Khaolo ea 6

Mosuoe e Moholo o ne a Sebeletsa Batho ba Bang

NA UA rata ha motho e mong a u etsetsa ntho e ntle?— Batho ba bang baa rata ha motho e mong a ba etsetsa ntho e ntle. Kaofela ha rōna rea rata. Mosuoe e Moholo o ne a tseba seo, ’me kamehla o ne a etsetsa batho lintho. O ile a re: ‘Ha kea tlela ho sebeletsoa, empa ho sebeletsa.’—Matheu 20:28.

Kahoo haeba re batla ho tšoana le Mosuoe e Moholo, re lokela ho etsa’ng?— Re lokela ho sebeletsa ba bang. Re lokela ho ba etsetsa lintho tse ntle. Ke ’nete hore batho ba bangata ha ba etse sena. Ha e le hantle, batho ba bangata ba batla ho lula ba sebeletsoa ke ba bang. Balateli ba Jesu ba kile ba ikutloa ka tsela ena ka nako e ’ngoe. E mong le e mong oa bona o ne a batla ho ba ea hlahelletseng kapa oa bohlokoa ho feta ba bang.

Ka letsatsi le leng Jesu o ne a tsamaea le barutuoa ba hae, ke hore balateli ba hae. Ka mor’a hore ba fihle motseng oa Kapernauma, o haufi le Leoatle la Galilea, bohle ba kena ka tlung. Ha ba le ka tlung Jesu a ba botsa: “Le ne le phehisana ka’ng tseleng?” Ba ile ba thōla hobane ha ba le tseleng ba ne ba phehisana ka hore na ke mang e moholo har’a bona.—Mareka 9:33, 34.

Jesu o ne a tseba hore ho fosahetse hore leha e le ofe oa barutuoa ba hae a nahane hore o moholo ho ba bang. Kahoo, joalokaha re ithutile khaolong e qalang ea buka ena, o ile a emisa ngoana e monyenyane har’a bona ’me a ba bolella hore ba lokela ho ikokobetsa ho tšoana le ngoana eo. Empa ha baa ka ba ithuta. Nakoana pele a e-shoa, Jesu o ile a ba ruta thuto e ’ngoe eo ba neng ba ke ke ba hlola ba e lebala. O ile a etsa’ng?—

Eitse ha ba ntse ba le hammoho ba e-ja, Jesu a tloha tafoleng ’me a hlobola liaparo tsa hae tsa ka ntle. A nka thaole, a itlama ka eona thekeng. A ntan’o nka basekomo a tšela metsi ka har’a eona. E tlameha ebe balateli ba hae kaofela ba ile ba ipotsa hore na o tlil’o etsa’ng. Ba ntse ba shebeletse, Jesu a ea ho e mong le e mong oa bona, a khumama, ’me a ba hlatsoa maoto. A ntan’o ba phumola maoto ka thaole. Ak’u nahane feela ka seo! U ka be u entse’ng ha u ne u le teng moo? U ne u tla ikutloa joang?—

Balateli ba hae ba ile ba nahana hore ha hoa lokela hore Mosuoe e Moholo a ba sebeletse ka tsela eo. Ba ile ba ikutloa ba soabile. Ha e le hantle, Petrose o ne a sa batle ha Jesu a mo etsetsa tšebeletso ena e tlaase. Empa Jesu o ile a re ke habohlokoa hore a e etse.

Kajeno ha hoa tloaeleha hore re hlatsoane maoto. Empa sena se ne se etsoa ha Jesu a le lefatšeng. Na u tseba lebaka la seo?— Ke hobane naheng eo Jesu le balateli ba hae ba neng ba phela ho eona, batho ba ne ba roala meqathatso e bulehileng ba sa kenya letho maotong. Joale ha ba ne ba tsamaea litseleng tsa mobu, maoto a bona a ne a koaheloa ke lerōle. E ne e le ho bontša mosa ho hlatsoa lerōle maotong a motho ea etetseng lapeng.

Empa lekhetlong lena ho ne ho se le ea mong oa barutuoa ba Jesu ea ithaopelang ho hlatsoa ba bang maoto. Kahoo Jesu a ba hlatsoa maoto ka boeena. Ka ho etsa sena, Jesu o ile a ruta balateli ba hae thuto ea bohlokoa. Ba ne ba lokela ho ithuta thuto ena. ’Me ke thuto eo le rōna kajeno re lokelang ho ithuta eona.

