Kreste o Etella Pele Phutheho ea hae

“Bonang! ke na le lōna ka matsatsi ’ohle ho fihlela qetellong ea tsamaiso ea lintho.”—MATHEU 28:20.

1, 2. (a) Jesu ea tsositsoeng o ile a tšepisa barutuoa ba hae eng ha a ba fa taelo ea ho etsa barutuoa? (b) Jesu o ile a etella pele phutheho ea pele ea Bokreste ka matla joang?

PELE a nyolohela leholimong, Moeta-pele oa rōna ea tsositsoeng, Jesu Kreste, o ile a itlhahisa ho barutuoa ba hae ’me a re: “Ke filoe matla ’ohle leholimong le lefatšeng. Ka hona e-eang ’me le etse batho ba lichaba tsohle barutuoa, le ba kolobetse ka lebitso la Ntate le la Mora le la moea o halalelang, le ba rute ho boloka lintho tsohle tseo ke le laetseng tsona. ’Me, bonang! ke na le lōna ka matsatsi ’ohle ho fihlela qetellong ea tsamaiso ea lintho.”—Matheu 23:10; 28:18-20.

² Jesu o ile a fa barutuoa ba hae mosebetsi ona o pholosang bophelo oa ho etsa barutuoa ba eketsehileng a ba a ba tšepisa hore o tla ba le bona. Histori ea Bokreste ba pele, joalokaha e tlalehiloe bukeng ea Bibele ea Liketso, e bontša ka tieo hore Kreste o ile a sebelisa matla ao a a filoeng ho etella pele phutheho e neng e sa tsoa thehoa. O ile a romela “mothusi” ea tšepisitsoeng—e leng moea o halalelang—hore a matlafatse balateli ba hae le hore a tataise boiteko ba bona. (Johanne 16:7; Liketso 2:4, 33; 13:2-4; 16:6-10) Jesu ea tsositsoeng o ile a tšehetsa barutuoa ba hae ka mangeloi a taolong ea hae. (Liketso 5:19; 8:26; 10:3-8, 22; 12:7-11; 27:23, 24; 1 Petrose 3:22) Ho feta moo, Moeta-pele oa rōna o ile a fana ka tataiso phuthehong ka ho lokisetsa hore banna ba tšoanelehang ba sebeletse e le sehlopha se busang.—Liketso 1:20, 24-26; 6:1-6; 8:5, 14-17.

 3. Ho tla tšohloa lipotso life sehloohong see?

³ Leha ho le joalo, mehleng ea rōna, e leng ‘qetellong ea tsamaiso ea lintho,’ teng ho joang? Kajeno Jesu Kreste o etella pele phutheho ea Bokreste joang? Hona re ka bontša joang hore re amohela boeta-pele boo?

Ke Mong’a Lekhoba le Tšepahalang

 4. (a) Ke bo-mang ba etsang “lekhoba le tšepahalang le le masene”? (b) Mong’a lekhoba o le file boikarabelo bofe?

⁴ Ha Jesu a fana ka boprofeta mabapi le pontšo ea boteng ba hae, o ile a re: “Ha e le hantle ke mang eo e leng lekhoba le tšepahalang le le masene leo mong’a lona a le behileng hore le okamele bahlanka ba hae ba ntlo, ho ba fa lijo tsa bona ka nako e tšoanetseng? Ho thaba lekhoba leo haeba mong’a lona ha a fihla a le fumana le etsa joalo. Kannete ke re ho lōna, O tla le beha hore le okamele lintho tsohle tsa hae.” (Matheu 24:45-47) Jesu Kreste, “mong’a” lekhoba, ke eena Moeta-pele oa rōna ’me o behile “lekhoba le tšepahalang le le masene”—e leng sehlopha sa Bakreste ba tlotsitsoeng ba lefatšeng—hore le hlokomele lintho tseo a li thahasellang lefatšeng.

5, 6. (a) Ponong eo moapostola Johanne a ileng a e bona, “liluloana tsa mabone tsa khauta tse supileng” le “linaleli tse supileng” li tšoantšetsa’ng? (b) Hore ebe “linaleli tse supileng” li ka letsohong le letona la Jesu ho bontša’ng?

