“Le be Sebete! Ke Hlōtse Lefatše”

LETSATSI leo Jesu a shoeleng ka lona—e leng la la 14 khoeling ea Bajuda ea Nisane—le qalile ha letsatsi le likela ka Labone la la 31 March, 33 C.E. Shoalaneng eo, Jesu le baapostola ba hae ba ile ba bokana ka kamoreng e ka holimo Jerusalema ho keteka Paseka. Ha a ntse a lokisetsa “hore a tlohe lefatšeng lena ho ea ho Ntate,” Jesu o ile a bontša hore o rata baapostola ba hae ho isa bofelong. (Johanne 13:1) Ka tsela efe? Ka ho ba ruta lithuto tsa bohlokoa, ’me ka tsela eo a ba hlomella bakeng sa se larileng ka pele.

Ha bosiu bo ntse bo roalellana, Jesu o ile a re ho barutuoa ba hae: “Le be sebete! Ke hlōtse lefatše.” (Johanne 16:33) O ne a bolela’ng ka mantsoe ao a sebete hakaale? Ka tekanyo e itseng o ne a bolela sena: ‘Bobe bo leng teng lefatšeng ha boa etsa hore ke hloname kapa ke iphetetse. Ha kea lumella lefatše hore le etse hore ke tšoane le lona. Le lōna le ka etsa se tšoanang.’ Seo Jesu a ileng a se ruta baapostola ba hae ba tšepahalang lihoreng tseo tsa ho qetela a phela lefatšeng se ne se tla ba thusa hore le bona ba hlōle lefatše.

Ke mang ea ka latolang hore bobe bo totile kajeno lefatšeng? Re itšoara joang ha ho e-ba le ho hloka toka le pefo e se nang kelello? Na lintho tsee li etsa hore re koetle lehloeo kapa re batle ho iphetetsa? Na re susumetsoa ke ho hlepha ho atileng ha boitšoaro? Ho phaella moo ha rea phethahala ebile re baetsalibe, ka lebaka leo re loantša lintho tse peli: e leng lefatše le khopo le litakatso tse mpe tseo re nang le tsona. Na ka sebele re ka lebella ho hlōla ntle ho thuso ea Molimo? Re ka fumana thuso ea hae joang? Re lokela ho sebeletsa ho ba le makhabane afe a tla re thusa ho loantša litakatso tsa nama? Ho fumana likarabo, a re nahaneng ka seo Jesu a ileng a se ruta barutuoa ba hae ba ratoang letsatsing la ho qetela a phela lefatšeng.

Hlōla Boikakaso ka ho Ikokobetsa

Ka mohlala, nahana ka bothata ba boikakaso, kapa boikhohomoso. Ha e bua ka bona, Bibele e re: “Boikakaso bo etella ho oa pele, ’me moea o ikhohomosang o etella ho khoptjoa pele.” (Liproverbia 16:18) Mangolo a boetse aa re eletsa a re: “Haeba leha e le mang a inahana hore ke ho hong ha e se letho, o thetsa kelello ea hae.” (Bagalata 6:3) E, boikakaso boa senya ’me boa thetsa. Re tla be re le bohlale ha re ka hloea “boiphahamiso le boikakaso.”—Liproverbia 8:13.

Na baapostola ba Jesu ba ne ba e-na le bothata ba ho iphahamisa le ho ikakasa? Ka lekhetlo le leng ba ile ba phehisana ka hore na e moholo ke mang. (Mareka 9:33-37) Lekhetlong le leng hape, Jakobo le Johanne ba ile ba kōpa hore ba fuoe maemo a phahameng ’Musong. (Mareka 10:35-45) Jesu o ne a lakatsa ho thusa barutuoa ba hae hore ba lahle mokhoa ona. Ka hona, ha ba ntse ba e-ja Paseka, o ile a ema, a itlama ka thaole ’me a hlatsoa maoto a barutuoa ba hae. O ile a totobatsa thuto eo a neng a batla hore ba ithute eona. Jesu o ile a re: “Haeba ’na, le hoja ke le Morena le Mosuoe, ke hlatsoitse maoto a lōna, le lōna le tšoanela ho hlatsoana maoto.” (Johanne 13:14) Boikakaso bo lokela ho nkeloa sebaka ke boikokobetso.

