Na Lentsoe la Molimo le Ruta ho Tsoaloa Hangata?
MANG kapa mang ea hlahlobisisang Bibele ka tšepo ea ho fumana tšehetso ea thuto ea ho tsoaloa hangata ka sebele o tla khathala matla. Ha ho moo u tla fumana ho thoe batho ba phetse nakong e fetileng. Ho feta moo, u ke ke ua fumana lipolelo tse kang “ho tsoaloa hangata” kapa “ho fetela ’meleng o mong ha sephefumolohi” kapa “sephefumolohi se sa shoeng” ka Bibeleng.
Leha ho le joalo, ba bang ba lumelang ho tsoaloeng hangata ba leka ho hlalosa ho haella hona ha tšehetso ea Bibele ka ho re khopolo ea ho tsoaloa hangata e ne e atile haholo mehleng ea boholo-holo hoo tlhaloso leha e le efe e neng e tla ba e sa hlokahaleng. Ke ’nete, thuto ea ho tsoaloa hangata ke ea khale haholo, empa ho sa tsotellehe hore na ke ea khale hakae kapa hore na e ne e tumme kapa e sa tuma hakae, potso e ntse e phahama, Na Bibele e ea e ruta?
Ho 2 Timothea 3:16, 17, moapostola Pauluse o ile a ngola: “Lengolo lohle le bulutsoeng ke Moea oa Molimo, le na le molemo oa ho ruta, oa ho kholisa, oa ho laea, le oa ho hōlisa ka khōlo ea ho loka; motho oa Molimo a tle a phethehe, ’me a rutehele ruri mesebetsing eohle e molemo.” E, Bibele ke Lentsoe le bulutsoeng la Molimo, puisano ea hae le moloko oa batho. ’Me joalokaha Pauluse a ngotse, le etsa hore mohlahlobisisi ea tšepehang a “phethehe, ’me a rutehele ruri” ho araba lipotso tsohle tsa bohlokoa tsa bophelo, ho akarelletsa le lipotso tse amang nako e fetileng, ea hona joale, le e tlang.
Pauluse o ile a boela a re: “Mohla le amohetseng lentsoe la Molimo, leo le le utloileng ho rōna, le le amohetse e seng joale ka hoja e le lentsoe la batho, empa la kholoa hore ke lentsoe la Molimo, joale ka ha e le lona ka sebele.” (1 Ba-Thessalonika 2:13) Kaha Bibele e jere likhopolo tsa Molimo, eseng tsa batho ba sa phethahalang, ha hoa lokela ho re makatsa ho fumana hore Bibele ka makhetlo a mangata e fapana le likhopolo tsa batho esita leha li ka tuma ho pholletsa le lilemo. Empa u ka ’na ua re, ‘Na Bibele, bonyane libakeng tse ling, ha e fane ka maikutlo a ho tsoaloa hangata?’
Litemana tse Utloisisoang ka Tsela e Fosahetseng
Ba lumelang ho tsoaloeng hangata ba bolela hore Bibele e ama taba eo ho Mattheu 17:11-13, moo Jesu a amahanyang Johanne Mokolobetsi le moprofeta oa boholo-holo Elia. Temana ena e ea baleha: “Ka ’nete Elia o tšoanetse ho tla, a busetse tsohle tokeng. Empa ke re ho lōna: Elia o se a tlile . . . Joale barutuoa ba utloisisa hobane o ba lekanyetsa Johanne Mokolobetsi.”
Ka ho rialo, na Jesu o ne a bolela hore Johanne Mokolobetsi ke ho tsoaloa hangata ha moprofeta Elia? Johanne ka boeena o ne a tseba hore ha ho joalo. Ka lekhetlo le leng ha a botsoa, “A u Elia na?” Johanne o ile a araba ka ho hlakileng: “Ha ke eena.” (Johanne 1:21) Leha ho le joalo, ho ne ho boletsoe esale pele hore Johanne o tla etella pele Messia “ka moea le ka matla a Elia.” (Luka 1:17; Malakia 4:5, 6) Ka mantsoe a mang, Johanne Mokolobetsi e ne e le “Elia” ka kutloisiso ea hore o ne a phetha mosebetsi o kang oa Elia.