⁵ Buka ea Bibele ea Tšenolo e bontša hore lekhoba le tšepahalang le le masene le laoloa ka ho toba ke Jesu Kreste. Ponong eo moapostola Johanne a ileng a e bona ea ‘letsatsi la Morena,’ o ile a bona “liluloana tsa mabone tsa khauta tse supileng, ’me har’a liluloana tsa mabone [a] bona e mong ea joaloka mor’a motho” ’me “ka letsohong la hae le letona o ne a e-na le linaleli tse supileng.” Ha Jesu a hlalosetsa Johanne pono ena o ile a re: “Ha e le sephiri se halalelang sa linaleli tse supileng tseo u li boneng letsohong la ka le letona, le sa liluloana tsa mabone tsa khauta tse supileng: Linaleli tse supileng li bolela mangeloi a liphutheho tse supileng, ’me liluloana tsa mabone tse supileng li bolela liphutheho tse supileng.”—Tšenolo 1:1, 10-20.

⁶ “Liluloana tsa mabone tsa khauta tse supileng” li tšoantšetsa liphutheho tsohle tsa ’nete tsa Bokreste tse leng teng “letsatsing la Morena,” le qalileng ka 1914. “Linaleli tse supileng” tsona li tšoantšetsa’ng? Qalong, li ne li tšoantšetsa balebeli bohle ba tlotsitsoeng ba tsoetsoeng ka moea ba neng ba hlokomela liphutheho tsa lekholong la pele la lilemo.a Balebeli ba ne ba le ka letsohong le letona la Jesu—tlas’a taolo le tataiso ea hae. E, Kreste Jesu o ne a etella pele lekhoba lena le entsoeng ka litho tse ngata. Leha ho le joalo, hona joale, balebeli ba tlotsitsoeng baa fokola ka palo. Boeta-pele ba Kreste bo fihla joang liphuthehong tse fetang 93 000 tsa Lipaki tsa Jehova tse lefatšeng lohle?

 7. (a) Jesu o sebelisa Sehlopha se Busang joang ho etella liphutheho pele lefatšeng lohle? (b) Ke hobane’ng ha ho ka thoe balebeli ba Bakreste ba khethoa ke moea o halalelang?

⁷ Joaloka lekholong la pele la lilemo, hona joale palo e nyenyane ea sehlopha sa banna ba tšoanelehang e tsoang har’a balebeli ba tlotsitsoeng e sebeletsa e le Sehlopha se Busang, se emelang lekhoba le tšepahalang le le masene le entsoeng ka litho tse ngata. Moeta-pele oa rōna o sebelisa Sehlopha sena se Busang ho khetha banna ba tšoanelehang—ebang ba tlotsitsoe ka moea kapa che—hore e be baholo liphuthehong. Ntlheng ena, moea o halalelang, oo Jehova a fileng Jesu matla a hore a o sebelise, o phetha karolo ea bohlokoa haholo. (Liketso 2:32, 33) Ntho ea pele, balebeli bana ba lokela ho finyella litlhokahalo tse boletsoeng ka Lentsoeng la Molimo, le ileng la bululeloa ka moea o halalelang. (1 Timothea 3:1-7; Tite 1:5-9; 2 Petrose 1:20, 21) Banna bana ba buelloa le ho khethoa ka mor’a hore ho etsoe thapelo le ka tataiso ea moea o halalelang. Ho phaella moo, batho ba khethoang ba bontša hore ba beha litholoana tsa moea oo. (Bagalata 5:22, 23) Joale, keletso ea Pauluse e sebetsa ka ho tšoana ho baholo bohle, ebang ke ba batlotsuoa kapa che: “Ikeleng hloko ’me le ele hloko le mohlape oohle, oo moea o halalelang o le behileng balebeli har’a oona.” (Liketso 20:28) Banna bana ba khethiloeng ba fumana tataiso e tsoang ho Sehlopha se Busang ’me ba lisa liphutheho ka boithaopo. Ka tsela ena, hona joale Kreste o na le rōna ’me ka matla o etella phutheho pele.