Leha ho le joalo, ha ho bonolo ho hlōla boikakaso. Hamorao shoalaneng eo ka mor’a hore Jesu a leleke Judase Iskariota, ea neng a le haufi le ho mo eka, ho ile ha tsoha khang e matla har’a baapostola ba 11. E ne e le khang ea eng? Khang ea hore na ke mang ho bona eo ho neng ho bonahala eka ke e moholo! Ho e-na le ho ba omanya, Jesu o ile a boela a hatisa ka mamello bohlokoa ba ho sebeletsa ba bang. O ile a re: “Marena a lichaba a rena ka thata holim’a tsona, le ba nang le matla holim’a tsona ba bitsoa Ba Tsoelang Molemo. Leha ho le joalo, ha lea lokela ho ba ka tsela eo. Empa e moholo har’a lōna a ke a be joaloka e monyenyane, le ea ka sehloohong a ke a be joaloka ea sebeletsang.” O ile a ba hopotsa ka mohlala oa hae ’me a phaella a re: “’Na ke har’a lōna joaloka ea sebeletsang.”—Luka 22:24-27.

Na baapostola ba ile ba utloisisa? Ho bonahala eka ho joalo. Lilemo hamorao, moapostola Petrose o ile a ngola a re: “Kaofela ha lōna le be le kelello e joalo, le bontša ho utloelana bohloko, le e-na le boikutlo bo mofuthu ba bara ba motho, le e-na le qenehelo e bonolo, le ikokobelitse kelellong.” (1 Petrose 3:8) Ke habohlokoa hakaakang hore le rōna re hlōle boikakaso ka ho ikokobetsa! Re tla be re le bohlale ha re ka qoba ho lelekisa botumo, matla, kapa maemo. Bibele e re: “Molimo o hanyetsa ba ikhohomosang, empa o fana ka mosa o sa tšoanelang ho ba ikokobetsang.” (Jakobo 4:6) Ka ho tšoanang, maele a boholo-holo a bohlale a re: “Phello ea boikokobetso le ho tšaba Jehova ke maruo le khanya le bophelo.”—Liproverbia 22:4.

U ka Hlōla Lehloeo Joang?

Nahana hape ka mokhoa o mong o tloaelehileng lefatšeng—e leng lehloeo. Ebang le bakoa ke tšabo, ho hloka tsebo, leeme, khatello, ho hloka toka, bochaba, bomorabe, kapa khethollo ea morabe, ho bonahala lehloeo le le hohle. (2 Timothea 3:1-4) Le mehleng ea Jesu, lehloeo le ne le jele setsi. Bajuda ba ne ba khesa balekhetho. Bajuda ba ne ba se na litšebelisano le Basamaria. (Johanne 4:9) ’Me Bajuda ba ne ba hloile Balichaba kapa batho bao e seng Bajuda. Leha ho le joalo, qetellong borapeli boo Jesu a neng a tla bo theha bo ne bo tla amohela batho ba lichaba tsohle. (Liketso 10:34, 35; Bagalata 3:28) Ka hona, ka lerato o ile a fa barutuoa ba hae ntho e ncha.

Jesu o ile a re: “Ke le fa taelo e ncha, hore le ratane; le lōna le ratane feela joalokaha ke le ratile.” Ba ne ba lokela ho ithuta ho bontša lerato lena, kaha o ile a tsoela pele a re: “Bohle ba tla tseba ka sena hore le barutuoa ba ka, haeba le e-na le lerato har’a lōna.” (Johanne 13:34, 35) Taelo ena e ne e le ncha hobane e ne e feta feela ho rata “oa heno joalokaha u ithata.” (Levitike 19:18) Ka tsela efe? Jesu o ile a hlakisa taba ena, a re: “Ena ke taelo ea ka, hore le ratane feela joalokaha ke le ratile. Ha ho ea nang le lerato le leholo ho lena, hore motho a nehelane ka moea oa hae molemong oa metsoalle ea hae.” (Johanne 15:12, 13) Ho ne ho hlokahala hore ba ikemisetse ho shoelana le ho shoela ba bang.