Ho Johanne 9:1, 2, rea bala: “Eitse Jesu ha a feta, a bona monna e sa le a tsoaloa a foufetse. Barutuoa ba hae ba ’motsa, ba re: Rabbi, ke mang ea sitiloeng, kapa eena, kapa batsoali ba hae, ha e le moo a tsoetsoe a foufetse?” Ba bang ba lumelang ho tsoaloeng hangata ba etsa tlhahiso ea hore kaha monna enoa o ne a tsoetsoe a foufetse, e tlameha ebe sebe sa hae se ne se etsahetse bophelong ba nakong e fetileng.
Empa ho sa tsotellehe hore na ke eng e ileng ea hlahisa potso ea barutuoa, karabo eo Jesu a ileng a fana ka eona e lokela ho ba tekanyetso ea ho etsa qeto. O ile a re: “Ha hoa sitoa eena, leha e le batsoali ba hae.” (Johanne 9:3) Sena se hanyetsa ho tsoaloa hangata, ho bolelang hore kholofalo e itšetlehile ka libe tsa bophelo ba nako e fetileng. Ntlha ea hore ha ho motho ea ka etsang sebe pele a tsoaloa e ile ea boela ea hlakisoa ke Pauluse ha a ngola ka Esau le Jakobo hore ‘ba ne ba e-so ho tsoaloe, ba e-so ho etse botle, leha e le bobe.’—Ba-Roma 9:11.
Tsoho ea Bafu, Eseng ho Tsoaloa Hangata
Le hoja Bibele e sa tšehetse thuto ea ho tsoaloa hangata, ha ho motho ea lokelang ho ikutloa a khathetse matla. Molaetsa oa Bibele o fana ka ntho e khothatsang ho feta khopolo ea ho tsoaloa hape lefatšeng le tletseng ho kula, masoabi, bohloko, le lefu. ’Me hase hore feela seo Bibele e se rutang sea khothatsa empa ke ’nete, Lentsoe la Molimo ka boeena.
Pauluse o ile a tsebahatsa thuto eo e khothatsang ka tsela ena: “Ke na le tšepo ho Molimo, . . . ea hore tsoho ea bafu e tla ba teng, ea ba lokileng le ea ba sa lokang.” Lentsoe “tsoho,” kapa mofuta o itseng oa lona, le hlaha ka makhetlo a fetang a 50 Mangolong a Segerike a Bakreste, ’me Pauluse o bua ka eona e le thuto ea motheo ea tumelo ea Bokreste.—Liketso 24:15; Ba-Heberu 6:1, 2.
Ka ho hlakileng, ho tsoha bafung ho bolela hore lefu le teng. Ka Bibeleng ha ho moo u tla fumana ho angoa hore motho o na le sephefumolohi se sa shoeng. Haeba motho a ne a e-na le sephefumolohi se sa shoeng se arohanang le ’mele ha a shoa ’me se e-ea ’nģalong ea ka ho sa feleng leholimong kapa liheleng kapa se tsoaloa hangata, ho ne ho ke ke ha hlokahala tsoho ea bafu. Ka lehlakoreng le leng, litemana tse ka bang lekholo tsa Bibele li bontša hore sephefumolohi sa motho, ho fapana le ho se shoe, sea shoa le ho ka timetsoa. Ka makhetlo Bibele e bua ka lefu e le ho fapana le bophelo, ke hore, ho se be teng ha ho bapisoa le ho ba teng.
Lefu, kapa ho se be teng, e ne e le kotlo ea sebe sa Adama le Eva khahlanong le Molimo. E ne e le kotlo, eseng tsela ea ho kena bophelong ba ho se shoe sebakeng se itseng. Molimo o ile a bolela ka ho hlaka hore ba ne ba tla boela moo ba neng ba tsoa teng—leroleng la lefatše: ‘Leo u ntšitsoeng ho lona; hobane u lerōle, ’me u tla khutlela lerōleng.’ (Genese 3:19) Ba ne ba se na liphefumolohi tse sa shoeng pele ba etsoa ke Molimo ’me ba behoa lefatšeng, tšimong ea Edene, ’me ba ne ba se na tsona ka mor’a hore ba shoe.