 8. Kreste o etella balateli ba hae pele ka mangeloi joang?

⁸ Jesu o boetse o sebelisa mangeloi a sebele ho etella pele balateli ba hae kajeno. Ho ea ka papiso ea koro le mofoka, nako ea kotulo e ne e tla tla “qetellong ea tsamaiso ea lintho.” Mong’a lekhoba o ne a tla sebelisa bo-mang hore ba kotule? Kreste o itse: “Bakotuli ke mangeloi.” O ile a phaella ka ho re: “Mor’a motho o tla romela mangeloi a hae, ’me a tla bokellela ka ntle ho ’muso oa hae lintho tsohle tse bakang ho khoptjoa le batho ba etsang tlōlo ea molao.” (Matheu 13:37-41) Ho feta moo, feela joalokaha lengeloi le ile la tataisa Filipi hore a fumane leqhalaha la Moethiopia, ho na le bopaki bo bongata kajeno ba hore Kreste o sebelisa mangeloi a hae ho tsamaisa mosebetsi oa Bakreste ba ’nete hore ba fumane batho ba lipelo li tšepahalang.—Liketso 8:26, 27; Tšenolo 14:6.

 9. (a) Kreste o sebelisa eng ho etella pele phutheho ea Bokreste kajeno? (b) Re lokela ho nahana ka potso efe haeba re batla ho rua molemo boeta-peleng ba Kreste?

⁹ Ho khothatsa hakaakang ho tseba hore kajeno Jesu Kreste o fa barutuoa ba hae ketello-pele ka Sehlopha se Busang, moea o halalelang le mangeloi! Esita le haeba barapeli ba bang ba Jehova ba ka arohanngoa le Sehlopha se Busang ka nakoana ka lebaka la mahloriso kapa la ntho e ’ngoe feela, Kreste o tla ’ne a ba etelle pele ka moea o halalelang le ka thuso ea mangeloi. Leha ho le joalo, re rua molemo boeta-peleng ba hae hafeela re bo amohela. Re ka bontša joang hore re amohela boeta-pele ba Kreste?

“Mamelang . . . le Ipehe Tlaase”

10. Re ka bontša tlhompho ho baholo ba khethiloeng ka phuthehong joang?

¹⁰ Moeta-pele oa rōna o file liphutheho “limpho tseo e leng banna”—“ba bang e le baevangeli, ba bang e le balisa le mesuoe.” (Baefese 4:8, 11, 12) Boitšoaro ba rōna le liketso tsa rōna malebana le bona li senola ka ho hlaka hore na re amohela boeta-pele ba Kreste kapa che. Ho loketse hore re ‘iponahatse re le ba lebohang’ banna bana ba tšoanelehang moeeng bao Kreste a faneng ka bona. (Bakolose 3:15) Hape hoa tšoaneleha hore re ba hlomphe. Moapostola Pauluse o ile a ngola a re: “Banna ba baholo ba okamelang ka tsela e ntle ba ke ba nkoe ba tšoaneloa ke tlhompho e habeli.” (1 Timothea 5:17) Re ka bontša joang hore re leboha le ho tlotla banna ba baholo—baholo, kapa balebeli—ka phuthehong? Pauluse o araba ka ho re: “Mamelang ba etellang pele har’a lōna ’me le ipehe tlaase.” (Baheberu 13:17) Ha ho pelaelo hore re lokela ho ba mamela le ho ipeha tlas’a bona, re ikokobeletse bona.

11. Ke hobane’ng ha ho hlompha tokisetso ea baholo e le pontšo ea ho phelela kolobetso ea rōna?

¹¹ Moeta-pele oa rōna o phethahetse. Banna bao a faneng ka bona e le limpho ha baa phethahala. Kahoo, ba ka ’na ba fosa ka linako tse ling. Leha ho le joalo, ke habohlokoa hore re lule re tšepahala tokisetsong ea Kreste. Ha e le hantle, ho phelela boinehelo ba rōna le kolobetso ea rōna ho bolela hore re amohela tokelo ea balaoli ba khethiloeng ke moea ka phuthehong le hore re utloisisa ho ipeha tlas’a bona. Ha re kolobetsoa ‘ka lebitso la moea o halalelang’ re bolela phatlalatsa hore rea tseba hore na moea o halalelang ke eng le hore re amohela karolo eo o e phethang mererong ea Jehova. (Matheu 28:19) Kolobetso eo e fana ka maikutlo a hore re sebelisana le moea ona ’me ha re etse letho le sitisang ho sebetsa ha oona har’a balateli ba Kreste. Kaha moea o halalelang o phetha karolo ea bohlokoa ha ho buelloa le ha ho khethoa baholo, na ka sebele re tla be re tšepahala boinehelong ba rōna haeba re sitoa ho sebelisana le tokisetso ea baholo ka phuthehong?

