Bakreste ba ’Nete ke Bo-mang?

“BOKRESTE ke ha batho ba tseba lithuto tsa Jesu Kreste ebile ba phela ka tsona.” (On Being a Christian) Ka mantsoe ana, setsebi sa thuto ea bolumeli sa Leswiss se bitsoang Hans Küng, se bolela ’nete e totobetseng ea hore: Bokreste ba ’nete ke ha feela batho ba tšepahalang ba sebelisa lithuto tsa Jesu.

Joale, ho thoe’ng haeba batho ka bomong kapa mekhatlo e ipolela hore e latela Kreste, empa bonneteng e sa etse seo Jesu a neng a se ruta? Jesu ka boeena o ile a re ba bangata ba ne ba tla ipolela hore ke Bakreste. Ba ne ba tla bua ka liketso tse fapa-fapaneng e le ho paka hore ba mo sebelelitse, ba re: “Na ha rea ka ra profeta ka lebitso la hao, le ho leleka bademona ka lebitso la hao, le ho etsa mesebetsi e matla e mengata ka lebitso la hao?” Leha ho le joalo, Jesu o ne a tla re’ng? Mantsoe a hae a tšosang a hlakisa kahlolo ea hae: “Ha kea ka ka le tseba le ka mohla! Tlohang ho ’na, lōna ba etsang tlōlo ea molao.”—Matheu 7:22, 23.

Eo ke temoso e matla hakaakang ho batho “ba etsang tlōlo ea molao” ba ipolelang hore ba latela Jesu! Nahana ka lintho tse peli tsa motheo tseo batho ba lokelang ho li finyella e le hore Jesu a ba amohele e le Bakreste ba ’nete ho fapana le ho ba lahla e le ba etsang tlōlo ea molao.

“Haeba le E-na le Lerato Har’a Lōna”

Ntho e ’ngoe eo Jesu a ileng a e bolela eo batho ba lokelang ho e finyella ke ena: “Ke le fa taelo e ncha, hore le ratane; le lōna le ratane feela joalokaha ke le ratile. Bohle ba tla tseba ka sena hore le barutuoa ba ka, haeba le e-na le lerato har’a lōna.”—Johanne 13:34, 35.

Jesu o batla hore balateli ba hae ba ratane e le kannete esita le ho rata batho ba bang. Lilemong tse makholo ka mor’a hore Jesu a phele lefatšeng mona, Bakreste ka bomong ba finyeletse seo. Empa ho thoe’ng ka mekhatlo e mengata ea bolumeli e ’nileng ea ipolela hore e emela Kreste? Na e tsebahetse ka lerato? Ka sebele ha ho joalo. Ho e-na le hoo, e ’nile ea itlhoma pele lintoeng tse ngata le liqhoebeshanong tseo ho tsona ho ’nileng ha tšolloa mali a se nang molato.—Tšenolo 18:24.

Ho ’nile ha e-ba joalo ho tla fihlela mehleng ea kajeno. Linaha tse ipolelang hore ke tsa Bokreste ke tsona tse ileng tsa etella pele lintoeng tse peli tsa lekholong la bo20 la lilemo tseo ho tsona ho ileng ha bolaoa batho ba bangata. Haufinyane tjena, litho tsa likereke tseo ho thoeng ke tsa Bokreste li ne li le ka sehloohong lipolaong tse sehlōhō le boitekong ba ho timetsa morabe o mong tse ileng tsa etsahala Rwanda ka 1994. Desmond Tutu, eo e neng e le moarekabishopo oa Chache, oa ngola o re: “Batho ba neng ba hloeane ka mokhoa ona oa ho batla ho tšolla mali, e ne e le ba tumelo e le ’ngoe. Boholo ba bona e ne e le Bakreste.”

“Haeba le Lula Lentsoeng la ka”

Jesu o ile a bolela ntho ea bobeli ea motheo eo Bakreste ba ’nete ba lokelang ho e finyella, ha a ne a re: “Haeba le lula lentsoeng la ka, ka sebele le barutuoa ba ka, le tla tseba ’nete, ’me ’nete e tla le lokolla.”—Johanne 8:31, 32.

Jesu o lebeletse hore balateli ba hae ba lule lentsoeng la hae—ke hore ba khomarele lithuto tsa hae. Ho e-na le hoo, baruti ba bolumeli ba ipolelang hore ba latela Kreste ba “’nile ba amohela likhopolo tsa Bagerike,” ho bolela Küng, eo e leng setsebi sa thuto ea bolumeli. Ba nketse lithuto tsa Jesu sebaka ka lintho tse kang khopolo ea hore moea ha o shoe, tumelo ea hore ho na le pelekatori, ho rapela Maria le ho ba le sehlopha sa baruti—e leng likhopolo tse nkiloeng ho bo-rafilosofi ba bahetene le malumeling a bohetene.—1 Bakorinthe 1:19-21; 3:18-20.

