Pono ea Bibele

Lebaka Leo Mokhatlo oa Bolumeli oa Tokoloho e Seng Karabo

MOKHATLO oa bolumeli oa tokoloho ke khopolo e ncha. O qapuoe lilemong tse mashome a mabeli tse fetileng ke baprista ba Roma e K’hatholike ba Amerika Boroa ba ileng ba tšoenngoa haholo ke bofuma har’a mehlape ea bona. Ba qala ho ikutloa hore ho bolella mafutsana litaba tsa moea feela ho ne ho sa thuse haholo. Ho e-na le hoo, bona, baruti, ba ikutloa hore ho hlokahala hore ba buelle liphetoho tse khōlō sechabeng haeba batho ba tla ntlafala moeeng. Ba bang ba ne ba buella phetohelo ea ’muso.

Ke ’nete hore ha ho letho le phoso ka ho batla ho ntlafatsa bohloko ba mafutsana. Jesu o ile a utloela batho ba mehleng ea hae bohloko. Rea bala: “Ha a bona matšoele, a a utloela bohloko, hobane ba ne ba khathetse, ba saretsoe joale ka linku tse se nang molisa.” (Mattheu 9:36) Ha e le hantle, Jesu o ile a tšepisa tokoloho ho ba neng ba arabela hantle mantsoeng a hae, a re: “Le tla tseba ’nete, ’me ’nete e tla le lokolla.” (Johanne 8:32) Kahona na mokhatlo oa bolumeli oa tokoloho ke tsela ea Bibele bakeng sa mosebeletsi oa Mokreste ho thusa mafutsana?

Khopolo e Fosahetseng

Che, ’me ho na le mabaka a mangata a karabo eo. Lebaka le leng, boikarabelo bo ka sehloohong ba mosebeletsi oa Mokreste ke katleho ea moea ea mohlape oa hae, ’me ha ho na bopaki bo bontšang hore haeba boemo ba mafutsana bo ntlafatsoa, hoo ho ’mulela menyetla e eketsehileng ea ho hōla moeeng. Ha e le hantle, linaha tse ruileng haholo tsa Amerika Leboea le Europa, ho sa tsotellehe litekanyetso tse phahameng tsa bophelo, li na le mathata a mangata a moea. Ho se tšepahale, boitšoaro bo bobe, tšoaro e mpe ea bana le ea batho ba hōlileng, le meharo—ho qolla feela mehlala e seng mekae—ho atile. ’Me libakeng tse ling ho thahasella litaba tsa Molimo ho shoele.—2 Timothea 3:1-5.

Ho feta moo, mokhatlo oa bolumeli oa tokoloho e ne e se tsela eo Jesu a boletseng hore e lokela ho sebelisoa ho thusa mafutsana, ’me Jesu ke Mohlala o Moholo bakeng sa Bakreste ba ’nete. (1 Petrose 2:21) Ha Jesu a ne a le lefatšeng, o ne a phela har’a batho bao e neng e le bafo ba ’muso o mong ’me ba ne ba hlokofatsoa ke balekhetho ba neng ba qhekella. Hangata ba futsanehileng ba ne ba hatelloa ke barui ba nang le lentsoe pusong. (Mattheu 22:21; Luka 3:12, 13; 20:46, 47) Empa leha ho le joalo, Jesu ha a ka a kenella mehopolong ea lipolotiki kapa maikutlong a bohale a sechaba ka ho leka ho ntlafatsa bophelo ba bona. Ho e-na le hoo, a bolela “litaba tse molemo tsa ’muso.”—Mattheu 4:23, NW.

Baruti ba bolumeli ba hōlisang mokhatlo oa bolumeli oa tokoloho ba batla tharollo ea lipolotiki bothateng bo ka lokisoang ka tsela oa Molimo feela. Le hoja khopolo ea bona e bitsoa ea bolumeli, ha ea theoa Bibeleng. Jesu o itse ho barutuoa ba hae: “Ha se karolo ea lefatše, joale ka ha le ’na ke se karolo ea lefatše.” (Johanne 17:16, NW) Ke taba e ke keng ea etsahala hore ho khothalletsoe mesebetsi ea tokoloho ea lipolotiki empa motho e se “karolo ea lefatše.”—Jakobo 4:4.

Ke’ng Seo ka Sebele se Thusang Mafutsana?