Ho tsosoa bafung ho tšoantšoa le ho tsosoa borokong, kapa phomolong. Ka mohlala, Jesu o ile a re ka Lazaro eo a neng a il’o mo tsosa bafung: “Lazaro . . . o robetse; empa ke ea mo tsosa borokong.” (Johanne 11:11) Mabapi le moprofeta Daniele, rea bala: “U tla phomola, ’me u tla tsohela lefa la hao qetellong ea matsatsi.”—Daniele 12:13.
Bophelo bo sa Feleng Lefatšeng
Phello ea ba tsosoang bafung e tla ba efe? Bibele e bua ka mefuta e ’meli ea tsoho ea bafu—ea leholimo le ea lefatše. Tsoho ea lefatše e tla ba phello ea bongata ba ba kileng ba phela le ho shoa. Ke ba fokolang feela ba nang le tsoho ea leholimo, ho busa le Kreste ’Musong oa leholimo oa Molimo. (Tšenolo 14:1-3; 20:4) Tsoho ea lefatše e tla qala neng? E tla qala ka mor’a hore tsamaiso ena e khopo e felisoe ke Molimo le hore “lefatše le lecha,” sechaba se secha sa batho se lokileng, le phethahale.—2 Petrose 3:13; Liproverbia 2:21, 22; Daniele 2:44.
‘Lefatšeng le lecha,’ ho ke ke ha hlola ho e-ba le ho kula kapa ho utloa bohloko. Esita le lefu le ke ke la hlola le e-ba teng empa le tla nkeloa sebaka ke tebello ea bophelo bo sa feleng. “Molimo o tla hlakola meokho eohle mahlong a bona; lefu ha le sa tla hlola le e-ba teng; ’me ha ho sa tla ba masoabi, leha e le ho bokolla, kapa bohloko; hobane tsa pele li fetile.” (Tšenolo 21:4) Hape, mopesaleme o ile a bolela esale pele: “Ba lokileng ba tla ja lefa la lefatše, ’me ba tla hlola ho lona ka ho sa feleng.” (Pesaleme ea 37:29) Ka ho tšoanang, Jesu o ile a re: “Ho lehlohonolo ba bonolo; hobane ba tla ja lefa la lefatše.”—Mattheu 5:5.
Bapisa litšepiso tseo tse hlollang tsa Molimo le thuto ea ho tsoaloa hangata. Ho latela khopolo eo, ho nahanoa hore u khutla nako le nako ho phela tsamaisong eona ena ea lintho e bolileng ea khale. Seo se ne se tla bolela hore u tsoela pele u likolohiloe ke bokhopo, ho utloa bohloko, ho kula, le ho shoa ka potoloho e batlang e sa khaotse. Eo ke tebello e se nang thuso hakaakang!
Kahoo, Bibele e araba lipotso tsena, Na u kile ua phela? le, Na u tla phela hape? ka tsela ena: Che, ha u e-s’o ka u phela bophelo bo bong haese ba hona joale. Empa ho ka khoneha hore u etse bophelo ba hao e be ba nako e telele, ka sebele, ba ka ho sa feleng. Kajeno, ‘mehleng ena ea qetello’ ea tsamaiso ena ea lintho, u ka ba le tšepo ea ho pholoha bofelo ba lefatše lena le ho kena lefatšeng le lecha la Molimo ka ntle le ho shoa. (2 Timothea 3:1-5; Tšenolo 7:9-15) Kapa haeba u e-shoa pele lefatše le lecha la Molimo le tla, u ka ba le tšepo ea ho tsosetsoa bophelong bo sa feleng lefatšeng la paradeise.—Luka 23:43.
Haeba u bonahatsa tumelo ho Jesu, ho sa tsotellehe hore na ho ka etsahala eng, mantsoe a Jesu ho Maretha ha khaitseli ea hae Lazaro e ne e shoele a boetse a sebetsa ho uena: “Ke ’na tsoho le bophelo; ea lumelang ho ’na, leha a shoele, o tla phela. E mong le e mong ea phelang, ’me a lumetse ho ’na, a ke ke a shoa le ka mohla o le mong.”—Johanne 11:25, 26.
[Ntlha e Qolotsoeng e leqepheng la 23]
dama o ne a se na sephefumolohi se sa shoeng empa o ile a boela leroleng ha a shoa
[Setšoantšo se leqepheng la 24]
Lentsoe la Molimo le ruta tsoho ea bafu, eseng ho tsoaloa hangata