Batho ba sa phethahalang ba ka etsa joang hore ba hloke lehloeo? Ka hore ba le nkele sebaka ka ho ba le lerato le bontšang boitelo. Batho ba limilione ba tšepahalang ba tsoang merabeng eohle, meetlong eohle, malumeling ’ohle le mekheng eohle ea lipolotiki ba etsa sona seo. Hona joale ba kopane mokhatlong oa lefatše lohle oa bara ba motho oa Lipaki Tsa Jehova o momahaneng le o se nang lehloeo. Ba mamela mantsoe a bululetsoeng a moapostola Johanne a reng: “E mong le e mong ea hloileng mor’abo ke ’molai, ’me lea tseba hore ha ho ’molai eo bophelo bo sa feleng bo lutseng ho eena.” (1 Johanne 3:15) Bakreste ba ’nete ha ba hane feela ho kopanela lintoeng empa ba boetse ikitlaelletsa ho bontšana lerato.

Leha ho le joalo, re lokela ho ikutloa joang ka bao e seng balumeli-’moho le rōna le ba ka ’nang ba re hloea? Ha Jesu a leketlile thupeng o ile a rapella babolai ba hae a re: “Ntate, u ba tšoarele, kaha ha ba tsebe seo ba se etsang.” (Luka 23:34) Ha banna ba tletseng lehloeo ba tlepetsa Setefane ka majoe ’me ba mo bolaea, mantsoe a hae a ho qetela a ile a re: “Jehova, u se ke ua ba balla sebe sena.” (Liketso 7:60) Jesu le Setefane ba ne ba lakaletsa batho molemo, esita le ba ba hloileng. Ba ne ba sa koetla lehloeo lipelong tsa bona. Bibele ea re eletsa e re: “A re sebetseng se molemo ho bohle.”—Bagalata 6:10.

‘Mothusi oa ka ho sa Feleng’

Ha seboka sa Jesu le baapostola ba hae ba 11 ba tšepahalang se ntse se tsoela pele, o ile a ba bolella hore haufinyane a ke ke a hlola a e-ba le bona. (Johanne 14:28; 16:28) Empa o ile a ba tiisetsa a re: “Ke tla kōpa Ntate ’me o tla le fa mothusi e mong hore a be le lōna ka ho sa feleng.” (Johanne 14:16) Mothusi enoa ea tšepisitsoeng ke moea o halalelang oa Molimo. O ne o tla ba ruta lintho tse tebileng tsa Mangolo ’me o ba hopotse seo Jesu a ileng a ba ruta sona nakong ea tšebeletso ea hae lefatšeng.—Johanne 14:26.

Moea o halalelang o ka re thusa joang kajeno? O ka re thusa kahobane Bibele ke Lentsoe la Molimo le bululetsoeng. Banna ba ileng ba sebelisoa ho profeta le ho ngola Bibele ba ne “ba khannoa ke moea o halalelang.” (2 Petrose 1:20, 21; 2 Timothea 3:16) Ha re ithuta Mangolo ’me re sebelisa seo re ithutang sona, re fumana tsebo, bohlale, kutloisiso, temohisiso, tlhalohanyo le matla a ho nahana. Na see ha se etse hore re lule re le malala-a-laotsoe ho tobana le likhatello tsa lefatše le khopo?

Moea o halalelang ke mothusi ka tsela e ’ngoe hape. Moea o halalelang oa Molimo ke matla a re susumelletsang ho etsa botle, a nolofalletsang ba susumetsoang ke oona hore ba bontše litšoaneleho tsa bomolimo. Bibele e re: “Litholoana tsa moea ke lerato, thabo, khotso, tiisetso, mosa, molemo, tumelo, bonolo, boitšoaro.” Na aa hase ’ona makhabane ao re a hlokang hore re hlōle litakatso tsa nama mabapi le boitšoaro bo bobe, ho qabana, poulelo, ho tlakoloha ka bohale le lintho tse ling tse tšoanang le tsona?—Bagalata 5:19-23.