12. Juda o qotsa mehlala efe ea ho se hlomphe ba boholong, ’me e re ruta’ng?

¹² Mangolo a na le mehlala e re rutang bohlokoa ba ho mamela le ho ipeha tlaase. Ha morutuoa Juda a bua ka ba ileng ba bua hampe ka banna ba khethiloeng ka phuthehong, o ile a supa mehlala e meraro e lemosang, a re: “Ho malimabe bona, hobane ba tsamaile ka tsela ea Kaine, ’me ba mathetse tseleng e fosahetseng ea Balame bakeng sa moputso, ’me ba timetse puong ea borabele ea Kora!” (Juda 11) Kaine o ile a hlokomoloha keletso e lerato ea Jehova ’me ka boomo a phehella tsela ea lehloeo le bolaeang. (Genese 4:4-8) Ho sa tsotellehe hore Molimo o ile a mo lemosa ka ho pheta-pheta, Balame o ile a leka ho rohaka batho ba Molimo hore a fumane moputso oa chelete. (Numere 22:5-28, 32-34; Deuteronoma 23:5) Kora o ne a e-na le boemo bo hlomphehang Iseraele, empa o ne a sa khotsofala. O ile a hlohlelletsa batho hore ba fetohele Moshe, mohlanka oa Molimo, monna ea bonolo ka ho fetisisa lefatšeng. (Numere 12:3; 16:1-3, 32, 33) Kaine, Balame le Kora ba ile ba oeloa ke tlokotsi. Mehlala ee e re ruta ka ho hlakileng hakaakang hore re mamele keletso ea ba sebelisoang ke Jehova maemong a boikarabelo le hore re ba hlomphe!

13. Moprofeta Esaia o ile a bolela esale pele ka litlhohonolofatso life tsa ba ipehang tlas’a tokisetso ea baholo?

¹³ Ha ho motho ea ke keng a rata ho rua molemo tokisetsong e ntle ea bolebeli eo Moeta-pele oa rōna a e thehileng ka phuthehong ea Bokreste. Moprofeta Esaia o boletse litlhohonolofatso tsa eona esale pele, a re: “Bonang! Morena o tla busa ka ho loka; ha e le likhosana, li tla busa e le likhosana ka toka. E ’ngoe le e ’ngoe e tla ba sebaka sa ho ipatela moea le sebaka sa ho ipatela pula e nang ka sefefo, joaloka melapo ea metsi naheng e se nang metsi, joaloka moriti oa lefika le leholo naheng e phophothehileng.” (Esaia 32:1, 2) Moholo e mong le e mong e lokela ho ba “sebaka” se joalo sa tšireletso le polokeho. Esita le haeba re thatafalloa ke ho ipeha tlas’a balaoli, e se eka ka thapelo re ka ikitlaelletsa ho mamela le ho ipeha tlas’a bolaoli bo khethiloeng ke Molimo ka phuthehong.

Kamoo Baholo ba Ipehang Tlas’a Boeta-pele ba Kreste Kateng

14, 15. Ba etellang pele ka phuthehong ba bontša joang hore ba ikokobelletsa boeta-pele ba Kreste?

¹⁴ Mokreste e mong le e mong—haholo-holo baholo—o lokela ho latela boeta-pele ba Kreste. Balebeli, kapa baholo, ba na le matla a itseng ka phuthehong. Empa ha ba hahamalle ‘ho ba balaoli ba tumelo ea balumeli-’moho le bona’ ka ho leka ho laola bophelo ba bona. (2 Bakorinthe 1:24) Baholo ba ela hloko mantsoe a Jesu a reng: “Lea tseba hore babusi ba lichaba ba rena ka thata holim’a tsona le banna ba baholo ba sebelisa bolaoli holim’a tsona. Ha hoa lokela ho ba ka tsela ena har’a lōna.” (Matheu 20:25-27) Ha baholo ba ntse ba etsa mesebetsi ea bona, ba leka ka matla ho sebeletsa ba bang.

