Thabela Melemo ea Thuto ea Bomolimo
“’Na, Jehova, ke Molimo oa hao, Ea u rutang ho ithuisa molemo.”—ESAIA 48:17, NW.
1. Re tla tsoella joang haeba re sebelisa thuto ea bomolimo bophelong ba rōna?
JEHOVA MOLIMO o tseba hamolemohali. Ha ho motho ea mo fetang ka monahano, puo, kapa ketso. Kaha ke ’Mōpi oa rōna, o hlokomela litlhoko tsa rōna ’me o li khotsofatsa ka botlalo. Ka sebele o tseba kamoo a ka re rutang kateng. ’Me haeba re sebelisa thuto ea bomolimo, re ithuisa molemo ’me re fumana thabo ea ’nete.
2, 3. (a) Batho ba Molimo ba boholo-holo ba ka be ba ruile molemo joang hoja ba ne ba ile ba utloa melao ea hae? (b) Ho tla etsahala eng haeba re sebelisa thuto ea bomolimo bophelong ba rōna kajeno?
2 Thuto ea bomolimo e senola takatso ea Molimo e tiileng ea hore bahlanka ba hae ba qobe tlokotsi ’me ba thabele bophelo ka ho ipapisa le melao le melao-motheo ea hae. Hoja batho ba Jehova ba boholo-holo ba ne ba ile ba mo mamela, ba ka be ba ile ba thabela litlhohonolofatso tse enneng, hobane o ne a ba boleletse sena: “’Na, Jehova, ke Molimo oa hao, Ea u rutang ho ithuisa molemo, Ea u etsang hore u tsamaee tseleng eo u lokelang ho tsamaea ka eona. Hoja feela u ne u ka hla ua ela hloko litaelo tsa ka! Joale khotso ea hao e ne e tla ba feela joaloka nōka, ’me ho loka ha hao ho be joaloka maqhubu a leoatle.”—Esaia 48:17, 18, NW.
3 Batho ba Molimo ba boholo-holo ba ka be ba ithuisitse molemo hoja ba ne ba ile ba ela hloko melao le litaelo tsa hae. Ho e-na le ho oeloa ke tlokotsi e tlisitsoeng ke Babylona, ba ka be ba thabetse khotso le katleho e tletseng, e tebileng, le e sa feleng joaloka nōka. Ho feta moo, liketso tsa bona tsa ho loka e ne e tla ba tse hlokang palo joaloka maqhubu a leoatle. Ka ho tšoanang, haeba re sebelisa thuto ea bomolimo bophelong ba rōna, re ka thabela melemo ea eona e mengata. E meng ea eona ke efe?
E Fetola Bophelo
4. Thuto ea bomolimo e ’nile ea ama bophelo ba batho ba bangata joang?
4 Thuto ea bomolimo e ’nile ea ruisa batho ba bangata molemo ka ho fetola bophelo ba bona hore bo be molemo. Ba sebelisang thupelo ea Jehova ba furalla “mesebetsi ea nama,” e kang boitšoaro bo hlephileng, borapeli ba litšoantšo, tšebelisano le meea, liqabang, le mōna. Ho e-na le hoo, ba bonahatsa litholoana tsa moea tsa lerato, thabo, khotso, mamello, mosa, molemo, tumelo, bonolo, le boitšoaro. (Ba-Galata 5:19-23, NW) Ba boetse ba ela hloko keletso ea Ba-Efese 4:17-24, moo Pauluse a phehellang balumeli-’moho hore ba se ke ba tsamaea joalokaha lichaba li tsamaea, ka bosaoana ba likelello tsa tsona le ka lefifi la kelello, ’me li arohile bophelong boo e leng ba Molimo. Kaha batho ba etsisang Kreste ha ba tataisoe ke lipelo tse se nang kutlo, ‘ba hlobola botho ba khale bo lumellanang le mokhoa oa bona oa pele oa boitšoaro ’me ba nchafatsoa matleng a susumetsang likelello tsa bona.’ Ba ‘apara botho bo bocha bo bōpiloeng ho latela thato ea Molimo ho lokeng le botšepehing ba ’nete.’
