Jesu—Bophelo le Tšebeletso tsa Hae

’Musi ea Batloang ea Nang le Matla a Phahametseng a Motho

HA JESU a fepa likete ka mohlolo, batho baa hlolloa. Ba re: “Ka ’nete enoa ke moprofeta eo ho itsoeng, o tla tla lefatšeng.” Ba fihlela qeto ea hore Jesu hase moprofeta ea moholoanyane ho Moshe feela empa hape e ne e ka ba ’musi ea laba-labeloang ka ho fetisisa. Kahoo ba rera ho mo nka ka mahahapa ’me ba mo etse morena.

Leha ho le joalo, Jesu o seli ka seo ba se rerang. Kahoo, o tloha ka potlako ho qoba ho khethoa ke bona ka mahahapa. O qhala matšoele, o khanna barutuoa ba hae ho kena sekepaneng le ho khutlela morao Kapernauma, eaba joale o nyolohela thabeng ho ea rapela. Jesu o moo a le mong bosiung boo.

Pejana e e-ba ka meso Jesu a le ’ng’along ea hae e phahameng oa qamaka ’me o bona maqhubu a akhotsoa ke moea o matla o leoatleng. Ka khanya ea khoeli ha e batla e tolokile, kaha paseka e le haufi, Jesu o bona sekepana sa barutuoa ba hae se tsamaea ka thata ho feta har’a maqhubu. Banna bao ba soka ka matla ’ohle a bona.

Ha a bona sena, Jesu o theoha thabeng ’me o qala ho tsamaea holim’a maqhubu a lebile sekepaneng. Hoba a tsamaee sebaka sa lik’hilomethara tse hlano kapa tse tšeletseng, o fihla ho barutuoa ba hae. Leha ho le joalo, o tsoela pele joalokaha eka o tla ba feta feela. Ha ba ’mona, ba bokolla: “Ke sethotsela!”

Jesu o arabela ka ho tšelisa: “Ke ’na, se tšabeng.”

Empa Petrose o re: “Morena, ha e-ba ke uena, laela hore ke tle ho uena holim’a metsi.”

Jesu oa araba: “Tlo!”

Eaba Petrose o tsoa ka sekepaneng, a tsamaea holim’a metsi ho leba ho Jesu. Empa ha Petrose a talima sefefo, a tšoha, ’me a qala ho teba, a hoa: “Morena, mpholose!”

Hang-hang Jesu a otlolla letsoho la hae, a mo tšoara, a re: “Motho ea tumelo e nyenyane, u belaeletse’ng?

Kamor’a hore Petrose le Jesu ba khutlele ka sekepaneng, moea oa emisa, ’me barutuoa baa hlolloa. Empa na ho lokela hore ho be joalo ka bona? Haeba ba ne ba utloisisitse “se boleloang ke mahobe” (NW) ka ho ananela mohlolo o moholo oo Jesu a o entseng lihora tse seng kae pejana ka ho fepa likete ka mahobe a mahlano feela le litlhapi tse peli tse nyenyane, joale ho ne ho ke ke ha bonahala ho makatsa hakaalo hore a ka tsamaea holim’a metsi ’me a etsa hore moea o khutse. Leha ho le joalo, hona joale barutuoa ba utloa Jesu ’me ba re: “Efela u Mor’a Molimo ruri.”

Kamor’a nakoana ba fihla Genesarethe, thota e ntle e behang haufi le Kapernauma. Ba ropa sekepana moo. Empa ha ba fihla lebopong, batho ba tseba Jesu ’me ba ea naheng e ba potolohileng, ho fumana ba kulang. Ha bana ba tlisoa ka liphate tsa bona ’me ba thetsa qola ea kobo ea Jesu feela, ba folisoa ka ho feletseng.

Letsatsing le hlahlamang letšoele le boneng ha likete li feptjoa ka mohlolo le hlokomela hore Jesu o tsamaile. Kahoo, ha liketsoana tse tsoang Tiberiase li fihla, ba kena ho tsona ’me ba leba Kapernauma ho ea batla Jesu. Ha ba mo fumana baa botsa: “Rabbi, u tlile neng mona?” Karabelo ea Jesu e tla ba e senolang haholo. Johanne 6:14-25; Mattheu 14:22-36; Mareka 6:45-56.

◆ Kamor’a hore Jesu a fepe likete ka mohlolo, batho ba batla ho mo etsa joang?

◆ Ke eng seo Jesu a se bonang ha a le thabeng eo a hloeletseng ho eona ’me joale o etsa’ng?

◆ Ke hobane’ng ha barutuoa ba sa lokela hore ebe ba makalitsoe hakaale ke lintho tsee?

◆ Ho etsahala’ng hoba ba fihle lebopong?

[Setšoantšo se tletseng leqephe la 9]