Baruti ba bolumeli ba ile ba boela ba kenyelletsa thuto ea Boraro-bo-bong e sa utloisisoeng, e phahamisetsang Jesu boemong boo ho seng mohla a kileng a ipeha ho bona. Ka thuto eo, ba ile ba sitisa batho hore ba rapele eo kamehla Jesu a neng a lebisa tlotla ho eena—e leng Jehova, Ntate oa Jesu. (Matheu 5:16; 6:9; Johanne 14:28; 20:17) Hans Küng oa ngola o re: “Ha Jesu a bua ka Molimo, o bolela Molimo oa boholo-holo oa bapatriareka Abrahama, Isaka le Jakobo: e leng Yahweh . . . Etsoe ho [Jesu] enoa ke eena Molimo a le mong feela.” Kajeno ke batho ba bakae ba lemohang kapele-pele hore Molimo oa Jesu eo e bileng e leng Ntate oa hae ke Yahweh kapa Jehova, joalokaha ka tloaelo lebitso la hae le ngoloa joalo ka Sesotho?

Baeta-pele ba bolumeli ba hlokomolohile ka ho feletseng taelo ea Jesu ea ho se nke lehlakore litabeng tsa lipolotiki. Mongoli e mong ea bitsoang Trevor Morrow o bolela hore mehleng ea Jesu, Galilea “e ne e le khubung ea moea oa bochaba.” Bajuda ba bangata ba neng ba rata naha ea habo bona ba ile ba nka lihlomo e le hore ba fumane tokoloho lipolotiking le bolumeling. Na Jesu o ile a laela barutuoa ba hae hore ba kenelle lintoeng tse joalo? Che. Ho fapana le hoo, o ile a re ho bona: “Ha le karolo ea lefatše.” (Johanne 15:19; 17:14) Leha ho le joalo, ho e-na le hore baeta-pele ba likereke ba lule ba sa nke lehlakore, ba ile ba qapa seo mongoli oa Leaerishe, e leng Hubert Butler a se hlalosang e le “lithuto tsa likereke tse tšehetsang lintoa le lipolotiki.” Oa ngola o re: “Bokreste bo tšehetsang lipolotiki, hangata bo chesehela ho buella le ho tšehetsa likhopolo tsa sesole ’me ha litsebi tsa lipolotiki le baeta-pele ba bolumeli ba etsa litumellano, ka linako tsohle Kereke e hlohonolofatsa mabotho a naha hore e fumane melemo e itseng.”

Mesuoe ea Bohata e Latola Jesu

Moapostola Pauluse o ile a lemosa ka ho kheloha Bokresteng ba ’nete. O ile a bolela hore ka mor’a lefu la hae, “liphiri tse hatellang,” tse hlahang har’a ba ipolelang hore ke Bakreste, li ne li tla ‘bua lintho tse sothehileng hore li ikhulele barutuoa.’ (Liketso 20:29, 30) Batho ba joalo ba kang liphiri ba ne ba tla “bolela phatlalatsa hore ba tseba Molimo,” empa bonneteng ba ne ba tla “mo latola ka mesebetsi ea bona.” (Tite 1:16) Ka ho tšoanang moapostola Petrose o ile a lemosa hore mesuoe ea bohata e ne e tla “tlisa ka lenyele maquloana a timetsang ’me e [ne e] tla latola esita le monghali ea e rekileng.” O ile a re boitšoaro ba eona bo bobe bo ne bo tla etsa hore batho ba ‘nyefole tsela ea ’nete.’ (2 Petrose 2:1, 2) Setsebi sa Segerike se bitsoang W. E. Vine se bolela hore ho latola Kreste ka tsela ena ho tšoana le ho “latola Ntate le Mora ka ho koeneha le ka ho jala lithuto tse kotsi.”

Jesu o ne a tla etsa joang haeba ka boomo batho ba ipolelang hore ke barutuoa ba hae ba sa ‘lule lentsoeng la hae’ ebile ba sa finyelle lintho tse ling tseo a li boletseng? O ile a lemosa tjena: “Mang kapa mang ea ntatolang ka pel’a batho, le ’na ke tla mo latola ka pel’a Ntate ea maholimong.” (Matheu 10:33) Ho hlakile hore Jesu ha aa latole motho ea etsang phoso empa a na le takatso e tiileng ea hore a tšepahale. Ka mohlala, le hoja moapostola Petrose a ile a latola Jesu hararo, Petrose o ile a baka ’me a tšoareloa. (Matheu 26:69-75) Leha ho le joalo, Jesu o latola batho kapa mekhatlo eo ha e le hantle e leng liphiri tse apereng letlalo la nku—ba iketsang eka ba latela Kreste empa ka boomo le ka ho phehella ba hana lithuto tsa hae. Mabapi le baruti ba joalo ba bohata, Jesu o ile a re: “Le tla tseba batho bao ka litholoana tsa bona.”—Matheu 7:15-20.