5. Thuto ea bomolimo e ama tsela eo batho ba tsamaeang ka eona joang?
5 Molemo o fetisisang oa ho sebelisa thuto ea bomolimo ke hore e re bontša kamoo re ka tsamaeang kateng le Molimo. Haeba re tsamaea le Jehova, joaloka Noe, re tla be re latela tsela ea bophelo e boletsoeng ke Morupeli oa rōna e Moholo. (Genese 6:9; Esaia 30:20, 21, NW) Joalokaha moapostola Pauluse a boletse, batho ba lichaba ke “ba eang ka bosaoana ba likelello tsa bona.” ’Me tse ling tsa lingoliloeng tsa likelello tseo e ka ba bosaoana bo bokaakang! Ha motho e mong a hlokomela mengolo ea batho ba bang e ngotsoeng leboteng la mohaho Pompeii, o ile a ngola: “Hoa makatsa hore ebe Uena, lebota, ha u e-s’o oe ka lebaka la lintho tse ngata hakana tse hlokang kelello tse ngotsoeng holim’a hao.” Empa ha ho ntho e hlokang kelello ‘thutong ea Jehova’ le mosebetsing oa boboleli ba ’Muso o nolofatsoang ke eona. (Liketso 13:12) Ka mosebetsi oo, batho ba ratang ’nete ba ’nile ba thusoa ho hlaphoheloa kelellong ka khato e bohlale. Ba rutoa kamoo ba ka khaotsang ho tsamaea tseleng ea bona ea boetsalibe, ka ho se tsebe merero ea Molimo. Likelello tsa bona ha li sa le lefifing, ebile ha ba sa susumetsoa ke lipelo tse se nang kutlo tse batlang lipakane tsa bosaoana.
6. Ho na le kamano efe pakeng tsa ho mamela ha rōna thuto ea Jehova le thabo ea rōna?
6 Thuto ea bomolimo e boetse e re ruisa molemo hobane e re tloaelanya le Jehova le litšebelisano tsa hae. Tsebo e joalo e re atametsa haufi le Molimo, e eketsa lerato la rōna ho eena, ’me e hōlisa takatso ea rōna ea ho mo utloa. Johanne oa Pele, 5:3 e re: “Ho rata Molimo, ke ha re boloka litaelo tsa oona, ’me litaelo tsa oona ha li boima.” Re boetse re utloa litaelo tsa Jesu hobane rea tseba hore thuto ea hae e tsoa ho Molimo. (Johanne 7:16-18) Kutlo e joalo e re sireletsa kotsing ea moea ’me e eketsa thabo ea rōna.
Morero oa Sebele Bophelong
7, 8. (a) Re lokela ho utloisisa Pesaleme ea 90:12 joang? (b) Re ka fihlela pelo ea bohlale joang?
7 Thuto ea Jehova e molemo bakeng sa ho re bontša kamoo re ka sebelisang bophelo ba rōna ka mokhoa o nang le morero. Ha e le hantle, thuto ea bomolimo e re bontša kamoo re ka balang matsatsi a rōna ka tsela e khethehileng. Tebello ea bophelo ba lilemo tse 70 e na le tšepiso ea matsatsi a ka bang 25 550. Motho ea nang le lilemo tse 50 o se a phetse matsatsi a 18 250 ho ’ona, ’me matsatsi a hae a setseng a 7 300 ao ho tšeptjoang hore o tla a phela ka sebele a bonahala a fokola. Ka ho khethehileng joale a ka ananela ka botlalo haholoanyane lebaka leo ho Pesaleme ea 90:12 moprofeta Moshe a ileng a rapela Molimo: “U re rute ho bala matsatsi a rōna ka mokhoa oo re ka fihlelang pelo e hlalefileng ka oona!” Empa Moshe o ne a bolela’ng ka seo?
