Jesu o Moketeng oa Litabernakele Jerusalema

Haesale Jesu a tuma ho tloha ka nako eo a neng a kolobetsoa. Bajuda ba likete ba bone ha a etsa mehlolo ’me litlaleho tsa mesebetsi ea hae li tsebahala naheng eohle. Joale, batho ba bangata ba tlileng Moketeng oa Litabernakele (kapa oa Maphephe) ba batlana le eena.

Batho ba na le maikutlo a sa tšoaneng ka Jesu. Ba bang ba re: “Ke monna ea molemo.” Ba bang bona ba re: “Ha a molemo, empa o khelosa bongata.” (Johanne 7:​12) Boholo ba litaba tsena bo buuoa matsatsing a qalang a mokete. Leha ho le joalo, ha ho motho ea nang le sebete sa ho buella Jesu pontšeng hobane batho ba tšaba baeta-pele ba Bajuda.

Nakong eo mokete o ntseng o tsoela pele, Jesu o ea tempeleng. Batho ba bangata ba makaletse bokhoni ba hae bo tsotehang ba ho ruta. Ha a e-s’o ee likolong tsa bo-rabi, kahoo Bajuda baa ipotsa ba re: “Monna enoa o na le tsebo ea lingoliloeng joang, ha a sa ka a ithuta likolong?”​—Johanne 7:15.

Jesu o hlalosa ka ho re: “Seo ke se rutang ha se sa ka, empa ke sa ea nthomileng. Haeba leha e le mang a lakatsa ho etsa thato ea Hae, o tla tseba malebana le thuto eo hore na ebe e tsoa ho Molimo kapa ke bua ka ho iqalla.” (Johanne 7:​16, 17) Lithuto tsa Jesu li lumellana le Molao oa Molimo. Kahoo, e tlameha ebe ho hlakile hore ha a ipatlele thoriso empa o batla ho tlotlisa Molimo.

Jesu o tsoela pele o re: “Moshe o le file Molao, na ha ho joalo? Empa ha ho le ea mong oa lona ea mamelang Molao. Ke hobane’ng ha le batla ho mpolaea?” Ba bang ba teng har’a letšoele lena, mohlomong ba tsoang libakeng tse ka thoko ho motse, ha ba tsebe hore Bajuda ba batla ho bolaea Jesu. Ba utloa e le ntho e sa utloahaleng hore ho ka ba le motho ea ka batlang ho bolaea mosuoe ea kang Jesu tjena. Kahoo ba etsa qeto ea hore e tlameha ebe ho na le ntho e phoso ka Jesu e etsang hore a bue joalo. Ba re ho Jesu: “U na le modemona. Ke mang ea batlang ho u bolaea?”​—Johanne 7:​19, 20.

Ha e le hantle, nako e ka etsang selemo le halofo e fetileng, baeta-pele ba Bajuda ba ne ba batla ho bolaea Jesu ka mor’a hore a phekole motho ka letsatsi la Sabatha. Joale Jesu o bua mantsoe a fatang maikutlo e le ho pepesa ho se be le kahlolo e molemo ha bona. O etsa hore ba hlokomele hore ho ea ka Molao, ngoana oa moshanyana o tlameha ho bolotsoa ka letsatsi la borobeli le haeba e le Sabatha. Oa ba botsa o re: “Haeba motho a amohela lebollo ka sabatha e le hore Molao oa Moshe o se ke oa tloloa, na le nkhalefela ka mabifi kahobane ke entse hore motho a phele hantle ka ho feletseng ka sabatha? Khaotsang ho ahlola ka ponahalo ea ka ntle, empa le ahlole ka kahlolo e lokileng.”​—Johanne 7:​23, 24.

Baahi ba Jerusalema ba tsebang se etsahalang ba re: “Enoa ke eena monna eo ba batlang ho mo bolaea, na ha ho joalo? Leha ho le joalo, bonang! o bua phatlalatsa, ’me ha ba re letho ho eena. Kannete-nete babusi ha ba tsebe hore enoa ke Kreste, na ha ho joalo?” Joale, ke hobaneʼng ha batho ba sa lumele hore Jesu ke Kreste? Ba re: “Rea tseba hore na monna enoa o tsoa hokae, empa leha ho le joalo ha Kreste a tla, ha ho ea tla tseba hore na o tsoa hokae.”​—Johanne 7:​25-27.

Jesu o ba araba a ntse a le hona moo tempeleng o re: “Lea ntseba ’me le tseba le hore na ke tsoa hokae. Hape, ha kea tla e le ho itsoelang ho ’na, empa ea nthomileng ke oa sebele, ’me ha le mo tsebe. ’Na kea mo tseba, hobane ke moemeli ea tsoang ho eena, ’me Eo o nthomile.” (Johanne 7:​28, 29) Karabo ena ea Jesu e hlakileng e etsa hore ba leke ho mo tšoara, mohlomong ka morero oa ho mo isa teronkong kapa ho mo bolaea. Leha ho le joalo, boiteko ba bona ha bo atlehe hobane ha e e-s’o be nako ea hore Jesu a shoe.

Leha ho le joalo, batho ba bangata ba beha tumelo ho Jesu, ’me ba tšoanetse. O kile a tsamaea holim’a metsi, a khutsisa sefefo, a fepa likete tsa batho ka mohlolo ka mahobe le litlhapi tse seng kae, a folisa ba kulang, a etsa hore ba holofetseng ba tsamaee hape, a bula mahlo a lifofu, a folisa balepera, a ba a tsosa le bafu. Ehlile ba na le mabaka a utloahalang a ho botsa ba re: “Ha Kreste a fihla, a ke ke a etsa lipontšo tse ngata ho feta tseo monna enoa a li entseng, na ha ho joalo?”​—Johanne 7:31.

Ha Bafarisi ba utloa letšoele le bua lintho tsena, bona hammoho le baprista ba ka sehloohong, ba roma balaoli hore ba tšoare Jesu.