Baapostola Baa Shoa, ’Me Bokoenehi Boa Qala

Bakreste ba bohata ba ile ba qala ho latola Kreste neng? Nakoana feela ka mor’a lefu la Jesu. Jesu ka boeena o ile a lemosa hore Satane Diabolose o ne a tla potlakela ho jalella Bakreste ba bohata, e leng “mofoka,” har’a Bakreste ba ’nete, e leng “peō e ntle,” eo Jesu a neng a e jetse nakong ea tšebeletso ea hae. (Matheu 13:24, 25, 37-39) Moapostola Pauluse o ile a lemosa hore mehleng ea hae ho ne ho se ho ntse ho utloahala hore baruti ba bohata ba teng. O ile a bolela hore lebaka la motheo la hore ba khelohe lithutong tsa Jesu Kreste ke hobane ba ne ba se na ‘lerato la sebele bakeng sa ’nete.’—2 Bathesalonika 2:10.

Baapostola ba Jesu Kreste ba ile ba thibela bokoenehi bona ha ba sa ntse ba phela. Leha ho le joalo, ka mor’a lefu la baapostola, baeta-pele bao ba bolumeli ba ile ba sebelisa “mosebetsi o mong le o mong o matla le lipontšo le limakatso tsa leshano le . . . thetso e ’ngoe le e ’ngoe e sa lokang” e le hore ba khelose batho ba bangata linneteng tse rutiloeng ke Jesu le baapostola ba hae. (2 Bathesalonika 2:3, 6-12) Joalokaha rafilosofi oa Lenyesemane ea bitsoang Bertrand Russell a ile a ngola, ka potlako phutheho ea pele ea Bokreste e ile ea fetoha mokhatlo oa bolumeli o “neng o tla makatsa Jesu, esita le Pauluse.”

Bokreste ba ’Nete Boa Tsosolosoa

Linnete tsena li hlakile. Ka mor’a lefu la baapostola, lithuto tsa Kreste ha lia ka tsa bonahatsoa liketsahalong tse ngata tse neng li etsoa ka lebitso la Bokreste. Leha ho le joalo, seo ha se bolele hore Jesu ha aa phethahatsa tšepiso ea hae ea ho ba le balateli ba hae “ka matsatsi ’ohle ho fihlela qetellong ea tsamaiso ea lintho.” (Matheu 28:20) Re ka kholiseha hore ho tloha ha a bua mantsoe ao, ho ’nile ha e-ba le batho ba tšepahalang ba ’nileng ba ‘tseba lithuto tsa Jesu Kreste ba ba ba phela ka tsona.’ Jesu Kreste o phethahalitse tšepiso ea hae ea ho tšehetsa batho ba joalo hobane ba lekile ho bontša lerato le tsebahatsang Bakreste ba ’nete ebile ba lekile ho lula ba tšepahalla linnete tseo a neng a li ruta.

Ho feta moo, Jesu o ile a tšepisa hore matsatsing a ho qetela a tsamaiso ena ea lintho, o ne a tla bokella barutuoa ba hae ba tšepahalang ka phuthehong ea Bokreste e bonahalang ka ho hlaka, eo a neng a tla e sebelisa hore a phethe thato ea hae. (Matheu 24:14, 45-47) Hona joale o sebelisa phutheho eo hore a bokelle “bongata bo boholo” ba banna, basali le bana ba tsoang “lichabeng tsohle le melokong eohle le bathong bohle le malemeng ’ohle” ’me o ba kopanya hammoho tlas’a bohlooho ba hae hore e be “mohlape o le mong” o tlas’a “molisa a le mong.”—Tšenolo 7:9, 14-17; Johanne 10:16; Baefese 4:11-16.

Kahoo, furalla mekhatlo leha e le efe e silafalitseng lebitso la Kreste le e sentseng Bokreste lebitso ka lilemo tsena tse fetileng tse likete tse peli. Ho seng joalo, joalokaha Jesu Kreste a ile a bolella moapostola Johanne u ka “amohela karolo ea likotlo tsa [eona]” ha Molimo a phethahatsa kahlolo ea hae ho eona nakong e tlang e atametseng haholo. (Tšenolo 1:1; 18:4, 5) Etsa qeto e tiileng ea hore u be har’a bao moprofeta Mikea a neng a bua ka bona ha a ne a re ‘qetellong ea matsatsi,’ barapeli ba ’nete—e leng ba tšoareletseng Bokresteng ba ’nete—ba ne ba tla mamela litaelo tsa Molimo ’me ba ‘tsamaee litseleng tsa hae’ tsa borapeli bo hloekileng bo tsosolositsoeng. (Mikea 4:1-4) Bahatisi ba makasine ena ba tla thabela ho u thusa hore u tsebe barapeli bao ba ’nete.

[Litšoantšo tse leqepheng la 5]

Ke hobane’ng ha Bakreste ba ’nete ba sa kopanele lintoeng?

[Litlhaloso Tsa Moo Litšoantšo li Nkiloeng Teng]

Soldiers, left: U.S. National Archives photo; flamethrower, right: U.S. Army Photo

[Litšoantšo tse leqepheng la 7]

Lintho tsa motheo tseo Jesu a li behetseng Bakreste ba ’nete hore ba li finyelle ke ho ‘ba le lerato har’a bona’ le hore ‘ba lule lentsoeng la hae’