8 Moshe o ne a sa bolele hore Molimo o tla senola lenane le tobileng la matsatsi a tla ba teng a ho phela ha Moiseraele ka mong. Ho latela Pesaleme ea 90, litemana 9 le 10, moprofeta eo oa Moheberu o ne a hlokometse hore bophelo ba motho e ka ’na ea e-ba lilemo tse ka bang 70 kapa 80—tseo ka sebele li leng khutšoanyane. Kahoo mantsoe a Pesaleme ea 90:12 ka ho hlakileng a bontša thapelo ea Moshe ea hore Jehova a ’montše, kapa a mo rute, eena le batho ba Hae ho sebelisa bohlale ho bona bohlokoa ba ‘matsatsi a lilemo tsa bona’ le ho a sebelisa ka tsela eo Molimo a e amohelang. Joale, ho thoe’ng ka rōna? Na re ananela letsatsi le leng le le leng e le la bohlokoa? Na re fihlela pelo e hlalefileng ka ho batla ho qeta letsatsi ka leng ka tsela e molemo bakeng sa ho tlotlisa Morupeli oa rōna e Moholo, Jehova Molimo? Ke sona seo thuto ea bomolimo e re thusang ho se etsa.
9. Ho ka lebelloa eng haeba re ithuta ho bala matsatsi a rōna tlotlisong ea Jehova?
9 Haeba re ithuta ho bala matsatsi a rōna tlotlisong ea Jehova, mohlomong re ka ’na ra khona ho tsoela pele ho bala matsatsi a rōna, hobane thuto ea bomolimo e fana ka tsebo bakeng sa bophelo bo sa feleng. “Sena se bolela bophelo bo sa feleng‚ ho bokella ha bona tsebo ka uena‚ Molimo a le mong oa ’nete‚ le eo u mo romileng‚ Jesu Kreste,” Jesu o boletse joalo. (Johanne 17:3, NW) Ho hlakile hore haeba re ka bokella tsebo eohle ea lefatše e leng teng, e ne e ke ke ea re tlisetsa bophelo bo sa feleng. Empa bophelo bo sa feleng e ka ba ba rōna haeba re fumana le ho sebelisa tsebo e nepahetseng ka batho ba babeli ba bohlokoa ka ho fetisisa bokahohleng le ho bontša tumelo.
10. Encyclopedia e re’ng ka thuto, ’me see se lumellana joang le melemo ea thuto ea bomolimo?
10 Ho sa tsotelehe hore na re se re phetse halelele hakae, a re hopoleng molemo ona oa bohlokoa oa thuto ea bomolimo: E fa ba e sebelisang morero oa sebele bophelong. The World Book Encyclopedia e re: “Thuto e lokela ho thusa batho ho ba litho tsa bohlokoa haholoanyane sechabeng. E boetse e lokela ho ba thusa ho hōlisa kananelo bakeng sa lefa la bona la setso le ho phela bophelo bo khotsofatsang haholoanyane.” Thuto ea bomolimo e molemo bakeng sa ho re thusa ho phela bophelo bo khotsofatsang. E hōlisa ka hare ho rōna kananelo e matla bakeng sa lefa la rōna la moea joaloka batho ba Molimo. Ka sebele e re etsa litho tse molemo sechabeng, hobane e re nolofaletsa ho phetha karolo ea bohlokoa ho finyella litlhoko tsa batho lefatšeng ka bophara. Ke hobane’ng ha ho ka thualo?
Lenaneo la Thuto la Lefatše ka Bophara
11. Thomas Jefferson o ile a totobatsa bohlokoa ba thuto e loketseng joang?
11 Thuto ea bomolimo e finyella litlhoko tsa batho tsa thuto ho feta lenaneo leha e le lefe le leng la thupelo. Bohlokoa ba ho ruta batho bo ile ba hlokomeloa ke Thomas Jefferson, eo e bileng mopresidente oa boraro oa United States. Lengolong la August 13, 1786, le eang ho George Wythe, eo e neng e le motsoalle le ea saenneng Phatlalatso ea Boipuso, Jefferson o ile a ngola: “Ke nahana hore molao oa bohlokoa ka ho fetisisa molaong oa rōna ke oa ho aba tsebo har’a batho. Ha ho motheo o mong o tsitsitseng o ka qaptjoang, bakeng sa ho boloka tokoloho le thabo. . . . Monghali ea ratehang, khothaletsa letšolo le matla khahlanong le ho hloka tsebo; tiisa le ho ntlafatsa molao oa ho ruta batho feela ba tloaelehileng. Tsebisa banna ba naha ea heso . . . hore lekhetho le tla lefshoa bakeng sa morero [oa thuto] ha le fete karolo ea sekete e tla lefshoa marena, baprista, le batho ba phahameng ba tla hlaha har’a rōna haeba re tlohela batho ba hloka tsebo.”
