“Li Tseba Lentsoe la Hae”
“JEHOVA ke molisa oa ka.” Mantsoe ana ke a qalang Pesaleme ea 23. Mangolo a boetse a bapisa Jehova Molimo le molisa boprofeteng ba Esaia, bo reng: “O tla alosa mohlape oa hae ka mokhoa oa molisa, o tla bokella likonyana matsohong a hae, a li jare sefubeng sa hae; le tse anyesang, a li sotetse butle.”—Esaia 40:11.
Ka ho tšoanang, Jesu Kreste o tšoantšoa le molisa. O itse: “Ke ’na molisa ea molemo; molisa ea molemo o beela linku bophelo ba hae.” (Johanne 10:11) Jesu o itse “linku li utloa lentsoe [la molisa], ’me o bitsa linku tsa hae ka mabitso a tsona, a li ise kantle.” O ile a phaella ka ho re ‘linku li latela [molisa], kahobane li tseba lentsoe la hae. Osele li ke ke tsa mo latela, empa li ka ’malehela, kahobane li sa tsebe lentsoe la osele.’—Johanne 10:2-5.
Jehova Molimo le Mora oa hae, Jesu Kreste ba pheletse setšoantšo se bontšitsoeng mangolong a ka holimo. Ba tšoara linku tsa bona tsa tšoantšetso ka bonolo le tlhokomelo e lerato. Ka lebaka leo, ba kang linku ba ikutloa ba ratoa, ba sireletsehile, ’me ba sirelelitsoe.
Kamano ena ka tšoanelo e tšoantšoa le ea linku tsa sebele le molisa oa tsona. Khale ka 1831, John Hartley o ile a ngola seo a se lemohileng tabeng ena. O ile a bolela ka ho khethehileng hore e ne e le tloaelo Greece hore balisa ba rehe linku tsa bona mabitso. Linku li ne li arabela lentsoe la molisa ha li bitsoa ka mabitso. Lilemo tse ka bang 51 hamorao, ka 1882, J. L. Porter o ile a lemoha se tšoanang. O ile a bona ka boeena ha balisa “ba bua . . . ka ho tlerola ka mokhoa o khethehileng” oo linku li neng li o arabela ka ho latela balisa ka boikokobetso. Ka selemo sona seo William M. Thomson o ile a ngola ka liteko tse pheta-phetoang tse ileng tsa tiisa hore linku li ka rutoa ho latela molisa oa tsona le ho lemoha lentsoe la hae.
Na kamano ee e khethehileng pakeng tsa balisa le linku tsa bona e ile ea lemohuoa linakong tsa morao tjee? E. Tokollong ea September 1993 ea National Geographic, Robyn Davidson oa Australia eo e leng oa-ha-malekelle o ile a ngola se latelang ka barui ba mehlape ba Marabari a India leboea-bophirimela: “Molisa ka mong o na le mekhoa ea ho bitsa e fapaneng hanyenyane, ho feto-fetoloa ha mololi o itseng. Ho na le mokhoa oa ho bitsa oa hoseng oa ho tsoa, mokhoa oa ho bitsa oa hore linku li e’o noa, joalo-joalo. Monna ka mong o tseba linku tsa hae ’me le linku lia mo tseba, ’me mohlape oo oa hae o tla ikarola mohlapeng o moholo ’me o mo sale morao hoseng.”
Ha ho pelaelo hore Jesu o ile a lemoha se hlalositsoeng ke bahahlauli bana ba bane bao ho sa tsoa buuoa ka bona. Seo a se lemohileng se ekelitse ’nete setšoantšong sa hae sa linku tse tsebang lentsoe la hae. Na u e ’ngoe ea linku tsa Jesu? Na u tseba lentsoe la hae ’me ua le mamela? Haeba u lemoha lithuto tsa hae hape u li amohela hore ke ’nete le haeba u mamela litaelo tsa hae ’me u latela tataiso ea hae ha u rapela Jehova, ke moo u ka latsoang bolisa bo lerato le bo bonolo ba Jehova Molimo le Mora oa hae, Jesu Kreste.—Johanne 15:10.