Na ua tseba hore na thuto eo ke efe?— Ka mor’a hore Jesu a apare liaparo tsa hae tsa ka ntle ’me a khutlele tafoleng, o ile a hlalosa: “Na le tseba seo ke se entseng ho lōna? Le mpitsa, ‘Mosuoe,’ le, ‘Morena,’ ’me le bua ka nepo, etsoe ke eena. Ka hona, haeba ’na, le hoja ke le Morena le Mosuoe, ke hlatsoitse maoto a lōna, le lōna le tšoanela ho hlatsoana maoto.”—Johanne 13:2-14.

Mona Mosuoe e Moholo o ile a bontša hore o batla hore balateli ba hae ba sebeletsane. O ne a sa batle hore ba inahane bobona feela. O ne a sa batle hore ba nahane hore ke ba bohlokoa hoo ba bang ba lokelang ho lula ba ba sebeletsa. O ne a batla hore ba ithaopele ho sebeletsa ba bang.

Na eo hase thuto ea bohlokoa?— Na u tla tšoana le Mosuoe e Moholo ’me u sebeletse ba bang?— Kaofela ha rōna re ka etsetsa ba bang lintho tse itseng. Sena se tla ba thabisa. Empa habohlokoa le ho feta, se tla thabisa Jesu le Ntate oa hae.

Ha ho thata ho sebeletsa batho ba bang. Ha u ka sheba, u tla bona lintho tse ngata tseo u ka li etsetsang ba bang. Ak’u nahane: Na ho na le ntho leha e le efe eo u ka e etsang ho thusa ’mè oa hao? Ua tseba hore o etsetsa uena le ba bang kaofela lapeng lintho tse ngata. Na u ka mo thusa?— Ke hobane’ng ha u sa mo botse hore na u mo thuse ka’ng?

Mohlomong u ka lokisa tafole pele ba lelapa ba e-ja. Kapa mohlomong u ka phutha lijana tse litšila tafoleng ha ba lelapa ba qeta ho ja. Bana ba bang ba qhala lithōle letsatsi le leng le le leng. Ka ho etsa ntho leha e le efe, u tla be u sebeletsa ba bang, feela joalokaha Jesu a entse.

Na u na le banab’eno ba banyenyane bao u ka ba sebeletsang? Hopola hore Jesu, Mosuoe e Moholo, o ile a sebeletsa balateli ba hae. Ha u sebeletsa banab’eno ba banyenyane, u tla be u etsisa Jesu. U ka ba etsetsa eng?— Mohlomong u ka ba thusa hore ba ithute ho phutha lintho tseo ba bapalang ka tsona ha ba qetile ho bapala. Kapa mohlomong u ka ba thusa ho apara. Kapa mohlomong u ka ba thusa ho alola bethe. Na ho na le ntho leha e le efe eo u nahanang hore u ka ba etsetsa eona?— Ba tla u ratela ho ba etsetsa lintho tseo, feela joalokaha balateli ba Jesu ba ne ba mo rata.

Sekolong le teng u ka sebeletsa batho ba bang. U ka ’na ua sebeletsa liithuti-’moho le uena kapa tichere ea hao. Haeba e mong a liha libuka, u tla be u bontša mosa ha u mo thusa ho li thonaka. U ka ’na ua ithaopela ho hloekisa boto kapa ho etsetsa tichere ea hao ntho e itseng. Esita le ho bulela motho e mong monyako ke ketso e mosa.

Ka linako tse ling, re tla fumana hore batho ha ba lebohe seo re ba etsetsang sona. Na u nahana hore see se lokela ho etsa hore re khaotse ho etsa se lokileng?— Che! Batho ba bangata ha baa ka ba leboha Jesu ka mesebetsi ea hae e metle. Empa seo ha sea ka sa mo thibela ho etsa se setle.

Kahoo a re se keng ra tlohela ho sebeletsa batho ba bang. A re hopoleng Mosuoe e Moholo, Jesu, ’me re leke ho latela mohlala oa hae kamehla.

Bakeng sa mangolo a mang a eketsehileng tabeng ea ho thusa batho ba bang, bala Liproverbia 3:27, 28; Baroma 15:1, 2; le Bagalata 6:2.

[Setšoantšo se leqepheng la 37]

Balateli ba Jesu ba ne ba phehisana ka’ng?

[Setšoantšo se leqepheng la 39]

Jesu o ile a ruta balateli ba hae thuto efe?

[Litšoantšo tse leqepheng la 40, 41]

U ka etsa’ng ho thusa ba bang?