12. Ke hobane’ng ha ho ka thoe thuto ea bomolimo ke lenaneo le atlehileng le le molemo ka ho fetisisa bakeng sa thuto ea lefatše lohle?
12 Ho e-na le ho tlohela batho ba nang le tšekamelo ea ho loka ba hloka tsebo, thuto ea Jehova e fana ka lenaneo le molemo ka ho fetisisa bakeng sa thuto ea lefatše lohle le ba tsoelang molemo. Ha Ntoa ea II ea Lefatše e ntse e kupa lilemong tse 50 tse fetileng, Komiti ea United States ea ho Tsosolosa Thuto e ile ea bona bohlokoa bo potlakileng ba “thuto ea lefatše lohle.” Tlhoko eo e sa ntse e le teng, empa thuto ea bomolimo ke lona feela lenaneo le atlehileng bakeng sa thuto ea lefatše lohle. Hape ke lona le molemo ka ho fetisisa hobane le tlosa batho ho nyahameng, le ntlafatsa boitšoaro ba bona le bomoea ba bona, le ba sireletsa boithating ba lefatše le leemeng, ’me le fana ka tsebo bakeng sa bophelo bo sa feleng. Ka holim’a tsohle, lenaneo lena le ruisa batho molemo libakeng tsohle ka ho ba ruta ho sebeletsa Jehova Molimo.
13. Esaia 2:2-4 e phethahatsoa joang kajeno?
13 Melemo ea thuto ea bomolimo e thabeloa ke batho ba bangata ba ntseng ba fetoha bahlanka ba Molimo hona joale. Ba ela tlhoko ea bona ea moea hloko ’me ba hlokomela ka botlalo hore letsatsi la Jehova le haufi. (Mattheu 5:3, NW; 1 Ba-Thessalonika 5:1-6) Hona joale, “mehleng ea bofelo,” batho bana ba lichaba tsohle ba phallela thabeng ea Jehova, e leng borapeli ba hae bo hloekileng. E tiile ’me e phahametse borapeli bohle bo leng khahlanong le thato ea Molimo. (Esaia 2:2-4) Haeba u Paki e inehetseng ea Jehova, na ha u thabele hore ebe u har’a matšoele a ntseng a eketseha a mo rapelang le ho rua molemo thutong ea bomolimo? Ke ho hlollang hakaakang ho ba har’a ba hooang: “Bokang Jehova!”—Pesaleme ea 150:6.
Phello e Molemo Moeeng oa Rōna
14. Ho molemo hakae ho latela keletso ea Pauluse e ho 1 Ba-Korinthe 14:20?
14 Har’a melemo e mengata ea thuto ea bomolimo ke phello e ntle eo e ka bang le eona monahanong le moeeng oa rōna. E re susumeletsa ho nahana ka lintho tse lokileng, tse hloekileng, tse khabane, le tse rorisoang. (Ba-Filippi 4:8) Thuto ea Jehova e re thusa ho latela keletso ea Pauluse: “Le be bana lonyeng [“bobeng,” NW]; ’me ha e le hlalefong, le be banna.” (1 Ba-Korinthe 14:20) Haeba re sebelisa keletso ena, re ke ke ra batla ho ba le tsebo ea bokhopo. Pauluse o ile a boela a ngola: “Tse bohloko tsohle, le bohale, le ho itšena, le komang, le ho seba, le lonya [“bobe,” NW] lohle, li falatsoe ho lōna.” (Ba-Efese 4:31) Ho ela hloko keletso e joalo ho tla re thusa ho qoba boitšoaro bo bobe le libe tse ling tse tebileng. Le hoja sena se ka ba molemo ’meleng le kelellong, haholo-holo se tla re tlisetsa thabo ea ho tseba hore re khahlisa Molimo.