¹⁵ Bakreste ba phehelloa ka ho re: “Hopolang ba etellang pele har’a lōna, . . . ’me ha le ntse le nahanisisa kamoo boitšoaro ba bona bo fellang kateng le etsise tumelo ea bona.” (Baheberu 13:7) Bakreste ha ba phehelloe ho etsa sena hobane baholo e le baeta-pele. Jesu o itse: “Moeta-pele oa lōna o mong, Kreste.” (Matheu 23:10) Re lokela ho etsisa tumelo ea baholo kahobane ke baetsisi ba Kreste, eena Moeta-pele oa rōna oa sebele. (1 Bakorinthe 11:1) Nahana ka litsela tse ling tseo ka tsona baholo ba loanelang ho tšoana le Kreste kamanong ea bona le phutheho.

16. Ho sa tsotellehe matla ao Jesu a neng a e-na le ’ona, o ne a tšoara balateli ba hae joang?

¹⁶ Le hoja ka litsela tsohle Jesu a ne a phahametse batho ba sa phethahalang a bile a e-na le matla a fetisisang ao a a filoeng ke Ntat’ae, o ne a inyenyefatsa litšebelisanong tsa hae le barutuoa ba hae. O ne a sa tsietse bamameli ba hae ka ho ikhantša ka tsebo eo a nang le eona. Jesu o ne a bontša hore o utloisisa balateli ba hae ebile oa ba qenehela, a nahanela litlhoko tsa bona. (Matheu 15:32; 26:40, 41; Mareka 6:31) Ho ne ho se mohla a batlang hore barutuoa ba hae ba etse se fetang matla a bona, hape ho ne ho se mohla a ba imetsang. (Johanne 16:12) Jesu o ne a “le maikutlo a bonolo ’me [a] ikokobelitse pelong.” Kahoo, ha ho makatse hore ba bangata ba ne ba khatholoha ha ba e-na le eena.—Matheu 11:28-30.

17. Baholo ba lokela ho bontša boinyenyefatso bo kang ba Kreste joang kamanong ea bona le ba bang ka phuthehong?

¹⁷ Haeba Kreste Moeta-pele o ne a inyenyefatsa, ebe ba etellang pele ka phuthehong bona ba lokela ho inyenyefatsa hakaakang! E, ba seli hore ba se ke ba sebelisa hampe matla a behiloeng boikarabelong ba bona. Hape, ha ba ‘tle ka puo kapa bohlale bo feteletseng,’ ba leka ho khahla ba bang. (1 Bakorinthe 2:1, 2) Ho e-na le hoo, ba leka ho bua mantsoe a ’nete ea Mangolo ka bonolo le ka tieo. Ho feta moo, baholo ba leka ho sebelisa kahlolo e molemo ho seo ba se lebellang ho ba bang le ho nahanela litlhoko tsa bona. (Bafilipi 4:5) Kaha baa hlokomela hore e mong le e mong oa fokola, ka lerato ba nahanela bofokoli ba barab’abo bona. (1 Petrose 4:8) ’Me na baholo ba ikokobelitseng le ba maikutlo a bonolo ha ba khatholle e le kannete? Ho joalo ka sebele.

18. Baholo ba ka ithuta’ng tseleng eo Jesu a neng a tšoara bana ka eona?

¹⁸ Esita le batho ba maemo a tlaase ba ne ba atamela Jesu le ho buisana le eena. Nahana ka bohato boo a ileng a bo nka ha barutuoa ba hae ba khalemela batho ba neng ba “mo tlisetsa bana ba banyenyane.” O ile a re: “Tlohelang bana ba banyenyane ba tle ho ’na; le se ke la leka ho ba thibela. . . . Eaba o sika bana bao ’me o qala ho ba hlohonolofatsa, a ba beha matsoho.” (Mareka 10:13-16) Jesu o ne a le botsoalle a bile a le mosa, ’me ba bang ba ne ba atamela ho eena. Batho ba ne ba sa tšabe Jesu. Esita le bana ba ne ba phutholoha ho eena. Baholo le bona baa atameleha, ’me ha ba bontša mosa le kameho e mofuthu, batho ba bang—esita le bana—baa phutholoha ho bona.