Ka ho itšetleha ka moea oa Molimo, le rōna re ka fumana “matla a fetang se tloaelehileng” ho sebetsana le bothata bofe kapa bofe kapa mahlomola. (2 Bakorinthe 4:7) Le hoja moea o halalelang o ke ke oa tlosa liteko, ka sebele o ka re thusa ho li mamella. (1 Bakorinthe 10:13) Moapostola Pauluse o ile a ngola a re: “Bakeng sa lintho tsohle ke na le matla ka lebaka la ea mphang bonatla.” (Bafilipi 4:13) Molimo o fana ka matla a joalo ka moea oa hae o halalelang. Re leboha moea o halalelang hakaakang! O tšepisoa ba ‘ratang Jesu ’me ba boloka litaelo tsa hae.’—Johanne 14:15.

“Le Lule Leratong la Ka”

Bosiung ba hae ba ho qetela, Jesu o ile a boela a re ho baapostola ba hae: “Ea nang le litaelo tsa ka ’me a li boloka, eo ke eena ea nthatang. Ea nthatang le eena o tla ratoa ke Ntate.” (Johanne 14:21) O ile a ba khothatsa a re: “Le lule leratong la ka.” (Johanne 15:9) Ho lula leratong la Ntate le la Mora ho re thusa joang ntoeng ea rōna khahlanong le mekhoa ea boetsalibe le lefatše le khopo?

Na ka sebele re ka hlōla mekhoa e mebe haeba re se na boikemisetso bo matla ba ho etsa joalo? Ke eng e ka re thusang ho feta takatso ea ho ba le kamano e ntle le Jehova Molimo le Mora oa hae? Ernesto,a mohlankana ea ileng a loana ka thata ho tsoela boitšoaro bo bobe boo esaleng a bo tloaela a sa le mocha, o re: “Ke ne ke batla ho thabisa Molimo, ’me ke ile ka ithuta Bibeleng hore ha a rate mokhoa oo ke neng ke phela ka oona. Kahoo ke ile ka etsa qeto ea ho fetoha hore ke mamele melao ea Molimo. Letsatsi le letsatsi ke ne ke loana le mehopolo e mebe le e litšila eo ke neng ke ntse ke e-ba le eona. Empa ke ne ke ikemiselitse ho hlōla ntoa ena, ’me ke ile ka rapela ke sa phetse hore Molimo a nthuse. Ka mor’a lilemo tse peli ntoa boholo e ne e felile, le hoja ke ntse ke itšoara ka thata.”

Tabeng ea ntoa eo re e loanang le lefatše, nahana ka thapelo e koalang eo Jesu a ileng a e etsa pele a tloha kamoreng e ka holimo Jerusalema. Molemong oa barutuoa ba hae, o ile a rapela Ntat’ae a re: “Ha ke u kōpe hore u ba ntše lefatšeng, empa ke kōpa hore u ba lebele ka lebaka la ea khopo. Hase karolo ea lefatše, feela joalokaha ke se karolo ea lefatše.” (Johanne 17:15, 16) Ao ke mantsoe a khothatsang hakaakang! Jehova o lebela bao a ba ratang ’me oa ba matlafatsa ha ba lula ba ikarotse lefatšeng.

“Bontšang Tumelo”

Ho boloka litaelo tsa Jesu ka sebele ho ka re thusa hore re hlōle lefatše le khopo le mekhoa ea boetsalibe. Leha ho le joalo, le hoja tlhōlo ena e le ea bohlokoa, e ke ke ea felisa lefatše kapa sebe seo re se futsitseng. Empa ha rea lokela ho nyahama.

Bibele e re: “Lefatše lea feta ’me ho joalo le ka takatso ea lona, empa ea etsang thato ea Molimo o hlola ka ho sa feleng.” (1 Johanne 2:17) Jesu o ile a nehela bophelo ba hae ho lokolla “e mong le e mong ea bontšang tumelo ho eena” sebeng le lefung. (Johanne 3:16) Ha tsebo eo re nang le eona ka thato ea Molimo le merero ea hae e ntse e hōla, a re eleng hloko keletso ea Jesu e reng: “Bontšang tumelo ho Molimo, le bontše tumelo le ho ’na.”—Johanne 14:1.

[Mongolo o botlaaseng ba leqephe]

[Setšoantšo se leqepheng la 6, 7]

Jesu o ile a khothatsa baapostola ba hae a re: “Le lule leratong la ka”

[Setšoantšo se leqepheng la 7]

Haufinyane re tla lokolloa sebeng le liphellong tsa sona