15. Ke eng se ka re thusang ho lula re le khabane monahanong?
15 E le hore re ka lula re le khabane monahanong, thuso e ’ngoe ke ho qoba ‘litloaelano tse mpe tse bolisang mekhoa e metle.’ (1 Ba-Korinthe 15:33) Joaloka Bakreste, re ke ke ra tloaelana le lihlola, bafebi, le bafosi ba bang. Ka ho utloahalang, re tlameha hore re se ke ra tloaelana le batho ba joalo ka ho bala ka bona bakeng sa monyaka oa nama kapa ho ba shebella thelevisheneng kapa libaesekopong. Pelo e mano, habonolo feela e ka ba le takatso ea ho fumana lintho tse mpe, ’me e ka lekeha hore e li etse. (Jeremia 17:9) Ka hona a re qobeng liteko tse joalo ka ho khomarela thuto ea bomolimo. E ka ama monahano oa “ba ratang Jehova” ka tekanyo e molemo hoo ba “hloeang bobe.”—Pesaleme ea 97:10.
16. Thuto ea Molimo e ka ama moea oo re o bontšang joang?
16 Pauluse o ile a bolella mosebetsi-’moho le eena Timothea: ‘Morena a be le moea oa hao. Mohau oa hae o be le lōna.’ (2 Timothea 4:22) Moapostola o ne a lakatsa hore Molimo, ka Morena Jesu Kreste, a amohele matla a susumetsang Timothea le Bakreste ba bang. Thuto ea Molimo e re thusa ho bonahatsa moea o lerato, o mosa, o bonolo. (Ba-Kolosse 3:9-14) ’Me e fapane haholo hakaakang le ea ba bangata mehleng ee ea bofelo! Baa ikhohomosa, ha ba na teboho, ba haelloa ke kameho e mofuthu ea tlhaho, ha baa bulehela tumellano leha e le efe, ha ba laolehe, ba rata menyaka, ’me ba haelloa ke boinehelo ba ’nete ba bomolimo. (2 Timothea 3:1-5, NW) Leha ho le joalo, ha re ntse re tsoela pele ho sebelisa melemo ea thuto ea bomolimo bophelong ba rōna, re bonahatsa moea o etsang hore re ratoe ke Molimo le batho ba bang.
E Molemo Litšebelisanong le Batho ba Bang
17. Ke hobane’ng ha e le habohlokoa hakaale ho sebelisana ’moho ka boikokobetso?
17 Thuto ea Jehova e re thusa ho bona melemo ea ho sebelisana ’moho ka boikokobetso le barapeli-’moho. (Pesaleme ea 138:6) Ho fapana le batho ba bangata kajeno, ha re tlōle melao-motheo e lokileng empa re bulehetse tumellano. Ka mohlala, ho ba le molemo o moholo hobane balebeli ba khethiloeng ba bulehetse tumellano nakong ea liboka tsa baholo. Banna bana ba bua ka bonolo molemong oa ’nete, le hoja ba sa lumelle maikutlo ho pupetsa kahlolo e molemo kapa ho baka ho hloka bonngoe. Litho tsohle tsa phutheho li tla rua molemo moeeng oa bonngoe oo re o thabelang haeba kaofela ha rōna re tsoela pele ho sebelisa thuto ea bomolimo.—Pesaleme ea 133:1-3.
18. Thuto ea bomolimo e re thusa ho ba le pono efe ka balumeli-’moho?
18 Thuto ea bomolimo e boetse e molemo bakeng sa ho re thusa ho ba le pono e loketseng ka balumeli-’moho. Jesu o itse: “Ha ho motho ea ka tlang ho ’na, ha a sa huloe ke Ntate ea nthomileng.” (Johanne 6:44) Haholo-holo ho tloha ka 1919, Jehova o ’nile a etsa hore bahlanka ba hae ba bolele likahlolo tsa hae, ’me tsamaiso ea lefatše la Satane e ’nile ea sisinngoa ke temoso ena ea lefatše lohle. Ka nako e tšoanang, batho ba tšabang Molimo—“tse lakatsehang”—ba ’nile ba huloa ke Molimo hore ba ikarole lichabeng le ho kopanela le Bakreste ba tlotsitsoeng bakeng sa ho tlatsa ntlo ea Jehova ea borapeli ka khanya. (Haggai 2:7) Ka sebele, re lokela ho talima ba joalo ba lakatsehang ba hutsoeng ke Molimo e le metsoalle e ratehang.