Haeba baruti ba buellang tokoloho ea bolumeli ea mafutsana ba sa rute molaetsa oa moea o amang haholo mafutsana, re ka bolela hore ba ruta molaetsa o fosahetseng. Jesu o ile a thusa haholo mafutsana a ileng a arabela hantle mehleng ea hae, ’me kajeno Lipaki tsa Jehova li etsa ho tšoanang ka ho ba le seabo ho boleleng “litaba tse molemo tsa ’muso.”—Mattheu 24:14, NW.

Litaba tsena tsa ’muso ke eng? Bakeng sa mehla ea rōna, ke ’nete ea hore ’Muso oa Molimo o hlonngoe maholimong le hore haufinyana o tla felisa bokhopo bohle le khatello lefatšeng lena. (Tšenolo 11:15, 18) Ka tsela ena, ’Muso oa Molimo o tla lokisa mathata a bofutsana le khatello ka ho sa feleng. Ha Bibele e bua ka liphello tsa ’Muso oa Molimo, e re: “O tla hlakola meokho eohle mahlong a bona; lefu ha le sa tla hlola le e-ba teng; ’me ha ho sa tla ba masoabi, leha e le ho bokolla, kapa bohloko; hobane tsa pele li fetile.” (Tšenolo 21:4) Ke tebello e hlollang hakaakang bakeng sa batho ba pelo li lokileng!

Empa hona joale ’nete ena ka ’Muso ea Molimo e thusa joang batho ba futsanehileng? Hopola hore Jesu o itse: “Le tla tseba ’nete, ’me ’nete e tla le lokolla.” (Johanne 8:32) ’Nete e thusa motho ho thabela tokoloho ea letsoalo le se nang molato, tokoloho tšabong ea bokamoso, le tokoloho tumela-khoeleng ea bolumeli.

Ho feta moo, motho ea ithutang ’nete ena o fumana Metsoalle e ’meli e matla. E mong ke Kreste Jesu, eo hona joale a busang e le Morena oa ’Muso oa Molimo. E mong ke Jehova Molimo ka boeena, eo Bibele e reng ka eena: “Jarisa Jehova phahlo tsa hao, ’me o tla u tšehetsa; a ke ke a lumela hore ea lokileng a ’ne a sisinngoe.” (Pesaleme ea 55:22) Esita le haeba motho ea futsanehileng a phela tlas’a tsamaiso e hatellang ea lipolotiki kapa ea moruo, Metsoalle ena e ’meli e nang le kutloelo-bohloko e ka mo thusa hore a sebetsane ka katleho le maemo ao ka hore a be phuthehong ea Bokreste.

Ho phaella moo, ho arabela ha motho ’neteng ea ’Muso oa Molimo ho mo tataisetsa ho lahla mekhoa eohle e mebe le hore a sebelise hamolemohali chelete eo a nang le eona. Che, motho ea futsanehileng ha a fetohe morui ka hore feela a phele bophelo ba Bokreste. Empa haeba a beha ’Muso oa Molimo pele ’me a phela tumellanong le litekanyetso tsa Oona tse lokileng, ka tsela e itseng litlhoko tsa hae tsa nama lia lokisetsoa. Ho joaloka ha Jesu a tšepisitse: “Le mpe le batle ’muso oa Molimo le ho loka ha oona pele; ’me lintho tseo tsohle le tla li ekeletsoa.”—Mattheu 6:33.

Morena Davida oa boholo-holo o ile a fana ka bopaki bo matlafatsang ha a bontša kamoo Molimo o hlokomelang bao e leng ba oona. O itse: “Nkile ka ba mocha, ’me joale ke tsofetse; empa ha ke e-so ho bone ea lokileng a tloheloa, leha e le litloholo tsa hae li sikila bohobe.” (Pesaleme ea 37:25) Ho na le mehlala e mengata haholo kajeno har’a Lipaki tsa Jehova e bontšang bonnete ba sena.

Kahona, ho e-na le ho batla tokoloho ea nakoana ka likhopolo le mekhatlo ea bolumeli, batho kaofela, ho akareletsa le mafutsana, ba khothalletsoa ho thabela melemo ea sebele e tlisoang ke ho sebeletsa Molimo. Ba etsang joalo ba lumellana le moapostola Pauluse, hore “borapeli bo thusa kahohle, bo tsoe bo e-na le pallo ea bophelo ba joale le ea bo tlang ho tla.”—1 Timothea 4:8.

[Setšoantšo se leqepheng la 29]

’Muso oa Molimo ke ’ona tharollo feela bofutsaneng ba lefatše