19. Ho ba le “kelello ea Kreste” ho akarelletsa’ng, ’me see se hloka boiteko bofe?

¹⁹ Tekanyo eo baholo ba ka etsisang Kreste Jesu ka eona e itšetlehile ka hore na ba mo tseba hantle hakae. Pauluse o ile a botsa: “Ke mang ea tsebang kelello ea Jehova, e le hore a ka mo ruta?” Eaba o phaella ka ho re: “Empa re fela re e-na le kelello ea Kreste.” (1 Bakorinthe 2:16) Ho ba le kelello ea Kreste ho akarelletsa ho tseba mokhoa oa hae oa ho nahana le lintlha tsohle tsa botho ba hae e le hore re tsebe seo a ka se etsang boemong bo itseng. Nahana u se u tseba Moeta-pele oa rōna hantle hakaalo! Ha ho pelaelo hore sena se hloka hore re ele hloko ka ho fetisisa litlaleho tsa Likosepele le ho tlatsa likelello tsa rōna kamehla ka kutloisiso ea bophelo ba Jesu le mohlala oa hae. Ha baholo ba iteka ho latela boeta-pele ba Kreste ho fihlela ntlheng eo, litho tsa phutheho li tla ba le tšekamelo e eketsehileng ea ho etsisa tumelo ea bona. ’Me baholo ba khotsofalla ho bona ba bang ka thabo ba latela mehlaleng ea Moeta-pele.

Lula Tlas’a Boeta-pele ba Kreste

20, 21. Ha re habile pele lefatšeng le lecha le tšepisitsoeng, boikemisetso ba rōna e lokela ho ba bofe?

²⁰ Hoa hlokahala hore kaofela re lule tlas’a boeta-pele ba Kreste. Ha re atamela bofelo ba tsamaiso ena ea lintho, boemo ba rōna bo tšoana le ba Baiseraele Lehoatateng la Moabe ka 1473 B.C.E. Ba ne ba le haufi le ho kena Naheng e Tšepisitsoeng, eaba Molimo o re ka moprofeta Moshe: “[Uena Joshua,] u tla tlisa sechaba sena naheng eo Jehova a hlapanyelitseng baholo-holo ba sona hore o tla se fa eona.” (Deuteronoma 31:7, 8) Joshua e ne e le moeta-pele ea khethiloeng. E le hore Baiseraele ba kene Naheng e Tšepisitsoeng, ba ne ba lokela ho ipeha tlas’a boeta-pele ba Joshua.

²¹ Bibele e re ho rōna: “Moeta-pele oa lōna o mong, Kreste.” Ke Kreste feela ea tla re isa lefatšeng le lecha le tšepisitsoeng leo ho loka ho tla aha ho lona. (2 Petrose 3:13) Ka lebaka leo, a re ikemisetseng ho ipeha tlas’a boeta-pele ba hae maemong ’ohle a bophelo.

[Mongolo o botlaaseng ba leqephe]

Na Ua Hopola?

• Kreste o ile a etella pele phutheho ea pele joang?

• Kreste o etella phutheho ea hae pele joang kajeno?

• Ke hobane’ng ha re lokela ho ipeha tlas’a ba etellang pele ka phuthehong?

• Baholo ba ka bontša ka litsela life hore Kreste ke Moeta-pele oa bona?

[Setšoantšo se leqepheng la 15]

Kreste o etella pele phutheho ea hae ’me o tšoere balebeli ka letsohong la hae le letona

[Setšoantšo se leqepheng la 16]

“Mamelang ba etellang pele har’a lōna ’me le ipehe tlaase”

[Setšoantšo se leqepheng la 18]

Jesu o ne a le botsoalle a bile a atameleha. Baholo ba Bakreste ba leka ho tšoana le eena