19. Thuto ea Molimo e senola eng mabapi le ho rarolla mathata a botho le Bakreste-’moho?
19 Kaha kaofela ha rōna ha rea phethahala, lintho li ke ke tsa tsamaea hantle ka mehla. Ha Pauluse a tla tloha a nka leeto la hae la bobeli la boromuoa, Barnabase o ne a ikemiselitse ho tsamaea ’moho le Mareka. Pauluse ha a ka a lumela hobane Mareka ‘o ne a ile a ba tlohela Pamfilia ’me a sa ka a ea le bona mosebetsing.’ Nakong eo, ho ile ha ba le “ho jajabetsa ho hoholo ka khalefo.” Barnabase o ile a nka Mareka a ea le eena Cypera, ’me Pauluse a tsamaea ’moho le Silase ho pholletsa le Syria le Cilicia. (Liketso 15:36-41, NW) Hamorao, ntle ho pelaelo lekhalo lena le ile la fela, hobane Mareka o ne a e-na le Pauluse Roma, ’me moapostola o ile a bua hantle ka eena. (Ba-Kolosse 4:10) Molemo o mong oa thuto ea bomolimo ke hore e re bontša kamoo re ka rarollang mathata a botho kateng pakeng tsa Bakreste ka ho latela keletso e kang ea Jesu e ho Mattheu 5:23, 24 le Mattheu 18:15-17.
E Tla Lula e Ruisa Molemo ’me e le e Hlōlang
20, 21. Puisano ea rōna ka thuto ea bomolimo e lokela ho re susumeletsa ho etsa eng?
20 Esita le ho tsoa puisanong ea rōna e khutšoaane ea melemo e meng le litlhōlo tsa thuto ea bomolimo, ntle ho pelaelo kaofela ha rōna re bona bohlokoa ba ho tiisetsa ho e sebeliseng bophelong ba rōna. Ka hona, ka moea oa borapeli, a re tsoeleng pele ho ithuta ho Morupeli oa rōna e Moholo. Haufinyane, thuto ea bomolimo e tla hlōla ho feta leha e le neng pele. E tla hlōla ha bahlalefi ba lefatše lena ba tla be ba shoele ka ho sa feleng. (Bapisa le 1 Ba-Korinthe 1:19.) Ho feta moo, ha batho ba eketsehileng ba limilione ba ithuta thato ea Molimo le ho e etsa, tsebo ea Jehova e tla tlala lefatše joalokaha metsi a aparetse leoatle. (Esaia 11:9) Batho ba mamelang ba tla rua molemo o moholo hakaakang ka eona le ho tlosa qoso ho Jehova joaloka ’Musi oa Bokahohle!
21 Thuto ea Jehova e tla ruisa molemo le ho hlōla ka mehla. Na u tla tsoela pele ho rua molemo ho eona joaloka seithuti se chesehang sa Buka e khōlō ka ho fetisisa ea Molimo ea Thuto? Na u phela tumellanong le Bibele le ho arolelana linnete tsa eona le ba bang? Haeba ho joalo, u ka lebella ho bona tlhōlo e feletseng ea thuto ea bomolimo, tlotlisong ea Morupeli oa rōna e Moholo, ’Musi Morena Jehova.
U Ithutile Eng?
◻ Thuto ea bomolimo e ka ba le phello efe bophelong ba rōna?
◻ Thuto ea Jehova e finyella litlhoko tsa thuto joang?
◻ Thuto ea bomolimo e ka ba le phello efe e molemo monahanong le boikutlong ba rōna?
◻ Thuto ea Molimo e ipaka e le molemo joang litšebelisanong le batho ba bang?
[Setšoantšo se leqepheng la 15]
Thuto ea bomolimo e re bontša kamoo re ka tsamaeang kateng le Molimo, joaloka Noe
[Setšoantšo se leqepheng la 17]
Batho ba lichaba tsohle ba phallela thabeng ea Jehova