tloaelana le bona; leha e le hore ka mano a ka leka ho qhekella motsoali e mong e le hore a ka ntšetsa mekhoa ea hae pele. (Liproverbia 3:32) Ho e-na le hoo, mocha ofe kapa ofe ea etelletsang Molimo pele bophelong ba hae o tla ikokobelletsa tataiso e lerato ea batsoali ba hae.

Etelletsa Molimo Pele!

Ho sa tsotellehe hore na re boemong bofe tikolohong ea lelapa, re lokela ho etelletsa Molimo pele bophelong le ho hlaolela kamano e haufi le oona. Na uena le lelapa la hao le etsa seo?

Kaofela ha rōna re tobana le “linako tse bohloko” tse leng teng “mehleng ea qetello.” (2 Timothea 3:1-5) Leha ho le joalo, re ka khona ho tsoela pele moeeng le ho pholoha bofelo ba tsamaiso ena ea lintho. (Mattheu 24:3-14) Ka ho sebetsa tumellanong le tsebo e nepahetseng ea Bibele, uena le lelapa la hao le ka ba le tšepo ea bophelo bo sa feleng lefatšeng la paradeise. (Luka 23:43; Johanne 17:3; Tšenolo 21:3, 4) E, ho ka ba joalo haeba u etelletsa Molimo pele bophelong ba hao ba lelapa.

[Mongolo o botlaaseng ba leqephe]

[Setšoantšo se leqepheng la 5]

Mosali ea khabane o ananeloa ka ho tebileng

[Setšoantšo se leqepheng la 7]

Bibele e khothalletsa banna ho etella pele borapeling ba lelapa